Kayà ni Jehova nga magayayya danuri mangatawa onu makitawa. Kayà na gapa nga maddukko ira anna permanente nakuan yatun. (Mat. 19:4-6) Ngem kunnasi ka nga makaleg tu mapia nga atawa? Si Jehova i Namaratu nittam yayya nga ammu na nu anni i mawag nga kuattam tapenu mabbalin tu magayayya i pagatawa. Nu iyaplika tam gafu i prinsipio ira nga niyawa na, mabbalin ittam tu kurug nga magayayya. Ammuattam i karuan tatun nga prinsipio.

Ollu, mawag nga makomprendi tam tu “mas minangngilogo i futu anne ta maski anni paga nga gannug anna desperadu.” (Jer. 17:9) Nu magaleg ngana tu atawa i tadday, baka insigida na nga makorsunadan i ka-date na, anna mafektan natun i addesision na tu mapia. Ngem nu mangatawa onu makitawa i tadday megafu laman ta mataga-tageno na, awayya na nga madismaya laman yayya. (Prov. 28:26) Nu ari paga ammammu tu mapia na dua nga tolay i kataggi-tadday, mas makasta nu ariadda labbi nga ikagi i mataga-tageno da onu mangipromesa tu maski anni.

Kagian na Proverbio 22:3: “Masingan na ma-uto i peligro anna mattagu yayya, ngem madderechu lagapa i awan tu ekspiriensa na anna mazziga-riga yayya ta resulta na ira.” Anni i peligro na pangusa ta website onu app ira ta paki-date? Kaddaraddam, aru nga totolay i naki-date ta nakilala da ta online anna inilloku ira na ka-date da. Namadday gapa i karuan tu feke nga account tapenu mapakkuartuan i tanakuan. Nu karuan, mappakilala gapa tu Saksi ira yaw nga minangngilogo nga totolay.

Yaw paga i tadday nga peligro. Mangusa i karuan nga website onu app ira para ta paki-date tu formula ira ta Math tapenu magaleg tu kaparis nga bagay ta tadday nga tolay tapus mad-date ira. Ngem ari paga vuluvuga napakurug nga talaga efektibo danatun nga formula. Ari gafu nga kinasirib nu mattalo ka ta formula ira nga pinadda-padday laman na tolay tapenu magangngua tu importante ira nga desision kagitta na pappili tu mapia nga atawa. Ararayyu nga mas mapattalakkan i prinsipio ira na Biblia anne ta formula ira ta Math.​—Prov. 1:7; 3:5-7.

Kunnaw i mabibbig ta Proverbio 14:15: “Kurugan na inosente nga tolay i kada uvovug, ngem pannonopan tu mapia na masirib i kada dakkua na.” Nige ka gafu nga mappili tu kayà mu nga mabbalin tu atawa, ammuammu nakuan labbi tu  mapia yatun nga tolay. Ngem mariga nga kuan yatun ta online. Maski paga nu masingan nu i profile na kataggi-tadday tapus kanayukkamu nga mat-chat onu mabbida online, makagim kari nga ammammum talaga yatun nga tolay? Nakaddag i karuan turi ta nakilala da ngana ta personal danuri abbo da nga mabbalin tu mapia nga atawa.

Kunnaw gapa i kinagi na salmista: “Ari ngà mevulu ta totolay ira nga awan tu kebilangad-da; ari ngà melivu-livu ta minaggappa-appe ira.” (Sal. 26:4) Aru i makkagi nga tapenu mas nga mapansin i profile mu ta paki-date mu ta online, okay laman nu malladdug ka. Yayya nga itagu da i kata-katolay da onu ari nga masingan i marake nga ugali da ta online. Kakkagian gapa na karuan nga totolay nga Saksi ira ni Jehova ngem kurug kari nga bawtisadu ira nga Cristiano? Manakam kari ira ta espiritual? Madukko kari i relasiodda kani Jehova? Makasta kari i taddag da ta kongregasion? Egga kari i kukukuadda nga marake onu ‘marakay ira nga kakavulu’? (1 Cor. 15:33; 2 Tim. 2:20, 21) Base ta prinsipio ira na Biblia, mepamavulun kari nga mangatawa onu makitawa ira? Mariga nga ammuan danatun. Kawagammu i uffun na karuan nga Saksi nga kilala da tu mapia yatun nga tolay. (Prov. 15:22) Yaw paga i daddammammu: Ari vuluvuga nga manono na tadday nga matalo nga aripan ni Jehova nga mangatawa onu makitawa ta ari tu Saksi anna “makipattakkilu” tatun nga tolay.​—2 Cor. 6:14, NW; 1 Cor. 7:39.

Talaga delikadu i pangusa tu website onu app ira tapenu maki-date. Ngem egga ira i makasta nga makuam tapenu makaleg ka anna mammammum tu mapia i tadday nga posible nga mabbalin tu atawam. Sitaw ka kari nga puede nga makaleg tu awayya na nga mabbalin tu mapia nga atawam? Nu ari nga megamma i paggarammammung ta publiko, makilala na Saksi ira ni Jehova i tanakuan nu magatende ira ta study, ta asembli, kombension, anna karuan paga nga paggarammammung.

Nu megamma i paggarammammung ta publiko, gitta na ta COVID-19 pandemic, mangiyusa ittam tu gadyet ira tapenu magatende ta study. Puede tam nga makilala tatun i karuan nga single nga Saksi. Masingammu gapa nu kunnasi da itaddag i parte da ta study anna maginnam i komento da ira. (1 Tim. 6:11, 12) Awayya nu gapa makka-istoria ta breakout room kabalin na study. Gukaban na virtual ira nga paggarammammung kavulu i wawwaragi, awayyam masingan nu kunnasi nga tratuan na tolay nga korsunadam i tanakuan anna masingammu gapa i kurug nga kata-katolena. (1 Ped. 3:4) Ta pappasa na tiempo, durante nga mas makilalam yatun nga tolay, masingammu nu parefu kamu tu goal anna prinsipio anna nu bagay kamu dua.

Nu tuttulan na tadday nga tolay i prinsipio na Biblia ta pagaleg tu mapia nga atawa, siguradu nga magayayya i pagatawa da anna maekspiriensa da i kagian na proverbio: “I tadday nga nakaleg tu mapia nga atawa ay nakaleg tu gannug nga makasta, anna nakalawa ta fabor ni Jehova.”​—Prov. 18:22.