Kultiban i Pangikallo ta ‘Ngamin nga Totolay’
TURI ta sinudduan ni Jesus i disipulosna nu kunnasi ilayyagayya i mapia nga dumug na Pappatulan, nirekunnisina nga ari tu kanayun nga alawatan na totolay yatun. (Luc. 10:3, 5, 6) Ta ministerio tam, baka makasimmu ittam tu karuan nga marake i pangalawada onu vayolente paga. Siempre nu kunnatun i reaksiodda, marigatattam nga pattalupaddianan i pangikallo turi ira ta layyagayyattam.
I minangngikallo nga tolay ay masinganna i pakawagan anna i problema na tanakuan, makisimpatia nira, anna kayàna nga manguffun. Nu mawawattam i pangikallo tam ta totolay ta ministerio, mamegafu gapa nga mawawattam i talikarag anna i lappo tam. Ngem nu kultibattam i pangikallo, gittana sosopattam i afi—nga mamagganga ta talikarag tam ta ministerio!—1 Tes. 5:19.
Kunnasi tam kultiban i pangikallo maski nu mariga yatun? Ikonsidera tam i tallu nga makasta nga ammarigan—i ehemplo ni Jehova, ni Jesus, anni apostol Pablo.
PARIGAN I PANGIKALLO NI JEHOVA
Rinivu nga dagun nga inattamman ni Jehova i kepasiranan na ngaganna. Ngem, “minaggallallo yaya maski ta totolay nga ari makannammu nga mabbala-balo sa tuange ta marakay ira.” (Luc. 6:35) Nepasingan i kinasippona ta appasa-pasensiana. Karagatan ni Jehova nga mapaliag “ngamin i totolay.” (1 Tim. 2:3, 4) Maski nu kala-kalussaw na Dios i kinamarake, imammatanna lagapa i totolay nga nabalor anna arianna kayà nga egga i maski sinni nga matay.—2 Ped. 3:9.
Ammu ni Jehova nu kunnasi nga efektibo nga sinakkabban ni Satanas i ginnonopan na totolay nga ari mangurug. (2 Cor. 4:3, 4) Aru i natudduan tu ugo nga tuddu meyannung ta Dios namegafu ta kabbidda, yari tu mariga para nira nga alawatan i kinakurug. Kakayà ni Jehova nga tudduan danatun. Kunnasi tam nammuan?
Ikonsidera i pagimamma ni Jehova ta Ninevita ira gari. Maski vayolente ira, kunni Jehova kani Jonas: “Ariakku kari gapa nga ikallo i Nineve nga dakal nga siudad, nga egga i maturu tu 120,000 nga totolena nga ariadda vuluvuga ammu i nadduman na fustu ta ugo, kunne na gapa ta napakaru nga aya-ayamda?” (Jon. 4:11) Minammatan ni Jehova i Ninevita ira nga kakkabbi ta espiritual, yari tu sigga-allo nga zinogna si Jonas nga abisowan ira.
Kagitta ni Jehova, imammatattam nakuan nga nabalor i totolay. Maparigattam yayya nu kakayà tam nga uffunan i maski sinni, maski nu gittana awan tu interesna.
PARIGAN I PANGIKALLO NI JESUS
Gittana Yamana, nikallo ni Jesus danuri totolay nga magawag ta espiritual. “Ta pakasingan na ta magaru nga totolay, ziminatu i allo na nira megafu ta mavuru-vurung ira anna awan tu awa-awayya da. Kagitta da i karneru ira nga napagurayan.” (Mat. 9:36) Nasingan ni Jesus i kononaggan na futuda; nirekunnisina nga danuri minaranni sa ay natudduan tu falsu ira nga tuddu anna pinagurayan na relihioso ira nga liderda. Maski paga ammu ni Jesus nga aru i makefugag nira ta pagginnada sa, ay tu “aru” lagapa i nitudduna nira.—Mar. 4:1-9.
Kammu madismaya nu awan tu interes na tolay ta gafu
Manguli i situasion na pattolay, kunne na ta pangalawa na totolay ta kinakurug
Nu ari tu makasta i pangalawa na totolay ta mensahe tam, mawag nga ammuattam i interu nga situasiodda anna iyavu ta baggi tam nu ngatta kunnatun ira. Awayyana nga negatibo i reaksion na karuan ta Biblia onu ta Cristianismo megafu ta marake nga annangngua danuri makkagi nga Cristiano ira. Awayyana nga egga i nakkagi ta karuan tu kinaladdug ira meyannung ta pangurug tam. Baka i karuan ay uyu-uyawan na totolay onu miembro mismu na familiada nu alawatadda yatun.
I karuan gapa nga marake i pangalawada nittam ay megafu ta kaddaraddam (trauma) nga naekspiriensada nga talaga nakafekto nira. Kunna misionera nga si Kim: “Ta karuan nga parte na teritoriami, aru i biktima na gerra nu sitaw nawawadda i ngamin nga pakkukuada ira. Talaga awan tu kurug nga iddanamada ta mappange. Nadismaya ira anna marigatan ira nga mattiwala. Taw nga lugar, regular kami nga makasimmu tu mangontra ta mensahe tam. Mittan, inatakedà durante nga mallayyagayya ngà.”
