1. Ngatta mepangngo nga tagikuan ni Jehova i ngamin? (Innan i letratu ta gafu na artikulo.)

KUKUA ni Jehova i ngamin! Kukuana “i langa-langi, maski i langa-langi na langi ira, anna i davvun tuange ta ngamin nga egga tatun.” (Deut. 10:14; Nep. 4:11) Yatutta i mismu nga nikeparatu na totolay i mamakurug nu ngatta kukua ira ngamin ni Jehova. (Sal. 100:3) Ngem ta interu historia na tolay, namili i Dios tu espesipiko nga grupo na totolay nga espesial nga tagikuanna.

2. Sinni danuri i tinukoy na Biblia nga espesial nga sinagikua ni Jehova?

² Angngariganna, mabibbig ta Salmo 135 nga i matalo ira nga maddayaw kani Jehova ta Israel gari ay kunna “kukua na.” (Sal. 135:4) Neprofesiya gapa ta libru na Oseas nga mabbalin tu totolay ni Jehova i karuan nga ari nga Israelita. (Os. 2:23) Natuppal i profesiya ni Oseas turi ta nilagum ni Jehova i ari-Judio ta pappilina tu mappange ira nga makipammaguray kani Cristo. (King. 10:45; Roma 9:23-26) Yaw nga “masanto nga nasion” ay espesial nga “sinagikua na Dios,” megafu ta i miembrona ira ay nazelugan tu masanto nga espiritu anna napili nga mattolay ta langi. (1 Ped. 2:9, 10) Kunnasi gapa danuri magaru nga matalo nga Cristiano ira ta maddaggun nga neravvunan i iddanamada? Agalan gapa ira ni Jehova nga “ilì” anna i “napilì ira.”​—Isa. 65:22.

3. (a) Sinni danuri napeggan tu espesial nga relasion kani Jehova ta maddaggun? (b) Anni i ikonsidera tam taw nga artikulo?

 ³ Ta maddaggun, i “pigi-piga laman,” nga napeggan tu nelangitan nga iddanama, anna ‘i karneru ira nga awan taw nga kural,’ nga neravvunan i iddanamada, ay mabbuu tu “tattadday nga kural” nga talaga tagikuan ni Jehova nga totolena. (Luc. 12:32; Juan 10:16) Siguradu nga kayà tam ipasingan i monag nga appresasiottam kani Jehova ta pangiyawana nittam tu espesial nga relasion sa. Ikonsidera naw nga artikulo i nadduruma nga makua tam tapenu mepasingan i appabalo tam ta pinangiyawa ni Jehova nittam tu espesial nga pangikakua.

4. Kunnasi tam mepasingan i appresasiottam kani Jehova ta pinangipamavulunna nga mapeggattam tu relasion sa? Kunnasi gapa kingngua ni Jesus yatun?

⁴ Mepasingattam i appresasiottam kani Jehova nu interu-futu nga idedika tam i baggi tam sa. Gukaban na pappabawtiso ta danum, formal anna publiko nga anugutattam nga kukua ittam ni Jehova anna sigga-paran nga makimoray ittam sa. (Heb. 12:9) Kunnatun gapa i kingngua ni Jesus ta kabawtisona, nga gittana kakkagianna kani Jehova: “Pagayaya ku [onu, karagatakku] nga kuan i urem, Dios ku!” (Sal. 40:7, 8) Nipresenta ni Jesus i baggina nga kuan i uray ni Jehova, maski paga namegafu ta nikeyanana ay parte ngana yayya na nasion nga dedikadu ta Dios.

5, 6. (a) Anni i kinagi ni Jehova turi ta nabawtisowan si Jesus? (b) Iyilustra nu ngatta appresian ni Jehova i dedikasiottam maski paga kukuana i ngamin.

