1. Anni i insigida nga kingngua ni Jehova turi ta nakaliwa si Adan anna si Eva? (Genesis 3:15)

 TURI ta nakaliwa si Adan anna si Eva, insigida nga napeggan tu iddanama i gaka-gaka da megafu ta kappabbaw nga profesiya ni Jehova. Mabibbig yatun ta Genesis 3:15.​—Bibbigan.

2. Ngatta kappabbaw i profesiya ta Genesis 3:15?

² Mabibbig i profesiya ta ollu nga libru na Biblia. Ngem kappabbaw yatun nga profesiya ta konektadu tatun i ngamin paga ira nga tanakuan nga libru na Biblia. Nonopan yaw: Megafu ta spring na notebook, mapattaradday i pahina ira natun. Megitta i profesiya ta Genesis 3:15 tatun nga spring. Pattaraddayan natun nga profesiya i naddian na kada libru na Biblia tapenu mabuu i tattadday nga mensahe na Biblia: mangidog i Dios tu Mamaliag tapenu daralan noka i Diablo anna i ngamin nga tagatuttul na. * Bendision yatun para ta ngamin nga mangaya kani Jehova!

3. Anni i gigiammuattam taw nga artikulo?

³ Taw nga artikulo, tabbagattam yaw ira nga pakkiavu meyannung ta profesiya na Genesis 3:15: Sinni ira i nakagi tatun? Kunnasi nga natuppal yatun nga profesiya? Kunnasi ittam mabbenefisio tatun?

4. Sinni i “iraw,” anna kunnasi tam nga nammuan yatun?

⁴ Mabibbig ta Genesis 3:14, 15 i tadday nga “iraw,” i ‘gaka’ na iraw, tadday nga “babay,” anna i “gaka” na babay. Usattam i Biblia tapenu mammuattam nu sinni i kada tadday tatun. * Sinni kari i “iraw”? Imposible nga literal nga iraw yatun megafu ta ari nga malippawa na tadday nga iraw i kinagi ni Jehova ta hardin na Eden. Tadday gafu nga intelihente nga pinaratu i kikkibbidan ni Jehova. Sinni yatun? Manawag i kagian na Nepakannammu 12:9 nga “i iraw gari” ay si Satanas nga Diablo. Ngem sinni gafu gapa i gaka na iraw?

5. Sinni ira i gaka na iraw?

⁵ Nu karuan, simboliko nga usan na Biblia i termino nga “gaka” tapenu tukuyan danuri paparigadda i appana-panono anna annangngua na yama da. I gaka gafu na iraw ay i espiritu ira nga pinaratu anna totolay nga kokkontradda si Jehova nga Dios anna i totolena. Kagitta gafu lagapa ira ni Satanas. Kasali tatun i anghel ira nga nanaw ta langi ta tiempo ni Noe kunne na gapa i marake ira nga totolay nga paparigadda i annangngua na yama da nga Diablo.​—Gen. 6:1, 2; Juan 8:44; 1 Juan 5:19; Jud. 6.

6. Ngatta imposible nga si Eva i “babay”?

⁶ Sinni gafu gapa i “babay”? Imposible nga si Eva yatun. Ngatta? Yaw i tadday nga rason. Nakagi ta profesiya nga “mammokan” na gaka na babay i ulu na iraw. Gitta na nagigiammu tam ngana, si Satanas i iraw. Imposible nga egga i pakawayya na imperfekto nga tolay nga gaka ni Eva nga daralan i espiritu nga si Satanas. Kunnasi gafu nga madaral si Satanas?

7. Base ta Nepakannammu 12:1, 2, 5, 10, sinni i babay ta Genesis 3:15?

 ⁷ Nepakannammu ta ultimu nga libru na Biblia nu sinni i babay ta Genesis 3:15. (Bibbigan i Nepakannammu 12:1, 2, 5, 10.) Ari nga naggafu ta davvun yatun nga babay! Nabbatay yayya ta vulan anna nakkorona yayya tu 12 nga bitun. Nagana yayya tu nerumu-ruma nga ana—i Pappatulan na Dios. Megafu ta egga ta langi i Pappatulan, ta langi gafu gapa i dian natun nga babay. Irepresenta natun nga babay i nelangitan nga parte na organisasion ni Jehova nga vukkalan na matalo ira nga espiritu nga pinaratu na.​—Gal. 4:26.

