1, 2. Anni nakuan i kombiksion na kataggi-tadday nittam? (Innan i letratu ta gafu na artikulo.)

KAGITTA na nagigiammu tam ta nappasa nga artikulo, ipilit na Diablo nga awan tu kepangngattan ni Jehova nga mammaguray anna kapianan nu pammagurayan lagapa na totolay i baggida. Fustu kari si Satanas? Angngariganna, kunnasi nu mattolay tu mannanayun danuri pinilida nga pammagurayan i baggida? Mas makasta kari i pattuppaladda nu awan ira ta pammaguray na Dios? Mas magayaya ka kari nu kuammu ngamin i kayàmu anna mattolay tu mannanayun?

² Awan tu makatabbag tatun nga pakkiavu para nikaw. Kawagan nga pannonopan yatun tu mapia na kada tadday. Nu kunnatun, mananawag nga masingadda nga fustu i soberania na Dios. Yatun i kapianan nga pammaguray. Mepangngo yatun ta interu-futu nga suporta. Nangiyawa i Biblia tu basehan tatun nga kombiksion. Angngariganna, ikonsidera nu anni i kagian na Biblia nittam meyannung ta kepangngattan na soberania ni Jehova.

3. Ngatta si Jehova i mepangngo laman nga Mammaguray?

³ Si Jehova i mepangngo nga Soberano ta interu uniberso megafu ta yaya i Makapangngua-sa-ngamin nga Dios anna  Namaratu. (1 Cro. 29:11; King. 4:24) Ta Nepakannammu 4:11, nepasingan ta tadday nga sirmata i 144,000 nga makipammaguray kavulu ni Jesus ta langi, nga kudda: “Yafu anna Dios mi! Mekunnay nikaw i kekakua, dayaw anna pakapangngua! Ta pinaro mu ngamin i adde na; megafu ta paka-urem laggapa, pinaro mu anna sinolem ira.” Wan, megafu ta pinaro ni Jehova i ngamin nga gannug, egga i buu nga kepangngattanna nga mammaguray ta totolay kunne na gapa ta espiritu ira nga pinaratu.

4. Ngatta pangabuso ta lallaguray i pangontra ta soberania ni Jehova?

⁴ Awan vuluvuga tu pinaratu ni Satanas. Yari tu awan tu kepangngattanna nga mammaguray ta uniberso. Ta perrebeldena kontra ta soberania ni Jehova, arogante i pinagguyuna anna na ollu nga magatawa. (Jer. 10:23) Megafu ta naparatu ira nga egga lallagureda, fustu nga awayyada pilian nga mesinna ta Dios. Ngem neddan kari ira tu kepangngattan nga kuan yatun? Ari. Uffunan na lallaguray i totolay nga mangngua tu mepangngo ira nga pappili kagaggaw. Ngem, ari mepangngo nga marrebelde ira kontra ta Namaratu anna ta Minangngiyawa-Inango. Manawag nga pangabuso ta lallaguray i pangontra kani Jehova. Bilang tolay, mepangngo ittam ta matunung nga pammaguray ni Jehova.

5. Ngatta makasiguradu ittam nga patas i desision ira na Dios?

⁵ Si Jehova i mepangngo nga Mammaguray ta tadday paga nga rason. Ipasinganna i autoridadna gukaban na perfekto nga hustisia. Kunna: “Sakan si Jehova, i Tadday nga mangipasingan tu matalo nga aya, hustisia, anna kinatunung ta davvun, megafu ta yaw nga ganna-gannug i pagayayatakku.” (Jer. 9:24) Ari yaya maddepende ta netura nga dorob nga kingngua na imperfekto nga totolay bilang basehanna nu anni i patas. Naggafu ta mismu nga personana i perfekto nga pagimammana ta hustisia, anna segun tatun, nangiyawa yaya tu netura nga dorob para ta totolay. ‘Pia anna tunung i nepataddaggan na pammagurayanna; aya anna kapasikkal i mepasingan ta ngamin nga kuanna,’ yatutta makapattiwala ittam nga matunung i ngamin nga dorob, prinsipio anna desisionna. (Sal. 89:14; 119:128) Ngem, maski inakusa ni Satanas si Jehova nga egga i pakkurangan na pammagurena, ari yaya makeyawa tu hustisia ta mundo.

