1, 2. Ngatta nibilang ni Jehova si Daniel nga “kuruga nabala-balor nga tolay,” anna kunnasi tam maparigan i pakimorena?

TA PATTALLUNG na naaripan nga Judio ira ta Babilonia gari, nasingadda nga napannu i siudad tu idolo anna totolay nga magana-anassing ta marakay ira nga espiritu. Ngem maski nu kunnatun, ari nappamolde si Daniel tuange ta tallu nga kakavvuluna tatun nga sistema na Babilonia. (Dan. 1:6, 8, 12; 3:16-18) Determinadu ira nga maddayaw laman kani Jehova bilang Minadduengda. Yatutta mapia i nattuppaladda! Maggi ta interu pattolay ni Daniel naddian yaya ta Babilonia; ngem kinagi na anghel nga “kuruga nabala-balor nga tolay” yaya.​—Dan. 10:11, 19.

² Ta tiempo na Biblia, ipay na minaddueng i pila ta pammoldeyan tapenu maformana ta kayàna nga figura. Ta kaggawattam, ammu na kurug ira nga maddayarayaw kani Jehova nga yaya i Katannangan ta Uniberso, i egga autoridadna nga mammolde ta totolay anna nasa-nasion. (Bibbigan i Jeremias 18:6.) Egga gapa i autoridad na Dios nga moldeyan ittam bilang indibidual. Ngem irespetona i lallaguretam nga mappili anna kayàna nga boluntario ittam nga makimoray sa. Gigiammuattam i tallu nga aspeto nu kunnasi ittam nga mattalupaddian nga malapo nga pila ta lima na Dios: (1) Kunnasi tam nga malillitan i kualidad ira nga mamattagga nittam kontra ta tabarang na Dios? (2) Kunnasi tam mapeggan tu kualidad ira nga makoffun tapenu mabbalittam tu mapakalinno anna minakkimoray? (3) Kunnasi nga makimoray ta Dios i magana nu moldeyadda i ánada?

3. Anni ira nga kualidad i awayyana nga mamattagga ta futu tam? Mangiyawa tu angngarigan.

³ Kinagi na Proverbio 4:23: “Pinaka-importante ta ngamin nga mawag tu sifutammu, immugurammu i futum, ta yatun i paggafuan ira na inango.” Anni ira nga kualidad i pagimmugurattam? Kasali taw i sobra nga pappakatannang, metotoli nga pattagaruli, anna kawan na pangurug. Yatun i awayyana nga paggafuan na ari pakimoray onu rebelyoso nga kata-katolay. (Dan. 5:1, 20; Heb. 3:13, 18, 19) Nangipasingan tu kinapakatannang si Patul Uzias. (Bibbigan i 2 Cronica 26:3-5, 16-21.) Ta gafu, kingngua ni Uzias i “matunung ta mata ni Jehova” anna “nitulu-tuloyna nga alegan i Dios.” Ngem “turi ta nabbalin ngana yaya nga makapangngua, nappakatannang i futuna” maski nu naggafu ta Dios yatun nga pakapangnguana! Pinuruebanna paga lagu i mangisibo tu insenso ta templo​—pribilehio nga para ta papari laman nga naggafu ta gaka ni Aaron. Turi ta pinakkagianan yaya na papari, kuruga napporay i minappakatannang nga si Uzias! Anni i resultana? Kappasiran i ‘nikadaralna’ ta lima na Dios anna natay yaya nga agga-ketong.​—Prov. 16:18.

4, 5. Anni i awayyana nga mesimmu nu ari tam pagimmuguran i pappakatannang? Mangiyawa tu angngarigan.

⁴ Nu ari tam memmuguran i baggi tam kontra ta pappakatannang, awayyana nga ‘ikwenta tam i baggi tam tu mas atannang,’ adde ta punto nga pammanakitattam i tabarang na Biblia. (Roma 12:3; Prov. 29:1) Ikonsidera i ekspiriensa na elder nga si Jim, nga egga ariadda nakka-annugutan ta tanakuan nga elder meyannung ta kongregasion. Kinagina: “Kinagì ta elder ira nga egga ta miting nga awan tu ayada, tapus pinanawakku ngana ira.” Nappasa i annam nga vulan, nagali yaya ta tanakuan nga kongregasion ngem ari narekomenda nga elder. Inaminna: “Talaga natakitannà. Nabbalin tu sobra i kinatunukku, yatutta pinanawakku i kinakurug.” Mafulu ragun nga nabbalin tu inaktibo si Jim. Kinagina: “Natakitan i pride ku, anna pinaliwa ku si Jehova ta nesimmu. Ta pappasa na daga-ragun, binisita anna kina-uvovugnà na elder ira ngem ariakku inalawa i uffudda.”

