1. Anni i negagangay nga pakkaraga tam ngamin, anna anni i nelagum tatun?

ANNI i matageno mu nu i tadday nga ammammum anna irespetom ay nakattamanna i ngagammu, onu ariannaka paga lagu nga makilala? Awayya nga makadismaya i kunnatun nga ekspiriensa. Ngatta? Megafu ta gagangay nga karagatan na kada tadday nittam nga maaksepta. I klase na pangidayaw onu pangikakua nga karagatattam ay ari laman nga pakannammu ta ngagattam; kayà tam gapa nga mammuadda i kata-katoletam anna i nakua tam ira.​—Num. 11:16; ftn.; Job 31:6.

2, 3. Kunnasi nga sumobra i pakkaraga tam nga maappresia? (Innan i letratu ta gafu na artikulo.)

² Ngem kagitta na negagangay ira nga pakkaraga, awayyana nga ari balanse i pakkaraga tam nga maappresia anna sumobra yatun megafu ta kina-imperfekto tam ira. Megafu tatun makkaraga ittam nga sobra nga medayaw. Duppangan na mundo ni Satanas i pakkaraga tam nga medayaw anna maappresia nga makalsa ta atensiottam ta tadday nga talaga mepangngo nga  maappresia anna medayaw, i nelangitan nga Yama tam, si Jehova nga Dios.​—Nep. 4:11.

³ Ta tiempo ni Jesus, mali i pagimamma na karuan nga relihioso nga lider ta kekakua. Inabisowanna i disipulosna: “Magimmugug kamu ta mestru ira na Dob. Ikaya da i massinnun tu apparaddu ta nira nga lumaka-lakag. Ikaya da gapa tu mekakua ira ta pagara-aruan na totolay. Kuruga ikaya da i maddian ta aggitubangngan na mammekakua ira nga totolay ta sinagoga anna ta kapianan nga lugar ta langa-langan ira.” Kunna paga: “Mas madammo noka i kakastigo da!” (Luc. 20:46, 47) Ngem, kinomendan ni Jesus i mariga nga balu nga posible nga ari napansin na karuan i pilippiga nga kontribusionna. (Luc. 21:1-4) Manawag nga nerumu-ruma i pagimamma ni Jesus ta kekakua kumpara ta tanakuan. Uffunan ittam naw nga artikulo nga mapeggan tu fustu nga pagimamma, i tadday nga alawatan ni Jehova nga Dios.

4. Anni i kakastan nga klase na kedayaw, anna ngatta?

⁴ Anni gafu i kakastan nga klase na kedayaw nga pappursigiattam nakuan? Ari tu yaw i dayaw nga mala na tolay ta edukasion, negosio, onu ta pabbalin tu sikat. Lallagu, yaw i kinagi ni Pablo nittam: “Ngem sangoye ta ammu nu ngana i Dios, onu kuk-ku nakuan, sangoye ta ammu nakamu ngana na Dios, ngatta ta ikaya nu mangana i manoli ta makafi anna awan tu kwenta da nga espiritu ira nga mammaguray toye ta utun na davvun? Ngatta ta ikaya nu mangana i maki-aripan nira?” (Gal. 4:9) Anni mabba kastana nga pribilehio nga ‘mammammu ittam na Dios,’ i Katannangan nga Mammaguray ta uniberso! Sigga-paran yayya nga mapeggan tu meggo nga relasion nittam. Kunna tadday nga iskolar, “malawà tam i faborable nga atensionna.” Nu rekunnisian ni Jehova nga kofunna ittam, matuppal tam i gakkag na pattoletam.​—Ecl. 12:13, 14.

5. Anni nakuan i kuattam tapenu makilala ittam ni Jehova?

⁵ Naekspiriensa ni Moises i kunnatun nga bendision. Turi ta nakimemallo yayya nga ipamavulun ni Jehova nga mas mammuan i dala-dalanna, kunni Jehova: “Kuakku gapa yaw nga gannug nga ikikkiddom niakan, megafu ta nakaleg ka tu fabor ta matà anna ammammu taka ta ngagammu.” (Ex. 33:12-17) Makalawa ittam gapa tu kunnatun nga kakkasta nga bendision nu personal nga ammammu ittam ni Jehova. Ngem anni nakuan i kuattam tapenu makilala ittam ni Jehova? Ayatattam yayya anna idedika i pattoletam sa.​—Bibbigan i 1 Corinto 8:3.

