1, 2. Kunnasi ittam banna-bannayan ni Jehova ta ziga-riga, anna anni i ipasiguradu na Uvovugna?

KINAGI na tadday nga mabbing nga single nga brother nga ngaganattam tu Eduardo i vuru-vurunna ta manakam nga sigga-atawan nga elder nga si Stephen. Nononopan ni Eduardo i nabibbigna ta 1 Corinto 7:28 nga duttal ta sigga-atawan ira i “neravvunan nga kavuru-vurungan.” Niyavuna: “Anni yaw nga ‘kavurungan,’ anna kunnasì arubangan yatun nu mangatawa ngà?” Nige tabbagan ni Stephen yatun nga pakkiavu, niyavuna kani Eduardo nga ikonsidera paga i tadday nga nitura ni apostol Pablo, nga si Jehova i ‘Dios nga paggafuan na ngamin nga uffun, banna-bannayanna ittam ta ngamin nga ziga-riga.’​—2 Cor. 1:3, 4.

² Wan, talaga meddu nga Yama si Jehova, anna banna-bannayanna ittam nu meparubattam ta ziga-riga. Awayyana nga personal nga naekspiriensa tam nu kunnasi ittam sinuportan anna nigiya na Dios, maruddu ta Uvovugna. Makasiguradu tam nga kayàna i kapianattam, gittana kingnguana ta aripanna  ira ta nappasa.​—Bibbigan i Jeremias 29:11, 12.

3. Anni ira nga pakkiavu i tabbagattam?

³ Mas malogon nga arubangan i problema ira onu ziga-riga nu ammu tam i rasonna. Fustu yatun nu meyannung ta ziga-riga ta pagatawa anna ta familia. Anni gafu i realidad ira nga marresulta ta “neravvunan nga kavuru-vurungan” nga nikagi ni Pablo? Anni ira nga ehemplo ta tiempo na Biblia anna ta maddaggun i makoffun nittam tapenu makaleg tu banna-bannay nga kawagattam? Makoffun i pakannammu tatun tapenu marubattam i kavurungan ira.

4, 5. Anni i karuan nga paggafuan na “neravvunan nga kavuru-vurungan”?

⁴ Mabibbig tam i kinagi na Dios ta gafu na historia na totolay: “I tadday nga lalaki panawanna i yama anna yenana anna metadday ta atawana, anna mabbalin ira nga tattadday nga pattag.” (Gen. 2:24) Kinagi yatun ni Jehova turi ta netuppalna i ollu nga pagatawa na tolay. Ngem, ta imperfekto nga situasion, mapeggan tu tension i relasion na familia megafu ta pagatawa anna pangigafu tu familia. (Roma 3:23) Maruddu nga talianan na autoridad na atawa nga lalaki i autoridad na magana. Niddan yaya na Dios tu pakapangngua tapenu ipasingan i pakka-uluna ta atawana. (1 Cor. 11:3) Mariga yatun para ta karuan nga atawa nga lalaki kunne na gapa ta atawa nga babay. Segun ta Uvovug na Dios, akseptan na atawa nga babay nga igiya yaya na atawana, ari na maganana. Awayyana nga egga i tension ta relasion ta manugang anna marresulta tu ziga-riga ta bagu nga magatawa.

⁵ Luttuag i bagu ira nga kavurungan kabalin nga kagian na atawa nga babay ta atawana, “Mabussi ngà ngana.” Maruddu nga magayaya i magatawa ta dattal na anada ngem egga i luttuag nga pakavurungan meyannung ta medikal ira nga isyu durante nga mabussi onu sonu magana ngana. Egga gapa i efektona yatun nira ta finansial, ta maddaggun anna ta mappange. Kawagan ngana i aru nga panguli sonu duttal i baby. Mefokus ngana i tiempo anna atension na bagu nga yena ta panangngaw ta anana. Matageno na aru nga lalaki nga awan ngana tu oras na atawada nira megafu ta okupadu ngana ira ta pangasikasu ta anada. Egga ngana gapa i bagu nga responsibilidad nga iyabaga na bagu nga yama. Nammungan ngana i trabahuna megafu ta egga ngana i bagu nga miembro na familia nga tangngawanna anna sustentowanna.

