1. Ngatta si Jehova i kapianan nga Minaddueng?

TURI Nobiembre 2010, melalaku tu maggi-70 million dolyares ta London England i tadday nga Chinese nga banga nga napadday turi meka-18 siglo. Manawag nga awayya nga pabbalinan na tadday nga minaddueng onu mamadday tu banga, i ordinario anna mappo laman nga pila onu dali tu makakkasta anna mangini-ngina nga obra maestra. Ngem awan vuluvuga tu minaddueng nga tolay i mekumpara kani Jehova. Ta pangurianan na meka-annam nga aggaw na pamaratu, niyusa na Dios i “gavu na davvun” tapenu mafforma tu perfekto nga tolay anna iniddanna tu abilidad nga parigan i kualidadna bilang Namaratu. (Gen. 2:7) Mepangngo gafu nga magalan yatun nga perfekto nga tolay nga si Adan tu “ana na Dios.”​—Luc. 3:38.

2, 3. Kunnasi tam maparigan i nabbabawi ira nga Israelita?

² Ngem nawawan ni Adan i relasionna ta Dios turi ta narrebelde yaya kontra ta Namaratu sa. Maski nu kunnatun, ta pappasa-pasa na henerasion ira, “napakaru” ta gaka-gaka ni Adan i nappili nga itaddaggan i soberania ni Jehova. (Heb. 12:1) Gukaban na sigga-pakalinno nga pakimoray kani Jehova, nipasingadda nga kayàda nga mabbalin yaya tu Yama anna Minadduengda, ari nga si Satanas. (Juan 8:44) Iperaddam nittam na kinamataloda ta Dios i kinagi ni Isaias meyannung ta nabbabawi ira nga Israelita: “Ngem, O Jehova, sikaw i Yamami. Sikami i pila, anna sikaw i Minadduengmi; sikami ngamin i trabahu na limam.”​—Isa. 64:8.

³ Ta kaggawattam, ipasingan gapa na ngamin nga maddayarayaw kani Jehova ta espiritu anna kinakurug i kunnatun nga kinapakalinno anna pakimoray. Ibiladda nga dayaw i agalan si Jehova nga Yama anna Minadduengda. Ibilammu kari i baggim nga kagitta na malapo nga pila ta lima ni Jehova, nga sigga-paran nga mappamolde sa tapenu mabbalin tu makasta nga banga ta matana? Imammatammu kari gapa i wawwaragim nga maddaggun paga laman imolde na Dios? Tapenu moffunattam tatun nga gannug, ikonsidera tam i tallu nga aspeto na trabahu ni Jehova bilang Minaddueng tam: Nu kunnasina nga pilian danuri kayàna moldeyan, nu ngatta moldeyanna ira, anna nu kunnasina nga kukukuan yatun.

4. Kunnasi nga pilian ni Jehova i moldeyanna? Mangiyawa tu angngarigan.

⁴ Ari nga itsura tam i ini-innan ni Jehova nu obserbanna ittam. Usitakkanna lallagu i futu tam, i kata-katoletam. (Bibbigan 1 Samuel 16:7b.) Masingan yaw turi ta binuu na Dios i kongregasion Cristiano. Nakikofun yaya anna i Anana ta totolay nga marake ta pagimamma na tanakuan. (Juan 6:44) I tadday tatun ay si Saulo nga Fariseo​—‘minannara-darum anna minammasa-pasiran.’ (1 Tim. 1:13) “Ngem si Jehova i minangngusito ta futu,” yatutta arianna minammatan si Saulo nga awan tu sesserbina nga pila. (Prov.17:3) Minammatan lallagu yaya ni Jehova nga awayyana nga moldeyan tu makakkasta nga banga​—kakuruganna, kinagi ni Jehova nga “pinilì yaya nga masserbi” tapenu mamakurug “ta patul ira, ta Hentil ira, tuange ta taga-Israel ira.” (King. 9:15) Kasali paga ta karuan nga nasingan na Dios nga potensial nga banga “nga masserbi ta importante nga langan,” i dati ira nga minaggillellaw, immoral, anna minakkoko. (Roma 9:21; 1 Cor. 6:9-11) Durante nga mammuadda i fustu nga pakannammu ta Uvovug na Dios anna mangurug ira, nipamavuludda nga moldeyan ira ni Jehova.

5, 6. Kunnasi nga i pangalawà kani Jehova bilang Minaddueng tam afektanna i pagimamma tam ta (a) totolay ta teritorio? (b) wawwaragi tam?

