“ARU i magatag ngem baddi i maggatag ira. Ipakimallo nu ta makakkua ta magatag tu maddog paga tu maggatag.” (Luc. 10:2) Masingan tatun nga kinagi ni Jesus ma-2,000 dagun ngana i nappasa i situasion ta Myanmar ta maddaggun. Ngatta? Ta Myanmar, egga laman i 4,200 nga publisher nga mangiwara tu mapia nga dumug ta 55 million nga tolay.

Ngem, nadde ni Jehova, i “makakkua ta magatag,” i giffutuan na magatu nga brother anna sister naggafu ta nadduruma nga nasion tapenu umay taw nga nasion ta Southeast Asia nga manguffun ta espiritual nga paggatag. Ngatta pinanawadda i nasiodda? Anni ira i uffun nga inalawada tapenu makali ta Myanmar? Anni ira i bendisiodda? Ammuattam.

Piga dagun i nappasa, nakkubra i epilepsy ni Kazuhiro nga payunir ta Japan, anna nawawan i palatagenona, tapus nekarela ta hospital. Kinagi sa na doktor nga ari yayya puede mammaneho tu dua ragun. Nakaddagan si Kazuhiro. Kunna ta baggina, ‘Kunnasì ngana gafu makua i kakayà ku? I mappayunir?’ Napafutuan nga nipakimallona kani Jehova nga mangivuka tu dalan para makapattuloy yayya ta pappayunir.

Istorian ni Kazuhiro: “Nappasa i tanga-vulan, nammuan na kofukku nga massesserbi ta Myanmar i problemà. Nagagal yayya niakan, nga kunna: ‘Ta Myanmar maruddu nga bus i pattakayan na tolay. Nu umay ka taw, makapallayyagayya ka lapa maski nu awan tu takem!’ Niyavu ku ta doktor ku nu puede ngà mappa-Myanmar maski kunnaw i situasiokku. Nakaddag ngà ta kunna niakan: ‘Mappasiar taw ta Japan i espesialista ta epilepsy nga taga-Myanmar. Iyammammu taka sa. Nu mattuka i taki mu, matangngallan naka.’ Para niakan, tabbag ni Jehova ta pakimallo ku yatun nga kinagi na doktor.”

Insigida na-email si Kazuhiro ta panga nga ofisina ta Myanmar tapus niturada na atawana i pakkaragada nga mappayunir tatun nga nasion. Lima aggaw laman i nappasa, simibbag i panga nga kudda, “Umay kamu taw, aru nga payunir i mawag mi!” Nilaku da Kazuhiro anni Mari i takeda ira, nanga ira tu visa, anna giminatang tu tiket na eroplano. Sangawe, magayayya ira nga masserbi ta sign-language group ta Mandalay. Kunni Kazuhiro: “Megafu taw nga nesimmu, natagenomi nga nassikan i pangurugmi ta promesa na Dios ta Salmo 37:5: ‘Iyalawa mu i baggim ta YAFU; mammakatalo ka sa ay uffunan naka.’”

Turi 2014, pribilehio na Saksi ira ni Jehova ta Myanmar nga mesimmu tatun i espesial nga kombension. Aru nga delegadu naggafu ta tanakuan nga nasion i nagatende tatun. Kasali tatun si Monique, sister nga 34 anios naggafu ta United States, nga nakkagi: “Kustu milibbe ngà maggafu ta kombension, naddasal ngà kani Jehova meyannung ta tumunug nga kuakku ta pattolè. Kiniyuvovug ku gapa i magana ku meyannung ta espiritual ira nga addetakku. Kumbinsidu kami ngamin nga mawag ku manoli ta Myanmar, ngem nappasa labbi i tiempo anna aru nga pakimallo nige ku nga nakapaddesision.” Iyesplika ni Monique nu ngatta kunna.

“Nitabarang ni Jesus ta disipulosna nga ‘karkuladda nu piga i magasto.’ Kukku gavu ta baggì: ‘Makalanno kari i kuartù tapenu makali? Masuportakku kari i baggì tatun nga nasion nga ari mofu i oras ku ta pattrabahu?’” Inaminna: “Insigida nanono ku nga kurang i kuartù tapenu makapaddian ta arayyu nga nasion.” Kunnasi gafu yayya nga nakali?​—Luc. 14:28.

Istorian ni Monique: “Tadday nga’ggaw, nipagalnà na boss ku nga babay. Maggudu-gudu ngà, megafu ta abbo ku nu masisante ngà. Yari balo ay mappabalo i boss ku ta makasta nga attrabahù. Tapus kinagina niakan nga planona nga meddan ngà tu bonus, nga yatun i eksakto nga balor na kawagakku tapenu mapagan i ngamin nga gata-gatu ku!”

