1. Anni i kayà kagian na termino nga “i kinakurug”?

“KUNNASIM nga nammuan i kinakurug?” “Napadakal ka kari ta kinakurug?” “Kunnasi ka ngana kabayag ta kinakurug?” Awayyana nga niyavuda ngana nikaw danatun onu niyavu mu ngana danatun ta tanakuan. Anni i kayà kagian na termino nga “i kinakurug”? Maruddu nga nu kagiattam i kinakurug, tumukoy yaw ta kuru-kurugattam, ta kukukuattam tapenu dayawan i Dios, anna nu kunnasi ittam mattolay. Danuri totolay nga “egga ta kinakurug” ay ammuda i ituttuddu na Biblia anna iyaplikada i prinsipio ira natun. Bilang resulta, ariadda ngana kuru-kurugan i falsu ira nga tuttuddu na relihion anna magayayya i pattoleda durante nga mattolay ira ta mundo ni Satanas.—Juan 8:32.

2. Segun ta Juan 13:34, 35, anni i awayyana nga ollu nga magustuan na tadday nga tolay ta kinakurug?

² Anni i ollu nga nagustuammu ta kinakurug? Awayyana nga i makasta nga kondukta na totolay ni Jehova. (1 Ped. 2:12) Onu baka i aya nga nipasingadda. Aru ta minay ta study i ollollu nga naka-ekspiriensa tatun anna mas nga keraddammadda yatun nga aya anne ta maski anni nga nakagi tatun nga study. Ari ngana nga kakkadda-kaddag yatun megafu ta kinagi ni Jesus nga makilala i disipulosna megafu ta ayada ta kataggi-tadday. (Bibbigan i Juan 13:34, 35.) Ngem egga paga i mawag nga kuan tapenu mapeggan tu masikan nga pangurug.

3. Anni i mesimmu nu nebase laman ta aya nga ipasa-pasingan na wawwaragi tam i pangurug tam ta Dios?

³ I pangurug tam ay ari laman nakuan nebase ta aya ta nallatanan na totolay na Dios. Ngatta? Kunnasi nu nakaliwa tu madammo i kapangngurug mu, maski paga nu elder onu payunir yayya, onu natakitakka na kapangngurug mu? Kunnasi nu nabbalin tu apostata i tadday anna kakkagianna nga awan ta  nittam i kinakurug? Nu kunnatun i mesimmu, mesiddukal ka kari anna magimmakka ngana nga masserbi kani Jehova? Yaw i leksion: Nu mangurug ka ta Dios megafu laman ta kukukuan na tanakuan nga tolay anna ari nga megafu ta personal nga relasiommu kani Jehova, makafi i fundasion na pangurug mu. Kurug nga makoffun gapa i matageno mu kani Jehova anna ta totolena tapenu mapeggakka tu pangurug. Ngem importante gapa nga ipafutum nga gigiammuan i Biblia, alippawatammu i magigiammum, anna marresearch ka tapenu masiguradum nga kinakurug i magigiammum ira meyannung kani Jehova. Mawag tu kumbinsidu ka nga kinakurug i ituttuddu na Biblia meyannung nisa.—Roma 12:2.

4. Segun ta Mateo 13:3-6, 20, 21, anni i efektona ta pangurug na karuan nu makkaproblema ira?

⁴ Kinagi ni Jesus nga egga i karuan nga “sigga-pagayaya” nga inalawada i kinakurug ngem nakkafi i pangurugda turi ta nakkaproblema ira. (Bibbigan i Mateo 13:3-6, 20, 21.) Posible nga ariadda nga inekspekta nga makkaproblema ira nu tuttuladda si Jesus. (Mat. 16:24) Posible gapa nga ninonoda nga ari ira makkaproblema nu mabbalin ira nga Cristiano anna kanayun nga alsan na Dios i problemada. Ngem taw nga mundo, magga egga ira i problema. Manguloli i sirkumstansia yatutta mawawattam i pagayayya tam.—Sal. 6:6; Ecl. 9:11.

5. Kunnasi nga pakurugan na aru ta wawwaragi tam nga kumbinsidu ira nga egga nira i kinakurug?

⁵ Aru ta wawwaragi tam i mamakurug nga kumbinsidu ira nga egga nira i kinakurug. Kunnasi? Ari nga makkafi i pangurugda nu natakitan ira na kapangngurugda onu nakaliwa i tadday nga kapangngurugda. (Sal. 119:165) Ta kada problemada, ari nga makkafi i pangurugda, nu ari, mas massikan yatun. (Sant. 1:2-4) Kunnasi ka nga mapeggan tu kunnatun nga masikan nga pangurug?

