1, 2. (a) Ngatta masirib nga pumanig kani Jehova? (b) Anni i ikonsidera tam taw nga artikulo?

MASIRIB nga gumafu kani Jehova. Awan ngana tu maski sinni nga mas makapangngua, masirib, onu minaggiddu anne ta Dios tam! Sinni gafu nittam i mammanaki nga pumanig sa? (Sal. 96:4-6) Maski kunna, egga karuan nga maddayarayaw ta Dios nga ari makapili nu mekiddaw nira nga pumanig kani Jehova.

² Taw nga artikulo, ikonsidera tam i angngarigan na karuan nga makkagi nga egga ira ta panig ni Jehova ngem kukukuadda mabba i gannug nga mamallussaw sa. Egga ira i importante nga leksion natun nga makoffun nittam tapenu mattalupaddian nga matalo kani Jehova.

3. Ngatta sinabarangngan ni Jehova si Cain, anna anni i kinagina sa?

³ Ikonsidera tam i nesimmu kani Cain. Awan tu tanakuan nga anugutanna nga Dios nu ari si Jehova. Ngem i paddayaw ni Cain ay ari alawatan na Dios. Megafu ta egga i vuku-vukal na kinamarake nga mattala-talovu ta kononaggan na futuna. (1 Juan 3:12) Kunnaw i nitabarang ni Jehova kani Cain: “Nu mangngua ka tu  mapia, arianna kari metoli na fabor nikaw? Ngem nu ariammu mangngua tu mapia, maginnennag i liwa ta puerta, anna karagatanna nga dominannaka; ngem malabanammu kari yatun?” (Gen. 4:6, 7) Kagitta na kakkagian ni Jehova kani Cain, “Nu mabbabawi ka anna pumanig ka niakan, pumanig ngà gapa nikaw.”

4. Anni i kingngua ni Cain turi ta egga i tiansana nga pumanig kani Jehova?

⁴ Nu ulian laman nakuan ni Cain i appana-panonona, netoli nakuan ni Jehova i faborna sa. Ngem ari nagginna ta tabarang si Cain. Mali nga appana-panono anna makasarili nga pakkaraga i nangitubba sa nga magangngua tu liwa. (Sant. 1:14, 15) Ta kabbing ni Cain, awayyana nga arianna vuluvuga nanono nga kontran si Jehova. Ngem zimittal i tiempo nga kingnguana i ari maekspekta​—narrebelde yayya kontra ta Dios anna pinatena i mismu nga wagina!

5. Anni nga klase na appana-panono i makalsa ta fabor ni Jehova nittam?

⁵ Kagitta ni Cain, awayyana nga tuttuttulan na tadday nga Cristiano i mali nga dalan maski nu kakkagianna nga dayawanna si Jehova. (Jud. 11) Angngariganna, baka egga i imoral nga paffantasia na tadday, minakkakkam i appana-panonona, onu ikalussona i kapangngurugna. (1 Juan 2:15-17; 3:15) Awayyana nga marresulta danatun tu mali nga agguyu. Ngem puede mabba nga aktibo yayya ta ministerio anna regular ta study ira. Baka ari nga ammu na tanakuan i appana-panono anna i kondukta tam, ngem masingan ni Jehova i ngamin anna ammuna nu ari nga napafutuan i passuporta tam sa.​—Bibbigan i Jeremias 17:9, 10.

6. Kunnasi ittam uffunan ni Jehova nga ‘malabanan’ i tendensia tam nga makaliwa nu mattalupaddian ittam ta panigna?

⁶ Maski kunna, ari insigida nga ibbattan ittam ni Jehova. Nu i dakkua na tadday nga tolay ay mangiyarayyu ta Dios, pagaramman yayya ni Jehova: ‘Manoli ka niakan, ay tu manoli ngà nikaw.’ (Mal. 3:7) Netallugaring nu marigatan ittam ta pakkafiattam ira, kayà ni Jehova nga labanattam i kinarake. (Isa. 55:7) Nu kuattam yatun, pakuruganna nga suportanna ittam gukaban na pangiyawa tu espiritual, emosional, anna pisikal nga sikan nga mawag tam tapenu ‘malabanattam’ i tendensia tam nga makaliwa.​—Gen. 4:7.