⁵ Ipasingan na ekspiriensa ni Jim nu kunnasi nga irasonattam i kukukuattam megafu ta pappakatannang, yari tu matagga tam nga mamolde. (Jer. 17:9) “Ariakku talaga mafugaddan nga maffokus ta awayyana nga pakkamalian na tanakuan,” kunni Jim. Natakitan ka ngana kari megafu ta kapangngurugmu onu ta kalsa na pribilehiom ira? Nu wan, anni i kingnguam? Nappakatannakka kari? Onu mas nga tinagibalormu i makasta nga relasion ta kapangngurugmu anna nattallupaddian nga matalo kani Jehova?​—Bibbigan i Salmo 119:165; Colosas 3:13.

6. Anni i mesimmu nu pakakuattam i makaliwa?

⁶ Awayyana nga ariattam ngana maggigginna ta tabarang na Biblia nu pakakuattam i mattagaruli, yammanno nu itaga-tagu tam i magangngua tu liwi-liwa. Mas malogon ngana laman nittam i makaliwa. Tadday nga brother i nakkagi nga awan ngana tu efekto sa na ari mepangngo nga kondukta megafu ta nasanay ngana yaya nga kuan yatun. (Ecl. 8:11) Kinagi paga na tadday nga brother nga nabbalin tu bisiuna i paggiraw tu pornograpia: “Natageno ku nga sesenu nga nabbalinnà tu minakkritika ta elder ira.” Daralanna yatun nga bisiu i espiritualidadna. Turi kua, nannammuan yatun nga bisiuna anna noffunan yaya. Siempre imperfekto tam ngamin. Ngem nu matageno tam nga minakkritika tam ngana onu irasonattam i mali nga kukukuattam imbes nga kiddawan i pamakoma anna uffun na Dios, awayyana tu mamegafu ngana nga mattagga i futu tam.

7, 8. (a) Kunnasi nga masingan ta Israelita gari i pattagga na futu megafu ta kawan na pangurug? (b) Anni i magigiammu tam tatun?

⁷ Nammuattam ta angngarigan na nasion na Israel nga nipaliag ni Jehova ta Ehipto, nu kunnasi nattagga i futuda megafu ta kawan na pangurugda. Nasingadda i kingngua ni Jehova nga milagro para nira, nga kuruga kappabbaw paga i karuan! Ngem turi ta aranni ngana ira ta Nepromesa nga Davvun, nangipasingan ira tu kawan na pangurug. Imbes nga mattalo ira kani Jehova, naganassing anna narreklamo lallagu ira kontra kani Moises. Kayàda paga lagu i mattoli ta Ehipto, nga naka-aripanadda! Kuruga natakitan si Jehova. Kinagina: “Kunnasi kabayag paga nga tratuaddà yaw nga totolay tu awan tu respetona?” (Num. 14:1-4, 11; Sal. 78:40, 41) Megafu ta tagga na giffutuan anna kawan na pangurugda, natay yatun nga henerasion ta tana.

⁸ Durante nga umara-aranni ittam ngana ta napabagu nga mundo, mapurueban i pangurug tam. Yatutta tu usitakkattam i kalidad na pangurug tam. Angngariganna, awayya tam purueban i pagimamma tam ta kinagi ni Jesus ta Mateo 6:33. Iyavumu ta baggim: ‘Ipasingan kari na prayoridad anna desisiokku ira nga mangurug ngà tatun nga kinagi ni Jesus? Ariakku kari maki-study onu mallawan nu karuan tapenu magaleg tu mas aru nga kuartu? Anni i kuakku nu mas massikan i influwensia na mundo niakan? Ipamavulukku kari nga moldeyannà na mundo​—nga awayyana paga nga iyarayyunà ta kinakurug?’

9. Ngatta mawag tu kanayun nga ‘usitakkattam tu mapia’ nu egga pangurug tam, anna kunnasi tam nga kuan yatun?

⁹ Tadday paga nga angngarigan, nonopammu i tadday nga aripan ni Jehova nga ari manuttuttul ta estandarte na Biblia, awayyana nga meyannung ta pakikavulu, paddisfellow, onu dibersion. Iyavumu ta baggim, ‘Kunnaw kari i situasiokku? Nu matageno tam nga mamegafu nga mattagga i futu tam, mawag tu insigida nga usitakkattam i pangurug tam! Nitabarang na Biblia: “Usitakkan nu tu mapia i baggi nu, tapenu kannammuan nu nu giminafu kamu ta angngurug.” (2 Cor. 13:5) Kanayun nakuan nga parte na pannonono tam i fustu nga pangusito ta baggi tam mekunnay ta Uvovug na Dios.

