Isimboloda i armada ta langi nga kasali ta nanaral ta Jerusalem anna kasali gapa ta panaral ta marakay nga sistema ni Satanas sonu Armagedon. Ngatta rasonable yaw nga panguli ta pangalippawa?

Kabalin nga nasingan ni Ezekiel i marakay nga ganna-gannug nga kukukuan na apostata ira ta Jerusalem nige na kadaralna turi 607 B.C.E., neddan yaya tu sirmata nga mattuppal tatun nga kadaral. Nasinganna i annam nga lallaki nga egga armasda nga panaral. Nasinganna paga i lalaki nga kavuluda nga “nakasinnun tu lino” anna egga sa i “tinta na sekretario nga nakepay ta taggug.” (Eze. 8:6-12; 9:2, 3) Nakagi taw nga lalaki: “Lumakag ka ta siudad, . . . , anna mangipeka tu marka ta frente na totolay nga maginango tu darakal anna maddaga-raging megafu ta ngamin nga kitaddake nga mesissimmu ta siudad.” Tapus, nekagi ta lallaki nga egga armasda nga panaral nga patayadda danuri egga ta siudad nga awan tu markana. (Eze. 9:4-7) Anni i itudduna yatun nga sirmata nittam, anna sinni i lalaki nga egga sa i tinta na sekretario nga nakepay ta taggug?

Neyawa yaw nga profesiya turi 612 B.C.E., anna i kadaral na Jerusalem gukaban na armada na Babilonia i ollu nga ketuppalanna​—nga nesimmu ta pappasa laman na lima ragun. Maski nepamavulun nga daralan ira na pagano nga Babilonio, nasserbi ira bilang taga-patay ni Jehova. (Jer. 25:9, 15-18) Megafu yatun ta niyusa ira ni Jehova tapenu disi plinan i apostata nga totolena. Ngem mawag nga ari tu ngamin ay madaral. Ari nga mesipo nga mapatay i matunung. Meddu nga nangiyawa si Jehova tu probision tapenu mepaliag i Judio ira nga ari nakisali ta kitaddake nga mesissimmu tatun nga siudad.

Ari nga kasali si Ezekiel ta pammarka onu ta mismu nga panaral. I anghel ira lallagu i direkta nga kasali ta panentensia. Gukabanna yatun nga profesiya, nannammuattam i ari masingi-singan nga mesissimmu, ta langi mismu. Ari laman nga zinog ni Jehova i anghel ira nga mangorganisa ta panaral ta marakay, ngem isinnada paga i matunung ira tapenu mapaliag.

Ta nappasa, nipakanawag tam nga i nabattang ira nga nazelugan i moderno nga irepresenta na lalaki nga egga sa i tinta na sekretario nga nakepay ta taggug. Nalippawa tam dati nga i mangalawa ira ta mensahe nga ilayyagayya tam i mamarkan nga mapaliag. Ngem ta nappasa laman nga daga-ragun, mas nannawag nga kawagan i panguli taw nga pakanawag. Segun ta kinagi na Mateo 25:31-33, si Jesus mismu i mangukum ta totolay. Yaya i ultimu nga mangukum ta tiempo na dakal nga ziga, isinnana i gittana-karneru nga totolay nga mepaliag, ta alle-kanzing nga totolay nga mapapatay.

Mekunnay taw nga nanguli nga pangalippawa tam, anni i magigiammu tam taw nga sirmata ni Ezekiel? Egga i lima nga leksion:

1.  Durante ta tiempo nga mattuppal ta kadaral na Jerusalem, nasserbi bilang guardia si Ezekiel kunne na gapa kani Jeremias, kagitta na kingngua gari ni Isaias. Ta kaggawattam, usu-usan gapa ni Jehova i baddi nga grupo na nazelugan nga aripanna tapenu pakanan i totolena anna mangiyawa tu pamappalan ta tanakuan nige nga mamegafu i dakal nga ziga. Yatutta kasali i ngamin nga aripan ni Jesus ta pangilayyagayya ta pamappalan.​—Mat. 24:45-47.

2.  Ari nga kasali si Ezekiel ta aktual nga pammarka ta totolay nga mapaliag; kunnatun gapa ta aripan ira na Dios ta kaggawattam. Ira laman i mangipakannammu ta mensahe ni Jehova, nga parte na pallayyagayyada nga gukaban na pangidirekta na anghel ira.​—Nep. 14:6.

3.  Ta kaggawan ni Ezekiel, awan tu nakalawà tu literal nga marka ta frente. Kunnatun gapa ta kaggawattam. Anni i mawag nga kuan na totolay tapenu malawàda i simboliko nga marka ta kapaliag? Mawag nga alawatadda i mensahe nga melayyagayya nira, ipasingan i personalidad na Cristiano, maddedika kani Jehova, anna matalo nga suportan i wawwaragi ni Cristo. (Mat. 25:35-40) Makalawà tu simboliko nga marka ta kapaliag danuri magangngua tatun nga ganna-gannug durante nga duttal i dakal nga ziga.

4.  Ta moderno nga ketuppalanna, si Jesu-Cristo i irepresenta na lalaki nga konsu tinta na sekretario nga nakepay ta taggug, i tadday nga ari masingan nga mammarka ta totolay nga mepaliag. Malawà na dakal nga ammung i markada ta tiempo nga masentensian ira bilang karneru durante ta dakal nga ziga. Megafu taw, mebilang ira ta makalawà ta mannanayun nga inango ta davvun.​—Mat. 25:34, 46.

5.  Ta moderno nga ketuppalanna, i annam nga lalaki nga agga-tammi tu armas nga panaral, irepresentana i nelangitan nga armada ni Jesus, nga yaya mismu i liderda. Aranni ngana nga daraladda i nasa-nasion anna i ngamin nga kinamarakay.​—Eze. 9:2, 6, 7; Nep. 19:11-21.

Gukaban na pangalippawa taw ira nga leksion, mapasikan i komfiansa tam kani Jehova nga arianna isipo nga daralan i matunung ira. (2 Ped. 2:9; 3:9) Meperaddam gapa nittam i importansia na pallayyagayya ta kaggawattam. Mawag nga maginna na ngamin i pamappalan nige nga duttal i panuppalan!​—Mat. 24:14.