6. Sitaw nga nebase na ollu-siglo nga disipulos i pangurugda?

⁶ Napeggan tu pangurug i ollu-siglo nga disipulos base ta pakannammuda ta Katurakan anna ta nituddu ira ni Jesu-Cristo nga yatun i “kurug nga evanghelio.” (Gal. 2:5) I kinakurug ay i ngamin nga kuru-kurugan na Cristiano ira, nelagum tatun i kinakurug meyannung ta sakrifisio nga tavvu ni Jesus anna i kapaginnolena. Kumbinsidu gapa si apostol Pablo nga kurug danatun nga tuttuddu. Ngatta? Megafu ta “nipakanawag na i Masanto nga Tura anna pinakurug na tu i Cristo ay mawag tu maziga-riga, matay, ngem maginnolay gabbalaman.” (King. 17:2, 3) Inalawa na ollu-siglo nga disipulos danatun nga tuddu anna naddepende ira ta masanto nga espiritu tapenu malippawada i Uvovug na Dios. Naggigiammu ira tu mapia tapenu masiguraduda nga nebase ta Katurakan danatun nga tuttuddu. (King. 17:11, 12; Heb. 5:14) Ari ira nga napeggan tu pangurug megafu laman ta emosiodda, ni tu nasserbi ira kani Jehova megafu laman ta magayayya ira nga makikavulu ta kapangngurugda. Imbes tu kunna, nebase i pangurugda ta fustu nga ‘pakannammu ta Dios.’—Col. 1:9, 10.

7. Anni i meyuffun nittam nu nebase ta kinakurug ira na Biblia i pangurug tam?

⁷ Ari nga manguli i kinakurug ira ta Biblia. (Sal. 119:160) Angngariganna, ari nga manguli danatun maski nu natakitan ittam na kapangngurug tam onu nakaliwa yayya tu madammo. Ari gapa nga manguli danatun nu meparubang ittam ta problema. Yatutta mawag nga ammuattam tu mapia i ituttuddu na Biblia anna siguraduattam nga kurug danatun. Nu nebase ta kinakurug ira ta Biblia i masikan nga pangurug tam, megitta yatun ta angkla na barko. Makoffun yatun tapenu  mattalupaddian ittam nga matalo kani Jehova maski ta gitta-bagiu ira nga problema. Kunnasim nga mapasikan i kombiksiommu nga egga nikaw i kinakurug?

8. Segun ta 2 Timoteo 3:14, 15, kunnasi nga nabbalin tu kumbinsidu si Timoteo nga egga nisa i kinakurug?

⁸ Kumbinsidu si Timoteo nga egga nisa i kinakurug. Ngatta makagina yatun? (Bibbigan i 2 Timoteo 3:14, 15.) Ollu nga nituddu na yenana anna na kakona nisa “i Masanto ira nga Tura.” Ngem siguradu nga inusana gapa i tiempo anna sikanna tapenu gigiammuan danatun nga tura. Bilang resulta, ‘napafutuan nga kinurugna’ nga danatun i kinakurug. Tapus nagigiammu ni Timoteo, na yenana, anna na kakona i meyannung ta tuddu ira na Cristiano. Siguradu nga nagustuan ni Timoteo i aya nga nipasingan na disipulos ni Jesus anna kakayàna nga makikavulu nira anna uffunan i wawwaragina ta kongregasion. (Fil. 2:19, 20) Ngem ari nga nebase i pangurugna ta panagenona para ta kasittolena, nu ari, ta kinakurug ira nga namaddukko nisa kani Jehova. Mawag gapa nga gigiammuammu i Biblia adde ta makumbinsi ka ta tuttuddu natun meyannung kani Jehova.

9. Anni nga tallu nga primeru nga kinakurug i mawag nga pakurugammu ta baggim?

⁹ Tapenu makumbinsi ka, mawag tu pakurugammu ta baggim i tallu nga primeru nga kinakurug. Ollu, mawag tu kumbinsidu ka nga si Jehova nga Dios i Namaratu ta ngamin nga gannug. (Ex. 3:14, 15; Heb. 3:4; Nep. 4:11) Mekadua, mawag tu ammum i rason ira nu ngatta makasiguradu ka nga mensahe na Dios para ta totolay i Biblia. (2 Tim. 3:16, 17) Anna mekatallu, mawag tu siguradu ka nga egga i organisadu nga grupo na totolay ni Jehova nga maddayarayaw nisa ta pangigiya ni Cristo. Yatun nga grupo ay i Saksi ira ni Jehova. (Isa. 43:10-12; Juan 14:6; King. 15:14) Tapenu mapakurug mu ta baggim danatun nga primeru nga kinakurug, ari nga mawag nga ammum i ngamin meyannung ta Biblia. Gakkag mu nakuan nga iyusa i ‘pakapangnguam nga marrason’ tapenu mas makumbinsi ka nga egga nikaw i kinakurug.—Roma 12:1, NW.