6, 7. Anni ira i rason nu ngatta mawawan i relasiottam kani Jehova?

⁶ Ngem, mawag tam nga pattalupaddianan i nabalor nga relasiottam ta nelangitan nga Yama tam. Kunna Cristiano ira nga taga-Galacia nga sinurakkan ni Pablo, ibita tam gapa i maki-aripan ta “makafi anna awan tu kwenta da” ira nga gannug naw nga mundo, nelavu ngana i pakkagustu nga sumikat. (Gal. 4:9) Napprogreso i ollu-siglo ira nga Cristiano adde ta nammammu ira na Dios. Ngem kunni Pablo nga danaw gabbalaman nga wagi ay ‘ikaya da mangana i manoli’ ta awan tu kwentana ira nga gannug. Gittana kakkagian ni Pablo: “Sangawe ta arayyu ngana i naddènu, ngatta manoli kamu mangana ta makafi anna awan tu kwentana nga ganna-gannug nga nibattannu?”

⁷ Posible kari nga mesimmu gapa nittam yatun? Wan. Ta ollu tam nga nakilala si Jehova, awayyana nga kagitta tam gapa si Pablo nga nammanakitattam i kinaprominente ta mundo ni Satanas. (Bibbigan i Filipos 3:7, 8.) Baka pinappasa tam i tiansa nga makalawa tu atannang nga edukasion, onu nammanaki ittam ta mas atannang nga  posision onu ta posibilidad nga marriku ta negosio. Puede nga mabbalin ittam tu sikat onu mariku megafu ta talento tam ta musika onu kalalaki tam ta isports, ngem pinallikurattam ngamin danatun. (Heb. 11:24-27) Talaga ari masirib para nittam nga imammatan sangawe danatun nga makasta nga desision nga gittana ‘sayang nga oportunidad’! I kunnatun nga pagimamma i mamanoli nittam ta gannug ira na mundo nga minammatattam ngana nga “makafi anna awan tu kwenta da.” *

8. Anni i mamasikan ta determinasiottam nga mappursigi ta pangidayaw na Dios?

⁸ Kunnasi tam pasikannan i determinasiottam nga pappursigian i pangidayaw na Dios imbes nga pangidayaw na totolay? Tapenu makua tam yatun, mawag nga daddammattam i dua nga importante nga kinakurug. Ollu, ari vuluvuga kattaman ni Jehova danuri matalo nga massesserbi sa. (Bibbigan i Hebreo 6:10; 11:6) Talaga appresianna i kada aripanna, anna megafu ta “matunung” yayya, arianna vuluvuga pagurayan danuri matalo sa. Kanayun nga “ammu na Dios nu sinni i totolay na ira.” (2 Tim. 2:19) “Tangngallan na YAFU i matunung ira” anna ammuna lagapa nga paliaran ira ta ziga-riga.—Sal. 1:6; 2 Ped. 2:9.

9. Mangiyawa tu angngarigan nu kunnasi finaboran ni Jehova i totolena.

⁹ Nu mittan, nipasingan ni Jehova i paffaborna ta totolena ta kappabbaw ira nga gannug. (2 Cro. 20:20, 29) Angngariganna, nu kunnasi nga nipaliag ni Jehova i totolena ta Uzzin nga Bebay turi ta daddaggan ira na makapangngua nga armada ni Faraon. (Ex. 14:21-30; Sal. 106:9-11) Kappabbaw yaw nga nesimmu yatutta paguruvovugan yatun na totolay tatun nga parte na mundo maski 40 dagun ngana i nappasa. (Jos. 2:9-11) Talaga makapagaram nittam nga daddamman i kunnatun nga aya anna pakapangngua ni Jehova sonu meparubang ittam ta nabayag ngana nga neprofesiya nga pangatake na Gog na Magog! (Eze. 38:8-12) Tatun nga tiempo, talaga dakal i appabalo tam nga nala tam i fabor na Dios tam, ari tu i fabor na totolay.