6. Anni i tadday nga rason nu ngatta ta si Jehova i egga kepangngattanna nga mammaguray ta mundo?

⁶ Mepangngo paga nga Mammaguray si Jehova megafu ta egga sa i pakannammu anna sirib nga kawagan tapenu tangngallan i uniberso. Angngariganna, ikonsidera i kinakurug nga niddanna tu pakawayya i Anana nga manguru tu taka-taki nga ari moru na doktor ira. (Mat. 4:23, 24; Mar. 5:25-29) Para kani Jehova, ari tu milagro yatun. Ammuna i proseso ira nga nelagum anna egga i abilidadna nga itoli i nadaral ira. Kunnatun gapa ta abilidadna nga mamaginnolay anna kontrolan i natural ira nga kalamidad.

7. Ngatta ta dakal i nikeruman na sirib ni Jehova kumpara ta mundo nga pammagurayan ni Satanas?

⁷ Magaleg paga laman tu remediu i mundo nga egga ta influwensia ni Satanas nu kunnasi solban i nasional anna internasional nga parralaban; si Jehova laman i keggan na sirib nga mangirattal tu imammo ta mundo. (Isa. 2:3, 4; 54:13) Durante nga gigiammuattam i pakannammu anna sirib ni Jehova, matageno tam i natageno ni apostol Pablo, nga nainspiran nga nattura: “Ari nga magawa-gawa na tolay i appana-panono onu sirib na, anna awan tu adde na pakannammuna! Sinni i makepakanawag ta appana-panono na? Sinni i makalippawa ta kuan na ira?”​—Roma 11:33.

8. Anni i makatukkal ta futum meyannung ta metodo ni Jehova nga mammaguray?

⁸ Ari laman nga pakurugan na Biblia i kepangngattan ni Jehova nga mammaguray. Ipamammana nu ngatta dakal i nikeduman na soberaniana anne ta tanakuan. Tadday nga rason, megafu ta mammaguray yaya segun ta aya. Talaga matukkal i giffutuattam nu kunnasina ipasingan i soberaniana. Yaya ay “minaggallallo anna minangngikabbi, mabayag nga mapporay anna abundansia ta matalo nga aya anna kinakurug.” (Ex. 34:6) Marespeto anna egga i dignidad i pattratu na Dios ta aripanna ira. Mas ikavurunganna ittam anne ta pangikavuruttam ta baggi tam. Kontra yatun ta akusasion na Diablo nga iyetu ni Jehova i anni laman nga mapia ta matalo nga maddayarayaw sa. Niyawana paga lagu i nabalor nga Anana tapenu mapeggan ittam tu iddanama nga matolay tu mannanayun!​—Bibbigan i Salmo 84:11; Roma 8:32.

9. Kunnasi tam nammuan nga talaga interesadu i Dios ta kataggi-tadday?

⁹ Ari laman nga mangikavurung si Jehova ta pammakapian na totolena bilang grupo. Talaga interesadu yaya ta kataggi-tadday. Angngariganna, innattam turi ta tiempo na Biblia durante nga inuffunan anna pinasikan ni Jehova i ukum ira tapenu ipaliag i nasion na Israel kontra ta manattazzi nira. Tatun nga mariga nga tiempo, ari nallampas ta matana i ari-Israelita nga mangngagan tu Ruth. Dakal i nisakrifisiona anna nakkumberte ta kurug nga paddayaw. Binendisionan ni Jehova si Ruth tu atawa anna ana. Ngem ari laman tu yatun. Sonu mapaginnolay si Ruth, mannammuanna nga parte i anana ta linia nga naggafuan na Mesias. Daddamman gapa nu kunnasi yaya mappabalo ta pakannammu nga netura i istoria na pattolena ta libru na Biblia nga nengagan sa!​—Ruth 4:13; Mat. 1:5, 16.

10. Ngatta ari nga istrikto i pammaguray ni Jehova?

¹⁰ Ari tu minattazzi onu istrikto i pammaguray ni Jehova. Ipamavulun natun i lallaguray anna ipagaram i pagayaya. (2 Cor. 3:17) Kunnaw i kinagi ni David: “Nalevutan yaya tu dayaw anna kekakua; sikan anna pagayaya i lugar nga paddiananna.” (1 Cro. 16:7, 27) Kunnatun gapa i nitura na salmista nga si Etan: “Mapalag i makkansion ta paddaya-rayaw nikaw, O Afu, danuri i mattolay ta nawag na pagallo mu! Megafu nikaw, magayaya ira ta tangaggaw, anna megafu ta piam maddayaw ira nikaw.”​—Sal. 89:15, 16.

