Nituddu ni Jesus ta totolay ira nga memammo nakuan i relasiodda ta kataggi-tadday. Ngem kinagi na ta apostol na ira: “Arian nu abbattan tu zimittal ngà ta utun na davvun nga mangirattal ta imammo. Ari, ari tu imammo i nirattal ku nu ari espada. I nirattal ku ay i ari pakka-ana-anugu na ána nga lallaki anna yama da, ána nga babbay anna yena da, manugang nga babbay anna katugangad-da nga babbay.” (Mat. 10:34, 35) Anni i kayà kagian ni Jesus?

Manaki ni Jesus nga passirinan i makkafamilia. Ngem ammu na nga puede nga passirinan na tuddu na ira i karuan nga familia. Yari tu mawag nga ammu na makkaraga ira nga mabbalin tu disipulo ni Cristo anna danuri maya nga mappabawtiso i efekto na desision nga kuadda. Nu kontran saw ira na ari tu Saksi nga atawa da onu tanakuan paga nga kafamilia da, awayya na nga marigatan ira nga tuttulan i tuddu ira ni Cristo.

Pagaramman na Biblia i Cristiano ira nga “makillivu-livu ta memammo ta ngamin nga totolay.” (Roma 12:18) Ngem ta karuan nga familia, awayya na nga mabbalin tu gitta na “espada” i tuddu ira ni Jesus. Mesimmu yatun nu alawatan na tadday nga miembro na familia i tuddu ira ni Jesus ngem pammanakitan yatun na karuan nga kafamilia na. Ta kunnatun nga situasion, mabbalin tu “kontra” nari na tadday nga maggigiammu tu kinakurug danuri kafamilia na onu kabbalena.​—Mat. 10:36.

Awayya na nga mapurueban i pangaya na disipulos ni Cristo kani Jehova anna kani Jesus nu tanakuan i relihion na kabbaleda. Angngarigan na, baka fersan ira na kafamilia da nga ari tu Saksi nga masselebra tu okasion ira nga konektadu ta falsu nga relihion. Nu mapurueban i pangurug da, sinni tamma i pagayayyatadda? Kinagi ni Jesus: “I sinni laman nga tolay nga mas i pangaya na ta yama onu yena na anne niakan, ay awan tu kekunnayan na niakan.” (Mat. 10:37) Ari gapa kayà kagian ni Jesus nga ari kuruga iddukan na disipulos na i magana da tapenu laman mabbalin ira tu mepappangngo ta nisa. Ipasa-pasigo na laman nga mawag tu ammu da nakuan i pinaka-importante ira nga gannug ta pattoleda. Nu kontran na ari tu Saksi nga kafamilia tam i kukukuattam ta passerbi kani Jehova, iddukattam nakuan lagapa ira. Ngem mas importante nakuan i pangaya tam ta Dios.

Siguradu nga mataka-taki i pangokkontra na familia. Ngem daddamman nakuan na disipulos ni Jesus yaw ira nga kinagi na: “Sinni laman nga manaki na nga iyabaga i pakazigarigatan nga estaka na anna tumuttul niakan ay ari mepappangngo ta niakan.” (Mat. 10:38, NW ) Imammatan gafu na Cristiano ira i pangokkontra na familia bilang parte na pazziga-riga nga mawag tu attamman na disipulos ni Cristo. Ngem iddanamadda nga megafu ta makasta nga kondukta da, manguli lagapa saw i nono na kafamilia da ira nga ari tu Saksi anna alawatadda lagapa saw i mensahe na Biblia.​—1 Ped. 3:1, 2.