1, 2. Kunnasi nga niprofesiya na Biblia nga umaru i totolay ni Jehova?

I MATALO ira nga aripan ni Jehova ta davHS.10vun, i Saksina ira, i mabbuu ta kuruga nerumu-ruma nga organisasion. Kurug nga imperfekto anna makaliwa i totolay nga mabbuu tatun. Ngem igiggiya lagapa na masanto nga espiritu na Dios i kongregasionna ta interu mundo tapenu mapprogreso anna dumakal. Gigiammuattam i karuan ta makapabbaw ira nga gannug nga kukukuan ni Jehova ta imperfekto, ngem sigga-paran nga totolena.

² Turi ta namegafu i pangurianan nga aggaggaw na maddaggun nga sistema ta 1914, balabaddi laman i aripan na Dios ta davvun. Ngem binendisionan ni Jehova i pallayyagayyada. Ta tumunug ira nga dekada, minillion i nakannammu ta kinakurug ta Biblia anna nabbalin ira tu Saksi ni Jehova. Niprofesiya mismu ni Jehova yaw nga kappabbaw nga paddakal: “I baddi ay mabbalin tu tanga-rivu, anna i baddi tu makapangngua nga nasion. Sakan mismu, si Jehova, i mamalistu tatun ta mismu nga tiempona.” (Isa. 60:22) Natuppal yatun nga profesiya taw nga pangurianan nga aggaggaw. Mas aru ngana i bilang na totolay na Dios ta davvun anne ta populasion na aru nga nasa-nasion.

3. Kunnasi nga nangipasingan tu aya i aripan ira na Dios?

 ³ Ta maddaggun, inuffunan gapa ni Jehova i totolena tapenu mas mepasingadda i primero nga kualidadna​—aya. (1 Juan 4:8) Pinarigan ni Jesus i aya na Dios anna kinagina ta disipulosna: “Ay sangoye, iyawa ku nikamu i bagu nga dob: makka-aya-aya kamu . . . Nu egga nikamu i pakka-aya-aya, kannammuan ngamin na totolay tu disipulo takamu.” (Juan 13:34, 35) Kuruga importante yaw ta nappasa nga daga-ragun turi ta napakaru i paggegerra na nasa-nasion. Angngariganna, ta World War II paga laman, ma-55 million ngana i natay. Ngem ari nga nakiparte i Saksi ira ni Jehova tatun nga pamatay nga nesimmu ta interu mundo. (Bibbigan i Mikias 4:1, 3.) Nakoffun yatun tapenu mattalupaddian ira nga marenu ta daga na totolay.​—King. 20:26.

4. Ngatta kappabbaw i pagaru na totolay ni Jehova?

⁴ Umaru lagapa i totolay na Dios maski nu egga ira ta marake nga mundo nga kagian na Biblia nga kontroladu ni Satanas, “i dios noye na mundo.” (2 Cor. 4:4) Yaya i mangokkontrol ta pulitikal nga elemento na mundo tuange ta media. Ngem arianna mapagimmang i pallayyagayya. Megafu ta ammu ni Satanas nga ababba ngana laman i nabattang nga tiempona, mappuppursigi yaya nga itallikug i totolay ta kurug nga paddayarayaw, anna usanna i nadduruma nga taktika.​—Nep. 12:12.

5. Ngatta egga tiempo nga matakitan ittam na tanakuan? (Innan i letratu ta gafu na artikulo.)

⁵ Ipagaram na kongregasion Cristiano i importansia na aya ta Dios anna ta kasittolay. Yatun gapa i nipasingan ni Jesus. Kunnaw i tabbagna meyannung ta pinaka-importante nga dob: “ ‘Ayatam-mu i Yafu nga Dios mu ta interu nga futum, interu nga ikararuam anna ta interu nga nono mu.’ Yaw i ollu anna kuruga importante ta ngamin nga dorob. I mekarua ay kagitta gabbalaman na ollu: ‘Ayatam-mu i ikattolem ta kunna pangaya mu ta baggim.’ ” (Mat. 22:35-39) Ngem manawag i kagian na Biblia nga neyana tam ngamin nga imperfekto megafu ta liwa ni Adan. (Bibbigan i Roma 5:12, 19.) Yari tu egga tiempo nga matakitan ittam ta kakkagian anna kukukuan na kakongregasiottam. Megafu tatun, mapurueban i aya tam kani Jehova anna ta totolena. Anni gafu i kuattam ta kunnatun ira nga situasion? Egga gapa nakagi onu nakua na matalo ira nga aripan ni Jehova gari nga nakataki ta tanakuan, yatutta makagigiammu tam ta kagian na Biblia meyannung taw.

