1. Anni i kingngua ni Jehova para nikaw?

KUNNASI ka nga nabbalin tu tadday nga Saksi ni Jehova? Ollu, awayya na tu nammuammu i ‘mapia nga dumug’ ta magana mu, ta katrabahum, kaeskuelam, onu ta pamala-balay na Saksi ira ta dian nu. (Mar. 13:10) Tapus egga i tolay nga nisakrifisio na i oras na anna nallallappo tapenu me-Bible study ka. Ta pab-Bible studym, nagigiammum nga ayatan si Jehova anna nammuammu nga ayatan naka. Niyaranni naka ni Jehova ta kinakurug tapus sangawe, tadday ka ngana nga disipulo ni Cristo anna iddanamammu nga mattolay ka tu mannanayun. (Juan 6:44) Siguradu nga mappappabalo ka kani Jehova nga egga i pinaguyu na tapenu metuddu nikaw i kinakurug anna inalawa naka bilang tadday ta aripan na.

2. Anni i gigiammuattam taw nga artikulo?

² Sangawe ta ammu tam ngana i kinakurug, egga i pribilehio tam nga uffunan i tanakuan tapenu mevulu ira nittam ta dalan mappange ta inango. Awayya na tu mabi ngana laman para nittam nga layyagayyan i totolay. Ngem baka marigatan ittam nga iyofer i Bible study anna ikondukta yatun. Kunnatun kari i matageno mu? Makoffun nikaw i karuan nga suhestion taw nga artikulo. Ammuattam nu anni i mamaguyu nittam tapenu manguffun ta pangngua tu disipulos. Gigiammuattam gapa nu kunnasi ittam lagapa nga makapab-Bible study maski nu marigatan ittam nu karuan. Ollu, ammuattam labbi nu ngatta mawag tu layyagayyattam i totolay anna ituddu nira i mapia nga dumug.

3. Ngatta mallayyagayya ittam?

³ Ta kegga ni Jesus taw ta davvun, egga i dua nga trabahu nga nibilin na ta disipulos na. Ollu, kinagi na nira nga ilayyagayya da i makasta nga dumug na Pappatulan tapus nipasingan na  nira nu kunnasi da nga makua yatun. (Mat. 10:7; Luc. 8:1) Angngarigan na, kinagi na ta disipulos na nu anni i kuadda nu magginna i totolay ta mensahe na Pappatulan, anna nu anni gapa i kuadda nu manaki da i magginna. (Luc. 9:2-5) Niprofesiya na gapa nu sitaw i pagaddetan na layyagayyan na disipulos na. Mawag tu layyagayyadda i “ngamin nga sinolay.” (Mat. 24:14; King. 1:8) Maski nu alawatan na totolay i mensahe onu ari, nibilin ni Jesus ta disipulos na nga ilayyagayya da i meyannung ta Pappatulan na Dios anna nu anni i ituppal natun.

4. Segun ta Mateo 28:18-20, anni paga i mawag nga kuattam fuera ta pallayyagayya?

⁴ Anni i mekadua nga nibilin ni Jesus? Kinagi na ta disipulos na nga tudduadda i totolay tapenu parulattan i ngamin nga nibilin na. Ngem kurug kari i kakkagian na karuan nga nepatrabahu laman ta ollu-siglo ira nga Cristiano i pallayyagayya anna panuddu? Ari. Nipasingan ni Jesus nga mattulu-tuloy yatun nga importante nga trabahu ta tiempo tam “adde ta panuppalan na mundo.” (Bibbigan i Mateo 28:18-20.) Nibilin ni Jesus yatun nga trabahu tagga ta nappasingan yayya ta maturu tu 500 nga disipulos na. (1 Cor. 15:6) Gukaban gapa na sirmata, egga i nipakannammu ni Jesus kani Juan. Manawag tatun nga ekspektan na nga uffunan na ngamin nga disipulos na i totolay, tapenu makannammuadda i meyannung kani Jehova.​—Nep. 22:17.

5. Segun ta 1 Corinto 3:6-9, kunnasi nga niyilustra ni Pablo i koneksion na pallayyagayya ta panuddu?

⁵ Nigitta ni apostol Pablo i pangngua tu disipulos ta pamadakal tu mula. Ari laman gafu tu basta pammula tu vukal i kuattam. Niperaddam na ta taga-Corinto ira: ‘Sakan i nammula, si Apolos i nabbaya, sikamu i koman na Dios.’ (Bibbigan i 1 Corinto 3:6-9.) Sittam i mattrabahu ta ‘koman na Dios’ yayya nga ariattam gafu laman nga imula i vukal. Bayatattam gapa yatun anna kanayuttam nga sifutan i paddakal na mula tam. (Juan 4:35) Ngem mawag gapa nga daddammattam nga i Dios i mamadakal ta mula.

