Nabibbigmu kari tu mapia i nappasa ira nga isyu na Passifusifutan?Innammu nu matabbagmu yaw ira nga pakkiavu:

Ngatta nipamavulun ni Jehova nga makigerra i Israel gari?

Minaggiddu si Jehova. Ngem egga tiempo nga nipamavulunna i pakiggerra nu mappeligro i totolena megafu ta kinamarakay anna pameppersigi. I Dios laman i maddisidi nu sinni i makiggerra anna nu sonu anni.​—w15-TG 11/1, p. 4-5.

Anni i importante nga ganna-gannug nga makua na maganà tapenu masanay i tinedyer nga ánada nga masserbi kani Jehova?

Importante nga egga aya na magana ta ánada nga tinedyer anna ipasingadda i kinapakalinno gukaban na ehemploda. Importante gapa nga mangipasingan ira tu pakalippawa anna mappursigi nga intindian i tinedyer nga ánada.​—w15-TG 11/15, p. 9-​11.

Ngatta ari tu mekonsidera nga katali ni Pedro i santo papa?

Ari tu kinagi na Mateo 16:17, 18 nga si Pedro i mabbalin tu ulu na kongregasion Cristiano. Imbes nga yaya i katannangan, ipasingan na Biblia nga si Jesus i kuruga importante nga batu na kongregasion. (1 Ped. 2:4-8)​—w15-TG 12/1, p. 12-14.

Anni ira i ikonsidera tam nige nga maguvovug?

Tapenu makasta i keyusan na zila tam, daddammattam nakuan (1) nu kada anni tam nga maguvovug (Ecl. 3:7),(2) nu anni i kagiattam (Prov. 12:18), anna (3) nu kunnasi tam ikagi (Prov. 25:15).​—w15-TG 12/15, p. 19-22.

Anni ira nga ari mapammakatalakkan nga annangngua i lillitan na Cristiano ira?

Lillitan na kurug ira nga Cristiano i palladdug anna pamara-parake ta tanakuan. Ariadda makkagi tu falso onu makadaral ira nga uvovug nga makataki ta tanakuan, anna ariadda mangilloko onu makkoko.​—wp16.1-TG, p. 5.

Sinni ira i “dakal na papari” nga nakagi ta Biblia?

Manawag nga i panakallan ira nga miembro na papari i tukuyan na termino nga “darakal na papari,” kasali i dati nga atannang nga papari nga nalsa ngana ta posisiodda.​—wp16.1-TG,p. 10.

Kunnasi nakuan i pattratu tam ta makiparte ta emblema ira ta Memorial?

Ari nga dayawan na Cristiano ira danuri makiparte ta emblema. Ari nga kayà na kurug nga nazelugan i medayaw, onu iyanunsio ta publiko i taddagna ta arubang na Dios. (Mat. 23:8-12)​—w16.01, p. 23-24.

Anni i magigiammu tam ta nipabbalin niAbraham nga kofun na Dios?

Awayyana nga kani Sem nga nannammuan ni Abraham i meyannung ta Dios. Nanga yaya tu ekspiriensa ta pakilallang sa na Dios tuange ta familiana. Awayya tam gapa nga kuan yatun.​—w16.02, p. 9-10.

Kunnasi nga nabilli-billay ta kapitulo anna bersikulo i Biblia?

Binilli-billay ni Stephen Langton nga klerigo ta meka-13 siglo i Biblia ta kapitulo ira. Nappollu nga nipay na Judio ira nga gumakkopia i bersikulo ta Hebreo nga Biblia, anna turi meka-16 siglo, kunnatun gapa i kingngua na iskolar nga si Robert Estienne ta Cristiano nga Griego nga Katurakan.​—wp16.2-TG,p. 14-15.

Literal kari nga niyangay ni Satanas si Jesus ta templo tapenu tentan yaya?

Ariattam nga masiguradu yatun. Ta rekord na Mateo 4:5 anna Lucas 4:9, awayyana nga gukaban na sirmata nga neyangay tatun si Jesus onu nanaddag yaya ta atannang nga lugar ta vuvung na templo.​—w16.03, p. 10-11.

Kunnasi nga kagitta na lumay onu lappà i ministerio tam?

Sesenu i kaforma na lumay anna makapabannay anna makeyawa-inango. Bendision nga naggafu kani Jehova i literal nga lumay. (Deut. 33:13) Kunnatun gapa ta napattaradday nga pappursigi na totolay na Dios ta ministerio.​—w16.04, p. 4.