⁵ Kunnasi nga makoffun yatun nittam? I pattalo tam ta abilidad ni Jehova nga mabbibbig tu futu anna makikofun ta kayàna nga pilian, i mangifugag nittam nga ukuman i tanakuan ta teritorio anna ta kongregasiottam. Innattam i angngarigan ni Michael. “Kada egga umay nga Saksi ni Jehova nikami, panawakku ira tapus magappappe ngà tu ariakku ira nasingan. Talaga marake i ugalì. Turi kua, egga nammammù nga familia nga nagustuakku i konduktada. Tapus tadday nga aggaw nakaddag ngà ta Saksi ni Jehova gabba ira! I makasta nga konduktada i namaguyu niakan nga pannonopan i pangirerumà nira. Nannammuakku nga awan tu nakebaseyanna yatun.” Tapenu mammuan ni Michael i kurug, nappa-Bible study yaya. Turi kua, nabawtisowan yaya anna nasserbi tu ngamin-tiempo.

⁶ Maka-afekto gapa ta pagimamma ta kapangngurug tam i pangalawà kani Jehova bilang Minaddueng tam. Imammatammu kari i wawwaragim nga kagitta na pagimamma ni Jehova​—ari tu napadday ngana nga produkto, nu ari, mapappadday paga laman? Masinganna i kata-katoletam kunne na gapa ta klase na tolay nga awayya tam pabbalinan ta makapangngua nga limana. Yatutta positibo i pagimamma ni Jehova ta totolay anna ari yaya nakafokus ta temporario ira nga kina-imperfekto. (Sal. 130:3) Maparigattam yaya gukaban na positibo nga paningan ta aripanna ira. Kakuruganna, awayya tam makipattrabahu ta Minaddueng tam gukaban na passuporta ta espiritual nga papprogreso na wawwaragi tam. (1 Tes. 5:14, 15) Bilang “regalu ta totolay ira,” i elder ira nakuan i mangipoppollu tatun.​—Efe. 4:8, 11-13.

7. Ngatta appresiammu i disiplina ni Jehova?

⁷ Awayyana nga naginnam ngana i karuan nga kunnaw i nakagida: ‘Naappresià laman i paddisiplina na maganaku niakan turi ta egga ngana anaku.’ Durante nga umaru i ekspiriensa tam ta pattolay, manguli i pagimamma tam ta disiplina anna imammatattam ngana yatun nga pangipasingan tu aya, kagitta ni Jehova. (Bibbigan i Hebreo 12:5, 6, 11.) Wan, megafu ta aya ni Jehova ta ánana, pasa-pasensianna nga moldeyan ittam. Kayàna nga mabbalittam tu masirib anna magayaya, anna ayatattam gapa yaya. (Prov.23:15) Ari yaya magayaya nu mazziga-riga ittam; onu matay ittam ta “negagangay nga paddia-paddiat-tam” bilang ána na gazzi, nga yatun i narensia tam kani Adan.​—Efe. 2:2, 3.

8, 9. Kunnasi nga tudduan ittam ni Jehova ta maddaggun, anna kunnasi nga mattulu-tuloy yaw ta mappange?

⁸ Bilang ána na gazzi, dati nga aru i kualidad tam nga ari makapagayaya ta Dios, awayyana paga lagu nga kagitta na ugu-ugali na ayam! Ngem mapia ngana laman ta megafu ta pammolde ni Jehova, nanguli ittam; nabbalittam nga kagitta na karneru. (Isa. 11:6-8; Col. 3:9, 10) Yatutta i pallevu nga pammoldeyan nittam ni Jehova ay kagitta na espiritual nga paraiso. Makatageno tam tu proteksion anna seguridad maski nu egga tam ta marakay nga mundo. Maekspiriensa ngana gabbalaman na ziminakal ira ta ari meddu anna magulu nga familia i kurug nga aya. (Juan 13:35) Nagigiammu tam gapa nu kunnasi nga ayatan i tanakuan. Pinaka-importante ta ngamin, nannammuattuam si Jehova anna mataga-­tageno tam i ayana bilang yama.​—Sant. 4:8.

⁹ Ta napabagu nga mundo, ma-ekspiriensa tam i ngamin nga bendision ta espiritual nga paraiso. Egga eksakto nga katumbasna yatun nga espiritual nga paraiso​—i literal nga paraiso sonu mammaguray ngana i Pappatulan na Dios. Tatun nga tiempo, itulu-tuloy ni Jehova nga moldeyan i ngamin nga maddian ta davvun, anna tudduanna ira tu ganna-gannug nga ariattam paga malippawa ta maddaggun nu kunnasi i karuna. (Isa. 11:9) Pabbalinan paga na Dios tu perfekto i nono anna baggi tam, tapenu malippawa tam i tudduna anna matuppal tam tu mapia i urena. Yatutta determinadu tam nakuan nga kanayun nga makimoray kani Jehova, nga imammatattam nga pangipasingan tu ayana nittam i pammoldena.​—Prov.3:11, 12.

