Nakadammo tu passport aranni ta baleda si Haykanush, tadday nga unbaptized publisher ta Armenia. Egga i debit card anna dakal nga kuartu ta unag na passport. Nipakannammuna yatun ta atawana nga lalaki nga unbaptized publi­sher gapa nga kagittana.

Dakal i problemada ta finansial anna egga gatuda; ngem naddesision ira nga itoli i kuartu ta adres nga egga ta passport. Nakaddag i makakkua tatun​—kunne na gapa ta familiana. Niyesplika ni Haykanush anna na atawana nga mapattalakkan ira megafu ta maggigiammu ira tu Biblia. Natagenoda nga mawag tu mapattalakkan ira, anna inusada yaw nga oportunidad tapenu mepakannammuda i meyannung ta Saksi ira ni Jehova anna nangibattang ira tu literatura tatun nga familia.

Kayà na familia nga iddan ira tu kuartu bilang pappabalo, ngem ariadda inà yatun. Ta tumunug nga aggaw, binisita ira na atawa nga babay ta baleda anna bilang pappabalo nira, pinilitna nga akseptadda i iyawana nga diamante nga saklang.

Kagittana yatun nga familia, aru nga totolay i nakaddag ta nipasingan ni Haykanush anna na atawana. Ngem nakaddag kari si Jehova? Anni i pagimammana ta kinamapattalakkadda? Sulit kari i kinamapattalakkadda?

Ari nga mariga i tabbag tatun ira nga pakkiavu. Megafu ta mangurug i aripan ira na Dios nga mas nabalor ta mata ni Jehova i pangipasingan tu kualidadna ira anne ta diamante, vulawan, onu tanakuan paga nga material nga ganna-gannug. Wan, neruma ta pagimamma na mas aru nga totolay i pagimamma ni Jehova nu anni i nabalor anna nu anni i ari. (Isa. 55:​8, 9) Para ta aripan ira ni Jehova, i mas paga nga pangipasingan tu kualidadna ira ay awan tu kegittanna.

Masingattam yatun ta kinagi na Biblia meyannung ta pakalippawa anna sirib. Kagian na Proverbio 3:​13-​15: “Magayaya i tolay nga nakaleg tu sirib; anna i tolay nga egga pakalippawana; i makala tatun ay mas mapia anne ta makala tu pira, anna i mapeggan tu kunnatun bilang benefisio ay mas mapia anne ta makala tu vulawan. Mas nabalor yatun anne ta korales; awan tu kekumparanna ta ngamin nga karagatammu.” Awan tu duda nga tagibaloran ni Jehova i kunnatun ira nga kualidad anne ta anni laman nga material nga pakkukua.

Kunnasi gapa meyannung ta kinamapattalakkan?

Mapattalakkan mismu si Jehova; “ari vuluvuga nga malladdug.” (Tito 1:2) Ininspiranna si Pablo nga mattura ta ollu-siglo ira nga Cristiano nga Hebreo: “Ipakimallo dakami. Awan tu babang mi tu marenu i konsensia mi ta karagatam-mi tu mekakua kami ta ngamin nga ikalangam-mi.”​—Heb. 13:18.

Makasta nga ehemplo si Jesus ta kinamapattalakkan. Angngariganna, turi ta kinagi na Atannang nga Pari nga si Caifas: “Iyassingam-mu ta ngagan na Dios nga matolay nu sikaw i Cristo nga Ana na Dios.” Ari nga nalladdug si Jesus ta pakkagina nga yaya i Mesias, maski paga kebalinanna yatun i pangakusa na Sanhedrin nga makkakkagi yaya tu mekontra ta Dios anna awayyana tu marresulta yatun ta patena.​—Mat. 26:63-67.

Kunnasi gapa nittam? Mapattalakkattam kari ta situasion ira nga awayyana tu mangiyawa nittam tu material nga benefisio ngem sobran onu kurangattam gamma i detalye na kagiattam?

Aminattam nga mariga i mabbalin tu mapattalakkan taw nga pangurianan nga aggaggaw megafu ta “ayatan na totolay i baggi da laman, anna kuartu laman i agga-nono da.” (2 Tim. 3:2) Egga paga i efekto na krisis ta finansial anna kawan na trabahu ta pabbalin tu mapattalakkan. Para ta karuan, ari tu marake i makkoko, mangilloko, onu i makisali ta darogas ira nga annangngua. Talaga aru i mannono tu kunnatun, nga nu kuartu ngana i kasali, nonopan na aru nga ari ngana tu isyu i pabbalin tu mapattalakkan. Nakakua tu mali ira nga desision maski i karuan nga Cristiano meyannung tatun anna nabbalin ira tu “kakkam” ta material nga benefisio yari tu nawawan i makasta nga taddagda ta kongregasion.​—1 Tim. 3:8; Tito 1:7.

