1, 2. (a) Anni i dakal nga isyu nga neparubang ta totolay? (b) Kunnasi ka-importante i pangappresia tatun nga isyu?

PARA ta aru nga totolay, dakal nga isyu i kuartu. Nakafokus ira ta parriku onu pammentena ta pakkukuada ira. Ta tanakuan gapa, importante para nira i familia, gawa-gawayyan, onu i personal ira nga netuppalda.

² Ngem, i kadakallan nga isyu nga neparubang nittam ay i paddefensa ta soberania ni Jehova. Kawagattam nga maffokus tapenu ari mawawan ta nono tam yaw nga importante nga isyu. Kunnasi mesimmu yatun? Nu kuruga okupadu ittam ta inaggaw nga pakavurungan ta pattolay nga kattammattam ngana nu kunnasi talaga ka-importante i pangidefensa ta soberania na Dios. Onu ipamavuluttam nga tavvunan na personal ira nga kapurueba yatun nga dakal nga isyu. Ngem nu monag i appresasiottam ta pangidefensa ta soberania ni Jehova, mas mawayya tam nga arubangan i inaggaw ira nga problema ta pattoletam. Mas paga nga maddukko ittam kani Jehova nu kunnatun i appresasiottam.

3. Anni ira i pinalattuag ni Satanas meyannung ta pammaguray na Dios?

³ I kingngua ni Satanas nga Diablo ay nappalattuag tu pakkuestion  ta kepangngattan na soberania ni Jehova. Ipilit ni Satanas nga marake i pammaguray ni Jehova anna iyetuna i kapianan para ta pinaratuna ira. Segun ta Diablo, mas makapagayaya anna mas makasta nu pammagurayadda i baggida. (Gen. 3:1-5) Pinalawan paga ni Satanas nga awan tu tolay nga napafutuan i kinamatalona ta Dios​—nga ta grabe nga ziga, iniga na maski sinni i pammaguray ni Jehova. (Job 2:4, 5) Nu meyannung ta akusasion na Diablo, nangiyawa si Jehova tu tiempo tapenu maekspiriensa na totolay nga miserable i pattolay nga kontra ta matunung nga pammaguray na Dios.

4. Ngatta kawagan nga masolba i isyu na soberania?

⁴ Siempre, ammu ni Jehova nga falso i akusasion na Diablo. Yatutta ngatta pinili na Dios nga ipamavulun nga mattuloy i isyu, nga nangiyawa tu tiempo kani Satanas nga pakurugan i puntona? Nelagum i ngamin nga intelihente nga pinaratu ta tabbag. (Bibbigan i Salmo 83:18.) Pinammanakitan na ollu nga magatawa i pammaguray ni Jehova kunne na gapa na aru paga. Megafu tatun, nononopan na tanakuan nga kurug i akusasion na Diablo. Durante nga ari paga nasolba yatun nga akusasion ta ginnonopan na totolay onu anghel, egga lagapa i parralaban na nasa-nasion, lahi, tribu, familia, anna na kataggi-tadday. Ngem sonu medefensa i soberania ni Jehova, makimoray tu mannanayun i ngamin ta matunung nga pammagurena. Metoli noka i imammo ta interu uniberso.​—Efe. 1:9, 10.

5. Anni i papel tam ta passuporta kani Jehova ta isyu na soberania?

⁵ Medefensa noka i kepangngattan na soberania na Dios anna maffaliu anna malsa noka i pammaguray ni Satanas anna na totolay. Mavviktoria i pammaguray na Dios gukaban na Mesianiko nga Pappatulanna, anna pakurugan danuri nattalupaddian nga matalo nga metaddaggan na totolay i pammaguray na Dios. (Isa. 45:23, 24) Kayàmu kari mebilang turi ta makagi nga nattalupaddian tu matalo nga massuporta ta soberania ni Jehova? Siguradu nga kayàmu. Tapenu makua tam yatun, kawagan nga nakafokus ittam ta dakal nga isyu anna alippawatan nu ngatta talaga importante yatun.