8. Sinni i primeru nga parte na gaka na babay, anna kanni yayya nga nabbalin tu kunnatun? (Genesis 22:15-18)

⁸ Mammuattam ta Uvovug na Dios nu sinni i primeru nga gaka na babay. Maggafu yatun nga gaka kani Abraham. (Bibbigan i Genesis 22:15-18.) Natuppal yatun nga profesiya megafu ta si Jesus ay gaka ni Abraham. (Luc. 3:23, 34) Ngem mawag tu mas nga makapangngua anne ta tolay yatun nga gaka megafu ta yayya i permanente nga manaral kani Satanas nga Diablo. Yatutta turi ta ma-30 anios si Jesus, nevuvvu nisa i masanto nga espiritu na Dios. Turi ta nesimmu yatun, si Jesus i nabbalin tu primeru nga parte na gaka na babay. (Gal. 3:16) Turi ta natay si Jesus tapus napaginnolay yayya, “dayaw anna kekakua i nebarungu” nisa na Dios. Neyawa gapa ta nisa “ngamin i pakawayya ta langi anna ta utun na davvun,” nelagum i autoridad ‘tapenu daralan i kukukuan ira na Demonio.’—Heb. 2:7; Mat. 28:18; 1 Juan 3:8.

9-10. (a) Sinni ira i tanakuan paga nga parte na gaka na babay, anna kanni ira nga mabbalin tu kunnatun? (b) Anni i tumunug nga ammuattam?

⁹ Ngem egga i segundariu onu tanakuan paga nga parte na gaka. Nipakannammu ni apostol Pablo nu sinni yatun nga parte na gaka turi ta kinagi na ta Judio anna Hentil ira nga nazelugan nga Cristiano: “Nu totolay nakamu ni Cristo, ginaka kamu gafu ni Abraham anna sikamu i mangalawa ta nitabba na Dios.” (Gal. 3:28, 29) Nu ivuvvu ni Jehova ta tadday nga Cristiano i masanto nga espiritu, mabbalin yatun nga tolay tu parte na gaka na babay. Si Jesu-Cristo gafu anna i 144,000 nga kavulu na nga mammaguray i mabbuu ta gaka. (Nep. 14:1) Paparigadda ngamin i appana-panono anna annangngua na Yama da nga si Jehova nga Dios.

¹⁰ Ammu tam ngana nu sinni ira i nakagi ta Genesis 3:15. Ammuattam labbi gapa nu anni ngana ira i kingngua ni Jehova tapenu matuppal yatun nga profesiya anna nu kunnasi ittam nga mabbenefisio tatun.

11. Anni i kayà kagian na profesiya nga mabigaran “ta tumang” i gaka na babay?

¹¹ Segun ta profesiya na Genesis 3:15, bigaran na iraw i gaka na babay “ta tumang.” Natuppal yatun turi ta ininfluwensian ni Satanas i Judio anna Romano ira nga patayan i Ana na Dios. (Luc. 23:13, 20-24) Nu mabigaran ta tumang i tadday, temporario nga ari yayya makalakag. Kunnatun gapa si Jesus. Gitta na nabigaran yayya ta tumang turi ta natay yayya. Temporario gare nga awan tu maski anni nga nakua na ta unag na tallu aggaw nga kegga na ta attanamman.​—Mat. 16:21.

12. Kunnasi anna sonu anni nga mamammo i ulu na iraw?

¹² Tapenu matuppal i profesiya na Genesis 3:15, mawag nga ari tu mattalupaddian si Jesus ta attanamman. Ngatta? Segun gare tatun nga profesiya, mammokan na gaka i ulu  na iraw. Mawag gafu nga mammapia i bigag ta tumang ni Jesus. Kunnasi nga natuppal yatun? Ta mekatallu nga aggaw kabalin na patena, napaginnolay yayya anna nabbalin tu imortal nga espiritu. Ta tiempo nga sinunno na Dios, permanente nga daralan noka ni Jesus si Satanas. (Heb. 2:14) Manguffun noka danuri kavulu nga mammaguray ni Cristo ta panaral ta ngamin nga kontra na Dios onu ta gaka na iraw.​—Nep. 17:14; 20:4, 10. *

13. Kunnasi ittam mabbenefisio ta ketuppal naw nga profesiya?

¹³ Nu massesserbi ka ta Dios, mabbenefisio ka ta ketuppal naw nga profesiya. Turi ta nattolay si Jesus ta davvun, perfekto nga naparigan na i personalidad na Yama na. (Juan 14:9) Yayya nga megafu kani Jesus, nakilala tam anna iniddu tam si Jehova nga Dios. Nammakapia ittam gapa ta tuttuddu ira ni Jesus anna ta pangirollu na ta Cristiano nga kongregasion sangawe. Sinudduan na ittam nu kunnasi tam mapagayayya si Jehova. Mammakapia ittam gapa ngamin ta nikabigag na tumang na onu ta patena. Kunnasi? Turi ta napaginnolay gare si Jesus, nitavvung na i daga na bilang perfekto nga sakrifisio nga “mamakarenu nittam ta ngamin nga katagarulian.”​—1 Juan 1:7.