⁵ Anni i natageno ni Jehova ta bawtismo ni Jesus? Mabibbig ta Biblia: “Ta paggafu ni Jesus ta danum ta kabalin na nga nabawtisowan, navvuka i langi anna nasingan na i Espiritu na Dios nga minulug nga kagitta na paloma nga nattun sa. Ay egga i ngaral nga naggafu ta langi nga nakkagi, ‘Yaw i ideddukak-ku nga Ana ku nga kuruga makapagayaya niakan!’” (Mat. 3:16, 17) Maski paga dati nga kukua ni Jehova si Jesus, magayayya lagapa i nelangitan nga Yamana nga masingan i Anana nga sigga-paran nga ituppal tu interamente i urena. Magayayya gapa si Jehova nga alawatan i dedikasiottam, anna ikakuana ittam gukaban na pamendisionna.​—Sal. 149:4.

⁶ Tapenu iyilustra, nonopan nga nammula tu makkarasta nga maseta i tadday nga yama ta laguertana. Tadday aggaw nanga i abbinna nga babay tu tadday nga lappaw tatun ira tapus niregaluna sa. Ari kari nga kukua mabba natun nga yama i lappaw? Ngatta pagalaman gafu nga iddanna i yamana? Magga ari nga kunnatun i nonopan na tadday nga meddu nga yama. Lallagu, magayayya nga akseptanna yatun nga regalu nga pamakurug ta aya na anana sa. Siguradu nga mas tagibaloranna yatun nga tadday nga lappaw nga niyawa na anana anne ta ngamin nga lappaw ta laguertana. Magayayya gapa si Jehova nu sigga-parattam nga iyawa sa i eksklusibo nga debosiottam.​—Ex. 34:14.

7. Kunnasi nipasingan ni Malakias i matageno ni Jehova turi ira ta sigga-paran nga masserbi sa?

⁷ Bibbigan i Malakias 3:16. Nu ari ka paga nga dedikadu anna bawtisadu, ikonsidera i importansia natun nga dakkua. Fustu nga namegafu ta nikeyana mu, kukua naka ni Jehova tuange ta ngamin nga totolay. Ngem, daddamman nu kunnasim nga kuruga mapagayayya si Jehova nu idedikam i baggim anna kuammu i urena megafu ta rekunnisiammu i soberaniana. (Prov. 23:15) Ammu gapa ni Jehova nu sinni danuri sigga-paran nga masserbi sa, anna iturana i ngagadda ta ‘libru na panakkilalanna.’

8, 9. Anni i ikiddaw ni Jehova tapenu mattalupaddian i ngagattam ta ‘libru na panakkilalanna’?

 ⁸ Egga i obligasion ira nga nelagum nu kayà tam nga mattalupaddian i ngagattam ta “libru na panakkilalan” ni Jehova. Espesipiko nga nitura ni Malakias nga mawag tam nga ‘maganassing kani Jehova anna monag nga nonopan i ngaganna.’ Nu dayawattam i maski sinni onu maski anni, mavurra i ngagattam ta figuratibo nga libru na inango ni Jehova.​—Ex. 32:33; Sal. 69:28.

⁹ Yatutta, i dedikasiottam kani Jehova ay ari laman nga promesa nga kuan i urena tapus mappabawtiso. Mittattam laman nga kuan danaw ngem i paddayaw tam kani Jehova ay istilo na pattolay. Kadaggaw gafu, adde ta matolay ittam, pakurugan nakuan na agguyu-guyu tam nga parulattattam si Jehova.​—1 Ped. 4:1, 2.

10. Anni nakuan i manawag nga nadduman danuri massesserbi kani Jehova anna danuri ari massesserbi sa?

¹⁰ Nikonsidera na nappasa nga artikulo i rekord na Biblia kada Cain, Solomon, anna na Israelita ira. Kakkagiadda nga maddayaw ira kani Jehova, ngem ari mabba nga eksklusibo i debosiodda sa. Manawag taw ira nga ehemplo nga danuri kurug nga kukua ni Jehova ay mawag nga ipafutuda i mapia anna pallikuradda i marakay. (Roma 12:9) Kabalin nga tinukoy ni Malakias i “libru na panakkilalan,” kinagi ni Jehova i ‘pakkaduman na matunung nga tolay anna na marake nga tolay, na massesserbi ta Dios anna na ari tu massesserbi sa.’​—Mal. 3:18.

