KINAGI ni David na Israel gari yatun nga uvovug ta pangidayona ta babay nga nasimmuanna. Abigail i ngaganna. Anni i namaguyu kani David nga dayawan yaya, anna kunnasi ittam mabenefisiowan tatun nga ehemplo?

Nasimmuan ni David yaw nga sigga-atawan nga babay turi ta mattammang yaya kani Patul Saul. Atawa ni Abigail si Nabal, tadday nga mariku nga tolay nga mappastor tu aya-ayamna ta bakulug nga rehion na zita nga parte na Juda. Si David anna i totolena ay “kagittada i mapprotekta nga pader” ta papastor anna aya-ayam ni Nabal. Turi kua, naddog si David tu mensaheru ira kani Nabal, tapenu makkiddaw ‘nu anni laman i meyawana’ nga makan. (1 Sam. 25:8, 15, 16) Ari gamma nga mariga yatun nga kiddaw megafu ta papprotekta da David anna totolena ta pakkukua ni Nabal.

Ngem pinakurug laman ni Nabal i kebalinan na ngaganna nga “Awan tu serbi” onu “Awan tu ammuna.” Makaporay anna makapa-insulto i tabbagna anna nammanaki yaya ta kiddaw ni David. Yatutta, napplano si David nga kastiguan si Nabal megafu ta makapataki anna ari mepappangngo nga reaksionna. Maekspiriensa ni Nabal anna na tangabbalayanna i resulta natun na kawan tu ammuna.​—1 Sam. 25:2-13, 21, 22.

Ta pakalippawa ni Abigail nga serioso i parresultanna yatun nga plano ni David, magutu nga naki-alam yaya. Marespeto nga nakifabor yaya kani David nga daddammanna i relasionna kani Jehova. Tapus nangiyawa yaya tu aru nga makan kani David, i tumunug nga mabbalin tu patul, anna ta totolena. Nalippawa gapa ni David nga inusa yaya ni Jehova tapenu malillitanna nga makangngua tu gannug nga makonsensia yaya ta arubang na Dios. Kinagi ni David kani Abigail: “Mebendisionan paray i pia na appanonomu! Mabendisionakka nakuan ta pangigammam niakan taw nga aggaw nga mattagaruli ta daga.”​—1 Sam. 25:18, 19, 23-35.

Nasifu tam nga ariattam vuluvuga kayà nga mabbalin tu kagitta ni Nabal, nga ari nga sigga-appresia ta ganna-gannug nga netuppal para nittam. Nu masingattam gafu nga marrake i situasion, makasta nu kuattam i mawayya tam tapenu pakalman yatun. Wan, makagi tam gapa i natageno na salmista nga kinagina ta Dios: “Iddam-mà tu pakannammu anna pia na ulu onu appanono.”​—Sal. 119:66.

Masingan na tanakuan i sirib, onu pia na appanono, ta kukukuattam. Maski kagiadda yatun onu ari, matagenoda i kagitta ni David, nga nakkagi: “Mabendisionan paray i pia na appanonomu!”