1. Anni i inamin ni apostol Pablo?

EGGA ira i tiempo nga aminadu si apostol Pablo nga makafi yayya. Kinagina nga “manisinu nga makkafi” i baggina yatutta marigatan yayya nga kuan nu anni i fustu. Ari gapa nga kanayun nga tabbagan ni Jehova i pakimallona segun ta inekspektana. (2 Cor. 4:16; 12:7-9; Roma 7:21-23) Ammu gapa ni Pablo nga imammatan yayya na kumokkontra ira nisa nga makafi. * Ngem arianna nipamavulun i negatibo nga pagimamma na tanakuan onu na mismu nga pakkafianna ira tapenu manonona nga awan tu kwentana.—2 Cor. 10:10-12, 17, 18.

2. Segun ta 2 Corinto 12:9, 10, anni i importante nga leksion nga nagigiammu ni Pablo?

² Nagigiammu ni Pablo i tadday nga importante nga leksion—posible nga mabbalin tu masikan i tadday nga tolay maski nu matagenona nga makafi yayya. (Bibbigan i 2 Corinto 12:9, 10.) Kinagi ni Jehova kani Pablo: “Mas nga matageno i pakapangnguà nu makafi ka.” Kayà kagian natun nga pannuan ni Jehova i sikan nga makkurang kani Pablo. Ollu, ammuattam nu ngatta ariattam nakuan nga madismaya nu insultowan ittam na kumokkontra ira nittam.

3. Ngatta sigga-pagayayya nga alawatattam i panginsulto ira?

³ Awan tu maski sinni nittam i maya nga ma-insulto. Ngem nu insultowan ittam na kumokkontra ira anna kuruga madismaya ittam ta kakkagiadda, makkafi i nono tam. (Prov. 24:10)  Kunnasi tam gafu imammatan i panginsultoda? Kagitta ni Pablo, ‘sigga-pagayayya nga alawatattam i panginsultoda.’ (2 Cor. 12:10) Ngatta? Megafu ta i panginsulto anna pangokkontra ay seniales nga kurug ittam nga disipulos ni Jesus. (1 Ped. 4:14) Kinagi ni Jesus nga mapersigi i tagatuttulna ira. (Juan 15:18-20) Nesimmu yatun ta ollu siglo. Tatun nga tiempo, minammatan danuri nainfluwensian na kultura na Griego nga ari tu ma-uto anna makafi i Cristiano ira. Para gapa ta Judio ira, mekonsidera i Cristiano ira nga “alinno i paddiad-da anna awan tu ginigiammu da” kagitta da apostol Pedro anna Juan. (King. 4:13) Gittana makafi i Cristiano ira. Awan tu influwensiada ta pulitika onu pakapangnguada ta militar anna ari ira nga irespeto na totolay ta komunidad.

4. Anni i reaksion na ollu-siglo ira nga Cristiano ta negatibo nga pagimamma nira danuri kumokkontra?

⁴ Nipamavulun kari danuri na ollu-siglo nga Cristiano nga magimmang ira megafu ta negatibo nga pagimamma nira danuri na kumokkontra? Ari. Angngariganna, minammatan da apostol Pedro anni Juan nga dayaw i mapersigi gafu ta panuttul kani Jesus anna pangibillay ta tanakuan meyannung nisa. (King. 4:18-21; 5:27-29, 40-42) Awan tu rason nga mappasiran i disipulos ira. Maski nu ari nga nirespeto na totolay ira ta komunidad danuri ollu-siglo nga Cristiano, daka-dakal i neyuffudda ta tanakuan anne ta kumokkontra ira nira. Angngariganna, tulu-tuloy nga makoffun anna mamaggiddanama ta minillion nga totolay i libru ira ta Biblia nga nitura na karuan tatun nga Cristiano. Mammaguray ngana gapa ta langi i Pappatulan nga nilayyagayyada anna aranni ngana nga immagurayan natun i ngamin nga totolay. (Mat. 24:14) I makapangngua nga gobiernu na Roma gari nga namersigi ta Cristiano ira ay aru dagun ngana nga napawan ngem mammaguray ngana bilang patul ta langi danuri matalo nga disipulos. Natay ngana danuri kumokkontra nira. Anna nu mapaginnolay man ira, mabbalin ira noka nga sakup na Pappatulan nga nilayyagayya na Cristiano ira nga nikalussoda.—Nep. 5:10.