Massesserbi ta Myanmar si Monique namegafu paga tagga ta Disiembre 2014. Anni i matagenona ta passerbina nu sitaw mas dakal i pakawagan onu i makagi nga need-greater? “Sobra ayayya ku nga egga ngà taw,” kunna. “Egga tallu nga tuttudduakku ta Biblia. Tadday nira ay 67-anios nga bako. Kada umay ngà nira, agga-galo laman yayya niakan tapus gakkopannà tu mapia. Ta pakannammuna nga Jehova i ngagan na Dios, makatangi yayya. Kunna: ‘Yaw pagalaman i ollollu nga naginnà nga i ngagan na Dios ay Jehova. Maggi gaddua laman i dagummu ta dagukku, ngem nituddum niakan i pinaka-importante nga gannug nga magigiammù.’ Siempre, makatangi ngà gapa. I ekspiriensà nga passerbi nu sitaw dakal i pakawagan i mamagayayya ta pattolè.” Nikanni laman, neddan tu pribilehio si Monique nga magatende ta School for Kingdom Evangelizers.

Tadday paga nga naka-engganio ta karuan nga umay ta Myanmar ay i mabibbig meyannung taw nga nasion ta 2013 Taunang Aklat ng mga Saksi ni Jehova. Tadday nga sister nga maturu tu 30 anios nga mangngagan tu Li i dati nga maddian ta Southeast Asia. Egga i full-time nga trabahuna, ngem i nabibbigna ta Taunang Aklat i namagaram sa nga ikonsidera i passerbi ta Myanmar. “Ta 2014 turi ta nagatende ngà ta espesial nga kombension ta Yangon, nakilalà i magatawa nga need-greater ta Chinese ira ta Myanmar. Gafu ta makabida ngà tu Chinese, nadesisionakku nga magali ta Myanmar tapenu suportan i Chinese group tari. Nakipartner ngà kani Monique, tapus nagali kami ta Mandalay. Inuffunan nakami ni Jehova tapenu makapattrabahu tu part-time teacher ta parehu nga eskuela, tapus nakaleg kami tu apartment ta aranni laman. Maski nu kiteppatu anna mariga ira i kondision, na-enjoy ku lapa i serbisiò taw. Simple laman i pattolay na taga-Myanmar ira, ngem masippo ira anna talaga iyetubangngadda nga ginnan i mapia nga dumug. Kappagayayya nga masingan nu kunnasi nga palistuan ni Jehova i trabahu. Talaga mangurug ngà nga uray ni Jehova para niakan nga egga ngà taw ta Mandalay.”

Aru ngana i nasserbi nga need-greater i nakaekspiriensa ta pakapangngua na pakimallo. Angngariganna, i 37-anios nga si Jumpei anna i atawana nga si Nao, nga 35 anios. Dati ira nga massesserbi ta sign-language congregation ta Japan. Ngatta  ta nagali ira ta Myanmar? Kagian ni Jumpei: “Nabayag ngana nga goal-mi na atawà nga masserbi nga need-greater ta tanakuan nga nasion. Egga i brother nga kakongregasiommi ta sign-language ta Japan i nagali ta Myanmar. Maski baddi laman i nonnugmi nga kuartu, nagali kami turi Mayo 2010. Mapapatu i pinangalawa nikami na wawwaragi ta Myanmar!” Anni i makagina ta teritoria na sign-language ta Myanmar? “Aru i maginteres. Nu ipagiromi i sign-language video ira, kakayà yatun na umal ira. Pia na laman talaga ta naddesisiokkami nga minay taw tapenu passerbian si Jehova!”

Kunnasi nalampasan da Jumpei anni Nao i problema ta finansial? Kunni Jumpei: “Kabalin na tallu ragun, maggi nofumi ngana i ngamin nga unnugmi nga kuartu anna kurang ngana i pappagami tu renta para ta tumunug nga dagun. Mas paga nga nakimallo kami na atawà. Ariammi inekspekta nga makalawa tu tura maggafu ta panga nga ofisina nga mangimbita nikami nga masserbi nga temporario nga espesial payunir! Nattalo kami kani Jehova, anna natagenomi nga arianna kami pinagurayan. Tattangngallan nakami ta ngamin nga gannug.” Nikanni laman, nagatende gapa da Jumpei anni Nao ta School for Kingdom Evangelizers.