10. Anni i mekadua nga kinakurug nga mawag tam daddamman?

¹⁰ Daddammattam gapa i mekadua nga importante nga kinakurug: Bala-balattan ittam ni Jehova gukaban na passurpresa nittam ta aru nga gannug. Danuri nangngua tu makasta ira nga gannug tapenu masingan na totolay ay awan vuluvuga tu bala-baloda kani Jehova. Ngatta? Megafu ta inalawada ngana i baloda turi ta zinayaw ira na tanakuan. (Bibbigan i Mateo 6:1-5.) Ngem, kinagi ni Jesus nga ‘masingan na Yamana i mapia nga kuan ta sekreto’ danuri ari nekakua megafu ta mapia ira nga kingnguada para ta tanakuan. Masingi-singanna danatun anna balattanna i kada tadday segun ta kepangngattanna. Ngem nu mittan bendisionan ittam ni Jehova tu ariattam ekspektan. Ikonsidera tam i karuan nga angngarigan.

11. Kunnasi binendisionan ni Jehova i maginganay nga si Maria?

¹¹ Turi ta tiempo ngana nga meyana tu tolay i Ana na Dios, pinili ni Jehova i minappakalinno nga birhen nga si Maria, tapenu mabbalin tu yena naw nga espesial nga abbing. Maddian si Maria ta kalinnakkan nga siudad na Nazaret, nga arayyu ta Jerusalem anna ta kappabbaw nga templona. (Bibbigan i Lucas 1:26-33.) Ngatta si Maria i napili taw nga pribilehio? Kinagi sa na anghel  nga si Gabriel nga ‘binendisionan yaya na Dios.’ Nipasingan ni Maria i monag nga espiritualidadna turi ta nakiyuvovug yayya ta parientesna nga si Elizabet. (Luc. 1:46-55) Wan, naobserba ni Jehova si Maria, anna niyawana sa yaw nga ari ekspektan nga pribilehio megafu ta kinamatalona.

12, 13. Kunnasi nga neyawa i mepangngo nga kedayaw kani Jesus ta nikeyanana anna turi ta neyangay yayya ta templo kabalin na 40 aggaw?

¹² Turi ta neyana ngana ni Maria si Jesus, ari nga niyawa ni Jehova i dayaw ta maski sinni nga prominente nga ofisial onu mammaguray ta Jerusalem anna ta Betlehem gukaban na pangikagi nira ta nesimmu. Nappasingan i angheles ta mapakalinno ira nga mappastor tu karneru ta tana-tana na Betlehem. (Luc. 2:8-14) Kabalinna, binisita danaw nga pastor i bagu neyana nga abbing. (Luc. 2:15-17) Magayayya nga nasurpresa da Maria anni Jose nga kunnatun i nikedayaw ni Jesus! Ikonsidera i nadduman na pangngua ni Jehova ta ganna-gannug kumpara ta Diablo. Turi ta naddog si Satanas tu astrologo ira tapenu bisitan si Jesus anna i maganana, navvurung i ngamin nga taga-Jerusalem ta pakadumug ta keyana ni Jesus. (Mat. 2:3) Yaw nga kepakannammu ta publiko na keyana ni Jesus i narresulta ta kapatay na aru nga inosente nga abbing.​—Mat. 2:16.

¹³ Kuarenta aggaw kabalin na keyana ni Jesus, mawag nga mangitavvung kani Jehova si Maria ta templo ta Jerusalem, nga massiam kilometro i karayyuna ta Betlehem. (Luc. 2:22-24) Ta pabbiahe ni Maria kavulu si Jose anni Jesus, baka nononopanna nu egga i espesial nga pangiyanunsio na pari ta mappange nga papel ni Jesus. Nekakua yayya, ngem ari tu gittana ekspektan ni Maria. Lallagu, inusa ni Jehova i “matunung anna minammarulo ta uray na Dios” nga si Simeon, tuange ta 84-anios nga balu nga profetisa nga si Ana, tapenu rekunnisian nga yaw nga abbing ay mabbalin tu nepromesa nga Mesias, onu Cristo.​—Luc. 2:25-38.

14. Anni ira nga bendision i nalawà ni Maria kani Jehova?

¹⁴ Kunnasi gapa si Maria? Tulu-tuloy kari nga binendisionan yayya ni Jehova ta matalo nga panangngaw anna pamadakalna ta Anana? Wan. Nipetura na Dios ta Biblia i kingnguana anna i kinaga-kagina ira. Awayyana nga ari tu posible nga mevulu-vulu si Maria ta pabbiahe ni Jesus ta tallu-gaddua dagun nga ministeriona. Megafu ta balu ngana si Maria, puede nga nabattang yayya ta Nazaret. Ngem maski paga aru nga pribilehio i nalonanna, presente lagapa yayya ta tiempo na patay ni Jesus. (Juan 19:26) Ngem turi kua, egga si Maria ta Jerusalem tuange ta disipulos ta aggaggaw nige na Pentecostes turi neyaluvu i masanto nga espiritu. (King. 1:13, 14) Posible nga nazelugan yayya kavulu i karuan nga presente. Nu kunnatun, kayàna kagian nga neddan yayya tu oportunidad nga makavulu si Jesus ta langi adde ta mannanayun. Talaga kakkasta nga bala-balo kani Maria ta matalo nga passerbina!