6. Kunnasi ka-importante i pangidefensa ta soberania ni Jehova?

⁶ Kagitta na nekagi, i pangidefensa ta soberania ni Jehova i pinaka-importante nga isyu nga nelaguman na totolay. Mas importante yatun anne ta personal nga pagayaya na maski sinni. Tagibadditan kari natun i balor na kepaliag tam onu palawananna nga ari ittam ikavurungan ni Jehova? Ari vuluvuga. Ngatta?

7, 8. Ngatta nelagum ta pangidefensa ta soberania ni Jehova i panuppal ta promesana ira?

⁷ Talaga ayatan anna tagibaloran ni Jehova i totolay. Sigga-paran yaya nga usan i daga na Anana tapenu mabbalin tu posible i mannanayun nga kepaliag. (Juan 3:16; 1 Juan 4:9) Nu ari tuppalan ni Jehova i promesana ira, egga nakuan i rason na Diablo nga tukuyan nga laddug i Dios, nga iyetuna i mapia, yatutta ari patas i pammagurena. Matabbag gapa natun danuri mangokkontra anna maguyoyung nga makkiavu: “Nitabba ni Jesus tu manoli, ari kari? Dian na gafu ngana? Natay ngana ngamin i ginafuam-mi ira, ngem magga-yaya mabba laman nga awan tu nangulian na ngamin nga ganna-gannug, namegafu paga gari ta nikaparo na mundo!” (2 Ped. 3:3, 4) Yatutta, siguraduan ni Jehova nga melagum ta paddefensa ta soberaniana i kepaliag na minattuppal nga totolay! (Bibbigan i Hebreo 6:17, 18.) Nebase ta aya i soberania ni Jehova. Yatutta,  makasiguradu ittam nga kanayun nga ayatan, tagibaloran, anna appresianna i matalo ira nga aripanna.​—Ex. 34:6.

⁸ Ta pakannammu ta importansia na soberania ni Jehova, ariattam tagibadditan i kepaliag tam onu i balor tam ta matana. Pattalupaddianattam laman i mepangngo nga pagimamma ta soberania anna ta kepaliag. Importante yatun nga fustu nga pagimamma tapenu makapaffokus ittam taw nga dakal nga isyu anna metaddaggan i matunung nga pammaguray ni Jehova.

9. Anni i kinagi ni Satanas meyannung kani Job? (Innan i letratu ta gafu na artikulo.)

⁹ I pakawagan ta mepangngo nga pagimamma ay manawag nga netura ta libru na Job, tadday ta ollu ira nga libru ta Biblia nga netura. Nagigiammu tam tatun i akusasion ni Satanas nga ta grabe nga ziga-riga, iniga ni Job i Dios. Kinagi ni Satanas nga parigatan mismu na Dios si Job. Ari kingngua ni Jehova tatun, ngem nipamavulunna si Satanas nga purueban si Job, nga kunna: “Innammu! Ngamin nga egga sa ay egga ngana ta limam.” (Bibbigan i Job 1:7-12.) Ari nabbayag, natay i aripan ni Job, nawawan i pagaleganna, anna i mafulu nga meddu nga ánana. Nituppal yaw ni Satanas nga pinalawanna nga gittana i Dios mismu i rason ta pazziga-riga ni Job. (Job 1:13-19) Tapus pinariga ni Satanas si Job gukaban na sumussussu anna kannama-nama nga taki. (Job 2:7) Mas paga nga naddaddam yaya megafu ta makapadismaya nga uvovug na atawana anna na tallu nga kavulu nga nagappappe nga kofunna.​—Job 2:9; 3:11; 16:2.

10. (a) Anni i kingngua ni Job nga nangipasingan tu integridadna ta Dios? (b) Anni i kamali ni Job?

¹⁰ I resulta? Napakurug nga talaga falso i akusasion ni Satanas. Ari nga nilikuran ni Job i Dios. (Job 27:5) Ngem, temporario nga nawawan ni Job i fustu nga pagimamma. Sobra i pinavvurunna ta pamakurug ta mismu nga kinatununna, yatutta niyavuna paga lagu nu ngatta nazziga-riga yaya. (Job 7:20; 13:24) Baka nonopattam nga fustu laman gapa yatun megafu ta nazziga-riga yaya. Ngem, nasingan na Dios i pakawagan nga itunung i pagimamma ni Job. Anni i kinagi ni Jehova sa?