11. Kunnasi tam mapasikan i kombiksiottam nga kapianan i soberiana ni Jehova?

¹¹ Mapasikan i kombiksiottam nga kapianan i pammaguray ni Jehova nu kanayuttam nonopan i piana. Matageno tam i natageno na salmista: “Mas mapia i maddian ta Templom tu tangaggaw anne ta marivu nga aggaw ta maski sitaw.” (Sal. 84:10) Siguradu nga kunnatun. Ngatta? Bilang meddu nga Diseniador anna Namaratu nittam, ammu ni Jehova i mawag tam tapenu fustu nga magayaya, anna pagustuanna yatun nga pakawagan. Para ta benefisio tam i ngamin nga ikiddona anna talaga marresulta tu kadakallan nga pagayaya, maski paga ikiddona nga massakrifisio ittam.​—Bibbigan i Isaias 48:17.

12. Anni i primeru nga motibo tam ta paddefensa ta soberania ni Jehova?

¹² Kagian na Biblia nga kabalin na Tanga-rivu Dagun nga Pammaguray ni Cristo, egga i karuan nga marrebelde kontra ta soberania ni Jehova. (Nep. 20:7, 8) Anni i mamaguyu nira nga kuan yatun? Siguradu nga ipagaram na Diablo nga napalawan ta nikefukutanna anna egga i gakkagna nga ilogo i totolay ta pabbalin tu makasarili gittana kanayun nga kuanna. Puruebanna nga kumbinsian i totolay nga awayyana mattolay tu mannanayun maski ari tuttulan si Jehova. Siempre, ari  kurug yatun. Ngem mas importante: Egga kari i efektona yatun nittam? Nu ayatattam si Jehova anna passerbian megafu ta piana anna ta kepangngattanna nga Mammaguray ta uniberso, kala-kalussaw tam gafu yatun nga makademonio nga akusasion. Ariattam kayà i pattolay nga awan ta mepangngo anna meddu nga pammaguray ni Jehova.

13. Kunnasi tam mepasingan nga suportattam i soberania ni Jehova?

¹³ Siguradu nga mepangngo ta interu-futu nga suporta i soberania ni Jehova. Gittana nagigiammu tam, mepangngo yaya nga mammaguray, anna kapianan i metodo na pammagurena. Medefensa tam i soberania ni Jehova gukaban na pamattalupaddian ta integridad tam anna passerbi nga matalo ta Dios. Kunnasi tam paga mepasingan i passuporta tam? Gukaban na pangngua ta ganna-gannug segun ta metodo ni Jehova. Nu parigattam i passolba ni Jehova ta ganna-gannug, mepasingan nga ayatattam anna idefensa i metodona ta pammaguray.—Bibbigan i Efeso 5:1, 2.

14. Kunnasi maparigan na elder anna ulu ira na familia si Jehova?

¹⁴ Nagigiammu tam ta Biblia nga kanayun nga meddu i pangipasingan ni Jehova ta autoridadna. Mekunnay tatun, ari nakuan nga dogmatiko onu mangipilit danuri ulu na familia anna elder ira nga mangaya ta soberaniana. Parigadda lallagu nakuan si Jehova. Pinarigan laman ni Pablo i Dios anna i Anana. (1 Cor. 11:1) Ari pinasiranan ni Pablo i tanakuan onu pinilitna ira ta kayàna nga desision. Nakifabor lallagu yaya nira. (Roma 12:1; Efe. 4:1; Flm. 8-10) Kunnatun i metodo ni Jehova ta passolba ta ganna-gannug. Yatutta, kunnatun gapa nakuan danuri mangaya anna mangidefensa ta pammagurena.

15. Kunnasi mepasingan na pangirespeto tam ta teokratiko nga pakka-ulu i pangaya tam ta pammaguray ni Jehova?

¹⁵ Anni i reaksiottam ta naggafu ta Dios nga autoridad na pakka-ulu? Gukaban na marespeto nga kooperasion, mepasingattam i suporta tam ta soberania ni Jehova. Maski  ariattam kuruga nalippawa onu umanugu ta tadday nga desision, suportattam lagapa i teokratiko nga unnug. Talaga neruma yatun ta kukukuan na mundo, ngem parte na pattolay yatun ta pammaguray ni Jehova. (Efe. 5:22, 23; 6:1-3; Heb. 13:17) Mabenefisiowan ittam ta pangngua tatun, megafu ta napafutuan i interes na Dios nittam.