10. Anni i makoffun nittam tapenu mabbalittam nga malapo nga pila ta limi-lima ni Jehova?

¹⁰ Kasali i Biblia, kongregasion Cristiano, anna i ministerio ta probision ni Jehova tapenu mattalupaddiattam nga malapo nga pila. Nu kunnasi nga mapalapo na danum i pila, kunnatun gapa nga mokoffun nittam i inaggaw nga pabbibbig tu Biblia anna monag nga pannonono tatun tapenu mabbalittam tu alistu nga mamolde ta lima ni Jehova. Ikikkiddaw ni Jehova ta patul ira gari ta Israel nga kopiadda mismu i Dob na Dios anna inaggaw nga bibbigan yatun. (Deut. 17:18, 19) Nalippawa gapa na apostoles nga importante ta ministerioda i pabbibbig tu Katurakan anna monag nga pannonono tatun. Direkta nga nangiyusa anna narreferensia ira ta Hebreo nga Katurakan ta ginatu nga beses ta turada anna pinagaramda i nilayyagayyadda nga kunnatun gapa i kuadda. (King. 17:11) Masingattam gapa ta kaggawattam i importansia na inaggaw nga pabbibbig tu Biblia anna sigga-pakimallo nga pannonopan yatun. (1 Tim. 4:15) Makoffun yatun tapenu mattalupaddiattam nga napakalinno ta arubang ni Jehova anna alistu nga mamolde ta limi-limana.

11, 12. Kunnasi nga iyusa ni Jehova i kongregasion Cristiano tapenu mamoldena ittam segun ta pakawagattam? Mangiyawa tu angngarigan.

¹¹ Moldeyan ittam ni Jehova segun ta pakawagattam bilang indibidual gukaban na kongregasion Cristiano. Si Jim, nga nakagi ta ­nappasa nga parapo, namegafu nga nallapo i futuna turi ta nangipasingan tu personal nga interes sa i tadday nga elder. “Ariannà vuluvuga nga pinaliwa ta situasiokku onu kinritikanà,” kunni Jim. “Positibo lallagu yaya anna nipasinganna nga talaga kayàna sakan uffunan.” Nappasa i mattallu vulan, inimbita na elder si Jim ta study. “Mapatu i pinangalawa na wawwaragi niakan,” kunni Jim, “anna i ayada i namaguyu niakan. Nasingakku nga ari importante i taki na nono ku. Gukaban na suporta na wawwaragi anna na meddu nga atawà nga ari vuluvuga nakkafi ta espiritual​​—⁠sesenu nga nattoli i espiritual nga sikakku. Napagaram ngà paga ta artikulo nga ‘‘Hindi si Jehova ang Dapat Sisihin’ anna ta ‘Maglingkod kay Jehova Nang Buong Puso’ nga mabibbig ta Ang Bantayan Nobiembre 15, 1992.”

¹² Turi kua, netoli nga elder si Jim. U-uffunanna ngana i wawwaragi nga arubangan i kagitta na problema ira nga nepa-arubang sa anna mapasikan ira uli ta espiritual. Kinagina: “Pagabbo ku nga matuyag i relasiokku kani Jehova, ngem i kakuruganna, ari! Mabbabawi ngà ta nipamavulukku nga vinulagnà na pride ku ta mas importante nga ganna-gannug anna nabbalin yatun tu rason tapenu i pakkurangan na wawwaragi ngana laman i kanayun nga masingakku.”​—1 Cor. 10:12.

