1. Ta anni ittam nga makasiguradu, anna ngatta?

 NU OBSERBAMMU i paddia-paddian na mundo, mangurug ka kari nga makkasta paga i situasion? Nallamming ngana i pangaya na makkakafamilia. Mas vayolente, makasarili, anna agresibo i totolay. Aru gapa i marigatan nga mattalo ta totolay nga egga i autoridad da. Ngem yatun nakuan ira nga mesissimmu i makakumbinsi nikaw nga araranni ngana nga makkasta i paddia-paddiattam. Ngatta? Megafu ta ipasa-pasingan na totolay sangawe i ugali ira nga dati ngana nga neprofesiya na Biblia meyannung ta “pangurianan ira nga aggaw.” (2 Tim. 3:1-5) Magga umanugu i totolay nga mapia i giffutuadda nga matuttuppal ngana yatun nga profesiya anna pakurugan na ketuppal natun nga mammaguray ngana si Cristo Jesus bilang Patul na Pappatulan na Dios. Ngem tadday laman yatun ta aru nga profesiya meyannung ta Pappatulan. Massikan i pangurug tam nu gigiammuattam uli i tanakuan paga ira nga profesiya nga netuppal ngana ta nappasa nga daga-ragun.

2. Anni i gigiammuattam taw nga artikulo, anna ngatta? (Komentuan i letratu ta vungun.)

² Taw nga artikulo, gigiammuattam (1) i profesiya nga manguffun ta nittam tapenu mammuan nu kanni nga nepataddag i Pappatulan, (2) i profesiya ira nga manguffun ta nittam tapenu mammuan nga mappatul ngana si Jesus ta Pappatulan na Dios ta langi, anna (3) i profesiya ira nga mangipasingan nu kunnasi noka madaral i kalaban ira na Pappatulan na Dios. Mammuattam nga konektadu i kada tadday tatun nga profesiya. Gitta da i pirasu ira na jigsaw puzzle nga mangiyawa nittam tu ideya nu aranni kari ngana nga ituppal ni Jehova i karuan paga nga profesiya ta tiempo nga sinunno na.

3. Anni i ipasiguradu ta nittam na profesiya ta Daniel 7:13, 14 meyannung ta Patul na Pappatulan na Dios?

³ Ipasiguradu nittam na profesiya ta Daniel 7:13, 14 nga mabbalin noka tu kapianan nga Mammaguray ta Pappatulan na Dios si Cristo Jesus. Magayayya noka i totolay ta ngamin nga nasion nga “passerbian yayya” anna ari yayya vuluvuga nga matalianan. Kinagi na tadday paga nga profesiya ta Daniel nga mammaguray noka si Jesus tatun nga Pappatulan kabalin na pitu nga tiempo. Posible kari nga mammuattam nu kanni nga nesimmu yatun?

4. Ipakanawag nu kunnasi ittam nga uffunan na Daniel 4:10-17 tapenu mammuattam nu anni i dagun na pammaguray ni Cristo bilang Patul. (Innan gapa i footnote.)

⁴ Bibbigan i Daniel 4:10-17. Irepresenta na “pitu nga tiempo” i 2,520 nga dagun. Namegafu yatun ta 607 B.C.E. turi ta inalsa na Babilonio ira i ultimu nga patul ta trono ni Jehova ta Jerusalem. Nangultimu yatun ta 1914 C.E. turi ta nitrono ni Jehova si Jesus—“i tadday nga egga legal nga kepangngattan na”—bilang Patul na Pappatulan na Dios. *—Eze. 21:25-27.

5. Kunnasi ittam moffunan na profesiya meyannung ta “pitu nga tiempo”?

⁵ Anni i meyuffun ta nittam natun nga profesiya? Nu malippawa tam i meyannung ta “pitu nga tiempo,” makumbinsi ittam nga tuppalan ni Jehova i promesa na ira ta fustu nga tiempo. Nonopan yaw. Egga i sinunno ni Jehova tu tiempo nu kanni na nga pabbalinan tu Patul si Jesus anna sinuppal na yatun ta mismu nga tiempo nga sinunno na. Makasiguradu ittam gafu nga tuppalan na i karuan paga nga profesiya ta mismu nga tiempo nga sinunno na. Wan, i aggaw ni Jehova ay “ari noka nga matalattan!”—Hab. 2:3.