5. Segun ta Juan 15:19, ngatta ari nga irespeto na totolay i Saksi ira ni Jehova ta maddaggun?

⁵ Ta maddaggun, egga karuan nga totolay nga ariadda irespeto i Saksi ira ni Jehova anna uyu-uyawadda ittam megafu ta nonopadda nga ari ittam nga ma-uto anna makafi. Ngatta? Megafu ta ari tam nga paparigan i pagimamma danuri na nakapalevu nittam. Mappuppursigi ittam nga mabbalin tu mapakalinno, masippo, anna minattuppal. Ngem i totolay ta mundo, dayawadda danuri minappakatannang, arogante, anna rebelyoso. Ariattam gapa nga makiparte ta pulitika anna ariattam gapa makisali ta militar ira nga fuersa na maski anni nga nasion. Neruma ittam ta totolay ta mundo ta maddaggun yatutta nonopadda nga makafi ittam kumpara ta tanakuan.—Bibbigan i Juan 15:19; Roma 12:2.

6. Anni i metuttuppal ni Jehova megafu ta panguffunna ta totolena?

⁶ Maski nu imammatan ittam na totolay ta mundo nga makafi, usu-usan ittam ni Jehova tapenu ituppal i kappabbaw ira nga gannug. Ituttuppalna i pinaka-alawa nga kampania na pallayyagayya ta interu mundo. Ta maddaggun, mangipublisa i aripanna ira tu magazina ira ta pinaka-aru nga lengguahe anna pinaka-aru nga kopia ta davvun. Usu-usadda gapa i Biblia tapenu uffunan i minillion nga totolay tapenu pakastan i pattoleda. Ngamin nga dayaw taw ira nga kappabbaw nga netuppal ay meyawa kani Jehova. Mangusa yayya tu totolay nga gittana makafi ta pagimamma na mundo tapenu ituppal danaw nga makapabbaw nga gannug. Ngem kunnasi gapa nittam bilang indibidual? Moffunan kari gapa ittam ni Jehova  nga mabbalin tu masikan? Nu kunnatun, anni i mawag nga kuattam tapenu moffunanna ittam? Ikonsidera tam ngana i tallu nga espesipiko nga magigiammu tam ta ehemplo ni apostol Pablo.

7. Anni i tadday ta magigiammu tam kani Pablo?

⁷ Yaw i tadday ta magigiammu tam kani Pablo: Ari ka nga mattalo ta mismu nga sikan onu abilidad mu ta passerbim kani Jehova. Nu ta tolay laman, egga i rason ni Pablo tapenu mappakatannang anna mattalo ta baggina. Ziminakal yayya ta Tarso, i kabisera nga siudad na tadday nga probinsia na Roma. I Tarso ay mariku anna egga i madumu-rumug nga unibersidad tatun. Edukadu si Pablo megafu ta sinudduan yayya ni Gamaliel, tadday ta pinakarespetadu nga lider na Judio ira ta kaggawanna. (King. 5:34; 22:3) Nabbalin gapa tu tadday nga prominente nga tolay si Pablo ta kasi-Judiona ira. Kinagina: “Nu meyannung ta panuttul ta relihion na Judio ira, arayyu niakan i kasiddagunak-ku ira.” (Gal. 1:13, 14; King. 26:4) Ngem ari nga nattalo si Pablo ta baggina.

8. Segun ta Filipos 3:8, kunnasi nga minammatan ni Pablo i ganna-gannug ira nga nibattanna, anna ngatta ‘sigga-pagayayya yayya ta anni laman nga pakkafian’?

⁸ Magayayya nga nibattang ni Pablo i ganna-gannug ira nga namabbalin nakuan sa nga prominente. Kakuruganna, nikwentana ngamin danaw nga gannug nga “basura.” (Bibbigan i Filipos 3:8.) Dakal i nisakrifisio ni Pablo tapenu mabbalin nga disipulo ni Cristo. Nikalussaw yayya na kasi-Judiona ira. (King. 23:12-14) Pinala-palu anna nifuku gapa yayya na kaparehuna ira nga Romano. (King. 16:19-24, 37) Fuera paga tatun, ammu gapa ni Pablo nga imperfekto yayya yatutta kitezziga nisa nga kuan i fustu. (Roma 7:21-25) Ngem imbes nga mappaffu yayya ta kumokkontra ira nisa onu ta pakkafianna mismu, ‘sigga-pagayayya yayya ta anni laman nga pakkafian.’ Ngatta? Megafu ta nu makafi yayya, tatun nga masinganna i panguffun na Dios nisa.—2 Cor. 4:7; 12:10.