11. Ngatta manawag nakuan ta tanakuan nga eksklusibo i debosiottam kani Jehova?

¹¹ Yaw paga gafu i tadday nga makua tam tapenu mepasingattam i appresasiottam kani Jehova ta pappilina nittam nga totolena. Mawag nga “masingan na ngamin” i approgreso tam ta espiritual. (1 Tim. 4:15; Mat. 5:16) Iyavu ta baggim: ‘Manawag kari ta tanakuan nga si Jehova laman i matalo nga panigakku? Ariakku kari ipasiran nga ipakilala i baggì nga Saksi ni Jehova?’ Siguradu nga maraddam si Jehova nu kabalin nga pinilina ittam kuenta totolena, ipasirattam nga ipakannammu ta tanakuan nga sittam  ay kukuana.​—Sal. 119:46; bibbigan i Marcos 8:38.

12, 13. Kunnasi nga pinariga na karuan nga makilala ira nga tadday nga Saksi ni Jehova?

¹² Kaddaraddam nga ari mepasingan na karuan i nadduman “na tadday nga massesserbi ta Dios anna na tadday nga ari tu massesserbi sa” megafu ta pamarigda ta “espiritu na mundo.” (1 Cor. 2:12) Yatun i espiritu nga manginfluwensia ta “negagangay nga karagatan na baggi.” (Efe. 2:3) Angngariganna, maski nu napakaru ngana nga tabarang i neyawa meyannung ta istilo na assissinnun anna itsura, aru lagapa i mappili tu ari nga disente. Mangiyusa ira tu sinnun nga pitis anna masingi-singan i ari mepangngo nga parte na baggi, maski ta study onu asembli ira. Paparigadda i gappo onu istilo na vù nga uso ta mundo. (1 Tim. 2:9, 10) Megafu tatun, marigatan i tanakuan nga makilala nu tadday ira nga Saksi ni Jehova onu ari.​—Sant. 4:4.

¹³ Nu karuan gapa, egga ira i Saksi nga ariadda interamente nga panakitan i makamundo nga kondukta. Ari mepangngo ta Cristiano ira i pattatala anna agguyu-guyuda ta selebrasion ira. Mangi-post ira tu letratuda anna makkomento ira ta social media tu ari mepappangngo para ta nespirituan nga tolay. Awayyana nga ari mabba ira nga madisiplina ta Cristiano nga kongregasion megafu ta serioso nga liwa, ngem puede nga marake i influwensiada ta kakavvuluda nga mappuppursigi nga meruma ta mundo.​—Bibbigan i 1 Pedro 2:11, 12.

14. Anni nakuan i kuattam tapenu protektan i espesial nga pakikofuttam kani Jehova?

¹⁴ Agresibo nga ipagaram na mundo i “karagatan na baggi, ganna-gannug ira nga makatenta ta mata, anna ngamin nga pappara-parayag na tolay.” (1 Juan 2:16) Ngem, megafu ta kukua ittam ni Jehova, natabarangngan ittam nga “pallikurat-tam i attolay nga ari nga mekunnay ta Dios, tuange ta pakkaraga ta neravvunan ira nga ganna-gannug, ay tu mattolay ittam toye ta utun na davvun nga matangngallat-tam i ginnonopat-tam, matunung ittam anna mekunnay ta Dios.” (Tito 2:12) I paguvovug tam, pakkakan anna paginum, i assissinnun anna itsura tam, i disiplina tam ta trabahu​—ngamin nga kuattam​—ay mamakurug nakuan  ta tanakuan nga eksklusibo i debosiottam kani Jehova.​—Bibbigan i 1 Corinto 10:31, 32.

