1. Segun ta Filipos 2:3, ngatta makkasta i relasiottam ta tanakuan nu mapakalinno ittam?

MAPAKALINNO nga tuttulattam si Jehova megafu ta mangurug ittam nga kanayun nga ammuna nu anni i kapianan para nittam. (Efe. 4:22-24) Nu mapakalinno ittam, nonopattam nga mas importante i uray ni Jehova anne ta uray tam anna ibilang tam nga mas atannang i tanakuan anne nittam. Bilang resulta, mabbalin tu makasta i relasiottam kani Jehova anna ta kapangngurug tam ira.—Bibbigan i Filipos 2:3.

2. Anni i anugutan ni apostol Pablo, anna anni i ikonsidera tam taw nga artikulo?

² Ngem nu ari ittam nga magimmugug, posible nga mainfluwensian ittam na totolay na mundo nga mapakatannang anna makasarili. * Yaw i tadday ta peligro nga neparubang ta karuan ta ollu-siglo nga Cristiano, megafu ta nitura ni apostol Pablo ta taga-Roma ira: “Kiddawak-ku ta kataggi-tadday nikamu: arian nu nga ikwenta i baggi nu tu mas atannang anne ta mepangngo. Ngem mappakalinno kamu lallagu ta appana-panono.” (Roma 12:3) Anugutan ni Pablo nga mepangngo nakuan i paningattam ta baggi tam. Makoffun nittam i kinapakalinno tapenu kanayun nga balanse i pagimamma tam ta baggi tam. Ikonsidera naw nga artikulo i tallu nga aspeto nu sitaw makoffun i kinapakalinno nittam tapenu ari tu atatannang i paningattam ta baggi  tam. Nelagum taw nga aspeto ira i (1) pagatawa tam, (2) pribilehio tam ira ta passerbi ta organisasion, anna (3) pangusa tam tu social media.

3. Ngatta luttuag i karuan nga problema ta pagatawa, anna anni i solusion na karuan?

³ Niyunnug ni Jehova i pagatawa tapenu paggafuan na pagayayya para ta atawa nga lalaki anna babay. Ngem megafu ta ari ira nga perfekto, posible nga ari ira nga makka-anugu ta karuan nga gannug. Kakuruganna, nitura ni Pablo nga ekspektan danuri na makitawa nga egga ira i kavuru-vurungadda. (1 Cor. 7:28) Egga ira magatawa nga kanayun nga maddama, anna awayyana nga nonopadda nga ari nakuan ngana ira nga nagatawa. Nu nainfluwensian ira na mundo, mabi laman nga nonopadda nga diborsio i solusion. Nononopadda laman i baggida anna kurugadda nga mabbalin laman ira nga magayayya nu maddiborsio ira.

4. Anni nakuan i ibita tam?

⁴ Ibita tam nakuan nga nonopan nga ari ittam ngana nga magayayya ta pagatawa tam. Ammu tam nga i nebase-Biblia laman nga basehan na diborsio ay seksual nga imoralidad. (Mat. 5:32) Yatutta nu egga ira i problema ta pagatawa tam, ari ittam nakuan nga paguyuan na pappakatannang tapenu iyavu ta baggi tam: ‘Meyayawa kari na pagatawà i pakawagakku ira? Mamala ku kari i aya nga mepangngo nio? Mas magayayya ngà kari nu tanakuan i atawà? Pansinan nga nakafokus ta baggi danatun nga pakkiavu. Kagian na kinasirib na mundo nga tuttulammu i futum anna kuammu i mamagayayya nikaw, maski nu kebalinan natun nga madaral i pagatawam. Ngem kagian na Biblia nga “arian nu nga nonopan i pammakapian nu laggapa, nu ari i pammakapian na kataggi-tadday nikamu.” (Fil. 2:4) Kayà ni Jehova nga mattalupaddiakka ta atawam anna ariammu idiborsio yayya. (Mat. 19:6) Kayà ni Jehova nga nonopammu labbi yayya, ari tu i baggim.

