SEGUN ta rekord na Evanghelio ni Mateo, “Ay simillung si Jesus ta Templo anna pinapanaw na ngamin i mallaka-laku tuange ta maggata-gatang ta lagum na Templo. Binala-balittag na i lamesa na manali ira tu kuartu, tuange gapa ta itubang na mallaku ira tu paloma. Kinagi na nira, ‘Ta Masanto nga Tura ay kinagi na Dios, “I Templò ay mangagan tu balay na akkimallakkan.” Ngem pinabbalin nu tu attaguan na minakkoko ira!’”​—Mat. 21:12, 13.

Ipasingan na rekord ira na historia na Judio i pangabuso na negosiante ira ta templo ta kostumerda gukaban na sobra ngina na pappresio. Angngariganna, nerekord ta Mishnah (Keritot 1:7) i nesimmu turi ollu-siglo C.E. turi ta nagadde i presio na tanga-paris nga paloma nga mesakrifisio ta tadday nga vulawan nga denario. Kaparehuna yatun i monnug na ari eksperto nga trabahador ta 25 aggaw nga pattrabahu. Maaksepta nga isakrifisio na mariga i paloma; ngem, sobra i ngina na presio maski natun ira nga mammanu. (Lev. 1:14; 5:7; 12:6-8) Megafu tatun nga annangngua, napporay si Rabbi Simeon ben Gamaliel, nga pinakariananna i karu na obligasion nga sakrifisio nga narresulta ta pagappo na presio tu mamimmagatu.

Yatutta, fustu si Jesus ta pakkagina nga “minakkoko” i negosiante ira ta templo megafu ta pangabuso anna pakkakkamda.