Ngem parigan na mas aru nga Cristiano si Jesus. Nannammuadda nga mas importante i makadios ira nga kualidad anne ta maski anni nga kinariku onu pammakapianan. Yari tu ari nga mangopya i Cristiano ira nga kabataan tapenu makala tu atannang nga grado ta eskuela. (Prov. 20:23) Kurug nga ari tu kanayun nga egga i bala-balo na pabbalin tu mapattalakkan kagitta ni Haykanush. Ngem matunung ta mata na Dios i pabbalin tu mapattalakkan anna mapattalupaddiattam nga marenu i konsensia tam, nga yatun i mas nabalor.

Kunnatun i nesimmu kani Gagik. Kinagina: “Nigè nga mabbalin tu Cristiano, nattrabahu ngà ta dakal nga kompania nga ari mappaga tu fustu nga vugi onu tax i makakkua gukaban na pangideklarana laman tu baddi nga ganansia na kompania. Bilang manedyer, mawag nga ‘maki-areglo’ ngà ta awditor na vugi gukaban na passuhol sa tapenu palampasan ngana laman yatun nga paddarogas. Yari tu nabbalin ngana tu reputasiokku i ari mapattalakkan. Turi ta nannammuakku i kinakurug, ariakku ngana kayà kuan yatun maski nu dakal i sueldu tatun nga trabahu. Navvuka ngà ngana lagapa tu sarilì nga negosio. Ta gafu paga laman, legal nga nirehistrò i kompanià anna pinagakku i ngamin nga vugi.”​—2 Cor. 8:21.

Kinagi paga ni Gagik: “Maggi gaddua ngana laman i income-ku, yari tu mariga i panolè ta familia. Ngem mas magayaya ngà. Marenu i konsensià ta arubang ni Jehova. Makasta ngà nga ehemplo ta dua nga ánaku nga lalaki, anna egga ngana ira i pribilehiò ta kongregasion. Egga ngana i reputasiokku nga mapattalakkan ta awditor ira na vugi tuange ta tanakuan paga nga katransaksiokku.”

Ayatan ni Jehova danuri mamakasta ta tuttudduna gukaban na pangipasingan ta makapabbaw ira nga kualidadna, kasali i kinamapattalakkan. (Tito 2:10) Ininspiranna si Patul David nga iyawa yaw nga pamasiguradu: “Nabayag ngana i nipattolè, sangoye ay laka-lakay ngà ngana, ngem ariak-ku paga vuluvuga nga naginna tu i YAFU ay pinagurayan na i tolay nga mapia, onu i ána na ay makilelimus tu kanad-da.”​—Sal. 37:25.

Pakurugan yatun na ekspiriensa na matalo nga si Ruth. Arianna pinanawan i katuganganna nga si Noemi turi ta nabbako ngana. Nagali ta Israel si Ruth tapenu makapaddayaw ta kurug nga Dios. (Ruth 1:16, 17) Turi ta egga yaya ta Israel, mapattalakkan anna malappo si Ruth, nga magillawag onu makkatak segun ta unnug na Dob. Kagitta na ekpiriensa ni David, ari nga pinagurayan ni Jehova nga mabbisin da Ruth anni Noemi. (Ruth 2:2-18) Ari laman nga material nga gannug i niyawa ni Jehova kani Ruth. Pinilina yaya nga mabbalin tu ginafuan ni Patul David anna maski na nepromesa nga Mesias!​—Ruth 4:13-17; Mat. 1:5, 16.

Mariga i situasion na karuan ta aripan ira ni Jehova megafu ta ari makalanno i alegda ta pakawagadda. Imbes nga maddarogas ngana laman ira, mattrabahu lallagu ira tu mapia. Ipasingadda nga tagibaloradda i makapabbaw ira nga kualidad na Dios, kasali i kinamapattalakkan, anne ta anni laman nga material nga gannug.​—Prov. 12:24; Efe. 4:28.

Kagitta gari ni Ruth, nipasingan gapa na Cristiano ira ta interu mundo i pattaloda ta panguffun ni Jehova. Buu i komfiansada ta nangipromesa taw nga netura nga Uvovugna: “Ariat-taka vuluvuga nga panawan ni et-taka nga pagurayan.” (Heb. 13:5) Kanayun nga ipasingan ni Jehova nga awayyana anna talaga uffunanna danuri mariga ngem mapattalakkan ta ngamin nga tiempo. Kanayun nga tuttuppalanna i promesana meyannung ta pangiyawana tu pakawagattam ta pattolay.​—Mat. 6:33.

Tagibaloran na totolay i diamante anna tanakuan paga nga nabalor nga ganna-gannug. Ngem siguradu ittam nga mas tagibaloran na Yama tam ta langi i pangipasingattam tu kinamapattalakkan anna tanakuan paga nga kualidadna, anne ta anni laman nga nabalor ira nga batu!