Sigga-paran nga Nisakrifisioda i Baggida—ta Turkey
DAKAL i nisakrifisio na ollu-siglo ira nga Cristiano tapenu iyadde i “Mapia nga Dumug na Pammaguray na Dios” ta mas aru nga totolay adde ta posible. (Mat. 24:14) Egga gapa danuri nagali ta tanakuan nga nasion. Angngariganna, si apostol Pablo ay minay ta rehion nga dian na moderno-aggaw nga Turkey anna alalawa i sakup na nilayyagayyanna tatun durante ta pammisionerona. * Ma-2,000 dagun i nappasa, turi 2014, nabbalin mangana nga fokus na espesial nga kampania na pallayyagayya i Turkey. Ngatta naorganisa yatun? Sinni i nakipartisipa?
“ANNI NGA GULU YAW?”
Maturu tu 2,800 i publisher ta Turkey, ngem i populasionna yatun nga nasion ay 79 million. Kayàna kagian nga i ratio na publisher ta populasion ay maggi 1 ta kada 28,000. Gitta na ekspektammu, baddi paga laman nga residente tatun nga nasion i nakauvovug ngana na publisher ira. Gakkag na espesial nga kampania ta pallayyagayya nga maddetan i mas aru nga totolay adde ta posible ta ababba nga tiempo. Egga ma-550 nga maguvovug tu Turkish nga brother anna sister nga naggafu ta tanakuan nga nasion i minay ta Turkey tapus nevulu nga mallayyagayya ta lokal ira nga publisher durante ta kampania. Anni i resultana?
Dakal nga pamakurug i neyawa. Nitura na tadday nga kongregasion ta Istanbul: “Turi ta nasingakkami na totolay, iyavuda: ‘Egga kari espesial nga kombension taw? Napakaru i Saksi ni Jehova maski sitaw!’” Kunna gapa na tadday nga kongregasion ta siudad na Izmir: “Egga tadday nga lalaki nga mattrabahu ta terminal na taxi i minaranni ta tadday nga elder anna niyavuna, ‘Anni nga gulu yaw? Ngatta kitakkaru kamu?’” Kurug nga napansidda i kampania.
Steffen
Talaga nagenjoy i dayu ira nga publisher ta pallayyagayya. Kinagi ni Steffen nga naggafu ta Denmark: “Kadaggaw, malayyagayyakku i totolay nga ari paga nakaginna meyannung kani Jehova. Natageno ku nga talaga meyammammù i ngagan ni Jehova.” Kunna paga ni Jean-David nga naggafu ta France: “Aru nga oras i nofumi ta tadday laman nga kalye. Kappagayaya yatun! Magaru nira i ari makannammu ta Saksi ira ni Jehova. Maggi ta kada balay, egga makayuvovugmi, mepagiraw i tadday ta video tam ira, anna makepalima kami tu literatura ta makabbalay.”
Jean-David (tangnga)
Nakepalima tu ma-60,000 nga literatura i 550 nga nakipartisipa ta unag laman na dua nga ligguan! Firmi nga alalawa nga pamakurug i resultana yatun nga kampania.
Ziminakal i talikarag ta ministerio. Napagaram i lokal ira nga brother megafu tatun nga espesial nga kampania. Aru i napplano nga masserbi ta ngamin-tiempo. Kakuruganna, ziminakal i bilang na regular payunir ira ta Turkey tu 24 porsiento ta tumunug nga 12 vulan kabalin na kampania.
Şirin
Kagian na dayu ira nga publisher nu kunnasi nafektan i ministerioda maski turi ta nanoli ngana ira ta nasiodda. Nitura ni Şirin, sister nga naggafu ta Germany: “Alistu laman para ta brother ira ta Turkey i ma-informal witnessing. Mappasirannà nu mallayyagayya tu informal. Pia ngana laman ta egga i espesial nga kampania, i ehemplo na lokal ira nga wawwaragi, anna aru nga pakimallo, nawayyà nga kuan i ariakku makua dati. Makalayyagayya ngà ngana anna makepalima tu tract ira ta subway! Ariakku ngana mappasiran.”
Johannes
“Egga ira nagigiammù para ta ministeriò,” kunni Johannes nga naggafu ta Germany. “Kakayà na wawwaragi ta Turkey nga ibillay i kinakurug ta aru nga totolay adde ta posible. Mamakurug ira kada egga tiansa. Kunnatun gapa i planò nga kuan turi ta panolì ta Germany. Tapus talaga mas aru ngana nga tolay i malayyagayyakku anne tagga.”
Zeynep
“Daka-dakal i efekto na kampania ta ministeriò. Noffunannà nga mabbalin tu magutu anna mas mattalo paga kani Jehova,” kunni Zeynep nga naggafu ta France.
Mas naddukko i wawwaragi ta kataggi-tadday. Ari vuluvuga makattamman i aya anna pattaradday na wawwaragi na nadduruma nga nasion. “Nasissimammi i pamadulo na wawwaragi,” kunni Jean-David, nga nakagi ta gafu. Kunna paga: “Inakseptada kami nga kagitta na kofudda ira anna parte na familiada. Inalawada kami ta gibbalayadda. Ammù nga internasional i pawwaragimi; kadabes ku ngana nga mabibbig yatun ta literatura tam. Ngem sangaw, maekspiriensà ngana mismu. Mas proud ngà ngana nga tadday ngà ta aripan ni Jehova, anna mappabalo ngà sa taw nga makakkasta nga pribilehio.”