15. Ngatta masippo anna meddu nakuan i pattratu tam ta wawwaragi tam?

¹⁵ Ipasingan na pattratu tam ta kapangngurug i appresasiottam ta espesial nga pakikofuttam kani Jehova. Kukua gapa ira ni Jehova. Nu sigga-nono ittam tatun, kanayun nga masippo anna meddu i pattratu tam ta wawwaragi tam. (1 Tes. 5:15) Kinagi ni Jesus ta disipulosna: “Nu egga nikamu i pakka-aya-aya, kannammuan ngamin na totolay tu disipulo takamu.”​—Juan 13:35.

16. Anni i kagian na Mosaiko nga Dob nga mangipasingan ta matageno ni Jehova ta totolena?

¹⁶ Tapenu iyilustra nu kunnasi tam nakuan nga tratuan i kataggi-tadday ta kongregasion, ikonsidera i tumunug. I gamit ira ta templo ni Jehova ay nededika, onu nesina, para laman ta marenu nga paddayaw. Mabibbig ta Mosaiko nga Dob i detalye nu kunnasi tangngallan danatun nga gamit, anna mapatay danuri ari mattuppal tatun. (Num. 1:50, 51) Nu fermi nga pinrotektan ni Jehova i awan tu inangona ira nga gamit para ta passerbi sa, yammanno paga nga protektanna i dedikadu ira nga matalo nga aripanna nga sinagikuana! Kunni Jehova ta totolena: “Ta sinni laman nga manukkal nikamu ay manukkal ta vukal na matà.”​—Zac. 2:8.

17. Anni i ammu ni Jehova?

¹⁷ Kinagi ni Malakias nga “kanayun nga iyawa ni Jehova i atensionna anna maggigginna yayya” durante nga makillivu-livu i totolena ta kataggi-tadday. (Mal. 3:16) Manawag nga “ammu [ni Jehova] nu sinni i totolay na ira.” (2 Tim. 2:19) Ariattam metagu sa i kada kuan onu kagiattam. (Heb. 4:13) Nu ari ittam nga masippo ta kapangngurug, ammu ni Jehova yatun. Nu minammisita, minangngiyawa, minammakoma, anna masippo ittam ta kataggi-tadday, makasiguradu ittam nga ammu gapa yatun ni Jehova.​—Heb. 13:16; 1 Ped. 4:8, 9.

18. Kunnasi tam mepasingan i appresasiottam ta pattagikua ni Jehova nittam?

¹⁸ Siguradu nga kakayà tam ipasingan i appresasiottam kani Jehova megafu ta sinagikuana ittam. Masingattam i sirib ta paganugu tam nga kukuana ittam gukaban na boluntariu nga pangidedika ta baggi tam sa. Maski mattolay ittam paga ta “mundo nga napannu ta kitaddake anna minattagaruli ira nga totolay,” kayà tam nga masingan na totolay nga ‘awan vuluvuga tu kapaliwatan anna kamanchattam; nawagattam ira kunna biti-bitun nga dumallangarang ta langi.’ (Fil. 2:15) Determinadu ittam nga kontran i kinarake. (Sant. 4:7) Iddukan anna irespeto tam nakuan i kapangngurug tam, nga rekunnisian nga kukua gapa ira ni Jehova.​—Roma 12:10.

19. Kunnasi bendisionan ni Jehova danuri kukuana?

¹⁹ Nipromesa na Biblia: “I YAFU ay arian na nga pallikuran i totolay na.” (Sal. 94:14) Yaw i maladda nga garantiya maski anni paga nga problema i meparubang nittam. Maski paga i patay ay ari nga mangigungay nittam ta aya ni Jehova. (Roma 8:38, 39) “Nu matolay ittam, matolay ittam para ta Yafu, ay nu matay ittam, matay ittam gapa para ta Yafu.” (Roma 14:8) Yatutta talaga iinnaggattam i tiempo sonu paginnolayan ni Jehova i ngamin nga matalo nga kokkofunna nga natay. (Mat. 22:32) Maekspiriensa tam maski ta maddaggun i aru nga bendision. Gitta na mabibbig ta Biblia, “mapalag i nasion nga [si Jehova] i YAFU na; mapalag danuri i pinili na tu totolay na!”​—Sal. 33:12.