15. Ta kegga ni Jesus ta davvun, kunnasi nipasingan ni Jehova i paffaborna ta Anana?

¹⁵ Ari nakkaraga si Jesus nga idayaw na relihioso onu pulitikal ira nga lider ta tiempona. Ngem talaga napagaram yayya turi ta si Jehova mismu i nangidayaw sa ta tallu nga okasion gukaban na direkta nga paguvovug nga maggafu ta langi. Kabalin laman na bawtismo ni Jesus ta Bannag Jordan, kinagi ni Jehova: “Yaw i ideddukak-ku nga Ana ku nga kuruga makapagayaya niakan!” (Mat. 3:17) Manawag nga si Juan Bautista laman fuera kani Jesus i nakaginna tatun. Kabalinna, mattanga-ragun nige na patay ni Jesus, tallu ta apostolesna i nakaginna kani  Jehova nga kunna kani Jesus: “Yaw i iddeddukak-ku nga Ana ku nga kuruga makapagayaya niakan. Ginnan nu yaya!” (Mat. 17:5) Tapus, piga aggaw nige na patay ni Jesus, nakiyuvovug mangana si Jehova ta Anana maggafu ta langi.​—Juan 12:28.

16, 17. Anni i ari maekspekta nga pinangidayaw ni Jehova kani Jesus?

¹⁶ Maski paga ammu ni Jesus nga maekspiriensana i kappasirang nga kapatay anna maakusan nga makkagi tu mekontra ta Dios, nipakimallona lagapa nga matuppal nakuan i uray ni Jehova ari tu i urena. (Mat. 26:39, 42) “Inattamman na anna arian na nga ninonono i kappasiran nga kapapatay” ta pakaziga-rigatan nga estaka, gafu ta arianna inaleg i pangidayaw na totolay, nu ari i pangidayaw na Yamana. (Heb. 12:2) Kunnasi nipasingan ni Jehova i pangidayona?

¹⁷ Ta kegga ni Jesus ta davvun, kinagina i pakkaragana nga metoli i dayona gittana gari ta keggana ta langi kavulu i Yamana. (Juan 17:5) Awan tu mabibbig nga iddanaman ni Jesus i mas paga anne tatun. Kanna ekspektan nga mas “meyatannang” paga yayya ta langi. Ngem anni i kingngua ni Jehova? Ari maekspekta i pangidayona kani Jesus gukaban na pamaginnolay sa ta “katannangan nga kekakua” anna pangiyawa sa ta gannug nga awan paga tu nakalawa tatun nga tiempo—i imortal nga espiritu! * (Fil. 2:9; 1 Tim. 6:16) Talaga kappabbaw nga pangidayaw ta matalo nga pattolay ni Jesus!

18. Anni i makoffun nittam tapenu mebita nga karagatan i pangidayaw na totolay?

¹⁸ Anni i makoffun nittam tapenu mebita tam nga karagatan i pangidayaw na totolay? Daddamman nga ari vuluvuga nga kattaman ni Jehova danuri matalo ira nga aripanna anna maruddu nga bala-balattanna ira ta ari ekspektan nga ganna-gannug. Sinni gafu i makannammu nu anni ira nga surpresa nga bendision i malawà tam ta mappange? Ngem ta maddaggun, durante nga atta-attammattam i ziga-riga anna problema ira taw ta marake nga mundo, kanayuttam nakuan daddamman nga yaw nga mundo, kunne gapa ta dayaw nga meyawana, ay mapawan. (1 Juan 2:17) I minaggiddu nga Yama tam, si Jehova ay ‘matunung, arian na nga kattaman i kingngua tam, onu i pangaya tam sa nga nipasingattam.’ (Heb. 6:10) Wan, mangiyawa yayya tu fabor nittam—posible ta gannug ira nga ariattam ekspektan maski ta maddaggun!