Claire (tangnga)
“Maski nu ta Denmark, France, Germany, onu Turkey i naggafuammi, gittami ngamin i tattadday nga familia. Gittana vinurran na Dios i boundary na nasa-nasion gukaban na dakal nga eraser,” kunni Claire nga naggafu ta France.
Stéphanie (tangnga)
Kunna paga ni Stéphanie nga naggafu ta France: “Sinudduan nakami na espesial nga kampania nga i mamattaradday nittam ay ari tu i kultura onu lengguahe, nu ari, i parehu nga aya tam kani Jehova.”
MANNANAYUN I BENEFISIONA IRA
Aru ta dayu ira nga publisher i napplano nga magali ngana ta Turkey tapenu manguffun ta dakal paga nga trabahu tatun. Egga ngana ira i nagali. Kuruga maappresia yaw ira nga need-greater onu masserbi ta mas dakal i pakawaganna.
Innan i tadday nga angngarigan na nesissinna nga grupo na 25 nga publisher. Aru nga dagun nga tattadday laman i elder. Nonopan i pagayaya na publisher ira turi 2015, egga annam nga need-greater nga naggafu ta Germany anna ta Netherlands i nagali tapenu suportan ira!
PASSERBI NU SITAW DAKAL I PAKAWAGAN
Anni i makagi na need-greater ira nga maddian ngana ta Turkey meyannung ta pattoleda tatun? Siempre, egga ira i tiempo nga mariga, ngem kuruga makapagayaya i pattoleda. Ikonsidera i kagian na karuan:
Federico
“Megafu ta baddi laman i material nga pakkukuà, mas egga lallagurè, anna mas makapaffokus ngà ta pinaka-importante nga ganna-gannug,” kunni Federico, sigga-atawan nga brother nga maturu tu 40 anios nga naggafu ta Spain. Irekomendana kari yaw nga klase na passerbi? “Wan, siempre!” kunna. “Nu magali ka ta tanakuan nga nasion nga gakkag mu nga manguffun tapenu kannammuan na totolay si Jehova, ta kakuruganna italo mu i baggim ta limana. Talaga matageno mu i panangngal ni Jehova anne ta dati.”
Rudy
“Kuruga makakontentu i masserbi ta dakal i pakawagan, anna ikagi i kinakurug ta napakaru nga totolay nga ari paga nakaginna tatun,” kagian ni Rudy, sigga-atawan nga brother nga magedad tu maturu 50 anios nga naggafu ta Netherlands.
“Kegafuan na dakal nga pagayaya i pakasingan ta pagayaya na totolay nu alawatadda i kinakurug.”Sascha
Kagian ni Sascha, sigga-atawan nga brother nga maturu tu 40 anios nga naggafu ta Germany: “Kada egga ngà ta ministerio, makayuvovug ku danuri ollu paga laman nga makaginna ta kinakurug. Magaya-ayaya ngà nga iddan i kunnatun ira tu oportunidad nga makilala si Jehova.”
Atsuko
Kunni Atsuko, nga sigga-atawan nga sister nga maturu tu 30 anios nga naggafu ta Japan: “Dati, kakayà ku nga duttal ngana nakuan i Armagedon. Ngem turi nagali kami ta Turkey, mappabalo ngà kani Jehova nga mappasa-pasensia paga yaya. Kada masingakku nu kunnasi nga igiggiya ni Jehova i pallayyagayya, mas karagatakku nga maddukko sa.”
Kinomento ni Alisa, sister nga maturu tu 30 anios nga naggafu ta Russia: “Nasissimakku i ngamin nga pia ni Jehova ta passerbi sa ta kunnaw nga klase na ministerio.” (Sal. 34:8) Kunna paga: “Ari laman tu Yamà si Jehova, nu ari, madukko paga nga Kofukku, nga mas nammammù megafu ta nadduruma nga sirkumstansia. Aru ira i magayaya nga nesimmu ta pattolè, makakkasta ira nga ekspiriensa, anna napakaru nga bendision!”
“INNAN NU TU MAPIA I KOMAN IRA”
Gukaban na espesial nga kampania na pallayyagayya ta Turkey, nadde na mapia nga dumug i mas aru nga totolay. Ngem egga paga teritoria ira nga ari naddetan. Kada aggaw, makayuvovug na need-greater ira nga nagali ta Turkey danuri ari paga vuluvuga nakannammu kani Jehova. Kayà mu kari i masserbi ta kunnatun nga teritoria? Nu wan, mapagaram ka: “Innan nu ta mapia i koman ira. Tiempo ngana na aggagatag!” (Juan 4:35) Makoffun ka kari ta tadday nga parte na mundo nu sitaw “tiempo ngana na aggagatag onu paggapas”? Nu wan, pegafuanammu ngana i praktikal ira nga dakkua nga mangiyadde nikaw tatun nga goal. Tadday nga gannug i siguradu: Nu mas dakal i billem ta pangiwara tu mapia nga dumug “adde ta ngamin nga tuppu-tuppag na davvun,” marresulta yatun nikaw tu aru nga bendision nga awan tu katumbasna!—King. 1:8.
^ par. 2 Innan i brosiur nga “Tingnan Mo ang Mabuting Lupain,” p. 32-33.