5. Segun ta Efeso 5:33, kunnasi nakuan nga tratuan na atawa nga lalaki anna na atawa nga babay i kataggi-tadday?

 ⁵ Mawag nga ayatan anna irespeto na atawa nga lalaki anna na atawa nga babay i kataggi-tadday. (Bibbigan i Efeso 5:33.) Ituttuddu na Biblia nga nakafokus ittam nakuan ta pangiyawa anne ta pangalawa. (King. 20:35) Anni nga kualidad i makoffun ta sigga-atawan tapenu makepasingan tu aya anna respeto? Kinapakalinno. Nu mapakalinno i atawa nga lalaki anna i babay, nonopadda ari tu i pammakapianadda laman, nu ari, ‘i pammakapianan na ikattoleda.’—1 Cor. 10:24.

6. Anni i magigiammum ta kinagi da Steven anna Stephanie?

⁶ Nakoffun i kinapakalinno ta aru nga Cristiano nga magatawa tapenu mas magayayya ira ta pagatawada. Kunnaw i kagian na sigga-atawan nga si Steven: “Nu makka-team kamu na atawanu, makka-uffukkamu, jebi nu egga ira problema. Imbes nga nonopammu, ‘anni i pammakapianakku?’ nonopammu, ‘anni i pammakapianammi?’” Kunnatun gapa i matageno na atawana nga si Stephanie. “Awan tu maski sinni nga maya nga makikabbalay ta kalabanna,” kunna. “Nu egga i ari pakkara-anugutan, ammuammi i problema. Tapus makimallo kami, marresearch, anna pabbidammi i problema. Tapus solbammi i problema anna ariammi nga maddama.” Mas mabbalin tu magayayya i atawa nga lalaki anna babay nu ariadda nonopan nga mas importante ira anne ta atawada.

7. Anni nakuan i kuan na tadday nga brother nu nakalawa yayya tu tadday nga pribilehio ta passerbi?

⁷ Pribilehio tam nga masserbi kani Jehova ta maski anni nga annungan. (Sal. 27:4; 84:10) Nu sigga-paran i tadday nga brother nga alawatan i tadday nga pribilehio tapenu masserbi, makomendan yayya. Kakuruganna, kagian na Biblia: “I tolay nga makkaraga nga mabbalin tu dakal na iglesia, ay mekakua nga trabahu i karagatan na.” (1 Tim. 3:1) Ngem nu nakalawa yayya tu tadday nga annungan, arianna nakuan nonopan nga mas atannang yayya anne ta mepangngo. (Luc. 17:7-10) Gakkagna nakuan nga mapakalinno nga passerbian i tanakuan.—2 Cor. 12:15.

8. Anni i magigiammu tam ta kingngua da Diotrefes, Uzias, anna Absalom?

⁸ Abisowan ittam na Biblia ta totolay ira nga atatannang i paningadda ta baggida. Ari tu mapakalinno si Diotrefes megafu ta ‘ikayana i mabbalin tu dakal’ na kongregasion. (3 Juan 9) Megafu ta kinapakatannang, kingngua ni Uzias i tadday nga annungan nga ari nga nitalo nisa ni Jehova. (2 Cro. 26:16-21) Kayà ni Absalom i mabbalin tu patul, yatutta nagappappe yayya nga ayatanna i totolay tapenu suportadda yayya. (2 Sam. 15:2-6) Manawag nga ipasingan naw ira nga rekord na Biblia nga manaki ni Jehova danuri karagatadda i medayaw. (Prov. 25:27) Sonu kua, mapeggan tu problema danuri mapakatannang anna kayàda nga medayaw i baggida.—Prov. 16:18.

9. Anni nga ehemplo i nipasingan ni Jesus?

⁹ Si Jesus ay ari tu kagitta danatun nga minappakatannang nga totolay. Kagian na Biblia nga “maski nu egga sa i ka-Dios, arian na nga nifersa tu megitta yaya ta Dios.” (Fil. 2:6) Si Jesus i mekadua kani Jehova ta autoridad, ngem arianna nikwenta i baggina nga mas atannang anne ta mepangngo. Kinagina ta disipulosna: “I kalinnakkan tu paddian nikamu ngamin ay yaya noka i mekwenta tu katannangan.” (Luc. 9:48) Talaga bendision i masserbi kavulu i papayunir, ministerial ira nga aripan, elder ira, anna manangngal ira ta sirkito nga mapakalinno kagitta ni Jesus! Nu mapakalinno ittam, makepasingan ittam tu mas dakal nga aya ta tanakuan! Kinagi paga ni Jesus nga makka-aya-aya ta kataggi-tadday i kurug ira nga aripan na Dios.—Juan 13:35.

