Ta tumunug nga dagun, neyanunsio ta familia na Bethel nga kawagan ira i boluntario nga masserbi ta South Africa branch megafu ta egga i bagu nga printing press da. Nappalista ngà anna kessaya ngà ta tadday ngà ta napili. Tallu paga nga Bethelite nga Canadian i napili—da Dennis Leech, Bill McLellan, anna Ken Nordin. Nekagi nikami nga mabbayag kami ta South Africa!

Nagagal ngà ta yenà tapus kukku nisa: “Mama, egga kagiakku niko. Umay ngà ta South Africa!” Ari kuruga mattattannug i yenà ngem masikan i pangurug na anna madukko i relasion na kani Jehova. Awan kuruga tu kinagi na nio. Ngem ammù tu suportadu nà. Ari vuluvuga kinontra na magana ku i desisiokku maski nu maraddam ira nga meyarayyu ngà nira.

Minay kami labbi nga appa ta Bethel ta Brooklyn. Tallu vulan nga sinanay da kami nu kunnasi usan i tadday nga klase na printing press. Tapus nabbarku kami mappange ta Cape Town, South Africa. Mabbente anios ngà pagalaman tatun nga tiempo. Gabi ngana turi ta pinegafuanammi i mabayag nga pinabbiahe mi ta tren maggafu ta Cape Town mappange ta Johannesburg. Ummumma kami nga nakadattal ta tadday nga baddi nga ili na Karoo. Mamaga-maga yatun nga lugar nu sitaw kitakkamfu anna kiteppatu. Nassigig kami ta benta anna ninono mi nu anni tamma nga klase na lugar yatun. Anni tamma i inangnga-angngayammi? Ngem nappasa i piga ragun, nappasiar kami uli tatun anna mas nagustuammi ngana danatun nga makakkasta anna baraddi nga ili anna i memammo nga pattoleda.

Piga ragun nga sakan i nanangngaw ta kakkasta anna komplikadu nga Linotype machine. Ipuestù i letra ira na kada linia nga meyimprenta ta magazina nga Watchtower anna Awake! Magimprenta i branch office tu magazina ira ta aru nga lengguahe, ari laman nga para ta South Africa, nu ari, ta tanakuan paga nga nasion ta Africa. Megafu tatun nga bagu nga rotary printing press, nakadde kami ta South Africa anna magayayya kami ta maruddu nga napakaru i nikeyusan natun!

Tapus nattrabahu ngà gapa ta Factory Office nga manangngaw ta nadduruma nga trabahu ta  printing, shipping, anna translation. Napakaru i mawag nga kuakku ngem magayayya ngà!

Ta 1968, inatawà si Sister Laura Bowen nga maddian aranni ta Bethel. Tadday yayya nga payunir anna nabboluntariu bilang typist ta Translation Department. Tatun ira nga tiempo, ari nga mepamavulun nga maddian ta Bethel danuri bagu nga kasal yayya nga niyasayn kami na branch bilang special pioneer. Mediu mavurung ngà gafu ta mafulu ragun ngà ngana ta Bethel. Ariakku probleman i makan anna i paddianakku. Kunnasi mi tamma gafu mabadyet i allowance mi? Bilang special pioneer, meddakkami tu taggi-25 rand (onu $35 U.S. tatun nga tiempo) kada vulan. Ngem iyawa da laman yatun nu madde mi i mekiddaw nga bilang na oras, passinoli, anna mepalima nga literatura. Tatun gapa i pagapammi tu pappaga mi para ta renta, makan, pamasahe, pappadoktor, anna karuan paga nga paggastuan.

Nappayunir kami aranni ta siudad na Durban ta Indian Ocean. Napakaru i Indian tatun anna aru nira i gaka-gaka danuri na minay ta South Africa tapenu mattrabahu ta industria na asukar turi ta ma-1875. Tanakuan ngana sangawe i pagalegadda, ngem parefu lagapa i kultura anna i maka-makadda, nelagum ngana i masingngo ira nga curry. Mabbida gapa ira tu English yayya nga mabi mi laman ira nga nalayyagayyan.

Mekiddaw ta special pioneer ira nga marreport tu 150 nga oras kada vulan ta ministerio. Ta ollu nga aggaw, niyiskediul mi ni Laura nga mallawakkami tu annam nga oras. Kiteppatu anna magugguggang kami. Awan tu awayya mi nga tolian anna awan gapa tu Bible study mi yayya nga annam nga oras kami nga namala-balay. Nappasa i manganannuan turi ta mamala-balay kami, iningakku i relò, tapus 40 minuto pagalaman balo i nappasa! Yayya nga kukku ta baggì, “Makapabbayag kami kari ta pa-special pioneer?”