10. Fuera ta pangammu ta kinakurug, anni paga i mawag nga makua tam?

¹⁰ Kabalimmu nga makumbinsi ta tallu nga primeru nga kinakurug meyannung ta Dios, ta Biblia, anna ta totolay na Dios, mawag nga usammu i Katurakan tapenu pakurugan danatun ta tanakuan. Ngatta? Megafu ta bilang Cristiano, egga i responsibilidad tam nga ituddu i kinakurug nga nagigiammu tam ta totolay nga maya nga magginna nittam. * (1 Tim. 4:16) Durante nga kumbinsiattam i tanakuan meyannung ta kinakurug ira ta Biblia, mapaladda i kombiksiottam meyannung tatun ira nga kinakurug.

11. Anni nga ehemplo i nipasingan ni apostol Pablo turi ta sinudduanna i totolay, anna kunnasi tam yayya maparigan?

¹¹ Turi ta sinudduan ni apostol Pablo i totolay, “kingngua na i adde na awayya na nga manga ta nono da tapenu mangurug ira kani Jesus ta pangiyusa na ta Dob ni Moises tuange ta nitura na profeta ira.” (King. 28:23) Kunnasi tam nga maparigan si Pablo ta panuddu tam ta tanakuan meyannung ta kinakurug? Mawag tu ariattam laman nga ikagi nira i ituttuddu na Biblia. Mawag nga uffunattam i estudiante tam ira ta Biblia nga gigiammuan anna pannonopan tu mapia i magigiammuda ira. Kayà tam nga alawatadda i kinakurug ari nga megafu ta irespetoda ittam, nu ari, megafu ta napakurugda mismu nga i magigiammuda ay kinakurug meyannung ta minaggiddu nga Dios tam.

12-13. Kunnasi nga moffunan na magana i ánada tapenu mattalupaddian ta kinakurug?

¹² Sikamu nga magana, siguradu nga kayànu nga mattalupaddian ta kinakurug i ánanu. Baka nonopannu nga nu mapia i kokkofudda ta kongregasion, mas makasta i approgresoda ta espiritual. Ngem tapenu mabbalin tu kumbinsidu i ánanu nga egga nira i kinakurug, ari nga makalanno i mapia nga kokkofun. Mawag tu egga i personal nga relasiodda ta Dios anna kumbinsidu ira nga kurug i ituttuddu na Biblia.

¹³ Tapenu metuddu na magana ta ánada i kinakurug meyannung ta Dios, mawag nga mangipasingan ira tu ehemplo gukaban na pabbalin tu mapia nga estudiante na Biblia. Mawag nga mangiyawa ira tu tiempo tapenu monag nga pannonopan i nagigiammuda. Tapus, metudduda gapa ta ánada nga kunnatun i kuadda. Mawag tu tudduadda i ánada nga usan i rimienta ira ta paggigiammu tu Biblia gitta na panudduda ta Bible study-da ira. Nu kunnatun i kuadda, moffunadda i ánada nga appresian si Jehova anna i usu-usanna tapenu iyawa i espiritual nga makan—“i mekatalo anna nannono nga doroban.” (Mat. 24:45-47) Sikamu nga magana, ari kamu nakuan makontentu ta panuddu ta ánanu ta primeru laman ira nga kinakurug ta Biblia. Uffunannu ira nga mapeggan tu masikan nga  pangurug gukaban na panuddu nira meyannung ta “kononaggan nga uray na Dios” adde ta posible, base ta edad anna abilidadda.—1 Cor. 2:10.

14. Ngatta mawag nga gigiammuattam i profesiya na Biblia? (Innan gapa i kahon nga “ Mepakanawag Mu Kari Danaw nga Profesiya?”)

¹⁴ Importante nga parte na Uvovug na Dios i profesiya megafu ta uffunan ittam natun nga mapeggan tu masikan nga pangurug kani Jehova. Anni ira nga profesiya i namasikan ta pangurug mu? Awayyana nga ikagim i profesiya ira meyannung “ta pangurianan ira nga aggaw.” (2 Tim. 3:1-5; Mat. 24:3, 7) Ngem anni paga i karuan nga natuppal ngana nga profesiya i mamasikan ta kombiksiommu? Angngariganna, mepakanawag mu kari nu kunnasi nga natuppal anna matuttuppal i profesiya ira ta Daniel kapitulo 2 onu Daniel kapitulo 11? * Nu nebase ta Biblia i pangurug mu, ari vuluvuga madaral yatun. Nonopan i ekspiriensa na wawwaragi tam nga napeppersigi ta Germany turi World War II. Maski nu ariadda interamente nga nalippawa i profesiya ira ta Biblia meyannung ta pangurianan ira nga aggaw, masikan i pangurugda ta Uvovug na Dios.

