NGATTA makasiguradu ka nga kurug yatun anna si Jehova i manangngal nikaw? I tadday nga rason ay megafu ta espesipiko nga kinagi yatun na Biblia. Kinagi na 1 Pedro 5:7: “Ipammakatalo nu sa ngamin i kavurungan nu ta yaya i manangngal nikamu.” Anni i pamakurugmu nga interesadu nikaw si Jehova?

Ollu ta ngamin, egga kani Jehova i kualidad ira nga ala-alegammu ta kapianan nga kokkofun. Maruddu nga mabbalin tu makkofun danuri masippo anna minangngiyawa ta kataggi-tadday. Kagitta na masingattam, masippo anna minangngiyawa si Jehova ta totolay kada aggaw. Ikonsidera tam i tadday nga angngarigan: “Ta mappaparehu nga nawagan na Dios ta bilag na i marakay anna mapia nga totolay. Anna mapparehu gapa nga iddan na Dios tu uran i mangngua ta mapia tuange ta mangngua ta marakay.” (Mat. 5:45) Anni kari i makua na bilag anna uran? Fuera paga ta tanakuan nga ganna-gannug, gukabanna yatun, “iddan nakamu [na Dios] ta kanan, anna pannuan na i giffutuan nu ta pagayaya.” (King. 14:17) Wan, siguraduan ni Jehova nga mavvunga i davvun tu abundansia nga makan, anna talaga gapa nga magustuattam i masingngo nga maka-makan.

Ngem ngatta gafu ta aru i mabbisin? Megafu ta maruddu nga nakafokus i mammaguray nga totolay ta pamasikan ta pulitikal nga pakapangngua anna parrikuda anne ta panguffun. Aranni ngana nga solban ni Jehova yatun nga problema na pabbalin tu kakkam. Talianan na nelangitan nga Pappatulan i pulitikal nga sistema ta maddaggun. I Anana i masserbi bilang Patul. Tatun nga tiempo, awan ngana vuluvuga tu mabisin. Ta maddaggun, sustinian ni Jehova i matalo ira nga aripanna. (Sal. 37:25) Ari kari nga pangipasingan yatun tu pangikavurunna?

Kanayun nga egga tiempo nikaw na mapia nga kofun. Awayyana nga maski piga oras nga makiyuvovug nikaw ta parehu nga paginteresannu. Magginna yaya tu mapia nu makkagi ka sa tu problema anna pakavurungammu. Kunnatun kari si Jehova? Wan! Ginnanna i pakimallo tam ira. Yari tu ipagaram na Biblia: “Maddasal kamu ta ngamin nga tiempo.”​—Roma 12:12; 1 Tes. 5:17.

Kunnasi i kapaddu na tiempo nga awayya ginnan ni Jehova i pakimallomu? Tabbagan yatun na angngarigan nga egga ta Biblia. Nige ni Jesus nga nappili tu apostolesna, ‘tanga-gabi yaya nga nakimallo ta Dios.’ (Luc. 6:12) Tatun nga pakimallo, awayyana nga sinaggi-tadday nga ninono ni Jesus i ngagan na disipulosna, nikonsiderana i kualidad anna pakkafiadda, anna nakiyuffun yaya ta Yamana nga mappili. Ta pallattuag na bilag, ammu ni Jesus nga napilina i pinaka-kualipikadu ira nga masserbi bilang apostolesna. Segun ta Salmo 65:2, tabbagan ni Jehova i dasa-dasal na ngamin nga napafutuan nga makimallo sa. Maski paga nu piga oras nga maddasal i tadday nga tolay meyannung ta gannug nga kuruga ikavurunganna, ari nga bili-bilangan ni Jehova i oras.

Nu meyannung ta pamakoma, marigatan nu karuan maski danuri madukko nga makkorofun. Nu karuan, madaral i nabayag nga pakkofun megafu ta marigatan ira nga mamakoma. Ari nga kunnatun si Jehova. Ipagaram na Biblia ta totolay nga napafutuan nga kiddawadda i pamakoma na Dios, “megafu ta dakal i pamakomana.” (Isa. 55:6, 7) Ngatta sigga-paran nga mamakoma i Dios?

Megafu yatun ta awan tu kagittana nga ayana. Kuruga iddukanna i mundo, yari tu zinogna i Anana nga si Jesus tapenu ipaliag i totolay ta liwa anna ta marake nga resultana yatun. (Juan 3:16) Kakuruganna, aru paga i metuppal na tavHS.10vu. Gukaban na sakrifisio ni Cristo, sigga-paran nga pakoman na Dios danuri ayatanna. Nitura ni apostol Juan: “Ngem nu kagiat-tam ta Dios i katagaruliat-tam, pakoman anna pakarenuan na ittam ta ngamin nga marakay nga kikkingngua tam. Ta matunung yaya anna mekatalo.” (1 Juan 1:9) Megafu ta pamakoma ni Jehova, awayyana nga tulu-tuloy nga makikofun i totolay sa, anna makatukkal ta futu tam nga mammuan yatun.

Uffunannaka na kurug nga kofun nu kawagammu yaya. Kunnatun kari si Jehova? Kagian na Uvovugna: “Maski nu mesiddukal ay ari yaya nga mapedda, ta i YAFU ay manguffun nga mamalakka sa.” (Sal. 37:24) Nadduruma i panguffun ni Jehova ta aripanna ira. Innammu yaw nga ekspiriensa ta St. Croix nga isla ta Caribbean.

Egga mabbing nga babay nga i-illokuan na kaklasena ta ari yaya massaludo ta bandera megafu ta pangurugna. Kabalinna nga ipakimallo i uffun ni Jehova, inarubanna i isyu. Pinilina i meyannung ta passaludo ta bandera ta tumunug nga reportna ta klase. Gukaban na libru nga Ang Aking Aklat ng mga Kuwento sa Bibliya, nipakanawagna nu kunnasi naka-afekto ta desisionna i istoria meyannung kada Sadrac, Mesac, anni Abednego. Kinagina, “Pinrotektan ni Jehova i tallu nga Hebreo megafu ta ariadda naddayaw ta imahen.” Tapus kinagina ta kaklasena ira nga awayyada makkiddaw tu kopia na libru. Nakkiddaw i 11 nira. Megafu ta ammuna nga iniddan yaya ni Jehova tu sikan anna sirib tapenu mepakanawagna yatun nga sensitibo nga topiko, kuruga nagayaya yatun nga mabbing nga babay.

Nu madduda ka nga kavurungannaka ni Jehova, monag nga pannonopammu i teksto ira ta Biblia kagitta na Salmo 34:17-19; 55:22; anna 145:18, 19. Iyavumu ta nabayag ngana nga Saksi nu kunnasi ira nga sinangngallan ni Jehova. Nu mawagmu i uffun na Dios, ipakimallomu sa yatun. Masingammu noka nu kunnasi nga si Jehova i ‘manangngal nikaw.’