Ari nabbayag, naka-adjust kami gabbalaman. Kada aggaw, mabbalukkami tu sandwich anna mangipay kami tu soup onu kafe ta termo. Nu kayà mi i mammerienda, iparada mi i baddi nga takay mi nga Volkswagen ta lirum na tadday nga kayu. Nu mittan, umaranni nikami i abbarabbing nga Indian tapus dudulangngaddakami ta tanakuan i itchura mi. Piga aggaw laman i nappasa, napansin mi nga kabalin na dua onu tallu nga oras ta pamministerio, mabi ngana laman nga mappasa i tangaggaw.

Anni ngana mabba i ayayya mi nga ilayyagayya i kinakurug ta minammadulo ira nga Indian tatun nga teritoria! Minangngikakua ira, masippo, anna iddukadda i Dios. Aru gapa nga Hindu i nagginna ta mensahe mi. Kakayà da nga makannammuan i meyannung kani Jehova, kani Jesus, ta Biblia, ta mappange nga memammo nga napabagu nga mundo, kunne na gapa i iddanama para ta natay ira. Kabalin na tanga-ragun, 20 ngana i Bible study mi. Kadaggaw, enjoy mi i makipakkan kavulu i familia ira na Bible study mi. Talaga magayayya kami tatun!

Nedog kami nga masserbi ta sirkito ta kongregasion ira nga aranni ta pipi na makakkasta nga Indian Ocean. Kada ligguan, nadduruma nga balay i naddianammi ta binisita mi ira. Nakavulu mi gapa i wawwaragi ta ministerio anna pinagaram mi ira. Trinatu da kami nga gitta na kafamilia da anna na-enjoy mi ira nga kavulu kunne na gapa i ána da anna i alaga da ira nga ayam ta baleda. Na-enjoy mi yatun nga dua nga ragun. Kabalin na, gavva nga egga i nattawag maggafu ta branch office. Kinagi nio na tadday nga brother: “Okay kari laman nikamu nga manoli kamu ngana taw ta Bethel?” Nitabbag ku nisa: “Magayayya kami ngana gare taw.” Ngem siempre, sigga-parakkami nga mappeyusa maski sitaw kami nga meyasayn.

Nattrabahu ngà ta Service Department ta panolì ta Bethel nu sitaw pribilehiò nga makatrabahu i aru nga masirib nga brother. Tatun ira nga tiempo, kabalin nga mabbisita i manangngal ta sirkito ta kongregasion, mangipatulug yayya tu report ta branch. Tapus patulugan gapa na Service Department tu tura i kada kongregasion base tatun nga report. Gakkag danatun nga tura nga mamagaram anna mangiyawa tu maski anni nga direksion  nga kawagan. Malallappo i sekretario ira nga itransleyt ta English i report ira na manangngal ta sirkito nga netura ta Xhosa, Zulu, anna tanakuan paga nga lengguahe. Tapus itransleyt da gapa i tura ira maggafu ta branch ta lengguahe ira ta Africa. Mappabalo ngà tatun ira nga malallappo nga transleytor nga nanguffun nio tapenu malippawa ku i pakarigatan na wawwaragi tam nga black African.

Tatun nga tiempo, apartheid i sistema na gobiernu ta South Africa. Kayà na kagian, egga i napili ira nga lugar nga paddianan na kada lahi yatutta ari kuruga makkaravulu i nadduruma i lahi da. Usan lagapa na wawwaragi tam nga black African i sarili da nga lengguahe ta pabbirida da, kunne na gapa ta pallayyagayya da, anna mevulu lagapa ira ta kongregasion nga mangusa ta lengguahe da.

Awan kuruga tu ammammù nga black African megafu ta kanayun nga English i paguvovug na totolay ta teritoria na kongregasion nga neyasaynammi. Ngem tatun nga tiempo, egga ngana i chansà nga mannammuan i kultura anna i kostumbre ira na black African. Nammuakku i problema ira na wawwaragi megafu ta lokal ira nga tradision anna relihioso ira nga pangurug. Talaga magutu-gutu ira! Manaki da nga tuttulan i ari nebase ta Biblia nga tradision, kunne na gapa i espiritistiko ira nga annangngua maski nu grabe i pangokkontra nira na kafamilia anna kalugaradda. Aru gapa i poppobre ta babario ira. Alinno laman i ginigiammu da ngem irespeto da i Biblia.

Pribilehiò gapa i manguffun ta karuan nga kaso ta korte meyannung ta lallaguray nga maddayaw anna neutralidad. Talaga napasikan i pangurug ku ta nasingakku i kinamatalo anna i gutu na abbing ira nga Saksi nga napapanaw ta eskuela megafu ta manaki da i makisali ta pakimallo anna relihioso ira nga pakkansion.