10. Kunnasi nga nipasingan ni Jesus i kinapasensia anna pakawayya na Kapianan nga Minad­dueng?

¹⁰ Kagitta na malalaki nga minaddueng, ammu ni Jehova i klase anna kalidad na “pila” nga egga sa, anna moldeyanna yatun ta kepangngattanna. (Bibbigan i Salmo 103:10-14.) Makilallang yaya nittam bilang indibidual nga ikonsiderana i pakkafian, limitasion, anna i espiritual nga paddakal tam. Nipasingan na Anana nu kunnasi i pattratuna ta imperfekto nga aripanna. Innattam nu kunnasi i nipattratu ni Jesus ta pakkafian ira na apostolesna, tallugaring ta tendensiada nga paddaraman nu sinni i mas atannang nira. Nu nasingammu mismu i paddidiskusion na apostoles, imammatammu kari ira nga mapakalinno anna alistu nga mamolde? Ari nga negatibo i pagimamma ni Jesus nira. Ammuna nga awayya nga mamolde na matalo nga apostolesna gukaban na masippo, mapasensia nga panabarang, anna pangobserba ta mismu nga kinapakalinnona. (Mar. 9:33-37; 10:37, 41-45; Luc. 22:24-27) Kabalin na paginnolay ni Jesus anna panullo sa na masanto nga espiritu, naffokus i apostoles ari nga ta posision onu kinaprominente, nu ari, ta trabahu nga neyawa nira.

11. Kunnasi nga napakurug ni David nga malapo yaya nga pila, anna kunnasi tam yaya nga maparigan?

¹¹ Moldeyan ni Jehova i aripanna ira ta kaggawattam gukaban na Uvovugna, masanto nga espiritu, anna kongregasion Cristiano. Moldeyan ittam na Uvovugna nu igakkag tam nga bibbigan, monag nga pana-panonopan, anna mappoffun kani Jehova nga meyaplika yatun. Kinagi ni David: “Maraddammat-taka nu egga ngà ta aggiddan; tanga-gabi nga agga-nono taka laman.” (Sal. 63:6) Kinagina paga: “Daya-rayawak-ku i YAFU gafu ta irolluan nà, nu ta gabi i nono ku ay tabarangngan nà.” (Sal. 16:7) Wan, nipamavulun ni David i tabarang na Biblia nga mepatalatto ta kononagganna, moldeyan i ginnonopan anna panagenona, maski nu madammo yatun nga tabarang. (2 Sam. 12:1-13) Anni kastana nga ehemplo na kinapakalinno anna pakimoray i nipasingan nittam ni David! Monag nga pana-panonopammu kari i Uvovug na Dios, nga ipamavulun nga influwensianna i kononaggammu? Mas kari paga nga kuammu yatun?​—Sal. 1:2, 3.

12, 13. Kunnasi nga moldeyan ittam ni Jehova gukaban na masanto nga espiritu anna na kongregasion Cristiano?

¹² Nadduruma i klase na pammolde nittam na masanto nga espiritu. Angngariganna, awayya nga uffunanna ittam nga mapeggan tu kagitta na personalidad ni Cristo, nga masingi-singan gukaban na vunga na masanto nga espiritu na Dios. (Gal. 5:22, 23) Aya i tadday ta aspetona yatun nga vunga. Ayatattam i Dios anna kayà tam nga parulattan yaya anna mappamolde sa, nga imammatan nga ari mamakadammo i bili-bilinna. Pasikannan ittam gapa na masanto nga espiritu tapenu malabanattam i influwensia na mundo anna i marake nga espirituna yatun. (Efe. 2:2) Ta kabbing ni Pablo, nainfluwensian yaya na minappakatannang nga espiritu na Judio ira nga lider na relihion. Turi kua niturana gabbalaman: “Awayyà nga arubangan ngamin nga paddia-paddian gafu ta pakapangngua nga iyawa niakan ni Cristo.” (Fil. 4:13) Yari tu parigattam si Pablo nga kanayun nga kiddawan i uffun na masanto nga espiritu. Ginnan ni Jehova i napafutuan nga pakiyuffun na minappakalinno ira.​—Sal. 10:17.