Anni i namaguyu kada Simone, 43-anios nga brother nga taga-Italy, anna i atawana, nga si Anna, sister nga 37 anios nga taga-New Zealand, nga magali ta Myanmar? “Yatun ay i 2013 Taunang Aklat meyannung ta Myanmar!” kunni Anna. Kagian gapa ni Simone: “Daka-dakal nga pribilehio i masserbi ta Myanmar. Mas simple i pattolay taw, anna mas aru i tiempò nga masserbi kani Jehova. Makakkasta nga matageno i panangngal ni Jehova nittam nu massesserbi ittam ta mas dakal nga pakawagan.” (Sal. 121:5) Kunni Anna: “Mas fermi i ayayya ku sangawe. Simple laman i pattolemi. Mas aru i oras ku kavulu i atawà, anna mas meggo i relasiommi. Nakaleg kami gapa tu nabalor ira nga bagu nga kokkofun. Ari nga ireruma na totolay i Saksi ira, anna kappabbaw i interesda!” Kunnasi nga kunnatun?

Istorian ni Anna: “Tadday nga aggaw, egga i nilayyagayyakku nga estudiante ta palengke tapus niyunnug ku nga bisitan uli yayya. Ta panolì, kavuluna i tadday nga kofunna. Ta tumunug, kavuluna i karuan paga nga kofunna. Tapus ta tumunug ira, mas aru paga i nivuluna. Sangawe, lima nira i estudiantè.” Kunni Simone: “Minakkikofun i totolay ta ministerio anna minakkiavu ira. Aru i interesadu. Talaga kurang i tiempomi nga tolian ira ngamin.”

Anni gapa i praktikal ira nga makua tapenu makapaddesision nga magali ta Myanmar? Istorian ni sister Mizuho nga taga-Japan: “Nabayagmi ngana nga kayà na atawà nga si Sachio i masserbi ta nasion nga mas dakal i pakawagan—ngem sitaw tamma? Kabalimmi nga binibbig i 2013 Taunang Aklat meyannung ta Myanmar, talaga natukkal i futumi ta makapagaram ira nga ekspiriensa natun, yatutta nanonomi nu posible para nikami nga masserbi ta  Myanmar.” Kunna gapa ni Sachio: “Nadisidimi nga pasiaran tu tanga-ligguan i Yangon, i kabisera nga siudad na Myanmar, tapenu innan nu anni i paddia-paddian tatun. Nakumbinsi kami natun nga pabbiahe nga mawag tu magali kami taw.”

Da Rodney anna i atawana nga si Jane nga taga-Australia, parehu nga maturu tu 50 anios kavulu i ánada nga si Jordan anni Danica, ay massesserbi ngana nga need-greater ta Myanmar namegafu turi 2010. Kunni Rodney: “Kuruga magustuammi i pakkaraga na totolay nga mammuan i meyannung ta Dios. Talaga irekomendà ta tanakuan ira nga familia nga puruebadda i masserbi ta lugar nga gitta na Myanmar.” Ngatta? “Talaga ari mapaga-pagan i neyawana yaw para ta espiritualidad na familiami! Aru nga abbarabbing i okupadu ta cellphone ira, takay, trabahu, anna ta karuan paga. Okupadu i ánami nga maggigiammu tu bagu ira nga uvovug ta ministerio. Mappraktis ira tapenu layyagayyan danuri ari kuruga familiar ta Biblia anna makatabbag durante ta study na kongregasion, anna nakafokus ira ta aru paga nga kappagayayya nga espiritual nga aktibidad.”

Iyesplika ni Oliver, 37 anios nga brother nga taga-United States nu ngatta irekomendana yaw nga klase na serbisio: “Nu masserbi ngà kani Jehova ta tadday nga lugar nga ariakku nakasanayan, aru i benefisio tatun. Noffunannà na pappanaw ku ta balemi nga massikan i komfiansa anna pattalo ku kani Jehova maski nu anni i situasiokku. I passerbi kavulu danuri ariakku dati ammammu ngem kaparehù tu pangurug ay talaga nakoffun tapenu masingakku nga awan ngana tu anni laman taw nga mundo nga mekumpara ta importansia na Pappatulan na Dios.” Ta maddaggun, matalikarag nga massesserbi da Oliver anna i atawana nga si Anna ta Chinese-language nga teritoria.

Si Trazel, sister nga 52 anios nga taga-Australia ay massesserbi ta Myanmar namegafu turi 2004. Kunna: “Sikamu nga ipamavulun na situasionnu, talaga irekomendà i passerbi nu sitaw mas dakal i pakawagan. Naekspiriensà nga nu talaga gustum i masserbi, bendisionan ni Jehova i appursigim. Ariakku vuluvuga nanono nga kunnaw i pabbalinakku. Yaw i kuruga kappagayayya anna makakontentu nga pattolay nga awayyà kiddawan.”

Paguyuan naka nakuan danaw nga napafutuan nga uvovug ira danuri need-greater ta Myanmar tapenu manono mu nga manguffun turi ira ta mapia-giffutuadda nga maddian ta lugar ira nga awan tu makatteritoria. Wan, iyagagal nikaw danuri need-greater, “Fabor bi laman, umay ka taw ta Myanmar anna uffunan nakami!”