14. Ngatta makagi tam nga mappasa labbi i tiempo nige nga matuppal i profesiya ta Eden? Ipakanawag.

¹⁴ Base ta kinagi ira ni Jehova ta Eden, mawag labbi nga mappasa i tiempo nige nga matuppal i ngamin nga detalye na profesiya. Mappasa labbi i tiempo nige nga meyana na babay i nepromesa nga gaka, nige nga maammung na Diablo i tagatuttul na ira, anna nige nga makkalussu-lussaw i dua nga grupo. Dakal i meyuffun na ta nittam nu mantindiattam yatun nga profesiya megafu ta abisowan ittam natun nga ikalussaw noka naw nga mundo nga kontroladu ni Satanas i maddayaw ira kani Jehova. Kunnatun gabbalaman i niyabiso ni Jesus ta disipulo na ira. (Mar. 13:13; Juan 17:14) Talaga napakurug tam nga natuppal yatun nga parte na profesiya, mas ngana ta nappasa nga 100 nga dagun. Kunnasi?

15. Ngatta mas ikalussaw sangawe na mundo i totolay na Dios, ngem ngatta ari tam nga ikassing si Satanas?

¹⁵ Ari nabbayag turi ta nabbalin tu Mesianiko nga Patul si Jesus ta 1914, napapanaw si Satanas ta langi. Megafu ta ari ngana yayya nga makatoli tari, iinnaggan na ngana laman i kadaral na taw ta davvun. (Nep. 12:9, 12) Ngem ari laman nga basta maginnag si Satanas. Desperadu yayya anna fermi i lussaw na ta totolay na Dios. (Nep. 12:13, 17) Megafu tatun, mas nga ikalussaw naw nga mundo i totolay na Dios. Ngem ari ittam nga maganassing kani Satanas anna ta tagatuttul na ira. Parigattam lallagu i masikan nga pangurug ni apostol Pablo. Nitura na: “Nu i Dios i kavulu tam, sinni paga i makawayya mangontra nittam?” (Roma 8:31) Aru ngana nga detalye na profesiya ta Genesis 3:15 i natuppal, yayya nga buu i pattalo tam kani Jehova.

16-18. Kunnasi nga nabbenefisio da Curtis, Ursula, anna Jessica turi ta nalippawa da i Genesis 3:15?

¹⁶ Makoffun nittam i promesa ni Jehova ta Genesis 3:15 ta problema tam ira sangawe. Kunnaw i niyistoria na misionero ta Guam nga si Curtis: “Egga ira i tiempo nga napurueban i kinamatalo ku kani Jehova megafu ta problemà ira. Ngem nakoffun niakan i pannono ku ta profesiya ta Genesis 3:15 tapenu ari nga mawawan i pattalo ku ta Yamà ta langi.”  Iddanaman ni Curtis i tiempo sonu pangultimuan ngana ni Jehova i ngamin nga problema tam.

¹⁷ Kinagi ni Sister Ursula nga taga-Bavaria nga nakumbinsi yayya na Genesis 3:15 nga naggafu ta Dios i Biblia. Gafu ta napakurug na nga konektadu yatun nga profesiya ta ngamin nga tanakuan paga nga profesiya, nappabbaw yayya. Kinagi na paga: “Mas iniddu ku si Jehova turi ta nammuakku nga insigida yayya nga nangiyawa tu solusion tapenu ari nga mawanan tu iddanama i totolay.”

¹⁸ Kunnaw gapa i niyistoria ni Jessica nga taga-Micronesia: “Manono ku paga i natageno ku turi ta na-realize ku nga nalegakku ngana i kinakurug! Matuttuppal ngana i profesiya ta Genesis 3:15. Niperaddam niakan natun nga ngamin i pappasa-pasattam sangawe ay ari tu i kurug nga pattolay. Megafu gapa tatun nga profesiya, mas kumbinsidu ngà nga i passerbi kani Jehova i mangiyawa niakan tu kakastan nga pattolay sangawe anna mas makasta paga nga pattolay ta mappange.”

19. Ngatta makapakkomfiansa ittam nga matuppal noka i ultimu nga parte na profesiya?

¹⁹ Nagigiammu tam nga matuttuppal ngana i Genesis 3:15. Manawag ngana ta nittam nu sinni i gaka na babay anna i gaka na iraw. Si Jesus i primeru nga parte na gaka na babay. Nammapia ngana i bigag na ta tumang anna sangawe, makapangngua anna imortal ngana yayya nga Patul. Aranni ngana gapa nga mabalin i pappili turi ira ta tanakuan paga nga parte na gaka. Megafu ta natuppal ngana i ollu nga parte na profesiya, makapakkomfiansa ittam nga matuppal gapa noka i ultimu nga parte natun—i pammammo ta ulu na iraw. Sonu madaral ngana si Satanas, kuruga magayayya noka i aripan ira na Dios! Ngem adde ta ari paga nga nesimmu yatun, ari ka nakuan magimmang ta passerbim megafu ta mapammakatalakkan i Dios tam. Gukaban na gaka na babay, mangiyawa noka yayya tu napakaru nga bendision ta “ngamin nga nasa-nasion ta davvun.”​—Gen. 22:18.