6. Anni i mawag nga kuattam tapenu matudduattam i totolay?

⁶ Ala-alegattam “danuri mepangngo nga mangalawa tu mannanayun nga inango.” (King. 13:48, NW ) Ngem tapenu mabbalin ira tu disipulos, mawag tu uffunattam ira nga (1) malippawa, (2) alawatan, anna (3) iyaplika i magiggigiammu da ta Biblia. (Juan 17:3; Col. 2:6, 7; 1 Tes. 2:13) Makoffun i ngamin ta kongregasion ta Bible study ira nu ipasingadda i aya ta nira anna nu ipatageno da ta nira nga malawa ira ta study ira. (Juan 13:35) Aru gapa nga tiempo anna sikan i ufutan na mangi-Bible study tapenu moffunan na i Bible study na nga ulian i pangurug na ira onu annangngua nga ‘maladda i nikepataddag na.’ (2 Cor. 10:4, 5) Awayya na tu kawagan i piga nga vulan tapenu moffunan i Bible study nga kuan yatun nga panguli ta pattolena tapenu madde na i bawtismo. Ngem sulit yatun.

7. Anni i mamaguyu nittam tapenu layyagayyan anna tudduan i totolay?

⁷ Ngatta layyagayyattam i totolay anna tudduattam ira tapenu pabbalinan ira tu disipulos? Ollu, megafu ta ayatattam si Jehova. Nu kuammu i adde na mawayyam tapenu matuttul i bilin nga mallayyagayya anna mangngua tu disipulos, ipasa-pasingammu i aya mu ta Dios. (1 Juan 5:3) Pannonopammu yaw: Pinaguyu naka na aya mu kani Jehova tapenu mallayyagayya ta babalay. Mabi kari laman yatun? Ari. Turi ta umaranni ka ta ollollu nga balay nga layyagayyammu, naggudu-gudu ka kari? Magga ngay! Ngem ammum nga yatun i kayà ni Jesus nga kuammu. Yayya nga sinuttul mu  yatun nga bilin. Tapus ta pappasa na tiempo, mas mabi ngana laman para nikaw i mallayyagayya. Ngem kumusta gapa ta pangikondukta tu Bible study? Baka maggudu-gudu ka ngana nu manono mu yatun. Ngem nu mappoffukka kani Jehova tapenu malsam i gudum anna makonnug ka tu gutu tapenu meyofer mu i Bible study, uffunan naka ni Jehova tapenu mapaguyu ka nga mangngua tu disipulos.

8. Segun ta Marcos 6:34, anni paga i mamaguyu nittam tapenu tudduan i totolay?

⁸ Mekadua, paguyuan ittam na aya tam ta kasittoletam tapenu ituddu nira i kinakurug. Mittan, nababbannag si Jesus anna i disipulos na megafu ta aru i nilayyagayyadda. Mawag da i umay ta tadday nga lugar tapenu magibannag. Ngem nalegan ira na aru nga totolay. Megafu ta ikallo ira ni Jesus, sinudduan na ira tu “aru nga ganna-gannug.” (Bibbigan i Marcos 6:34.) Nallallappo nga nanuddu si Jesus maski nu nababbannag yayya. Ngatta? Ammu na gare i mataga-tageno na totolay. Kayà na ira nga uffunan megafu ta masingi-singan na i pazziga-riga da anna talaga kawagadda i iddanama. Kunnatun gapa i totolay ta kaggawattam maski nu gitta na magayayya ira anna kontentu ngana ta pattoleda. Gitta da i karneru nga napagurayan anna awan tu pastor nga mangigiya nira. Dineskriba ni apostol Pablo danatun nga totolay nga awan tu Dios da anna awan tu iddanama da. (Efe. 2:12) Egga ira ta “dalan nga mappange ta kadaral”! (Mat. 7:13, NW ) Nu pannonopattam nu ngatta kawagan na totolay ta teritoria tam i meyannung ta Dios, paguyuan ittam na aya anna allo tapenu uffunan ira. Oferattam ira tu Bible study. Yatun i kapianan nga makua tam tapenu moffunan ira.

