Ipasingan na ebidensia nga nabbalin tu Atannang nga Pari si Jesus turi ta nabawtisowan yayya ta 29 C.E. Anni yatun nga ebidensia? Ta nikebawtiso ni Jesus, nipresentana i baggina bilang tavvung ta altar na “uray” na Dios. (Gal. 1:4; Heb. 10:5-10) Megafu ta i altar ay tadday nga importante nga parte na templo, awayyana nga limittuag gapa i espiritual nga templo turi ta nabawtisowan si Jesus. Irepresenta na dakal nga espiritual nga templo ni Jehova i ngamin nga gannug nga mamapposible para nittam tapenu fustu i paddayaw tam nisa base ta sakrifisio ni Jesus.—Mat. 3:16, 17; Heb. 5:4-6.

Kawagan ta dakal nga espiritual nga templo i tadday nga atannang nga pari. Yatutta sinunno ni Jehova si Jesus bilang atannang nga pari gukaban na “Espiritu Santo anna pakapangngua.” (King. 10:37, 38; Mar. 1:9-11) Ngem kunnasi tam makasiguradu nga natunno si Jesus bilang Atannang nga Pari nige na patay anna kapaginnolena? Moffunan ittam na angngarigan da Aaron anna na tumunug ira nisa nga atannang nga pari tapenu matabbag yaw nga pakkiavu.

Segun ta Dob nga niyawa ni Jehova kani Moises, i atannang nga pari laman i awayyana nga tullung ta Kuruga Masanto nga lugar na tabernakulo anna turi kua, ta Kuruga Masanto nga lugar na templo. Egga i kurtina nga mangisina ta nallatanan naw nga Kuruga Masanto anna na Masanto nga lugar. Tallungan laman na atannang nga pari i abbag na kurtina ta Aggaw na Pangitavvung. (Heb. 9:1-3, 6, 7) Nu kunnasi nga natunno bilang atannang nga papari da Aaron anna na katunugna ira nigeda nga simillung “adde ta abbag na kurtina” na tabernakulo, siguradu nga natunno si Jesus bilang Atannang nga Pari na dakal nga espiritual nga templo ni Jehova nige yayya nga natay. Tapus, ‘nanaffu yayya adde ta abbag na kurtina—ikayana nga kagian ay i mismu nga baggina’ tapenu mattolay yayya ta langi. (Heb. 10:20) Megafu taw nga rason, tinukoy ni apostol Pablo si Jesus nga zimittal bilang “Katannangan nga Pari” anna nanaffu yayya ta ‘mas dakal anna awan tu pakkuranganna nga tolda, anna ari tu pinataddag na tolay,’ anna ta “mismu ta langi.”—Heb. 9:11, 24.

Awan tu naddumanna nu kanni nga napabbalin tu legal i bagu nga pakkasinabban anna nu kanni nga nagefekto yatun. Ngatta? Tagga ta minune si Jesus ta langi anna nipresentana i balor na perfekto nga inangona bilang tolay para nittam, kingnguana i ollu ta tallu nga dakkua nga mamabbalin tu legal ta bagu nga pakkasinabban. Danatun gabbalaman nga dakkua i mamagefekto ta pakkasinabban. Anni danatun nga dakkua?

Ollu, minarubang si Jesus kani Jehova; mekadua, nipresenta ni Jesus i balor na sakrifisiona kani Jehova; anna mekatallu, inalawa ni Jehova i balor na nevuvvu nga daga ni Jesus. Adde ta ari nga makua danaw nga tallu nga dakkua, ari paga nga maffunsina i bagu nga pakkasinabban.

Ari nga kagian nittam na Biblia i eksakto nga tiempo nu kanni nga inalawa ni Jehova i balor na sakrifisio ni Jesus. Yatutta, ariattam makagi i eksakto nga tiempo nu kanni nga napabbalin tu legal i bagu nga pakkasinabban anna nu kanni nga nagefekto yatun. Ngem ammu tam nga minune si Jesus ta langi mafulu nga aggaw nige na Pentecostes. (King. 1:3) Ta lagum natun nga baddi nga periodo na tiempo, nipresentana i balor na sakrifisiona kani Jehova anna inalawa ni Jehova yatun. (Heb. 9:12) Megafu ta nesimmu ta Pentecostes, egga i masingan nga ebidensia nga maffuffunsina ngana i bagu nga pakkasinabban. (King. 2:1-4, 32, 33) Manawag gafu nga nagefekto ngana i bagu nga pakkasinabban.

Bilang sumario, i bagu nga pakkasinabban ay napabbalin tu legal anna nagefekto kabalin nga inalawa ni Jehova i balor na nevuvvu nga daga ni Jesus anna pinabbalinna nga parte na pakkasinabban i nazelugan ira. Kabalin natun, naffunsina ngana i pakkasinabban nu sitaw si Jesus bilang Atannang nga Pari i nabbalin tu Mangibaggi tatun.—Heb. 7:25; 8:1-3, 6; 9:13-15.