11, 12. Kunnasi inuffunan ni Jehova si Job nga mangappresia, anna anni i reaksion ni Job?

¹¹ Netura ta appa nga kapitulo na libru na Job i kinagi na Dios sa​—kapitulo 38 adde ta 41. Awan vuluvuga tu mabibbig tam nga kinagi na Dios i espesipiko nga rason ta pazziga-rigana. Ari tu pangiyesplika kani Job nu ngatta mazziga-riga yaya i pinakapunto na kinagi ni Jehova, nga gittana irasonanna i baggina. Kayà lallagu uffunan ni Jehova si Job nga ammuan i kabaddina kumpara ta  kadakal na Dios. Inuffunanna gapa si Job nga innan i mas darakal nga isyu nga mawag nga kavurungan. (Bibbigan i Job 38:18-21.) Yatun i nakoffun kani Job tapenu metoli i fustu nga pagimamma.

¹² Awan kari tu allo ni Jehova ta pangiyawa tu prangka nga tabarang kabalin na pagattam ni Job ta grabe nga ziga-riga? Ari kunnatun i Dios, anna ari gapa ninono ni Job tu kunnatun. Maski ta pazziga-riga ni Job, sigga-appresia lagapa yaya nga naguvovug. Kunna paga: “Yatutta babawyakku i kinagì, anna mabbabawi ngà ta gavù anna ta avu.” Kunnatun i efekto na direkta ngem meddu nga tabarang ni Jehova. (Job 42:1-6) Nakalawa gapa ta gafu si Job tu pangitunung ta mabbing nga si Elihu. (Job 32:5-10) Kabalin nga nitunung ni Job i pagimammana megafu ta tabarang ni Jehova, kinagi ni Jehova ta tanakuan nga magayaya yaya kani Job ta kinamatalona maski ta pazziga-riga.​—Job 42:7, 8.

13. Kunnasi nakoffun i tabarang ni Jehova kani Job maski ta kabalin na pazziga-rigana?

¹³ Tulu-tuloy nga mabbenefisio si Job ta tabarang ni Jehova maski ta kabalin na pazziga-rigana. Kunnasi? Maski nu kawagan i tiempo ta pangitoli anna pammapia, “binendisionan ni Jehova i ultimo nga parte na pattolay ni Job tu mas aru anne ta ollu.” Turi kua, “napeggan gapa yaya tu pitu paga nga ana nga lalaki anna tallu paga nga ana nga babay.” (Job 42:12-14) Siguradu nga kanappan ni Job i ánana nga natay ta lima ni Satanas. Egga ira i tiempo nga meraddammanna i pinazziga-rigana. Maski nu nalippawana gabbalaman i rason ta pazziga-rigana, baka nu mittan manonona nu ngatta kawagan nga mazziga-riga yaya tu kunnatun nga kagrabe. Maski anni paga i kavurunganna, awayyana nga daddamman i tabarang na Dios. Makoffun yatun tapenu kanayun nga fustu i pagimammana anna mangiyawa yatun tu pamanna-bannay.​—Sal. 94:19.

14. Anni i magigiammu tam ta ekspiriensa ni Job?

¹⁴ Awayya tam gapa makala tu fustu nga pagimamma anna pamanna-bannay ta rekord na Job. Nipetura yaw ni Jehova “tapenu matudduan ittam nga magiddanama gafu ta pappasa-pasensia anna kapasikan na nono nga maggafu ta Masanto nga Tura.” (Roma 15:4) Anni i leksion para nittam? Primeru megafu taw: Ari nakuan tu sobra i pavvuru-vuruttam ta inaggaw nga pattoletam nga mawawan i fokus tam taw nga dakal nga isyu—i pangidefensa ta soberania ni Jehova. Appresiattam gapa nga importante i papel tam taw nga isyu nga mekiddaw nga mattalupaddian ittam nga matalo maski ta mariga ira nga sirkumstansia, gitta ni Job.