16. Kunnasi maddesision danuri massuporta ta soberania na Dios?

¹⁶ Mepasingattam paga i passuporta tam ta soberania na Dios ta personal ira nga desisiottam. Ari nga mangiyawa si Jehova tu espesipiko nga dob ta kada situasion. Ngem, kagianna i appana-panonona ta pangigiyana nittam. Angngariganna, ari yaya nangiyawa tu detalyadu nga dob meyannung ta assissinnun na Cristiano ira. Kagianna lallagu nga mappili ittam tu istilo ira na sinnun anna itsura nga umangay anna mepangngo ta ministro ira nga Cristiano. (1 Tim. 2:9, 10) Ikavurunganna gapa nga ariattam makesiddukal onu makonsensia i tanakuan megafu ta desisiottam ira. (1 Cor. 10:31-33) Nu maddesisiottam nga ari base ta kayà tam, nu ari base ta appana-panono anna pangikavurung ni Jehova, mepasingattam nga ayatattam anna suportan i pammagurena.

17, 18. Kunnasi medefensa na magatawa ira i soberania ni Jehova?

¹⁷ Ikonsidera tam i tadday nga gannug nu sitaw masuportan na Cristiano ira nga magatawa i annangngua ni Jehova anna marresulta tu pangidefensa ta soberaniana. Kunnasi nu mas mariga i pagatawa anne ta naekspekta? Kunnasi nu gittana kaddismaya? Ngatta ari magimmang anna daddamman i pinakilallang ni Jehova ta Israelita ira? Tinukoyna i baggina nga gittana atawa nga lalaki tatun nga nasion gari. (Isa. 54:5; 62:4) Siguradu nga mariga nga “pagatawa” yatun! Ngem nappasa-pasensia si Jehova. Namippiga yaya nangipasingan tu allo tatun nga nasion anna sinuppalna i tabbana nira. (Bibbigan i Salmo 106:43-45.) Ari kari nga mas maddukko ittam kani Jehova megafu tatun nga matalo nga aya?

¹⁸ Parigan gapa danuri magatawa si Jehova nu iddukadda i annangnguana. Ariadda magaleg tu ari nebase ta Biblia nga rason tapenu makigungay. Nalippawada nga pinattadday ira ni Jehova anna kayàna nga “metadday” ira ta kataggi-tadday. Seksual nga imoralidad laman i rason ta Biblia ta pakidiborsio na tadday tapenu awayyana mangatawa onu maki-atawa uli. (Mat. 19:5, 6, 9) Gukaban na pangngua ta pinakamapia segun ta situasiodda anna pakastan paga lagu yatun, medefensada i matunung nga pammaguray ni Jehova.

19. Nu makkurang ittam ta pangidefensa ta soberania na Dios, anni nakuan i kuattam?

¹⁹ Megafu ta imperfekto ittam, makangngua ittam tu gannug nga makadismaya kani Jehova nu mittan. Ammuna yaw yatutta nangiyawa yaya tu probision para nittam gukaban na tavvu ni Cristo. Yatutta nu egga i pakkurangattam ta karuan nga aspeto, makkiddaw ittam tu pamakoma kani Jehova. (1 Juan 2:1, 2) Imbes nga kanayun nga kastiguan i baggi tam, mappursigi ittam lallagu nga makagigiammu ta kamali tam. Nu madukko ittam kani Jehova, pakomanna ittam anna uffunan nga solban anna arubangan i parehu ira nga situasion ta mappange.​—Sal. 103:3.

20. Ngatta tiempo ngana tapenu suportan i soberania ni Jehova?

²⁰ Ta napabagu nga mundo, pammagurayan ni Jehova i ngamin anna ammuadda i matunung ira nga annangnguana. (Isa. 11:9) Ngem, aru ngana i nalawa tam nga tuttuddu ta maddaggun. Aranni ngana maresolba i isyu na pakkasoberano. Tiempo ngana tapenu medefensa i soberania na Dios gukaban na integridad tam, serbisio, anna napafutuan nga pamarig sa ta ngamin nga kukukuattam.