15-17. Kunnasi nga pinasikan na paggigiammu tu Biblia i wawwaragi tam nga pineppersigi na Nazi ira?

¹⁵ Turi ta nammaguray i Nazi ta Germany, rinivu ta wawwaragi tam i nefuku ta kampu konsentrasion. Kala-kalussaw ni Hitler anna na prominente nga ofisial nga si Heinrich Himmler i Saksi ira ni Jehova. Segun ta tadday nga sister, kinagi ni Himmler ta grupo na sister ira ta tadday nga kampu konsentrasion: “Awayyana nga mammaguray ta langi i Jehova-nu, ngem taw ta davvun, sikami i mammaguray! Innattam nu sinni i makapabbayag, sikamu nga Saksi onu sikami nga Nazi!” Anni i nakoffun ta totolay ni Jehova tapenu mattalupaddian nga matalo?

¹⁶ Ammu na Estudiante ira na Biblia nga namegafu nga mammaguray i Pappatulan na Dios turi 1914. Ari ngana ira nakaddagan ta grabe nga pangokkontra nga neparubang nira. Kumbinsidu  i totolay ni Jehova nga awan tu maski anni nga gobiernu na tolay i mamagimmang ta ketuppal na gakkag na Dios. Ari nga interamente nga malsa ni Hitler i kurug nga paddayaw onu ari yayya makepataddag tu gobiernu nga mas makapangngua anne ta Pappatulan na Dios. Kumbinsidu i wawwaragi tam nga duttal noka i tiempo nga mangultimu i pammaguray ni Hitler.

¹⁷ Nesimmu i kurugan na wawwaragi tam megafu ta ari nabbayag, nangultimu i gobiernu na Nazi. Si Heinrich Himmler nga nakkagi nga “taw ta davvun, sikami i mammaguray” ay mattattammang ngana para ta inangona. Turi ta mattattammang yayya, nasimmuanna si Brother Lübke, tadday nga dati nga nefuku nga ammu ni Himmler tu tadday ta Saksi ira ni Jehova. Megafu ta pakkadismaya, niyavu ni Himmler kani Brother Lübke: “Bueno, Estudiante na Biblia, anni ngana gafu i mesimmu?” Niyesplika ni Brother Lübke kani Himmler nga ta ollollu pagalaman, ammu ngana na Saksi ira ni Jehova nga ari nga mavviktoria i gobiernu na Nazi anna mapalawan ira. Si Himmler nga dati ay aru i kinakkagina tu marake meyannung ta Saksi ira ni Jehova ay awan tu nakagina tatun nga oras. Ari nabbayag, nappakamatay yayya. Anni i punto? Makoffun i paggigiammu tam ta Biblia nelagum ngana i profesiya ira tatun tapenu mapeggan ittam tu masikan nga pangurug ta Dios anna makapammakatalo ittam nu mapersigi.—2 Ped. 1:19-21.

18. Segun ta Juan 6:67, 68, ngatta kawagattam i “kurug nga pakannammu anna pakalippawa” gitta na nitura ni Pablo?

¹⁸ Mawag tu ipasingattam i aya tapenu mapakurug tam nga kurug ittam nga Cristiano. Ngem kawagattam gapa i “kurug nga pakannammu anna pakalippawa.” (Fil. 1:9) Ta nu ari, ‘malogon ittam laman nga mangurug ta maski anni nga ituddu na tolay nga minannaba-tabag,’ nelagum tatun i apostata ira. (Efe. 4:14) Turi ta aru ta disipulos ni Jesus i nagimmang nga manuttul nisa ta ollu-siglo C.E., nipasingan lagapa ni apostol Pedro i masikan nga kombiksionna nga egga kani Jesus i “uvovug nga mangiyawa ta inango nga adde ta ngangangay.” (Bibbigan i Juan 6:67, 68.) Maski nu ari nga nalippawa ni Pedro tatun nga tiempo i ngamin nga detalye danatun nga uvovug, nattalupaddian yayya nga matalo megafu ta nalippawana i kinakurug meyannung ta Cristo. Awayyam gapa mapasikan i kombiksiommu ta ituttuddu na Biblia. Nu kuammu yatun, mattalupaddian nga masikan i pangurug mu maski anni i mesimmu anna moffunammu i tanakuan nga mapeggan tu masikan nga pangurug.—2 Juan 1, 2.