6. Ngatta makagi nga ari nadisiplina ni Eli i ánana?

⁶ Angngariganna, egga dua nga ana na Atannang nga Pari nga si Eli nga ari mattuttuppal ta bilin ira ni Jehova. Mabibbig tam: “I ána ni Eli ay marake nga lallaki; awan tu respetoda kani Jehova.” (1 Sam. 2:12) Maski nu importante i annungan na yamada ta pangipoppollu ta kurug nga paddayarayaw, nakangngua lagapa ira tu madammo nga liwi-liwa. Ammu ni Eli yatun anna dinisiplinana nakuan ira, ngem pinagurayanna laman ira. Bilang resulta, sinentensian na Dios i familia ni Eli. (1 Sam. 3:10-14) Turi kua, ari ngana nga napamavulunan nga masserbi bilang atannang nga papari i gaka-gakana. Nu egga ka ta tiempo ni Eli, anni i reaksiommu megafu ta pinagurayanna laman i liwi-liwa na ànana? Ipamavulummu kari nga mesiddukal ka tatun adde ta punto nga ari ka ngana masserbi ta Dios?

7. Kunnasi nga nakaliwa tu grabe si David, anna anni i kingngua na Dios meyannung tatun?

⁷ Iniddu ni Jehova si David, i kinagina nga “tolay nga meddu ta futù.” (1 Sam. 13:13, 14; King. 13:22) Ngem turi kua, sinallaw ni David si Batsheba, tapus nabussi. Nesimmu yatun turi ta awan i atawa ni Batsheba nga si Uria megafu ta nasserbi ta armada. Turi ta manganannuan nga limibbe si Uria ta baleda, minaniobra ni David nga mabbiko ira ni Batsheba tapenu mallawan nga si Uria i yama na bussi ni Batsheba. Ari nga kingngua ni Uria yatun yari tu niyunnug ni David nga mapatay yaya ta gerra. Dakal i katali na krimen nga kingngua ni David​—trahedia sa tuange ta familiana. (2 Sam. 12:9-12) Ngem nangipasingan tu allo i Dios taw nga tolay nga nasserbi gabbalaman kani Jehova “nga matalo i futuna.” (1 Pat. 9:4) Nu egga ka tatun nga tiempo, anni i reaksiommu? Mesiddukal ka kari ta marake nga kingngua ni David?

8. (a) Kunnasi nga ari nattuppal si Pedro ta kinagina? (b) Ngatta tulu-tuloy nga niyusa ni Jehova si Pedro kabalinna nga nakaliwa?

⁸ Si apostol Pedro i tadday paga nga angngarigan. Pinili yaya ni Jesus nga tadday ta apostolesna; ngem egga gapa tiempo nga nakekagi onu nakangngua si Pedro tu pinabbabawyanna gabbalaman. Angngariganna, pinanawan na apostoles si Jesus turi ta kawaganna ira. Nigena yatun, kinagi ni Pedro nga arianna nga panawan si Jesus maski nu panawan yaya na karuan. (Mar. 14:27-31, 50) Ngem turi ta nagafu si Jesus, pinanawan yaya na ngamin nga apostoles​—kasali si Pedro. Namippiga nga nilimag ni Pedro nga ammuna si Jesus. (Mar. 14:53, 54, 66-72) Nabbabawi gabbalaman si Pedro, anna tulu-tuloy nga niyusa yaya ni Jehova. Nu tadday ka nga disipulo tatun nga tiempo, nafektan pano i kinamatalomu kani Jehova?

9. Ngatta mattalo ka nga kanayun nga ipasingan ni Jehova i hustisia?

⁹ Yatun i karuan ta angngarigan ira na indibidual nga nakakua tu makataki ta tanakuan. Aru paga i nesimmu nga kunnatun gari anna ta kapappasa laman nga tiempo. Egga ira marake nga nakua na nasserbi kani Jehova nga makataki ta tanakuan. Ngem i punto, anni i kuammu? Pamavulunammu kari nga mesiddukal ka ta nakaliwatadda, nga panawammu si Jehova anna i totolena tuange ta kongregasiommu? Onu malippawamu nga pappasan ni Jehova i tiempo tapenu mabbabawi i nakaliwa anna itununna i mali ira anna ipasingan i hustisia? Egga gapa ira i nakaliwa tu madammo, nga ariadda inalawa i allo na Dios anna ari nabbabawi. Ta kunnatun ira nga situasion, makkomfiansa ka kari nga panunnutan gabbalaman ni Jehova i nakaliwa ira, nga awayyana tu malsa ira ta kongregasion?