7. Kunnasi nawawan ni Solomon i makasta nga sinaddagna kani Jehova?

⁷ Aru i magigiammu tam ta ehemplo ni Patul Solomon. Ta kabbinna, nappegiya yayya kani Jehova. Pinabbalin yayya ni Jehova tu kuruga masirib anna nitalona sa i pamataddag ta kappabbaw nga templo ta Jerusalem. Ngem nawawan ni Solomon i pakikofunna kani Jehova. (1 Pat. 3:12; 11:1, 2) Espesipiko nga igamma na Dob na Dios ta Hebreo nga patul nga manga tu “aru nga atawa para ta baggina, tapenu ari [nakuan] meyawawan i futuna.” (Deut. 17:17) Ari nga nattuppal si Solomon megafu ta nangatawa yayya tu 700 anna nangammung paga tu 300 nga babbayna. (1 Pat. 11:3) Ari nga Israelita i aru ta atawana anna maddayaw ira ta falsu ira nga dios. Ngem, ari nga sinuttul ni Solomon i dob na Dios kontra ta pangatawa tu dayu nga babbay.​—Deut. 7:3, 4.

8. Anni ira i marake nga kingngua ni Solomon?

⁸ Sisinu nga minarayyu si Solomon ta kiddaw ira ni Jehova nga narresulta ta pangnguana tu grabe nga liwa. Namadday yayya tu altar para ta sinan-diosa nga si Astoret anna ari laman tu tadday nga altar para ta kani Kemos. Vinuluna tatun i attawana ta pagano nga paddayaw. Fugurammu nga pinataddagna paga danatun nga altar ta vukig ta arubang mismu na Jerusalem, nu sitawna pinataddag i templo ni Jehova! (1 Pat. 11:5-8; 2 Pat. 23:13) Awayyana nga illillokuan ni Solomon i baggina ta pannono tu  puede nga palampasan ni Jehova i arianna nga pattuttul basta tulu-tuloy yayya nga umay mangitavvung ta templo.

9. Anni i resulta na ari pagginna ni Solomon ta abiso na Dios?

⁹ Ari vuluvuga nga palampasan laman ni Jehova i tagaruli ira. Mabibbig ta Biblia: “Napporay si Jehova kani Solomon, megafu ta minarayyu i futuna kani Jehova . . . , nga nappasingan sa tu namiddua anna nangabiso sa meyannung taw mismu nga gannug, nga arianna nakuan nga tumuttul ta tanakuan ira nga dios. Ngem arianna gininna i nebilin sa ni Jehova.” Megafu tatun, inalsa na Dios i fabor anna suportana sa. Nawawan na gaka-gaka ni Solomon i napakatadday nga pappatulan na Israel anna nakaekspiriensa ira tu aru nga problema ta ginatu nga dagun.​—1 Pat. 11:9-13.

10. Anni i mamappeligro ta makasta nga sinaddag tam kani Jehova?

¹⁰ Gitta na nesimmu kani Solomon, i pakikofun turi ira ta ari makalippawa onu mangirespeto ta estandarte ira ni Jehova ay kuruga mamappeligro ta espiritualidad. Awayyana nga miembro na kongregasion i karuan ngem makafi ta espiritual. Karuan tatun ay paparientes, karruba, katrabahu, onu kaeskuela nga ari maddayaw kani Jehova. Maski anni paga tatun, nu i madukko nga kakavvulu tam ay ariadda irespeto i estandarte ni Jehova, awayyana nga duttal sangaw i tiempo nga daraladda i makasta nga sinaddag tam ta Dios.

11. Kunnasi tam mammuan nu mawag tu arayyuattam i tadday nga kavulu?

¹¹ Bibbigan i 1 Corinto 15:33. Egga ira i makasta nga ugali na aru nga totolay, anna ari gapa nga magangngua tu kitaddake i aru ta ari nga Saksi. Nu kunnatun i kakavvulu mu, makagim kari nga makasta ngana ira nga kakavvulu? Iyavu mu ta baggim nu anni i efekto na pakikavulu nira ta relasiommu kani Jehova. Mapakastada kari yatun? Anni i mayang na futuda? Angngariganna, maruddu kari nga i mallawan ta simuda ay meyannung ta istilo na assissinnun, kuartu, gadget ira, pagiraw ta telebision anna pelikula, onu material nga pakkaraga? Kanayun kari nga negatibo i kakkagiadda meyannung ta tanakuan onu bastus i parralafugda? Nangabiso si Jesus: “Ta nu anni i egga ta nono, yatun laggapa i mallawan ta simu.” (Mat. 12:34) Nu natageno mu nga mamappeligro i kakavvulu mu ta makasta nga sinaddag mu kani Jehova, insigida nga magguyu! Limitan i tiempo nga pakikavvulu nira, anna iyemmang i pakikofun nira nu kawagan.​—Prov. 13:20.

12. (a) Anni i manawag nga kinagi ni Jehova ta Israelita ira kabalidda nallawan ta Ehipto? (b) Anni i tabbag na Israelita ira ta kiddaw ni Jehova nga interu-futu nga debosion?