6-8. Kunnasi mabbalin tu problema i ari ketuppal na pakkaraga nga mapeggan tu ana?

⁶ Egga paga i tanakuan nga ziga nga meparubang ta karuan nga magatawa. Kayàda i mapeggan tu ana ngem ariadda makka-ana. Nu ari mabussi i atawa nga babay, awayyana tu mapproblema yaya ta emosion. Ari garantiya nga awan ngana tu kavurungan danuri magatawa onu egga anana, ngem danuri makkaraga nga magana nga ari nagana ay makagi gapa nga egga i ‘neravvunan nga kavuru-vurungadda.’ (Prov. 13:12) Ta tiempo na Biblia, kappasiran i pabbalin tu baug. Naddaddam si Rachel nga atawa ni Jacob turi ta nasinganna nga nagana i manangna. (Gen. 30:1, 2) Maruddu nga meyava-avu ta misionero ira nga masserbi ta lugar nga normal i dakal nga familia nu ngatta awan tu anada. Maski ta lohikal anna mataktika nga eksplanasiodda, awayyana nga kagiadda lagapa nira, “Ay kunnari, ipakimallomi kamu!”

⁷ Ikonsidera gapa i situasion na sister nga taga-England nga talaga kayàna i magana ngem ari paga natuppal yatun nga iddanamana. Tapus nammenopause ngana yaya. Inaminna nga narraddam yaya megafu ta nalippawana nga ari metuppal ta maddaggun nga sistema na ganna-gannug  i pakkaragana. Naddisidi ira na atawana nga magampun. Ngem, kinagina: “Nakatageno ngà lagapa tu taki ta futu. Ammù nga ari tu parehu i pagampun ta kapeggan tu ana nga naggafu mismu niakan.”

⁸ Kinagi na Biblia nga “gafu ta magana i babay, awayya na i mapaliag.” (1 Tim. 2:15) Ngem ari gapa kebalinan natun nga i pagana onu kapeggan tu ana ay marresulta tu pangalawa ta mannanayun nga inango. Tukuyanna lallagu i kinakurug nga megafu ta i babay nga okupadu ta panangngaw ta ana anna ta balay ay mebita ta patsismis anna pangi-alam ta pattolay na tanakuan. (1 Tim. 5:13) Ngem, meparubang lagapa yaya ta ziga-riga megafu ta pagatawa anna ta paffamilia.

9. Ngatta naperuma nga kapurueba i patay na atawa?

⁹ Nu meyannung ta ziga-riga nga nelagum ta pagatawa, egga i tadday nga ari insigida nga manono​—i patay na iddeddukan. Wan, i naperuma nga kapurueba nga arubangan na aru ay i patay na meddu nga atawa. Yaw i tadday nga ziga nga ari ekspektan na natayan nga arubangan taw nga sistema na ganna-gannug. Talaga kurugan na Cristiano ira i promesa ni Jesus nga paginnolay. (Juan 5:28, 29) Anni i efektona yatun nga iddanama ta matolay nga atawa? Dakal nga banna-bannay i iyawana yatun. Yaw i tadday nga pangiyawa na meddu nga Yama tu suporta anna banna-bannay turi ta maka-ekspiriensa tatun nga ziga-riga gukaban na Uvovugna. Ikonsidera tam i natageno na karuan nga aripan na Dios—anna nu kunnasi ira nabbenefisio—ta banna-bannay nga niyawa ni Jehova.