10. Anni i nalippawa ni Jesus meyannung ta nakaliwatan ni Judas Iscariote anna ni Pedro?

¹⁰ Mabibbig ta Biblia i rekord ira na aripan na Dios nga nattalupaddian nga matalo kani Jehova anna ta totolena maski nu madammo i liwi-liwa na tanakuan ta pallevuda. Angngariganna, nappili si Jesus tu 12 nga apostoles kabalinna nga nakimallo ta interu gabi. Si Judas Iscariote i tadday nira. Turi ta trinaydor yaya ni Judas, ari nga pinamavulunan ni Cristo nga madaral i mismu nga relasionna ta Yamana nga si Jehova; onu maski i pinangilimag sa ni Pedro. (Luc. 6:12-16; 22:2-6, 31, 32) Ammu ni Jesus nga ari nga liwa yatun ni Jehova onu na totolena. Nitulu-tuloyna lagapa i makakkasta ira nga kukukuanna maski nu makadismaya sa i karuan ta disipulosna. Binendisionan ni Jehova si Jesus gukaban na pamaginnolena sa, nga yatun i nangivuka sa tu dalan nga mabbalin tu Patul ta nelangitan nga Pappatulan.​—Mat. 28:7, 18-20.

11. Anni kinagi na Biblia meyannung ta totolay na Dios ta kaggawattam?

¹¹ Ari manguli i maladda nga nakebaseyan na komfiansa ni Jesus kani Jehova anna ta totolena. Kakuruganna, nu innattam i metuttuppal ira ni Jehova gukaban na aripanna ira taw ta pangurianan nga aggaggaw, talaga nga makapabbaw yatun. Awan ngana tu tanakuan nga mangilayyagayya tu kinakurug ta interu mundo, megafu ta i nattaradday nga kongregasion ni Jehova laman i igiggiyana. Mabibbig ta Isaias 65:14 i espiritual nga kondision na totolay na Dios: “Innannu! Makkulle ta pagayaya i aripakku ira megafu ta makasta nga kondision na futuda.”

12. Kunnasi tam nakuan imammatan i naliwatan na tanakuan?

¹² Magayaya i aripan ira ni Jehova ta mapia ira nga makuada megafu ta igiggiya ira ni Jehova. Balittag gapa i mesissimmu ta totolay nga nainfluwensian ni Satanas, nga marraddam ira megafu ta mas narrake i paddia-paddiadda. Ari masirib anna mali nga paliwatan si Jehova onu i kongregasionna ta liwi-liwa na karuan laman nga aripanna. Mawag tu kanayuttam nga mammakatalo kani Jehova anna ta unnugna ira anna gigiammuan nu kunnasi tam arubangan i naliwatan na tanakuan.

13, 14. (a) Ngatta mawag tu makkapasa-pasensia ittam? (b) Anni nga promesa i kayà tam nga daddamman?

¹³ Kunnasi tam gafu nga arubangan i situasion ira nga egga nakagi onu nakua na tadday nga aripan ni Jehova nga nakataki nittam? Kunnaw i makasta nga prinsipio ta Biblia: “Ari ka insigida nga matakitan, megafu ta i taki na nono i aggadian ta abaga na ulapa ira.” (Ecl. 7:9) Mawag nga malippawa tam nga ma-6,000 dagun ngana nga nawawan na tolay i kina-perfekto nga egga ta Eden gari. Kanayun nga makaliwa i imperfekto nga tolay. Yari tu ari makasta nga sobra i ekspektattam ta kapangngurug tam anna pamavulunattam nga mawawan i pagayaya tam bilang parte na totolay na Dios megafu ta naliwatadda. Mas marake paga nu mappesiddukal tam ta naliwatadda ira anna panawattam i organisasion ni Jehova. Nu mesimmu yatun, mawawattam i pribilehio nga masserbi kani Jehova, maski paga i iddanama nga mattolay ta napabagu nga mundo na Dios.