15. Anni i ituppal na kinamatalo tam maski ta pazziga-riga?

 ¹⁵ Ngatta makapabannay i pannono ta balor na kinamatalo? Megafu ta kebalinanna yaw nga egga i gakkag na pazziga-riga tam. Ari tu pangikalussaw yaw ni Jehova, nu ari, tiansa tam nga mangipasingan tu suporta ta soberaniana. (Prov. 27:11) Megafu ta pappasa-pasensia tam, “apruban ittam na Dios” anna mapaladda i pagiddanama tam. (Bibbigan i Roma 5:3-5.) Mabibbig ta rekord na Job nga “i Yafu ay minaggallallo anna minaggiddeddu.” (Sant. 5:11) Yatutta makasiguradu tam nga bala-balakkanna ittam ngamin nga mangidefensa ta soberaniana. Makoffun i pakannammu tam tatun tapenu ‘mapasensia nga magattam’ anna “sigga-pagayaya.”​—Col. 1:11.

16. Ngatta iperaddam nakuan ta baggi tam i importansia na pangidefensa ta soberania ni Jehova?

¹⁶ Talaga mariga nga maffokus ta pangidefensa ta soberania ni Jehova. Nu mittan gittana makkafi ittam megafu ta problema ira. Maski baraddi nga problema ay awayyana tu dumakal nu agga-nono tam yatun. Yatutta, kanayuttam nakuan nga iperaddam ta gibbaggiattam i importansia na passuporta ta soberania na Dios nu meparubang ta mariga ira nga situasion.

17. Kunnasi makoffun i regular nga pakibillay ta trabahu ni Jehova tapenu makapattalupaddian nga nakafokus ta dakal nga isyu?

¹⁷ Makoffun i regular nga pakibillay ta trabahu ni Jehova tapenu kanayun ittam nakafokus ta dakal nga isyu. Angngariganna, na-stroke i Saksi nga si Renee anna narigatan ta tulu-tuloy nga taki anna cancer. Durante nga mapporu ta medikal ira nga pasilidad, nilayyagayyanna i empleyadu ira na hospital, pasiente, anna bisita. Ta tadday nga hospital, nakalayyagayya yaya tu 80 nga oras ta dua-gaddua laman nga ligguan. Maski aranni ngana matay, ari nawawan i fokusna ta soberania ni Jehova. Megafu tatun, napakarianan i karuan nga pazziga-rigana.

18. Kunnasi nipasingan na ekspiriensa na tadday nga sister i benefisio na pangidefensa ta soberania ni Jehova?

¹⁸ Siempre, kayà tam nga kanayun nga nakafokus ta soberania ni Jehova maski ta inaggaw ira nga problema anna pakarigatan. Tallu aggaw nga naginnag si Jennifer nga makatakay ta eroplano tapenu makalabbe. Natturunug nga nakansel i flight. Magitetadday anna nababbannag yaya, yatutta mabi laman nakuan nga nakatageno tu pangikabbi ta baggi. Ngem, nakimallo yaya nu kunnasi makoffun ta espiritual ta tanakuan nga maka-ekspiriensa tu pakkadismaya. Anni i resultana? Aru i nalayyagayyanna anna aru i nepalimana tu literatura. Kunna: “Natageno ku nga binendisionannà ni Jehova maski ta mariga nga situasion anna nangiyawa tu sikan tapenu medayaw i ngaganna.” Wan, kanayun yaya nga nakafokus ta gakkag ni Jehova.

19. Anni i taddag na totolay ni Jehova meyannung ta soberaniana?

¹⁹ Mapadduma i kurug ta falso nga relihion ta pangappresia ta soberania ni Jehova. Kanayun nga idefensa na totolay na Dios i soberaniana. Bilang massuporta ta kurug nga paddayaw, kanayun nakuan nga pattalupaddianan na kada tadday nittam i parehu nga pagimamma na Biblia.

20. Anni i matageno ni Jehova ta appursigim nga medefensa i soberaniana?

²⁰ Makasiguradu ka nga tagibaloran ni Jehova i appursigim nga idefensa i soberaniana gukaban na matalo nga passerbim anna pagattam ta ziga-riga. (Sal. 18:25) Ikonsidera na tumunug nga artikulo nu ngatta mepangngo ta interu futu nga suporta i soberania ni Jehova anna nu kunnasim medefensa yatun.