1. Anni i uray ni Jehova ta maddaggun?

 TA MADDAGGUN, uray na Dios nga melayyagayya i mapia nga dumug na Pappatulan ta interu davvun. (Mar. 13:10; 1 Tim. 2:3, 4) Trabahu yaw ni Jehova anna kuruga importante yaw ta pinili na paga lagu i meddu nga Ana na tapenu irolluan yaw nga trabahu. Makasiguradu ittam nga ta pangirollu ni Jesus, mebala-balin i trabahu nga pallayyagayya segun ta ikaya ni Jehova nige nga duttal i panuppalan.​—Mat. 24:14.

2. Anni i gigiammuattam taw nga artikulo?

² Gigiammuattam taw nga artikulo nu kunnasi nga usu-usan ni Jesus i ‘mekatalo anna nannono nga doroban na’ tapenu iyawa i espiritual nga makan anna tapenu organisan i tagatuttul na ira nga kuan i kadakallan nga trabahu nga pallayyagayya namegafu tagga. (Mat. 24:45) Gigiammuattam gapa nu anni i makua na kada tadday ta nittam tapenu suportan si Jesus anna i mekatalo nga doroban.

3. Anni nga autoridad i neyawa kani Jesus?

³ Si Jesus i mangirollu ta trabahu nga pallayyagayya. Ngatta siguradu ittam tatun? Nige nga minay si Jesus ta langi, nakipaggarammammung labbi yayya ta karuan nga matalo nga tagatuttul na ta tadday nga vukig ta Galilea. Kinagi na ta nira: “Neyawa niakan ngamin i pakawayya ta langi anna ta utun na davvun.” Sifutan i tumunug nga kinagi na: “Umay kamu gafu ta ngamin nga totolay ta ngamin nga lugu-lugar anna pabbalinan nu ira tu disipulò.” (Mat. 28:18, 19) Kasali gafu ta neyawa ngana kani Jesus i pakawayya onu autoridad tapenu irolluan i trabahu nga pallayyagayya.

4. Ngatta siguradu ittam nga irolluan lagapa ni Jesus i trabahu nga pallayyagayya magadde ta kaggawattam?

 ⁴ Kinagi ni Jesus nga makua i trabahu nga pallayyagayya anna i pangngua tu disipulos “ta ngamin nga lugu-lugar” anna makitappaddian yayya ta disipulos na “adde ta panuppalan na mundo.” (Mat. 28:20) Manawag nga ipasingan danatun nga kinagi ni Jesus nga magadde ta kaggawattam, tulu-tuloy nga irolluan na i trabahu nga pallayyagayya.

5. Kunnasi ittam nga makoffun ta ketuppal na Salmo 110:3?

⁵ Ari nga mavurung si Jesus nga baddi laman saw i mallayyagayya durante na panuppalan na mundo. Ammu na gare nga matuppal yaw nga profesiya nga kinagi na salmista: “Sigga-paran nga mevulu i totolem ira ta kaggawan na em-mu nga pakiggerra.” (Sal. 110:3) Nu mallayyagayya ka, supu-suportammu si Jesus anna i mekatalo nga doroban. Makoffukka gapa tapenu matuppal yatun nga profesiya. Tulu-tuloy lagapa yatun nga trabahu, ngem egga ira i luttuag nga problema.