9. Kunnasi tam imammatan danuri gannug ira nga awan nittam?

⁹ Nu kayà tam nga mala i sikan nga maggafu kani Jehova, ariattam nakuan nonopan nga i pisikal nga sikan, edukasion, i naggafuanattam, onu i material nga kinariku i maggukug  nu kunnasi ittam kabalor. Ari tu danaw nga ganna-gannug i rason nu ngatta iyusa ittam ni Jehova. Kakuruganna, piga laman ta totolay na Dios i ‘ma-uto, makawayya onu atannang i paddia-paddianna segun ta paningan na tolay.’ Maski kunnatun, pinili ni Jehova nga usan “danuri mekwenta tu makafi.” (1 Cor. 1:26, 27) Yatutta nu awan nikaw i ganna-gannug nga nakagi ta gafu naw nga parapo, makapasserbi ka lagapa kani Jehova. Imammatammu danatun bilang oportunidad nga masingan i pakapangngua ni Jehova gukaban na panguffunna nikaw. Angngariganna, nu maganassikka turi ira ta manguestion ta pangurug mu, ipakimallo mu kani Jehova nga paggutukan naka nga idefensa i pangurug mu. (Efe. 6:19, 20) Nu marigatakka megafu ta serioso nga taki, ikiddom kani Jehova i sikan nga kawagammu tapenu makapattalupaddiakka nga okupadu ta passerbi nisa adde ta mawayyam. Kada masingammu i panguffun nikaw ni Jehova, mas dumakal i pangurug mu anna mas massikakka.

10. Ngatta gigiammuattam nakuan i ehemplo ira danuri matalo nga karakter na Biblia nga mabibbig ta Hebreo 11:32-34?

¹⁰ Malappo nga ginigiammu ni Pablo i Katurakan. Maruddu nga gigiammuanna i Uvovug na Dios anna aru i nammuanna nga ganna-gannug ta ehemplo ira danuri na matalo nga aripan ni Jehova nga mabibbigna. Turi ta nattura yayya ta Hebreo ira nga Cristiano, nikiddaw ni Pablo nira nga pannonopadda i ehemplo na aru nga matalo nga aripan ni Jehova. (Bibbigan i Hebreo 11:32-34.) Tadday tatun si Patul David. Mawag nga arubanganna ari laman i pangokkontra danuri na kalabanna, nu ari, na karuan nga dati nga kokkofunna. Durante nga innattam i ehemplo ni David, malippawa tam nu ngatta nakoffun kani Pablo i pannono ta ekspiriensa ira ni David anna nu kunnasi tam nga maparigan si Pablo.

11. Ngatta gittana makafi si David? (Innan i letratu ta vungun.)

¹¹ Minammatan na masikan nga suddalu nga si Goliat si David nga makafi. Turi ta nasinganna si David, ‘nigala-galona yayya.’ Kurug gapa nga mas masikan si Goliat, mas kumpleto i armasna anna mas nasanay yayya nga makiggerra. Ngem si David ay gittana makafi megafu ta abbing laman yayya anna ari yayya nga nasanay bilang suddalu. Ngem kakuruganna, masikan yayya. Nattalo yayya kani Jehova yatutta neddan yayya tu sikan tapenu affutan si Goliat.—1 Sam. 17:41-45, 50.

12. Anni paga i tadday nga kapurueba nga inarubang ni David?

¹² Egga paga tadday nga kapurueba nga inarubang ni David nga namakkafi nakuan anna nangufu ta sikanna. Matalo nga nasserbi si David ta sinunno ni Jehova nga patul na Israel, si Saul. Ta ollu, nirespeto ni Patul Saul si David. Ngem ta pappasa na tiempo, nappakatannang si Saul yatutta nappassil yayya kani David. Marake i pinattratu ni Saul kani David anna pinuruebanna paga lagu nga patayan yayya.—1 Sam. 18:6-9, 29; 19:9-11.

13. Anni i reaksion ni David ta ari patas nga pattratu nisa ni Patul Saul?

¹³ Maski nu ari nga patas i pinattratu ni Patul Saul kani David, nitulu-tuloyna lagapa nga ipasingan i respeto ta sinunno ni Jehova nga patul. (1 Sam. 24:6) Ari nga pinaliwa ni David si Jehova megafu ta marake ira nga kingngua ni Saul, nu ari, nattalo yayya kani Jehova nga iddanna yayya tu sikan nga kawaganna tapenu maattamman yaw nga mariga nga kapurueba.—Sal. 18:1, footnote na superskripsion.

14. Anni nga situasion i inarubang ni apostol Pablo nga kaparehu ta kani David?

¹⁴ Si apostol Pablo ay neparubang ta situasion nga kaparehu ni David. Ararayyu nga  mas makapangngua i kalaban ira ni Pablo anne nisa. Aru nga prominente nga lider ta kaggawanna i nangikalussaw nisa. Maruddu nga nipapala-paluda yayya anna nipefuku. Kagitta ni David, marake i nikatratu ni Pablo ta totolay nga kokkofunna nakuan. Kinokkontra paga lagu yayya na karuan ta kongregasion. (2 Cor. 12:11; Fil. 3:18) Ngem nalabanan ni Pablo i ngamin nga mangokkontra nisa. Kunnasi? Arianna nagimmang nga nallayyagayya maski nu kokkontradda yayya. Inayana lagapa i kapangngurugna ira maski nu dinismayada yayya. Anna pinaka-importante, matalo yayya ta Dios adde ta patena. (2 Tim. 4:8) Nalampasanna i darakal nga kapurueba ari tu megafu ta nattalo yayya ta sarilina nga abilidad, nu ari, megafu ta nattalo yayya kani Jehova.