¹³ Usan ni Jehova i kongregasion Cristiano anna i mangiyorollu ira tapenu mamolde ittam bilang indibidual. Angngariganna, nu masingan na elder ira nga egga problema tam ta espiritual, uffunadda ittam​—ngem ari nga base ta sirib nga naggafu ta totolay. (Gal. 6:1) Sigga-pakalinno ira nga mappoffun ta Dios, nga kiddawan i pakalippawa anna sirib. Megafu ta agga-nonoda i situasiottam, magguyu ira mekunnay ta pakimalloda gukaban na par-research ta Uvovug na Dios anna ta publikasiottam ira. Makoffun yaw nira tapenu meyawada i uffun nga kawagattam. Nu meddu nga tabarangngaddaka, kagittana ta istilo na assinnummu, alawatammu pano yatun bilang pangipasingan na Dios tu aya nikaw? Nu kunnatun i kuammu, mepasingammu nga kagittam i malapo nga pila ta lima ni Jehova, nga sigga-paran nga mappamolde ta pakabenefisiowammu.

14. Maski nu egga autoridad ni Jehova ta pila, kunnasi nga ipasinganna i respeto ta lallaguretam nga mappili?

¹⁴ I pakalippawa nu kunnasi nga moldeyan ittam na Dios ay makoffun ta relasion ta kapangngurug tam anna ta pagimamma tam ta totolay ta teritoria, kasali ngana i Bible study tam ira. Ta tiempo na Biblia, ari laman nga magunnug tu pila i minaddueng tapus insigida nga moldeyanna yatun. Ipreparana labbi i pila gukaban na pangalsa ta bata-batu anna tanakuan paga nga ari makasta nga kivuna. Kunnatun gapa ta espiritual, uffunan na Dios nga meprepara i sigga-paran ira nga indibidual tapenu mamoldena ira. Arianna ira fuersan nga manguli, nu ari, itudduna i matunung ira nga estandartena tapenu mapakarennuadda i pattoleda onu boluntariu ira nga manguli.

15, 16. Kunnasi nga mepasingan na Bible study ira nga kayàda nga moldeyan ira ni Jehova? Mangiyawa tu angngarigan.

¹⁵ Ikonsidera tam i angngarigan ni Tessie, nga sister ta Australia. Kinagi na sister nga nagistudy sa: “Alistu nga nannammuan ni Tessie i kinakurug ta Biblia. Ngem ari yaya napprogreso ta espiritual​—maski ta pagatende ta study ira! Yatutta kabalikku nga napafutuan nga ipakimallo yatun, nadisidì nga iyemmang i pagistudy sa. Ngem nakaddag ngà ta nesimmu. Turi ta abbo ku nga ultimo ngana nga pagistudy-mi, nivuvvu ni Tessie niakan i egga ta futuna. Kinagina nga natagenona nga minaggappappe yaya megafu ta minassugal yaya. Ngem naddesision ngana yaya nga iyemmang yatun nga bisiu.”

¹⁶ Ari nabbayag, nagatende ngana si Tessie ta study ira anna ipasa-pasinganna ngana i kualidad ira na Cristiano​—maski nu uyu-uyawan yaya na dati nga kakavvuluna. Kinagi paga na sister: “Turi kua, nabawtisowan si Tessie anna nasserbi nga regular payunir, maski nu baraddi paga i ánana.” Wan, nu pakarennuan na Bible study ira i pattoleda tapenu mapagayaya i Dios, makikkofun yaya nira anna moldeyanna ira tu makakkasta nga banga.

17. (a) Anni i kakayàmu meyannung kani Jehova bilang Minaddueng tam? (b) Anni nga aspeto na pammolde i magigiammu ta tumunug nga artikulo?

¹⁷ Adde ta kaggawattam, egga lagapa ira banga nga mana-mano nga napadday; moldeyan tu mapia na minaddueng i pila nga usanna. Kunnatun gapa nittam, mapasensia nga moldeyan ittam tu mapia na Minaddueng tam, gukaban na tabaranna ira anna obserbanna nu kunnasi ittam mattuppal. (Bibbigan i Salmo 32:8.) Matagenomu kari i personal nga interes nikaw ni Jehova? Masingammu kari i baggim nga maddaggunna nga moldeyan ta meddu nga limi-limana? Nu wan, anni paga ira nga kualidad i makoffun nikaw tapenu mattalupaddiakka nga malapo anna alistu nga mamolde nga pila ta arubang ni Jehova? Anni ira i kualidad nga mawag tu lillitammu tapenu ari ka mabbalin tu matagga anna mariga nga mamolde? Kunnasi nga maki-koopera i magana kani Jehova tapenu moldeyan i ánada? Yatun i magigiammu ta tumunug nga artikulo.