10. Anni nakuan i kuammu nu masingammu nga egga ira i problema ta kongregasion ngem ari nga matangngaw danatun?

 ¹⁰ Anni nakuan i kuammu nu makasingakka tu problema ira ta kongregasion, anna matageno mu nga ari nga tattangngawan danatun na elder ira? Imbes nga marreklamo, makepasingakka tu kinapakalinno gukaban na passuporta turi ira ta mangirollu. (Heb. 13:17) Tapenu makuam yatun, iyavu ta baggim: ‘Kuruga serioso kari danaw nga problema nga masingakku yatutta kawagan nga metunung? Yaw kari i mepangngo nga tiempo tapenu metunung danatun? Responsibilidad ku kari nga itunung danatun? Talaga kari nga kayà ku nga mattaradday i kongregasion onu mappappa-importante ngà laman?’

11. Segun ta Efeso 4:2, 3, anni ira i resultana nu mapakalinno ittam nga masserbi kani Jehova?

¹¹ Mas importante kani Jehova nga mapakalinno ittam anne ta maabilidad ittam anna mas importante nisa nga egga i pattaraddetam anne ta aru i magafuanattam. Yatutta, kuammu i ngamin nga mawayyam tapenu mapakalinno nga masserbi kani Jehova. Nu kuammu yatun, makoffukka ta pattaradday na kongregasion. (Bibbigan i Efeso 4:2, 3.) Mabbalikka tu aktibo ta ministerio. Magaleg ka tu oportunidad ira nga passerbian i tanakuan gukaban na pangngua tu mapia para nira. Mabbalikka tu minammadulo ta ngamin nelagum danuri awan tu pribilehioda ta organisasion. (Mat. 6:1-4; Luc. 14:12-14) Durante nga mapakalinno nga makipattrabahu ka ta kongregasion, masingan na tanakuan ari laman i abilidad mu, nu ari, pati i kinapakalinno mu.

12. Ipagaram kari na Biblia nga mapeggan ittam tu kokkofun? Ipakanawag.

¹² Kayà ni Jehova nga magayayya ittam nu kavulu tam i kokkofun anna kafamilia tam. (Sal.  133:1) Egga gapa i mapia ira nga kofun ni Jesus. (Juan 15:15) Kagian na Biblia i benefisio ira na kapeggan tu kurug nga kokkofun. (Prov. 17:17; 18:24) Kagian paga natun nga ari tu makasta nu isisina tam i baggi tam. (Prov. 18:1) Aru i mangurug nga makoffun i social media tapenu mapeggan ira tu aru nga kokkofun anna tapenu ariadda matageno nga magitetadday ira. Ngem mawag tu magimmugug ittam nu usan yaw nga metodo na komunikasion.

13. Ngatta posible nga marraddam anna madepres i karuan nga mangusa tu social media?

¹³ Pakurugan na research ira nga mas dakal i posibilidad nga marraddam anna madepres danuri totolay nga aru i tiempoda nga maningan ta komento anna letratu ira na tanakuan nga totolay ta social media. Ngatta? Tadday nga posible nga rason ay megafu ta maruddu nga i-post na totolay ta social media i picture-da ira nga mangipasingan ta pinakamakasta ira nga nesimmu ta pattoleda. Ipasingadda laman i pinilida ira nga letratuda, na kokkofudda, anna na makasta ira nga lugar nga nangngayadda. Nu masingan na tadday nga tolay danatun nga letratu, awayyana nga makkonklusion yayya nga kumpara nira, boring i pattolena. Kunnaw i kagian na 19-anios nga sister: “Nappassil ngà turi ta nasingakku nga kitessaya i tanakuan ta weekend-da ngem sakan ay egga laman ta balay nga magitetadday.”

