NAPPURSIGI si Don, tadday nga Saksi ni Jehova ta Canada nga mallayyagayya ta totolay nga maddian ta aggig ira na dalan. Meyannung ta tadday nira, niyistoria ni Don: “Tadday nga lalaki nga mangngagan tu Peter i pinakamadaping nga nasingakku tatun nga dalan. Bastus yaya anna ammuna i kuanna tapenu umarayyu sa i tanakuan. Kanayunna nga pammanakitan i kinasippo nga ipasingan na totolay sa.” Maski kunnatun, ta maturu 14 nga dagun, egga ira i tiempo nga nappasa-pasensia si Don nga nangipasingan tu kinasippo tatun nga lalaki nga maddian ta aggig na dalan.

Tadday nga aggaw, niyavu ni Peter kani Don: “Ngatta angngayannà pagalaman? Arayyuannà na ngamin nga totolay. Ngatta ikavurungannà?” Mataktika nga niyusa ni Don i tallu nga teksto tapenu madde i futu ni Peter. Niyavuna labbi kani Peter nu ammuna nga egga i personal nga ngagan na Dios anna direkta nga nipabibbigna ta Biblia i Salmo 83:18 (NW). Tapus, tapenu ipasinganna nu ngatta ikallona yaya, nipabibbig ni Don kani Peter i Roma 10:13, 14 (NW), nga nekagi nga “kada tadday nga magagal ta ngagan ni Jehova ay mepaliag.” Pangultimuanna, binibbig ni Don i Mateo 9:36 anna nikiddona nga bibbigan gapa mismu ni Peter yatun. Mabibbig tatun nga bersikulo: “Ta pakasingan [ni Jesus] ta magaru nga totolay, ziminatu i allo na nira megafu ta mavuru-vurung ira anna awan tu awa-awayya da. Kagitta da i karneru ira nga napagurayan.” Makatangi nga niyavu ni Peter: “Tadday ngà kari tatun ira nga karneru?”

Pinegafuanan ngana ni Peter i manguli. Nazzigu ngana yaya, inayusna i barbasna, anna inusana i niyawa ni Don nga mas makasta nga sinnun. Kanayun ngana nga marenu i itsura ni Peter.

Nangipappan si Peter tu diary. Negatibo anna maraddam i ollu ira nga parte na turana, ngem ari tu kunnatun i bagu ira nga niturana. Kunnaw i mabibbig ta tadday nga niturana: “Taw nga aggaw, nagigiammù i ngagan na Dios. Nu makimallo ngà ngana, awayyà ngana makimallo kani Jehova. Kappagayaya nga kannammuan i ngaganna. Kinagi ni Don nga puedè mabbalin tu Kofun si Jehova,  tadday nga kanayun tu egga i orasna nga magginna niakan, maski nu sitaw onu anni.”

I ultimo ira nga nitura ni Peter ay para ta wawwaragina. Kunna:

“Marake i gawagawayyakku taw nga aggaw. Matageno ku nga mallakay ngà ngana. Ngem, maski nu matay ngà ngana taw nga aggaw, ammù nga masingakku mangana i kofukku [si Don] ta Paraiso. Durante nga bibbigannu yaw, awannà ngana. Ngem nu egga masingannu nga tadday nga lalaki ta taragku nga nerumu-ruma tatun, makiyuvovug kamu sa, anna pakibibbig nu yaw nga baddi nga asul nga libru [tukuyanna i material nga meyusa ta paggigiammu ta Biblia i The Truth That Leads to Eternal Life nga nalawana ta nappasa ira nga daga-ragun]. * Mabibbig tatun nga masingakku noka mangana i kofukku ta Paraiso. Kurugakku yatun ta interu futù. I meddu nga waginu, Peter.”

Kabalin na tanam, kinagi na babay nga wagi ni Peter nga si Ummi: “Maddua-ragun ngana i nappasa, nakiyuvovug niakan si Peter. Yaw pagalaman i tiempo ta napassa ira nga dagun, nga talaga magayaya yaya anna makagala-galo paga lagu.” Kinagina kani Don: “Bibbigakku i libru megafu ta siguradu nga espesial i anni laman nga nakoffun ta wagì nga manguli.” Minanugu gapa si Ummi nga makipaggigiammu ta bagu nga libru nga Anni Talaga i Ituttuddu na Biblia? ta tadday ta Saksi ira ni Jehova.

Awayya tam gapa nga innan ari laman i pisikal ira nga itsura, ipasingan i kurug nga aya, anna mabbalin tu mapasensia ta ngamin nga klase na tolay. (1 Tim. 2:3, 4) Durante nga kuattam yatun, awayya tam mapaguyu i totolay nga kagitta ni Peter, nga ari makasta ta paningan na totolay ngem mapia i giffutuanna. Makasiguradu tam nga i Dios, nga ‘makasingan nu anni i egga ta futu,’ i mangipamavulun nga dumakal i kinakurug turi ta mapia i giffutuadda.​—1 Sam. 16:7; Juan 6:44.