6. Anni i tadday nga problema nga arubangan na mangilayyagayya ira ta Pappatulan sangawe?

⁶ Tadday nga problema nga arubangan danuri na mangilayyagayya ta Pappatulan ay i pangokkontra. Mangiwara-wara tu aru nga kinaladdug i apostata ira, relihioso ira nga lider, anna i pulitiko ira meyannung ta trabahu tam. Nu melogo tatun ira nga propaganda i kafamilia, kakilala, anna katrabahu tam ira, awayya na tu fersadda ittam nga magimmang ngana ta passerbi kani Jehova anna ta pallayyagayya. Ta karuan nga nasion, ananassingan na kalabattam ira i wawwaragi tam, ziga-rigatadda ira, anna ipefuku da paga lagu ira. Ari ittam ngana makaddag tatun nga pattratu. Niprofesiya ni Jesus: “Ikalussaw dakamu noka ngamin na sinolay megafu niakan.” (Mat. 24:9) Pakurugan na kunnatun nga pangikalussaw nga faboran ittam ni Jehova. (Mat. 5:11, 12) I Diablo i egga ta likug natun nga pangokkontra, ngem awan tu laban na kani Jesus! Ta suporta ni Jesus, makadde i mapia nga dumug ta totolay ta ngamin nga nasa-nasion. Ikonsidera i ebidensia.

7. Ngatta makagim nga matuttuppal ngana i Nepakannammu 14:6, 7?

⁷ Anni paga nga problema i arubangan danuri na mangilayyagayya ta Pappatulan? Madduruma i lengguahe na layyagayyadda. Ngem ari nga makefugag yatun ta kelayyagayya na mapia nga dumug ta kaggawattam. Yatun i magigiammu tam ta sirmata nga niyawa ni Jesus kani apostol Juan. (Bibbigan i Nepakannammu 14:6, 7.) Kunnasi nga matuttuppal yatun? Iddiddattam tu chansa i aru nga totolay adde ta posible tapenu maginna i mensahe na Pappatulan. Available ngana sangawe ta totolay ta interu mundo i nebase-Biblia ira nga material ta website tam nga jw.org megafu ta ne-translate yatun ta maturu tu 1,000 nga lengguahe! Inapruban na Manangngal nga Baggi nga me-translate ta maturu tu 700 nga lengguahe i libru nga Magayayya nga Mattolay tu Mannanayun! nga primeru nga usu-usattam ta pangngua tu disipulos. Makalawa ngana gapa tu espiritual nga makan maski danuri umal onu bangngag gukaban na video recording ira anna danuri vuling gukaban na braille ira nga publikasion. Masingattam nga matuttuppal ngana i profesiya ira na Biblia. Magiggigiammu na totolay “naggafu ta ngamin nga lengguahe na nasa-nasion” nga uvovugan i “marenu nga lengguahe” na kinakurug ta Biblia. (Zac. 8:23; Zef. 3:9) Metuttuppal ngamin danatun megafu ta pangirollu ni Jesu-Cristo.

8. Anni ngana ira i resulta na pallayyagayya tam?

⁸ Ta tiempo tam, maturu ngana tu 8,000,000 nga totolay ta 240 nga nasa-nasion i parte na organisasion ni Jehova anna kada  ragun, maturu tu 100,000 i mabawtisowan! Ngem mas importante anne tatun ira nga bilang, ipasa-pasingan ngana na bagu nga disipulos i kualidad ira na Cristiano, “i bagu nga kata-katolay.” (Col. 3:8-10) Aru ngana i nagimmang ta pabbalin tu imoral, vayolente, mangireruma, anna nasionalistiko. Matuttuppal ngana i profesiya ta Isaias 2:4 nga ‘ari ngana ira maggigiammu tu pakiggerra.’ Megafu ta ikagumattam nga ipasingan i bagu nga kata-katolay, maginteres i totolay ta organisasion na Dios anna mapakurug tam nga tuttuttulattam i mangirollu nittam nga si Jesu-Cristo. (Juan 13:35; 1 Ped. 2:12) Ari tu nekanna laman ngamin danatun. Uuffunan ittam ni Jesus.