9. Segun ta Filipos 2:13, kunnasi naka moffunan ni Jehova?

⁹ Baka magalangan ka nga iyofer i pab-Bible study megafu ta kawagan i aru nga tiempo ta papprepara anna pangikondukta tatun. Nu kunnatun i mataga-tageno mu, ipakimallo mu yatun kani Jehova. Mappoffukka nisa tapenu mapaguyu ka nga magaleg tu Bible study anna mekonduktam yatun. (Bibbigan i Filipos 2:13.) Nipasiguradu nittam ni apostol Juan nga tabbagan na Dios i pakimallo ira nga mekunnay ta urena. (1 Juan 5:14, 15) Makasiguradu ka gafu nga uffunan naka ni Jehova tapenu mapaguyu ka nga tudduan i totolay.

10-11. Anni i awayya na tu makefugag nittam tapenu mangikondukta tu Bible study?

¹⁰ Kuruga importante para nittam i trabahu nga panuddu. Ngem maski nu anni i aya tam nga mangngua tu disipulos, baka marigatan ittam. Ammuattam i karuan nga rason nu ngatta marigatan ittam, anna nu kunnasi tam nga marubang danatun.

¹¹ Matageno tam nga limitadu laman i makua tam megafu ta situasiottam. Angngarigan na, bako onu lakay ngana i karuan nga wagi tam tapus mataki gapa i karuan. Nu kunnatun i situasiommu, nonopammu i tadday nga nagigiammu tam ta COVID-19 pandemic. Puede gabba ittam nga mab-Bible study maski nu gukaban laman na gadyet tam. Puede ka gafu nga makegafu anna mangikondukta tu Bible study maski nu egga ka laman ta balem! Egga paga i tadday nga bentaha natun. Kayà na karuan nga gigiammuan i Biblia ngem ari ira nga available ta tiempo nu kanni nga mallayyagayya i wawwaragi tam. Ngem baka available ira nu ummumma onu nu gabi. Nu kawagan, puedem kari nga kuan yatun? Sinudduan ni Jesus si Nicodemo ta gabi gafu ta yatun i kayà ni Nicodemo.​—Juan 3:1, 2.

12. Anni ira i mamasikan ta nono tam nga mawayya tam i mabbalin tu malalaki ta pab-Bible study?

¹² Awayya na tu kurang i komfiansa tam nga mangikondukta tu Bible study. Baka matageno  tam nga mawag labbi tu ammungattam i pakannammu tam onu mabbalin ittam tu malalaki ta panuddu nige tam nga i-Bible study i tadday nga tolay. Nu kunnatun i matageno mu, pannonopammu i tallu nga gannug tapenu massikan i nono mu. Ollu, ammu ni Jehova nga kualipikadu ka tapenu tudduan i tanakuan. (2 Cor. 3:5) Mekadua, si Jesus nga egga nisa “ngamin i pakawayya ta langi anna ta utun na davvun” i nangidog nikaw tapenu manuddu. (Mat. 28:18) Mekatallu, moffunan naka na tanakuan. Nattalo si Jesus ta nituddu nisa na Yama na nga ikagi na, anna puedem gapa nga kuan yatun. (Juan 8:28; 12:49) Puede ka nga mappoffun ta field service group overseer, ta malalaki nga payunir onu publisher tapenu makegafu ka anna makekondukta ka tu Bible study. Massikan paga i nono mu nu mevulu ka ta pab-Bible study tatun ira nga wagi.

13. Ngatta mawag tu magadjust ittam?

¹³ Awayya na tu marigatan ittam nga magadjust ta bagu nga metodo anna bagu ira nga rimienta. Nanguli ngana i pangi-Bible study tam. Bagu ngana i usattam nga rimienta, i publikasion nga Magayayya nga Mattolay tu Mannanayun! Tanakuan ngana gapa i papprepara anna i pangikondukta tam tatun kumpara ta dati nga kukukuattam. Baddi ngana laman nga parapo i bibbigattam anna mas nakafokus ngana ittam ta pakiyuvovug ta Bible study. Tapus ta panuddu tam gapa, mas aru ngana nga video anna elektroniko nga rimienta i usattam kagitta na JW Library^®. Nu marigatakka nga usan danatun nga rimienta, mappoffukka tapenu mammuammu nu kunnasi nga usan danatun. Maruddu nga mariga ngana nga ulian i nakasanayattam. Ngem ta pappasa na tiempo, mas mabi lapa ittam sangaw nga maka-adjust taw nga bagu nga metodo anna bagu nga rimienta. Ta uffun ni Jehova anna na tanakuan, mas maka-adjust ittam anna mas magayayya ittam ta pab-Bible study. Kurug i kagian na tadday nga payunir nga “parefu nga ma-enjoy na Bible study anna na manuddu nisa yaw nga metodo na paggigiammu.”