¹⁴ Tapenu mapattalupaddiattam i monag nga pagayaya anna matuyag nga iddanama, mawag tu kanayun nga manawag ta nono tam i promesa ni Jehova: “Innannu! Mamaratu ngà tu bagu nga langa-langi anna bagu nga davvun; anna i dati ira nga ganna-gannug ay ari ngana nga meraddamman, onu maski paga mepafutu.” (Isa. 65:17; 2 Ped. 3:13) Ariammu pavulunan nga fugaddannaka na naliwatan na tanakuan ta pangalawa tatun ira nga bendision.

15. Anni i kinagi ni Jesus nga mawag tu kuattam nu makaliwa i tanakuan?

¹⁵ Megafu ta awattam paga ta napabagu nga mundo, mawag gafu nga ikonsidera tam i pana-panono na Dios nu kunnasi nga arubangan i situasion ira nu egga nakagi onu nakua na tanakuan nga nakataki nittam. Angngariganna, i tadday nga prinsipio nga daddammattam ay i kinagi ni Jesus: “Ta nu pakoman nu i nakaliwa ira nikamu, pakoman nakamu gapa na Yama nu ta langi. Ngem nu arian nu ira nga pakoman, arian nakamu gapa nga pakoman na Yama nu ta katagarulian nu.” Daddammattam gapa turi ta niyavu ni Pedro kani Jesus nga nu mawag tu adde ta “mamippitu” ittam nga mamakoma, kinagi sa ni Jesus: “Ari laman tu mamippitu ngem mamippitu-fulu nga pitu.” Manawag nga kayà kagian ni Jesus nga kanayuttam nakuan nga sigga-paran nga mamakoma; yaw nakuan i ollu anna ­insigida nga kuattam.​—Mat. 6:14, 15; 18:21, 22.

16. Anni i makasta nga ehemplo ni Jose?

¹⁶ Makasta nga ehemplo ta pangarubang nu egga nakaliwa nittam si Jose, i kaka ta dua nga ana ni Jacob kani Rachel. Mamassil sa i mafulu nga wawwaragina ta yama megafu ta paborito yaya na yamada. Nilakuda ta pakka-aripan si Jose. Ta pappasa na aru nga dagun, megafu ta makasta ira nga kingngua ni Jose, nabbalin yaya tu mekadua ta katannangan ta Ehipto. Turi ta egga bisin ta diadda, minay ta Ehipto i wawwaragi ni Jose tapenu gumatang tu makan ngem ariadda ammu nga yaya i wagida. Awayya nakuan ni Jose nga niyusa i autoridadna tapenu balakkanna ira ta kitaddake nga pinattratuda sa. Pinuruebanna lallagu i wawwaragina nu nanguli ngana ira. Turi ta nammuanna nga talaga nanguli ngana ira, niyammammuna nira i baggina. Tapus kinagina: “Yari tu ari kamu nga maganassing. Sakan i kanayun nga mangiyawa tu makan nikamu anna ta baraddi nga ánanu.” Kinagi paga na Biblia: “Binanna-bannayanna gafu ira anna pinagaramna ira.”​—Gen. 50:21.

17. Anni i kuammu nu makaliwa i tanakuan?

¹⁷ Makasta gapa nga daddamman nga megafu ta makaliwa ittam, awayyana nga matakitattam i tanakuan. Nu nakua tam yatun, nibilin na Biblia nga angngayattam i natakitattam anna makippakoma ittam. (Bibbigan i Mateo 5:23, 24.) Appresiattam nu pakoman ittam na tanakuan anna ari mattaki i nonoda ta liwi-liwa tam, yari tu kunnatuttam nakuan gapa nira. Kinagi na Colosas 3:13: “Makkapasa-pasensia anna makkapaka-pakoma kamu nu egga i taki na nono nu ta kataggi-tadday nikamu. Mawag tu makkapaka-pakoma kamu ta kunna nipamakoma na Yafu nikamu.” Ari nga ‘mamappan tu taki na nono’ i Cristiano megafu ta aya, kunna 1 Corinto 13:5. Nu pakomattam i tanakuan, pakoman ittam gapa ni Jehova. Wan, nu meyannung ta pangarubang ta naliwatan na tanakuan, parigan na Cristiano ira i minaggallallo nga pakilallang ni Jehova nittam nu makaliwa tam.​—Bibbigan i Salmo 103:12-14.