9. Segun ta Mateo 24:45-47, anni i neprofesiya meyannung ta tiempo na panuppalan?

⁹ Bibbigan i Mateo 24:45-47. Niprofesiya ni Jesus nga ta tiempo na panuppalan, manunno yayya tu tadday nga “mekatalo anna nannono nga doroban” tapenu mangiyawa tu espiritual nga makan. Ekspektattam gafu nga mallallappo ta tiempo tam yatun nga doroban. Kurug nga nesimmu yatun. Nangusa i mangirollu nittam tu baddi nga grupo na nazelugan nga lallaki tapenu mangiyawa ta totolay na Dios anna ta interesadu ira tu espiritual nga “kanad-da ta gagangay nga oras na akkakan.” Ari nga imammatan danatun nga lallaki i baggi da nga yafu ira na pangurug na tanakuan. (2 Cor. 1:24) Rekunnisiadda lallagu nga si Jesu-Cristo i “lider anna kumandante” na totolena.​—Isa. 55:4.

10. Anni nga publikasion ta picture i nakoffun ta niko tapenu masserbi ka kani Jehova?

¹⁰ Aru ngana nga publikasion i niprepara na mekatalo nga doroban namegafu turi ta 1919. Megafu tatun ira, ollu nga nasissiman na babbaragu i makapasikan nga espiritual nga makan. Ta 1921, niprepara na doroban i libru nga  The Harp of God tapenu magigiammu na interesadu ira i primeru ira nga tuddu na Biblia. Ta pappasa na tiempo, aru paga nga publikasion i nepublisa. Anni i nakoffun niko tapenu mammuan anna iddukan i Yama tam ta langi? Yari kari i libru nga “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, Anni Talaga i Ituttuddu na Biblia?, Anni i Ituddu na Biblia Nittam?, onu i Magayayya nga Mattolay tu Mannanayun! nga pinakabagu nga publikasiottam? Makoffun ngamin danatun ta pangngua tam tu disipulos. Sassakto ta pakawagan turi ta nepagilawan danatun.

11. Ngatta mawag tu makalawa ittam ngamin tu espiritual nga makan?

¹¹ Ari laman tu danuri interesadu i magawag tu matagga nga espiritual nga makan. Kawagattam ngamin yatun. Nitura ni apostol Pablo: “I matagga nga kanan ay para ta manakam ngana.” Kinagi paga ni Pablo nga nu iyaplika tam i magiggigiammu tam ta Biblia, ‘masingattam i nadduman na mapia anna marakay.’ (Heb. 5:14) Awayya na tu kitazziga nga tuttulan i estandarte ira ni Jehova megafu ta alalinno ngana i moralidad na totolay sangawe. Ngem siguraduan ni Jesus nga malawa tam i kawagattam nga espiritual nga makan tapenu kanayun nga masikan i pangurug tam. Mala tam yatun nga makan ta Uvovug na Dios, i Biblia. I mekatalo nga doroban i mangiprepara anna mangitaneg tatun nga makan ta pangirollu ni Jesus.

12. Kunnasi tam nga nikakua i ngagan na Dios, kagitta ni Jesus?

¹² Kagitta ni Jesus, mepangngo i pangikakua tam ta ngagan na Dios. (Juan 17:6, 26) Angngarigan na, ta 1931, ina tam ta Katurakan i ngagattam nga Saksi ni Jehova. Nipasingattam nga talaga importante i ngagan na Dios ta nittam anna kayà tam nga makilala ittam na tanakuan gukaban na ngagan na Yama tam  ta langi. (Isa. 43:10-12) Namegafu gapa ta Oktubre natun nga dagun, masingan ngana i ngagan na Dios ta vungun na kada isyu naw nga magazina. Fuera paga tatun, nitoli na New World Translation of the Holy Scriptures i ngagan na Dios ta mepangngo nga lugar natun ta Uvovug na. Dakal i neruman natun ta relihion ira nga kasali ta Kakristianuan megafu ta inalsadda i ngagan nga Jehova ta aru nga translation na Biblia da!