13. Uffunan ittam na ministerio nga ipasingan i anni ira nga kualidad, anna kunnasi ittam nga mabenefisiowan?

¹³ Kunnasi nga moldeyan ittam na ministerio ta pammakapianattam? Makoffun nittam i pangipakannammu ta makasta nga dumug ta tanakuan tapenu mabbalittam nga mapakalinno anna mapeggattam tu aspeto ira na vunga na masanto nga espiritu. (Gal. 5:22, 23) Nonopammu i makasta ira nga kualidad nga nipasingammu ta ministerio. Nu ipasingattam paga i personalidad nga kagitta ni Cristo, mapakasta tam i mensahe tam, nga egga efektona ta karuan nga malayyagayyattam. Angngariganna, marespeto nga nagginna i dua nga wagi ta Australia ta householder nga marake i pakiyuvovugna nira. Turi kua, nabbabawi yaya ta kingnguana tapus nattura ta panga nga ofisina. Kunnaw i kinagina: “Ta dua nga mapasensia anna mapakalinno nga tolay, kayàku mappadispensa ta sobra nga pappakatunung anna pappakatannakku. Awan tu kuentà megafu ta inarubakku i dua nga mangilayyagayya ta Uvovug na Dios tapus basta ngana laman nga pinapanaw ku ira.” Mattura kari tu kunnatun i householder nu nangipasingan tu maski baddi laman nga lussaw i dua nga wagi? Baka ari. Wan, kuruga makabenefisio i ministerio tam​—ta nittam anna ta totolay!

14. Anni nakuan i kuan na magana tapenu efektibo i pammoldeda ta ánada?

¹⁴ Kakayà na aru ta abbing paga nga ána i makagigiammu, anna mapakalinno ira. (Mat. 18:1-4) Yatutta mappursigi nakuan i magana nga ipatalatto ta nono anna giffutuan na abbing nga ánada i kinakurug anna i pangaya tatun. (2 Tim. 3:14, 15) Siempre, mawag nga ipatalatto labbi na magana i kinakurug ta mismu nga giffutuadda, nga pabbalinadda tu parte na pattoleda i kinakurug tapenu makuada yaw tu makasta. Nu kuan na magana yatun, ari laman nga magigiammu na ána i kinakurug, nu ari, maekspiriensada paga yatun. Imammatadda paga nga pangipasingan tu aya ni Jehova i paddisiplina nira na maganada.

15, 16. Kunnasi nga mepasingan na magana i pattaloda kani Jehova nu nadisfellow i anada?

¹⁵ Pinanawan na karuan nga abbing i kinakurug onu nadisfellow gapa i karuan, maski nu napadakal ira nga Cristiano, nga nangiyawa tu taki na nono ta familia. Kinagi na sister nga taga South Africa: “Turi ta nadisfellow i wagì nga lalaki, gittana natay ngana yaya. Talaga mataki ta futù!” Anni i kingnguana anna na maganàna? Sinuttulda i tabarang na Uvovug na Dios. (Bibbigan i 1 Corinto 5:11, 13.) Kinagi na maganàna: “Determinadu kami nga iyaplika i egga ta Biblia megafu ta ammumi nga makasta i pattuppalan na dalan na Dios. Minammatammi nga disiplina nga naggafu ta Dios i paddisfellow anna kumbinsidu kami nga aya i rason na paddisiplina ni Jehova anna mepangngo laman yatun. Yari tu makiyuvovug kami laman sa ta ganna-gannug nga talaga kawagan ta familia.”

¹⁶ Anni i natageno na nadisfellow nga ana? Kinagina, “Ammù nga ari dà kalussaw na familià. Tuttuttuladda laman si Jehova anna i organisasionna.” Kinagina paga: “Nu awan ngana tu tanakuan nga makuam nu ari ipakimemallo i uffun anna pamakoma ni Jehova, mammuammu nga talaga mawagmu yaya.” Nonopammu i ayaya na familia turi ta netoli yaya! Wan, nu tuttulattam i Dios ta ngamin nga dala-dalattam, malawà tam i kakastan nga resulta.​—Prov. 3:5, 6; 28:26.

17. Ngatta mawag tu kuattam nga parte na pattoletam i pakimoray kani Jehova, anna kunnasi ittam nga mabenefisiowan?

¹⁷ Tinukoy ni Isaias i pangultimuan nga tiempo ta nike-aripan na Judio ira turi ta nalippawa na nabbabawi ira: “O Jehova, sikaw i Yamami. Sikami i pila, anna sikaw i Minad­duengmi; Sikami ngamin i trabahu na limam.” Tapus nakimemallo ira: “Ariammu daddamman tu mannanayun i nakaliwatammi. Innannakami, fabor bi, ta sikami ngamin ay totolem.” (Isa. 64:8, 9) Nu sigga-pakalinno tam gapa nga makimoray kani Jehova anna kuattam yatun nga parte na pattoletam, imammatanna ittam nga nabala-balor nga tolay, kagitta ni profeta Daniel. Itulu-tuloy paga ni Jehova nga moldeyan ittam gukaban na Uvovug, espiritu, anna na organisasionna tapenu duttal noka i tiempo nga tumaddag tam ta arubanna bilang “ána na Dios.”​—Roma 8:21.