15. Anni i gakkag tam, anna kunnasi tam makua yatun?

¹⁵ Meparubakka kari ta panginsulto onu pameppersigi na kaklasem, katrabahum, onu na ari Saksi nga kafamiliam onu parientes mu? Egga ngana kari i marake i pinattratuda nikaw ta kongregasion? Nu kunnatun, daddamman i ehemplo ira da David anni Pablo. Mawayyam nga kanayun nga ‘affutan i marakay ta pangngua ta mapia.’ (Roma 12:21) I gakkag mu ay ari tu ipatallo i batu ta frente na tolay nga kunna kingngua ni David, nu ari, ipatalatto mu i Uvovug na Dios ta ginnonopan anna giffutuan danuri na mangalawa tatun. Makuam yatun gukaban na pangiyusa ta Biblia tapenu tabbagan i pakkiavu ira na totolay, pabbalin tu marespeto anna masippo turi ira ta marake i pattratuda nikaw, anna gukaban na pangngua tu mapia ta ngamin maski ta kumokkontra nikaw.—Mat. 5:44; 1 Ped. 3:15-17.

16-17. Anni i ari vuluvuga nakattaman ni Pablo?

¹⁶ Nige nga nabbalin tu disipulo ni Cristo si apostol Pablo, dati yayya nga mabbing nga awan tu respetona nga nameppersigi ta tagatuttul ira ni Jesus. (King. 7:58; 1 Tim. 1:13) Si Jesus mismu i namagimmang kani Pablo nga kilala bilang Saul ta panara-darumna ta Cristiano nga kongregasion. Naguvovug si Jesus kani Pablo maggafu ta langi anna pinavvulinna yayya. Tapenu metoli i paningan ni Pablo, fuersadu nga nakiyuffun yayya ta mismu nga totolay nga pineppersigina. Mapakalinno nga inalawana i panguffun na disipulo nga si Ananias nga nangitoli ta paninganna.—King. 9:3-9, 17, 18.

 ¹⁷ Turi kua, nabbalin si Pablo nga tadday ta prominente nga miembro nga Cristiano nga kongregasion. Ngem arianna vuluvuga nakattaman i nituddu nisa ni Jesus mappange ta Damasco. Nattalupaddian nga mapakalinno si Pablo anna sigga-paran nga inalawana i uffun na kapangngurugna ira. Inanuguna nga “kuruga dakal i meyuffud-da” nisa.—Col. 4:10, 11.

18. Ngatta nu mittan manaki tam nga alawatan i uffun na tanakuan?

¹⁸ Anni i magigiammu tam kani Pablo? Turi ta ollu tam pagalaman nga makikavulu ta totolay ni Jehova, awayyana tu sigga-paran ittam nga alawatan i uffun na tanakuan megafu ta ammu tam nga abbing ittam laman ta espiritual anna aru i mawag nga gigiammuattam. (1 Cor. 3:1, 2) Ngem kumusta gapa ta maddaggun? Nu nabayag ittam ngana nga massesserbi kani Jehova anna aru ngana i ekspiriensa tam, baka ari ngana ittam nga sigga-paran nga alawatan i uffun mas ngana nu naggafu yatun ta bagu pagalaman ta kinakurug. Ngem maruddu nga usu-usan ni Jehova i wawwaragi tam tapenu pasikannan ittam. (Roma 1:11, 12) Mawag tu ammu tam yatun nga kinakurug tapenu mala tam i sikan nga iyawa ni Jehova.

19. Kunnasi nga nakua ni Pablo i ngamin nga kappabbaw nga gannug nga kingnguana?

¹⁹ Egga ira i nakua ni Pablo nga kappabbaw nga gannug turi ta nabbalin yayya nga Cristiano. Ngatta? Megafu ta nagigiammuna nga ari tu importante nu anni i naggafuan na tadday nga tolay, nu kunnasi kasikan yayya, i naddena nga edukasion, onu i karu na kuartuna. Nu yayya ay mapakalinno anna mattalo kani Jehova, aru nga makasta nga gannug i makuana. Paray nakuan tu parigattam ngamin si Pablo gukaban na (1) pattalo kani Jehova, (2) panga tu leksion ta ehemplo ira na Biblia, anna (3) pangalawa ta uffun na kapangngurug tam ira. Nu kunnatun, maski nu matageno tam nga makafi ittam, pasikannan ittam ni Jehova!