13. Ngatta mangurug ka nga usu-usan sangawe ni Jesus i “mekatalo anna nannono nga doroban”? (Juan 6:68)

¹³ Nakepataddag si Jesus tu kappabbaw nga organisasion ta davvun nga mangipoppollu ta marenu nga paddayaw gukaban na “mekatalo anna nannono nga doroban.” Anni i matageno mu tatun nga organisasion? Awayya na tu manono mu i kinagi ni apostol Pedro kani Jesus: “Sinni gafu paga i tanakuan nga angayam-mi? Sikaw laman i dian na uvovug nga mangiyawa ta inango nga adde ta ngangangay.” (Juan 6:68) Anni tamma i nesimmu ta kada tadday nittam sangawe nu ari ittam nga netadday ta organisasion ni Jehova? Gukaban natun, siguraduan ni Cristo nga kanayun ittam nga nabattug ta espiritual. Sana-sanayan na gapa ittam tapenu metuppal tam tu mapia i ministerio tam. Uuffunan na gapa ittam tapenu mebaruasi “i natalibagu nga kata-katolay” tapenu mapagayayya tam si Jehova.​—Efe. 4:24.

14. Kunnasi ka nga nabbenefisio ta pabbalin tu parte na organisasion ni Jehova durante na COVID-19 pandemic?

¹⁴ Mangiyayawa si Jesus tu masirib nga direksion ta tiempo na ziga. Nasingan i benefisio ira natun nga direksion turi ta namegafu i COVID-19 pandemic. Magaru ta mundo i ariadda ammu nu anni i kuadda. Ngem siniguradu  ni Jesus nga makalawa ittam tu manawag nga giya tapenu mattalupaddian ittam nga safe. Nepagaram ta nittam nga mam-mask onu maf-face shield ta publiko anna tuttulan i physical distancing. Neperaddam ta elder ira nga kanayudda nga kamustan i wawwaragi ta kongregasion tapenu mammuadda nu anni ira i pakawagadda ta pisikal anna ta espiritual. (Isa. 32:1, 2) Nakalawa ittam paga tu kammungan nga direksion anna pamagaram gukaban na update ira na Manangngal nga Baggi.

15. Anni nga direksion i nalawa tam ta pagistudy anna pallayyagayya durante na pandemic, anna anni ira i resulta natun?

¹⁵ Durante na pandemic, nakalawa ittam tu manawag nga direksion nu kunnasi ittam nga magistudy anna mallayyagayya. Insigida nga sinuttul tam danatun. Nangusa ittam tu videoconferencing tool ira tapenu magistudy, magasembli, anna makkombension. Letter writing anna telephone witnessing ngana gapa i maruddu nga kukukuattam ta pallayyagayya. Binendisionan ni Jehova i appursigi tam ira. Aru nga branch i nar-report nga napakaru i neyammung tu publisher da. Kakurugan na, makakkasta i ekspiriensa na aru nga wawwaragi durante taw nga tiempo.​—Innan i kahon nga “ Bebbendisionan ni Jehova i Pallayyagayya Tam.”

16. Ta anni ittam nga makasiguradu?

¹⁶ Nononopan na karuan nga sobra ngana mabba i pagimmugug na organisasion ta pandemic. Ngem namippiga ngana nga napakurug tam nga masirib i direksion ira nga nalawa tam. (Mat. 11:19) Nu pannonopattam gapa i naaya nga pangirollu ni Jesus ta totolena, makasiguradu ittam nga maski nu anni i mesimmu ta mappange, kanayun nga uffunan ittam ni Jehova anna na meddu nga Ana na.​—Bibbigan i Hebreo 13:5, 6.

17. Anni i matageno mu ta pangirollu ni Jesus?

¹⁷ Kuruga magayayya ittam ta pangirollu ni Jesus ta nittam! Parte ittam na organisasion nga ari mapassirina na nadduruma nga kultura, lahi, anna lengguahe. Kanayun ittam nga nabattug ta espiritual anna masanay ittam nu kunnasi nga ituppal i pallayyagayya. Matudduan gapa i kada tadday ta nittam nu kunnasi nga ibaruasi i bagu nga personalidad anna nu kunnasi nga makka-aya-aya. Mepangngo laman gafu nga iparayag tam nga si Jesus i mangirollu ta nittam!