10. Kunnasi nakaleg tu banna-bannay si Hana ta ziga-riga? (Innan i letratu ta gafu na artikulo.)

¹⁰ Neparubang i meddu nga atawa ni Elkana nga si Hana ta tadday nga kapurueba. Baug yaya ngem i tadday nga atawa ni Elkana nga si Penina ay napeggan tu ana. (Bibbigan i 1 Samuel 1:4-7.) Naekspiriensa ni Hana i panguyu-uyaw ni Penina “kada dagun.” Megafu tatun narraddam anna nazziga-riga si Hana. Nakkiddaw yaya tu banna-bannay gukaban na pangipakimallo tatun nga gannug kani Jehova. Wan, “nakimallo yaya tu nabayag ta arubang ni Jehova.” Ekspektanna kari nga tabbagan ni Jehova i pakimallona? Awayyana nga nagiddanama yaya. Maski anni paga tatun, “ari ngana nga narraddam i mukana.” (1 Sam. 1:12, 17, 18) Nattiwala yaya nga pangultimuan ni Jehova i kinabaugna onu pannuan i pakkurangan ta karuan nga gannug.

11. Kunnasi ittam banna-bannayan na pakimallo?

¹¹ Mattulu-tuloy i kapurueba anna ziga-riga durante nga imperfekto ittam anna egga ta pammaguray ni Satanas yaw nga sistema. (1 Juan 5:19) Anni mabba kastana nga mammuan nga si Jehova i “Dios nga paggafuan na ngamin nga uffun”! Tadday nga makua tam tapenu marubang i personal ira nga kapurueba onu ziga-riga ay gukaban na pakimallo. Nivuvvu ni Hana i futuna kani Jehova. Kunnatun gapa nu meparubang ta problema, ari laman nga basta kagian kani Jehova i mataga-tageno tam. Kawagattam nga ipakimemallo sa, wan, kagian i mataga-tageno tam gukaban na napafutuan nga pakimallo.​—Fil. 4:6, 7.

12. Anni i nakoffun ta balu nga si Ana tapenu makaleg tu pagayaya?

¹² Maski gittana egga i dakal nga kurang ta pattoletam​—megafu ta kawan tu ana onu patay na iddeddukan—​awayya tam lagapa mabanna-bannayan. Ta kaggawan ni Jesus, natayan tu atawa i profetisa nga si Ana kabalin laman na pitu dagun nga pagatawa. Awan tu mabibbig ta Biblia meyannung ta anana. Anni i kukukuan ni Ana ta edad nga 84? Kagian na Lucas 2:37: “Maruddu yaya  nga umay ta Templo ta aggaw-gabi nga makadasa-dasal anna magayuno tu paddaya-rayaw na ta Dios.” Wan, nakaleg tu banna-bannay si Ana kunne na gapa na pagayaya ta paddayaw kani Jehova.

13. Mangikagi tu angngarigan nu kunnasi mangiyawa tu banna-bannay i kurug ira nga kofun nu ari matuppal yatun na parientes.

¹³ Nu meggo i relasiottam ta wawwaragi, makaleg ittam tu kurug nga kofun anna madukko ira nga kavulu. (Prov. 18:24) Meraddamman ni Paula i daddam nga natagenona turi ta lima i dagunna ta pinanawan na yenana i kinakurug. Mariga nga arubangan yaw nga kapurueba. Ngem egga i payunir nga sister nga mangngagan tu Ann nga namagaram anna nangipasingan tu meddu nga interes sa. “Maski paga ariakku parientes si Ann, natageno ku i meddu nga pangikavurunna nga manguffun,” kunni Paula. “Nakoffun yatun niakan tapenu mattalupaddian nga masserbi kani Jehova.” Tulu-tuloy lagapa nga masserbi tu matalo si Paula. Talaga magayaya mangana yaya nga masserbi kavulu i yenana. Magayaya gapa si Ann megafu ta nabbalin yaya tu yena ta espiritual ni Paula.

14. Anni ira nga bendision i maekspiriensa danuri mangiyawa tu banna-bannay?

¹⁴ Nu makepasingan ittam tu meddu nga interes ta tanakuan, malsa i karuan nga negatibo nga panageno tam. Ammu na sister ira, single onu sigga-atawan, nga mas magayaya ira bilang katrabahu na Dios ta pangilayyagayya ta mapia nga dumug. Gakkagda nga dayawan i Dios gukaban na pangngua ta urena. Imammatan na karuan nga  therapy i pakiparteda ta ministerio. Siguradu nga makoffun ittam ngamin ta meggo nga relasion ta kongregasion nu ipasingattam i pangikavurung ta tanakuan, danuri egga ta teritoria tam anna ta kongregasion. (Fil. 2:4) Makakkasta nga angngarigan si Pablo. Nangipasingan yaya tu “aggiddeddu na yena” ta kongregasion ta Tesalonica; gittana gapa i yama ta espiritual.​—Bibbigan i 1 Tesalonica 2:7, 11, 12.