14. Kunnasi nga makoffun nittam i tabarang na Biblia ta 1 Pedro 3:8 meyannung ta pangusa ta social media?

¹⁴ Siempre, egga i bentaha na pangusa tu social media, gitta na pakikomunika ta kafamilia anna kokkofun. Ngem naobserbam kari nga i karuan ta post na totolay ta social media ay nadisenio tapenu isentroda i atension ta baggida? Gittana kakkagiadda ta totolay: “Sakan i innannu!” Egga gapa ira i karuan nga makkomento tu makapataki anna bastus ta mismu nga letratuda onu ta letratu na tanakuan. Mekontra gapa yaw ta mepagaram ta Cristiano ira nga kultibadda i kinapakalinno anna pakipattageno.—Bibbigan i 1 Pedro 3:8.

15. Kunnasi ittam moffunan na Biblia nga ibita nga nonopan nga kuruga importante ittam?

¹⁵ Nu mangusa ka tu social media, iyavu ta baggim: ‘Ipasa-pasingan kari na komentò ira, na letratu onu na video ira nga i-post ku nga mappara-parayag ngà? Kayà ku kari nga makatageno tu passil i tanakuan niakan?’ Kagian na Biblia: “Ngamin i egga toye ta mundo nga  kunne ta karagatan na baggi, ganna-gannug ira nga makatenta ta mata, anna ngamin nga pappara-parayag na tolay ay ari tu maggafu ta Yama, nu ari maggafu ta mundo.” (1 Juan 2:16) Nitransleyt na tadday nga version na Biblia i “pappara-parayag na tolay” bilang “pakkaraga nga mabbalin tu importante.” Ari nakuan nga matageno na Cristiano ira nga importante ira onu dayawan nakuan ira na tanakuan. Tuttuladda yaw nga tabarang na Biblia: “Mawag tu ari ittam nga mappara-parayag, mangara-aru tu dama, onu makkapassa-passil.” (Gal. 5:26) Nu mapakalinno ittam, ariattam nga parigan i totolay ta mundo nga mapakatannang anna kayàda nga nonopan na tanakuan nga kuruga importante ira.

16. Ngatta ari ittam nakuan nga mappakatannang?

¹⁶ Mawag tu kultibattam i kinapakalinno megafu ta danuri mapakatannang ay ari tu ‘mapakalinno i appana-panonoda.’ (Roma 12:3) Minakkiddama anna makasarili i mapakatannang nga totolay. Megafu ta nononopadda anna kukukuadda, maruddu nga matakitadda i baggida anna i tanakuan. Nu ari ira nga magimmugug, vulaggan anna iyawawan ni Satanas i appana-panonoda. (2 Cor. 4:4; 11:3) Ngem, makasta i appana-panono na tolay nga mapakalinno. Balanse anna rasonable i pagimammana ta baggina anna ammuna nga aru ira i gannug nga mas malalaki i tanakuan anne nisa. (Fil. 2:3) Ammuna gapa nga “ikabatù na Dios i maparayag, ngem ikallo na i minappakalinno.” (1 Ped. 5:5) Manaki danuri na mapakalinno i appana-panonoda nga mabbalin ira tu kalaban ni Jehova.

17. Anni i kuattam tapenu mattalupaddian ittam nga mapakalinno?

¹⁷ Tapenu mattalupaddian nga mapakalinno, mawag tu iyaplika tam i tabarang na Biblia nga ‘arian ngana i dana nga kata-katoletam tuange ta negagangay nga pangnga-pangngua tam anna natalibagu ittam ngana nakuan.’ Mawag i appursigi tapenu makua yatun. Mawag gapa nga gigiammuattam i ehemplo ni Jesus anna parigattam yayya adde ta mawayya tam. (Col. 3:9, 10; 1 Ped. 2:21) Nu kuattam yatun, kuruga mabbenefisio ittam. Durante nga kultibattam i kinapakalinno, mabbalin tu mas magayayya i familia tam, makoffun ittam ta pattaradday na kongregasion, anna ariattam nga iyusa i social media tapenu ipatageno ta tanakuan nga kuruga importante ittam. Pinaka-importante ta ngamin, bendisionan anna faboran ittam ni Jehova.