Kunnasi napattalupaddian ni Kim i pangikallona maski ta kunnatun nga pattratu? Kunna: “Nu abusuaddà, kanayukku nonopan i Proverbio 19:11, nga kunna: ‘I pakalippawa na tolay ay kurug tu makapagannano ta porayna.’ I pannono ta nesimmu ira ta totolay ta teritoriami i nakoffun niakan tapenu kultiban i pangikallo nira. Ari gapa tu maporay i ngamin nga masimmuammi. Tatun nga lugar, egga ira i makakkasta nga passinolimi.”
Awayyana nga iyavu tam ta baggi tam, ‘Anni i reaksiokku ta mensahe na Pappatulan nu sakan i egga ta lugar danuri layyagayyattam?’ Angngariganna, kunnasi nu kanayun nga egga i makkagi nittam tu kinaladdug ira meyannung ta Saksi ira ni Jehova? Tatun ira nga situasion, baka negatibo gapa i reaksiottam anna mawag tam gapa i pangikallo. Nu daddammattam i bilin ni Jesus nga tratuattam i tanakuan ta kayà tam nga pattratuda nittam, mapaguyu ittam nga maki-empatia maski nu mariga nga kuan yatun.—Mat. 7:12.
PARIGAN I PANGIKALLO NI PABLO
Nangipasingan si apostol Pablo tu pangikallo maski ta vayolente ira nga mangokkontra. Ngatta? Kanna nattaman i mismu nga nappasanna. Kunna: “Maski paga nu naguvovug ngà gari ta kontra sa, zinara-darum ku, anna pinasa-pasiranak-ku yaya. Ngem nu kunnuri paga, nikallo nà na Dios ta ariak-ku nga ammu i kikkingnguà turi ta ari ngà paga nga mangurug sa.” (1 Tim. 1:13) Nirekunnisina nga nangipasingan si Jehova anni Jesus tu dakal nga allo sa. Yayya nga masinganna i dati nga pattolena ta karuan nga layyagayyanna.
Egga ira i tiempo nga neparubang si Pablo turi ira ta aralam i nikegamuda ta falsu ira nga tuddu. Anni i kingnguana? Mabibbig ta Kingngua 17:16 nga ta kegga ni Pablo ta Atenas, “nasingan na ta siudad i napakaru nga sinan-dios. Ay nalluag i daga na megafu taw.” Ngem inusa lagapa ni Pablo yatun nga gannug tapenu makapallayyagayya tu mapia. (King. 17:22, 23) Nibagayna i metodo na pallayyagayyana ta nadduruma nga naggafuan na totolay tapenu ‘mapaliagna i karuan nira ta adde na awayyana.’—1 Cor. 9:20-23.
Maparigattam si Pablo gukaban na pangammu ta negatibo nga ugu-ugali onu kuru-kurugan danuri masimmuattam tapus mataktika nga pangilayyagayya ta “mapia nga dumug na gannug nga mas makasta.” (Isa. 52:7) Kunni sister Dorothy: “Ta teritoriami, aru i natudduan nga maporay anna insigida nga mangukum i Dios. Komendakku danatun ta maladda nga pangurugda ta Dios tapus ituddù nira nu anni i kagian na Biblia meyannung ta meddu nga personalidad ni Jehova anna ta promesana ta mappange.”
“AFFUTAN NU LALLAGU I MARAKAY TA PANGNGUA NU TA MAPIA”
Durante nga mattoletam ta “pangurianan ira nga aggaw,” ekspektattam nga i ugali danuri karuan nga layyagayyattam ay “mabbalin tu mas marakay.” (2 Tim. 3:1, 13) Ngem kattam nakuan ipamavulun yaw nga paggrabe nga alsan i pangikallo tam onu pawanan i pagayayya tam. Meyawa ni Jehova i sikan tapenu ‘maffu tam lallagu i marakay ta pangngua tam ta mapia.’ (Roma 12:21) Inistoria na payunir nga si Jessica: “Kanayun ngà makasimmu tu totolay nga minappakatannang anna mattagibaddi nittam anna ta mensahe tam. Makairita yatun. Nige ku tubbag, makimallo ngà kani Jehova anna ikiddò nga masingakku nakuan yatun nga tolay nga kunna paninganna sa. Makoffun yaw tapenu malsà i fokus ku ta mataga-tageno ku anna nonopakku lallagu nu kunnasì yayya nga uffunan.”
Itulu-tuloy tam nga alegan danuri natunno para ta mannanayun nga inango
Maginteres i karuan megafu ta pasensia tam nga uffunan ira ta espiritual
Ikonsidera tam gapa nu kunnasi pagaramman i kavulu tam nga mallayyagayya. Kunni Jessica: “Nu marake i ekspiriensa na tadday nikami, kakku maffokus tatun. Uliakku lallagu i paguruvovugan ta positibo ira nga topiko, gitta na makasta ira nga netuppal ta ministerio maski ta negatibo nga pangalawa na karuan.”
Talaga ammu ni Jehova i kapurueba ira nga meparubang nittam ta ministerio. Anni mabba i ayayyana nu parigattam i pangikallona! (Luc. 6:36) Siempre, egga i pagaddetan na pangikallo ni Jehova. Siguradu ittam nga ammuna i eksakto nga tiempo nu sonu annina pangultimuan i sistema na ganna-gannug. Durante nga ari paga nesimmu yatun, ariattam nakuan italattan i pallayyagayya. (2 Tim. 4:2) Itulu-tuloy tam nakuan nga matalikarag nga kuan i annungattam anna ikallo “ngamin i totolay.”