15. Sinni i primeru nga makarresponsibilidad nga tudduan tu kinakurug i abbarabbing?

¹⁵ Tadday nga aspeto nga iddattam tu atension ay i banna-bannay anna uffun nga iyawa tam ta familia ira. Nu mittan, ikiddaw na bagu nga publisher ta manakam nga publisher nga uffunan ira nga tudduan tu kinakurug i ánada, maski ta pangikondukta tu paggigiammu tu Biblia ta abbarabbing. Segun ta Biblia, i magana i primeru nga makarresponsibilidad nga tudduan anna sanayan i abbarabbing. (Prov. 23:22; Efe. 6:1-4) Ta karuan nga situasion, kawagan i uffun na tanakuan anna talaga maappresia yatun. Ngem, arianna alsan natun i responsibilidad na magana. Importante i regular nga komunikasion ta familia.

16. Ta panguffun ta abbarabbing, anni nakuan i daddammattam?

¹⁶ Nu idisidi na magana nga tanakuan i magistudy ta ánada, ari nakuan purueban na magistudy nga apan i papel na magana. Egga ira i situasion nga mekiddaw ta tadday nga Saksi nga mangistudy ta abbarabbing nga ari interesadu i maganada ta kinakurug. Ngem mawag nga nonopan na Saksi ira nga maski mangiyawa ira tu espiritual nga uffun ariadda mabbalin tu magana na abbing. Nu mekondukta i kunnatun nga study, masirib nu kuan yatun ta baleda kavulu i maganada onu manakam nga Saksi onu ta mepangngo nga lugar ta publiko. Yatutta awan tu basehan na maski sinni nga manguestion ta pagistudy. Iddanaman nga duttal sangaw i tiempo nga tuppalan na magana i neyawa na Dios nga responsibilidad nga manangngal ta espiritualidad na ánada.

17. Kunnasi nga paggafuan na banna-bannay i ána?

¹⁷ Talaga banna-bannay ta familia danuri abbarabbing nga natudduan nga ayatan i kurug nga Dios anna manuttul ta tabaranna. Mepasingadda yatun gukaban na pangirespeto ta maganada anna panguffun ta material ira nga gannug. Awayyada gapa makoffun ta espiritual. Nige na Delubio, naddayaw i gaka ni Set nga si Lamec kani Jehova. Kinagi natun nga lalaki ta anana nga si Noe: “Mangiyawa [Yaya] tu banna-bannay ta pinattrabahu tam anna ta grabe nga pinattrabahu na lima tam megafu ta davvun nga nebariaw ni Jehova.” Natuppal yatun nga profesiya turi ta nalsa i kebariaw na davvun. (Gen. 5:29; 8:21) Ta personal nga pangiyaplika, danuri abbarabbing nga mappursigi ta kurug nga paddayarayaw ay talaga paggafuan na banna-bannay na familiada. Makoffun gapa ira ta interu familia tapenu maattammadda i kapurueba ta maddaggun anna mapaliag ta mas dakal nga mesimmu anne ta Delubio.

18. Anni i makoffun nittam tapenu magutu nga makapagattam ta maski anni laman nga ziga-riga onu kapurueba?

¹⁸ I pakimallo, monag nga appana-panono ta ehemplo ira nga malegan ta Biblia, anna meggo nga relasion ta totolay ni Jehova ay makoffun ta minillion ta maddaggun tapenu mabanna-bannayan ira ta ngamin nga ziga-riga. (Bibbigan i Salmo 145:18, 19.) Siguradu nga makoffun i pakannammu nga si Jehova i Naggafuan na mannanayun nga banna-bannay tapenu magutu nga maattamman i maski anni nga ziga-riga nga meparubang nittam​—ta maddaggun anna ta mappange.