6. (a) Anni ira nga ebidensia i mangipasingan nga mammaguray ngana si Cristo ta langi? (b) Kunnasi nga suportan na profesiya ta Nepakannammu 6:2-8 yatun ira nga ebidensia?

⁶ Aranni ngana nga mabalin i ministerio ni Jesus ta davvun turi ta niprofesiya na i mesimmu ta mundo. Makoffun yaw ta disipulos na ira tapenu mammuadda nga mammaguray ngana yayya ta langi. Kinagi na nga egga noka i gerra, bisin, anna lunig. Niprofesiya na gapa nga egga noka i tulu-tulagan onu taka-taki “ta madduma-ruma nga lugar,” gitta na COVID-19 pandemic. Agalan na Biblia danatun nga mesimmu bilang “panakkilalan” na pappatul ni Cristo. (Mat. 24:3, 7; Luc. 21:7, 10, 11) Maturu tu 60 dagun kabalin na patay ni Jesus anna na panoli na ta langi, siniguradu na kani apostol Juan nga mesimmu danatun. (Bibbigan i Nepakannammu 6:2-8.) Nesimmu ngamin danatun turi ta nabbalin tu Patul si Jesus ta 1914.

7. Ngatta mas naddake i paddia-paddian na mundo turi ta nappatul si Jesus?

⁷ Ngatta mas naddake i paddia-paddian na mundo turi ta nappatul si Jesus? Kinagi na Nepakannammu 6:2 i importante nga detalye. I ollu nga mision ni Jesus bilang Patul ay makiggerra. Sinni i kalaban na ira? Makillaban yayya ta Diablo anna ta demonio na ira. Segun ta Nepakannammu kapitulo 12, naffu si Satanas tatun nga gerra yari tu netabbo yayya anna i demonio na ira taw ta davvun. Nepallo i poray ni Satanas yari tu i totolay i pinappata-patuan na tu ulu. Megafu tatun,  ‘pakallallo danuri egga ta utun na davvun.’—Nep. 12:7-12.

8. Kunnasi nga makoffun nu masingattam i ketuppal na profesiya ira meyannung ta Pappatulan?

⁸ Anni i meyuffun ta nittam danatun nga profesiya? Makoffun nittam i mesissimmu ta mundo anna i masingi-singattam nga panguli ta ugali na totolay tapenu mammuattam nga nappatul ngana si Jesus. Yayya nga ari ittam nakuan madismaya nu makasarili anna vayolente i totolay. Daddammattam nga ketuppalan na profesiya ta Biblia i kukukuadda. Mammaguray ngana i Pappatulan! (Sal. 37:1) Ekspektattam gapa nga mas maddake i paddia-paddian na mundo durante nga umara-aranni i Armagedon. (Mar. 13:8; 2 Tim. 3:13) Mappappabalo ittam ta minaggiddu nga Yama tam ta langi ta panguffun na ta nittam nga malippawa nu ngatta marake i paddia-paddian naw nga mundo.

9. Kunnasi nga dineskriba na Daniel 2:28, 31-35 i ultimu nga world power, anna kanni nga limittuag yatun?

⁹ Bibbigan i Daniel 2:28, 31-35. Matuttuppal ngana yaw nga profesiya sangawe. Nakagi ta tatageno ni Nabucodonosor nu anni noka i mesimmu “ta pangurianan nga parte na aggaggaw,” kabalin nga namegafu i pammaguray ni Cristo. Kavulu ta kalaban ira ni Jesus taw ta davvun i ultimu nga world power nga neprofesiya ta Biblia. Irepresenta yatun na ‘balayang anna pila nga takki.’ Maddaggun ngana nga mammaguray yatun nga world power. Limittuag yatun durante na World War I turi ta nakka-alyansa i Britain anna i United States. Yatun i Anglo-American World Power. Neprofesiya gapa ta estatua nga tatageno ni Nabucodonosor i dua nga neruman natun nga world power ta nappasa ira nga nammaguray.