¹² Egga paga i mala tam nga leksion turi ta nesimmu kabalin nga napalawan i Israelita ira ta Ehipto. Nattaradday i magili ta arubang na Vukig Sinai. Tatun, kappabbaw  nga nipatageno ni Jehova i presensiana. Milagro nga limittuag i mazibbo nga kunam. Nappa-arugug, nappakili-kila, nappa-atu, anna nappaguni si Jehova tu gittana magallu nga trumpeta. (Ex. 19:16-19) Taw nga nesimmu, niyammammu ni Jehova i baggina ta Israelita ira bilang “i Dios nga mangikiddaw tu interu-futu nga debosion.” Nipasiguraduna nira nga matalo yayya turi ira ta mangaya sa anna manuppal ta bili-bilinna. (Bibbigan i Exodo 20:1-6.) Gittana kakkagian ni Jehova ta totolena, “Nu pakurugannu nga egga kamu ta panig ku, pakurugakku nga panigattakamu.” Nu tadday ka ta nakaginna tatun, anni tamma i matageno mu tatun nga promesa ni Jehova? Siguradu nga kuammu i kingngua na Israelita ira, nga “naggiriddang nga simibbag: ‘Ngamin nga uvovug nga kinagi ni Jehova, sigga-parakkami nga kuan.’” (Ex. 24:3) Ngem ari nabbayag, egga i ari nga inekspekta na Israelita ira nga nesimmu nga namurueba ta kinamataloda.

13. Anni nga situasion i namurueba ta kinamatalo na Israelita ira?

¹³ Naganassing i Israelita ira ta mazibbo nga kunam, ta kili-kila, anna ta makapabbaw nga seniales naggafu ta Dios. Minanugu si Moises ta kiddoda nga mabbalin yayya tu pannakasimuda ta ngamin nga pakikomunika kani Jehova ta Vukig Sinai. (Ex. 20:18-21) Minune si Moises ta Vukig Sinai tapus nabayag nga minulug. Sangaw, ari ngana kari nga makapagali ta katanapan i Israelita ira megafu ta awan i pattalakkadda nga lider? Kaddaraddam nga kuruga nakadepende ta presensia ni Moises i pangurug na magili. Navvurung ira anna kudda kani Aaron: “Ipaddayan nakami tu diosmi nga mangirollu nikami, megafu ta ariammi ngana ammu i nesimmu taw nga Moises, i lalaki nga nangilawan nikami ta davvun na Ehipto.”​—Ex. 32:1, 2.

14. Kunnasi nga illillokuan na Israelita ira i gibbaggiadda, anna anni i reaksion ni Jehova?

¹⁴ Ammu na magili nga serioso nga tagaruli kontra kani Jehova i idolatria. (Ex. 20:3-5) Ngem ari nabbayag, maddayaw ngana ira ta vulawan nga baka! Manawag taw nga ari pattuttul ta bilin nga illillokuan na Israelita ira i gibbaggiadda nga egga paga ira ta panig ni Jehova. Tinukoy paga ni Aaron i paddayaw na magili ta baka nga “fiesta para kani Jehova”! Anni i reaksion ni Jehova? Natagenona nga inillokuda yayya. Kinagi ni Jehova kani Moises nga “zinapingadda i gibbaggiadda” anna ‘minarayyu ira ta dalan nga nibilinna nira nga angngayadda.’ Megafu ta “umafa-afi nga poray” ni Jehova, ninonona nga daralan i kabubuu nga nasion na Israel.​—Ex. 32:5-10.

15, 16. Kunnasi nipasingan da Moises anni Aaron nga matalo ira ta panig ni Jehova? (Innan i letratu ta gafu na artikulo.)

¹⁵ Dinisidi ni Jehova nga ari daralan i Israelita ira. I allona i nangiyawa ta matalo nga maddayarayaw sa tu oportunidad tapenu itaddaggan yayya. (Ex. 32:14) Ta pakasingan ni Moises nga makkurulle, makkaransion, anna mattala-tala ta arubang na idolo i magili, binakka-bakkana i vulawan nga baka anna minarakkimona. Tapus kunna: “Sinni i egga ta panig ni Jehova? Umay niakan!” Yari tu, “i ngamin nga Levita ay nagarimummung” kani Moises.​—Ex. 32:17-20, 26.

¹⁶ Maski kavulu si Aaron nga namadday tu idolo, nabbabawi yayya anna nevulu ta Levita ira nga egga ta panig ni Jehova. Danaw nga matalo ay ari laman nga pumanig kani Jehova, nu ari, isisinada paga i baggida ta minattagaruli ira. Masirib yatun nga desision; tatun nga aggaw rinivu i natay megafu ta idolatria. Ngem, danuri egga ta panig ni Jehova ay napromesan tu bendision.​—Ex. 32:27-29.