Egga paga i tadday nga problema na wawwaragi ta baddi nga nasion ta Africa nga magalan gari tu Swaziland. Turi ta natay si Patul Sobhuza II, obligadu i ngamin nga taga-tari nga makipartisipa ta ritual ira para ta natay. Mawag tu mappakalbu i lallaki anna gappattan gapa na babbay tu ababba i vu da. Napeppersigi i aru nga wawwaragi gafu ta manaki da i makisali tatun. Egga gare i koneksion natun nga ritual ta paddayaw ta inafu. Magaya-ayayya kami megafu ta kinamatalo da kani Jehova! Aru i nagigiammu mi ta kinamatalo  anna pappasa-pasensia na wawwaragi tam nga African anna gafu tatun, napatuyag i pangurug mi.

Ta 1981, nattrabahu ngà mangana uli ta Printery. Manguffun ngà ta pangusa tu computer ira ta pagimprenta. Exciting yatun nga tiempo! Aru ngana i nangulian na metodo ira ta pagimprenta. Tapus egga i sales representative nga nangiyawa ta branch tu phototypesetter nga awayya mi nga purueban tu libre. Megafu tatun, natalianan i siam nga Linotype machine tu lima nga bagu nga phototypesetter. Bagu ngana gapa nga printing press i meyusa. Megafu tatun, mas minaru ngana i meyimprenta mi!

Megafu ta computer ira, nakanono kami tu bagu ira nga metodo ta composition nga mangusa tu MEPS onu i Multilanguage Electronic Publishing System. Daka-dakal ngana i napprogresowan na teknolohia namegafu tagga ta nagali kami nga appa nga Canadian Bethelite ta South Africa! (Isa. 60:17) Para-parehu kami ngana gapa nga nangatawa tu payunir ira nga sister nga makasta i espiritualidad da. Massesserbi kami lagapa ni Bill ta Bethel ngem naffamilia ngana da Ken anna Dennis.

Umara-aru i trabahu ta branch. Metransleyt ngana i nebase-Biblia ira nga literatura ta umara-aru nga lengguahe tapus meyimprenta danatun anna mepatulug ta karuan nga branch. Megafu tatun, kawagan na Bethel i bagu nga building. Nipataddag yatun na wawwaragi ta Johannesburg anna nidedika da yatun turi ta 1987. Magayayya ngà ta nasingakku ngamin danatun nga papprogreso anna aru dagun nga nakapasserbi ngà bilang miembro na Branch Committee ta South Africa.

Ta 2001, fermi i nikasurpresa mi ta nembitan ngà nga masserbi bilang miembro na Branch Committee ta United States nga bagu laman nga nabuu tatun nga tiempo. Maraddam kami ta panawammi ngana i trabahu anna kokkofummi ta South Africa ngem excited kami nga mabbalin tu parte na familia na Bethel ta United States.

Ngem mavurung kami ta ararayyu kami ngana nu kua ta bako ngana nga katugangakku. Baddi laman saw i meyuffummi nisa nu egga kami ngana ta New York. Ngem nabboluntariu i tallu nga asipag ku nga manguffun ira ta pisikal, emosional, anna finansial nga pakawagan na yena da. Kinagi da kani Laura: “Ari kami nga makapa-full-time. Ngem nu tangngawammi si Mama, makapattulu-tuloy ka ta asayment mu.” Kuruga mappabalo kami nira.

Kunnatun gapa i kingngua na manung ku anna na hipag ku nga maddian ta Toronto, Canada. Ira ngana i nanangngaw ta balu nga yena mi. Maturu tu 20 dagun ngana nga kabbalay da yayya. Talaga appresiammi i pangiddu anna i panangngal da ta nisa adde ta patena ari nga nabbayag kabalimmi nga zimittal ta New York. Bendision talaga i kapeggan tu familia nga minassakrifisio. Nagadjust ira tapenu tangngawan i bako anna lakay ngana nga magana mi. Talaga madammo nga responsibilidad yatun!

Ta United States, piga ragun nga nattrabahu ngà ta pamadday tu literatura nga nabbalin ngana tu mas high-tech anna simple. Nikanni laman gapa, mattrabahu ngà ta Purchasing Department. Kurug tu magayayya ngà nga ta nappasa nga 20 nga dagun, parte ngà naw nga daka-dakal nga branch nga mabbilang ngana tu ma-5,000 nga Bethelite anna 2,000 nga commuter!

Ta nappasa nga 60 dagun, ariakku nanono nga kunnaw i pabbalinakku. Kanayun nga buu i suporta nio ni Laura. Talaga makakkasta i pinattolay mi. Appresiammi i napakaru nga asayment nga neyawa nikami anna i ngamin nga masippo nga totolay nga nakatrabahu mi ta aru nga branch nga binisita mi ta nadduruma nga parte na mundo. Maturu ngana tu 80 i dagukku, yayya nga baddi ngana laman i mepatrabahu nio ta aru ngana nga kualipikadu nga mabbing nga brother i nasanay tapenu kuan danatun.

Kinagi na salmista: “Magayayya i nasion nga i Dios na ay si Jehova.” (Sal. 33:12, NW ) Mangurug ngà tatun! Dakal i appabalo ku nga nakapasserbi ngà kani Jehova kavulu i magayayya nga totolena.