10. (a) Ngatta eksakto i niprofesiya na Daniel meyannung ta alyansa na Anglo-America? (b) Anni nakuan i pagimmugurattam? (Innan i kahon nga “ Magimmugug ta Pila!”)

 ¹⁰ Ollu, i nappasa ira nga world power nga nakagi ta sirmata ay isimbolo na puro ira nga metal gitta na vulawan onu pira. Ngem i alyansa na Anglo-America ay isimbolo na balayang nga nakivuan tu pila. Irepresenta na pila i “gaka na totolay,” onu i ordinariu nga totolay. (Dan. 2:43, ftn.) Gitta na masingi-singattam sangawe, marigatan i lider ira natun nga world power nga mepatuppal i polisiya da ira megafu ta masikan i influwensia na ordinariu ira nga totolay ta eleksion, ta kampania ira para ta karapatan na totolay, ta protesta ira, anna ta union ira.

11. Ngatta i pammaguray na Anglo-American World Power i mas mamakkomfiansa nittam nga mattolay ittam ngana ta tiempo na panuppalan?

¹¹ Mekadua, i Anglo-America nga irepresenta na takki na daka-dakal nga estatua i ultimu nga world power nga neprofesiya ta Biblia. Awan ngana tu tumunug tatun nga world power. Sonu Armagedon, daralan yatun na Pappatulan na Dios kunne na gapa i ngamin nga gobiernu na totolay. *—Nep. 16:13, 14, 16; 19:19, 20.

12. Anni paga nga profesiya ni Daniel i mamanna-bannay anna mamaggiddanama nittam?

¹² Anni i meyuffun ta nittam natun nga profesiya? Mas paga nga pakurugan na profesiya ni Daniel nga mattotolay ittam ngana ta tiempo na panuppalan. Maturu tu 2,500 dagun ngana i nappasa, niprofesiya ni Daniel nga kabalin nga mammaguray na Babilonia, appa paga nga world power i egga dakal nga efekto na ta totolay na Dios. Niprofesiya na paga nga i Anglo-American World Power i ultimu tatun ira. Yatun i mamanna-bannay anna mamaggiddanama ta nittam nga araranni ngana nga daralan na Pappatulan na Dios i ngamin nga gobiernu na totolay anna yatun ngana laman i mammaguray ta interu mundo.​—Dan. 2:44.

13. Anni i irepresenta na “mekawalu nga patul” anna na “mafulu nga patul” nga nakagi ta Nepakannammu 17:9-12, anna kunnasi nga natuppal yatun nga profesiya?

¹³ Bibbigan i Nepakannammu 17:9-12. Natuppal i tadday paga nga profesiya na Biblia meyannung ta pangurianan ira nga aggaw megafu ta kadaral nga resulta na World War I. Kayà na lider ira na gobiernu nga mangirattal tu imammo ta mundo. Yayya nga turi ta Enero 1920, binuu da i League of Nations nga sinalian na United Nations turi ta Oktubre 1945. Magalan yatun nga organisasion bilang “mekawalu nga patul.” Ngem ari tu world power yatun. Nakadepende laman gare i sikan anna i influwensia natun ta gobiernu ira nga massuporta tatun. Danatun nga gobiernu i kakkagian na Biblia nga irepresenta na “mafulu nga patul.”

14-15. (a) Anni i kinagi na Nepakannammu 17:3-5 meyannung ta Babilonia nga Dakal? (b) Anni i mesissimmu ta taga-suporta ira na falsu nga relihion?

¹⁴ Bibbigan i Nepakannammu 17:3-5. Ta sirmata nga naggafu ta Dios, nasingan ni apostol Juan i babay nga minakkigannug, i “Madumu-rumug nga Babilonia” onu i Babilonia nga Dakal, nga mangirepresenta ta imperio na falsu nga relihion ta interu mundo. Kunnasi nga natuppal yatun nga sirmata? Mabayag ngana nga supu-suportan na falsu ira nga relihion i gobiernu ira. Ngem araranni ngana nga ipay ni Jehova ta nono na gobiernu ira tu “mapakatadday i uray da nga mangngua ta gakkag na.” Anni i kuadda? Bweltan noka na “mafulu nga patul” onu gobiernu ira i falsu ira nga relihion tapenu daralan ira.​—Nep. 17:1, 2, 16, 17.