14. Anni i nonopattam nu mariga i teritoria tam? Ngatta mapagaram ittam ta 1 Corinto 3:6, 7?

¹⁴ Mariga nga mangigafu tu Bible study ta teritoria tam. Baka ari nga interesadu i totolay ta mensahe tam onu kontradda paga lagu yatun. Anni i makoffun nittam tapenu mattalupaddian ittam nga positibo? Daddammattam nakuan nga mabi laman nga manguli i situasion na totolay taw nga magulu nga mundo. Awayya na nga manono gabbalaman danuri na ari interesadu nga kawagadda i pangigiya na Dios. (Mat. 5:3) Nappa-Bible study gapa i karuan nga dati nga panakitadda i literatura tam ira. Ammu tam gapa nga si Jehova i Yafu na paggatag. (Mat. 9:38) Kayà na nga ari ittam nga magimmang nga mammula anna mabbaya megafu ta yayya mabba i mamadakal tatun. (1 Cor. 3:6, 7) Mapagaram ittam gapa nu manono tam nga maski nu awan tu Bible study tam sangawe, bebbendisionan ni Jehova i lallappo tam, ari tu i karu na nepalima tam onu i karu na Bible study tam! *

15. Anni i matageno ni Jehova nu mappa-Bible study i tadday nga tolay anna iyaplika na i magigiammu na?

¹⁵ Magayayya si Jehova nu alawatan na tadday nga tolay i kinakurug ta Biblia anna ibillena ngana yatun ta tanakuan. (Prov. 23:15, 16) Siguradu nga kuruga magayayya si Jehova nu masingi-singan na i mesissimmu ta tiempo tam! Angngarigan na, ta 2020 dagun serbisiu, maski nu egga paga i pandemic ta interu mundo,  7,705,765 nga Bible study i nekondukta, anna 241,994 tatun i naddedika kani Jehova anna nappabawtiso. Sonu kua, mangikondukta gapa tu Bible study danaw nga bagu nga disipulos, yayya nga mangngua ira tu mas aru paga nga disipulos. (Luc. 6:40) Siguradu nga mapagayayya tam si Jehova nu manguffun ittam ta pangngua tu disipulos.

16. Anni i makasta nga goal?

¹⁶ Mawag i pangikaguman ta pangngua tu disipulos. Ngem ta uffun ni Jehova, makoffun ittam ta panuddu ta Bible study ira tapenu ayatadda i nelangitan nga Yama tam. Puede kari nga kuattam tu goal nga makegafu anna makekondukta maski tadday laman nga Bible study? Nu approbetchattam i kada mepangngo nga situasion tapenu meyofer i Bible study ta ngamin nga masimmuattam, baka ariattam nga ekspektan i resulta natun. Magga bendisionan ni Jehova i appursigi tam.

17. Anni i matageno tam nu makekondukta ittam tu Bible study?

¹⁷ Parefu nga daka-dakal nga pribilehio nga ilayyagayya anna ituddu i kinakurug ta tanakuan! Danatun i kurug nga mamagayayya nittam. Aru i noffunan ni apostol Pablo ta Tesalonica tapenu mabbalin tu disipulo. Kunnaw i natageno na: “Sikamu i iddanama mi! Sikamu i makapagayayya nikami, ta sikamu i awayya mi nga pappara-parayag, kagitta na karuan ira, ta arubang na Yafu tam nga Jesus noka nu manoli yaya. Ta kakurugan na, sikamu i kegafuan na papparayag anna pagayaya mi!” (1 Tes. 2:19, 20; King. 17:1-4) Aru gapa ta tiempo tam i makatageno tu kunnatun. Kunnaw i kagian ni Sister Stéphanie nga aru ngana i noffunadda na atawa na nga mappabawtiso: “Awan ngana tu mas makapagayayya anne ta panguffun ta totolay tapenu maddedika kani Jehova.”