17. Anni i ituddu nittam na nitura ni Pablo meyannung ta vulawan nga baka?

 ¹⁷ Anni i leksion para nittam? Kunni apostol Pablo: “Danaw nga nesimmu ay pamappalan nittam tapenu ariat-tam nga karagatan i . . . maddaya-rayaw ta sinan-dios ira nga kagitta na kingngua na karuan nira. Netura gapa [danaw nga nesimmu] tu panuddu nittam nga mattolay toye nga tiempo nga aranni ngana manuppal. Yatun tu magimmugug i sinni laman nga magabbo tu siguradu ngana i taddag na, ta marakay nu matomba.” (1 Cor. 10:6, 7, 11, 12) Gitta na nipunto ni Pablo, awayyana nga makaliwa maski danuri kurug nga maddayarayaw. Nonopan danuri nakaliwa nga egga lagapa i makasta nga taddagda kani Jehova. Ngem ari nga automatiko nga faboran ni Jehova i tolay nga basta kayàna nga mabbalin tu kofun si Jehova onu makkakkagi nga matalo yayya sa.​—1 Cor. 10:1-5.

18. Anni i mangiyarayyu nittam kani Jehova, anna anni i resultana?

¹⁸ Nu kunnasi nga navvurung i Israelita ira ta nabayag nga pakkazza ni Moises ta Sinai, mavvurung gapa i Cristiano ira ta maddaggun ta gittana mabayag nga paddattal na aggaw na pangukum ni Jehova anna i paddattal na napabagu nga mundo. Gittana mabayag paga nga metuppal danaw nga promesa onu gittana ari paga nga mesimmu. Nu kunnatun i agga-nono tam, baka pagolluattam ngana i nepattaggan ira nga pakkaraga imbes nga i uray ni Jehova. Sonu kua, umarayyu ittam ngana kani Jehova anna sisinu nga magangngua ittam tu gannug ira nga ariattam ekspektan nga makua tam tagga ta makasta paga i espiritual nga gawa-gawayyattam.

19. Anni nga importante nga kinakurug i ariattam nakuan nga kattaman, anna ngatta?

¹⁹ Ariattam nakuan vuluvuga kattaman nga ikiddaw ni Jehova i interu-futu nga pattuppal anna debosion. (Ex. 20:5) Nu marayyu ittam ngana ta paddayaw kani Jehova, kebalinan natun nga uray ngana ni Satanas i kuattam anna mattuppal yatun ta kadaral. Yatutta, niperaddam ni Pablo nittam: “Arian na nga awayya tu uminum kamu ta kopa na Yafu anna uminum kamu gapa ta kopa na demonio ira. Arian na nga awayya tu umarubang kamu ta akkakanan na Yafu anna umarubang kamu gapa ta akkakanan na demonio ira.”​—1 Cor. 10:21.

20. Maski nu nakaliwa ittam, kunnasi ittam uffunan ni Jehova?

²⁰ Para-parehu nga egga i tiansa da Cain, Solomon, anna na Israelita ira ta Vukig Sinai nga mabbabawi anna ulian i ugalida. (King. 3:19) Manawag nga ari insigida nga ibbattan ni Jehova danuri nakaliwa. Ta situasion ni Aaron, pinakoma yayya ni Jehova. Ta maddaggun, awayyana nga mala i abiso ira ni Jehova ta rekord na Biblia, nebase-Biblia ira nga publikasion, onu meddu nga tabarang na kapangngurug. Nu ginnattam danatun nga abiso, makasiguradu ittam ta allo ni Jehova.

21. Anni nakuan i determinasiottam nu mapurueban i kinamatalo tam kani Jehova?

²¹ Egga i gakkag na ari mepangngo nga allo ni Jehova. (2 Cor. 6:1) Iddanna ittam natun tu oportunidad nga ‘pallikuran i attolay nga ari nga mekunnay ta Dios, tuange ta pakkaraga ta neravvunan ira nga ganna-gannug.’ (Bibbigan i Tito 2:11-14.) Durante nga “mattolay ittam toye ta utun na davvun,” meparubang ittam ta situasion ira nga mamurueba ta interu-futu nga debosiottam kani Jehova. Agga-parattam nakuan nga mattalo ta panigna, megafu ta ‘mawag nga maganassing ittam kani Jehova nga Dios tam, yayya nakuan i passerbiattam, anna yayya i mawag nga paggafutattam’!​—Deut. 10:20.