 ¹⁵ Kunnasi tam nga mammuan nga aranni ngana nga madaral i Babilonia nga Dakal? Tapenu matabbag yatun nga pakkiavu, makasta nu daddammattam nga i siudad na Babilonia gari ay protektadu na dana-danum na Bannag Eufrates. Nikumpara na libru na Nepakannammu i minillion nga taga-suporta na Babilonia nga Dakal ta “bannag ira” nga mapprotekta ta nira. (Nep. 17:15) Nakagi gapa nga ‘mammaga i bannag’ ira. Kayà na kagian, mawawan i aru nga taga-suporta na falsu nga relihion ta mundo. (Nep. 16:12) Matuttuppal ngana yatun nga profesiya sangawe. Aru ngana nga totolay i awan tu ganas da ta relihion anna tanakuan ngana i pappoffunadda ta problema da ira.

16. Anni i meyuffun na nu malippawa tam i profesiya ira meyannung ta kabuu na United Nations anna na pangultimu na Babilonia nga Dakal?

¹⁶ Anni i meyuffun ta nittam danatun nga profesiya? Pakurugan na nikabuu na United Nations anna na bumaddi nga taga-suporta na falsu ira nga relihion nga mattolay ittam ngana ta pangurianan ira nga aggaw. Ngem maski nu bumaddi ngana i massuporta ta Babilonia nga Dakal, ari tu yatun i mamangultimu  ta falsu ira nga relihion. Gitta na nakagi ta nappasa ira nga parapo, ipay ni Jehova ta nono na “mafulu nga patul” onu gobiernu ira nga massuporta ta United Nations nga ‘kuan i gakkag na.’ Gavva noka nga daralan natun ira nga gobiernu i falsu ira nga relihion. Yayya nga makaddagan i interu nga mundo. * (Nep. 18:8-10) Dakal i efekto na kadaral na Babilonia nga Dakal ta interu nga mundo anna posible nga marresulta yatun ta pazziga-riga. Ngem egga i dua nga rason na totolay na Dios tapenu magayayya. Mawawan ngana noka tu mannanayun yatun nga mabayag ngana nga kalaban na Dios nga Jehova, anna araranni ngana i kapaliag tam taw nga marake nga mundo!—Luc. 21:28.

17-18. (a) Kunnasi tam metulu-tuloy nga mapasikan i pangurug tam? (b) Anni i gigiammuattam ta tumunug nga artikulo?

¹⁷ Niprofesiya ni Daniel nga “umaru noka i fustu nga pakannammu.” Kunnatun mismu i mesissimmu! Malippawa tam ngana i profesiya ira meyannung ta kaggawattam. (Dan. 12:4, 9, 10) Talaga eksakto i niketuppal natun ira nga profesiya yatutta mas mattalo ittam kani Jehova anna ta Uvovug na. (Isa. 46:10; 55:11) Itulu-tuloy mu gafu nga pasikannan i pangurug mu gukaban na malappo nga paggigiammu ta Biblia anna panguffun ta tanakuan nga mapeggan tu madukko nga relasion kani Jehova. Protektan na danuri buu i pattalo da ta nisa anna iddan na ira tu “tulu-tuloy nga imammo.”​—Isa. 26:3.

¹⁸ Ta tumunug nga artikulo, gigiammuattam i profesiya ira meyannung ta Cristiano nga kongregasion ta tiempo na panuppalan. Magigiammu tam nu kunnasi paga pakurugan natun ira nga profesiya nga mattolay ittam ngana ta pangurianan ira nga aggaw. Gigiammuattam paga i karuan nga pamakurug nga irolluan na Patul tam nga si Jesus i matalo ira nga tagatuttul na.