1. Anni i rasottam tapenu magayayya?

ANNI ngana mabba kastana nga madumug i approgreso na ili ni Jehova! Ta nappasa nga dagun, regular nga mangikondukta ittam tu maturu 10,000,000 nga paggigiammu ta Biblia. Ebidensia yaw nga pannawagan na aripan ira na Dios i panuluda! Nonopan gapa danuri minillion nga interesadu nga inalawa tam ta Memorial. Magigiammuda gapa i aya nga nipasingan na Dios gukaban na tavvu.​—1 Juan 4:9.

2, 3. (a) Anni i ari nga makefugag nittam tapenu makapannawag nga “kunna biti-bitun nga dumallangarang”? (b) Mekunnay ta kinagi ni Jesus nga nerekord ta Mateo 5:14-16, anni i ikonsidera tam?

² Ta interu mundo, nadduruma i lengguahe na magili ni Jehova. Ngem, ari yatun makefugag nittam ta nattaradday nga pangidayaw ta Yama tam, si Jehova. (Nep. 7:9) Maski anni paga i lengguahe tam onu sitaw i paddianattam, makapannawag ittam nga “kunna biti-bitun nga dumallangarang ta langi.”​—Fil. 2:15.

³ I maobserba tam nga pakkaru, maekspiriensa tam nga pattaradday, anna i appursigi tam nga kanayun nga mappara-paran onu massifu-sifu ay makoffun tapenu mangiyawa tu gloria kani  Jehova. Taw nga artikulo, gigiammuattam nu kunnasi matuppal yatun.​—Bibbigan i Mateo 5:14-16.

4, 5. (a) Fuera paga ta pallayyagayya, kunnasi tam pannawagan i tulu tam? (b) Anni i benefisio ira na masippo nga agguyu-guyu tam? (Innan i letratu ta gafu na artikulo.)

⁴ “Awan tu maski sinni nga makapammakatalo anna deboto ta Yafu taw nga nabattang paga ira nga aggaw . . . nu arianna approbetsan i oportunidad nga pannawagan i tuluna.” Yatun i komento ta artikulo nga “Light in the Darkness” na The Watch Tower, Hunio 1, 1925. Kunna paga na artikulo: “Kuanna nakuan yaw gukaban na pangilayyagayya ta mapia nga dumug ta ngamin nga totolay ta davvun, anna gukaban na pangitonosna ta pattolena ta dala-dalan ni Jehova.” I tadday nga makua tam tapenu pannawagan i tulu tam ay gukaban na pangilayyagayya ta mapia nga dumug anna pangngua tu disipulos. (Mat. 28:19, 20) Medayaw tam gapa si Jehova megafu ta Cristiano nga kondukta tam. Oobserban na layyagayyattam ta babalay anna mattatalebag i agguyu-guyu tam. Dakal i makagi na minakkikkofun nga pangngizzi anna napafutuan nga paddios nu sinni ittam anna nu anni nga klase na Dios i dayawattam.

⁵ “Nikamu nga tullung ta balay,” kinagi ni Jesus ta disipulosna, “kagian-nu, ‘Imammo i egga nikamu.’” (Mat. 10:12) Ta lugar nga kanayun nga pallayyagayyan ni Jesus anna na apostolesna, normal laman para ta totolay nga padulattan i estrangheru ira ta baleda. Ta maddaggun, ari nga kostumbre yatun ta aru nga lugar. Ngem nu positibo anna minakkikofun ka durante nga iyesplikam nu ngatta minay ka ta baleda, alsan natun i vuru-vurung onu pakka-irita na makabbalay. Kanayun nga kapianan nga pamegafu i makasta nga pangngizzi. Kurug gapa yatun para ta wawwaragi nga makipartisipa ta public witnessing nga mangusa tu literature cart. Durante nga makiparte ka ta kunnatun nga klase na serbisio, maruddu nga mapansin mu nga maginteres i totolay nu gumalo ka anna maddios. Awayyana nga umaranni ira nittam anna manga tu publikasion. Makoffun gapa i masippo nga agguyu-guyu tapenu egga i maka-uvovug mu.

6. Kunnasi pinalawa na bako anna lakay nga magatawa i ministerioda?

⁶ Egga i magatawa ta England nga lakay anna bako nga ari ngana kuruga makalawan megafu ta ari ngana makasta i gawa-gawayyadda kumpara dati. Naddisidi ira nga pannawagan i tuluda ta lawan mismu na baleda. Nangidispley ira tu piga nga nebase-Biblia nga publikasion ta lamesa ta oras na passundu na magana ta ánada ta aranni nga eskuela. Aru i naginteres nga manga tu kopia na Ang mga Tanong ng mga Kabataan​—Mga Sagot na Lumulutas, Tomo 1 anna 2, kunne na gapa ta brosiur ira. Nevulu gapa i tadday nga payunir nga sister ta kongregasiodda ta nigafuda nga pallayyagayya. I masippo nga agguyu-guyu na sister anna i napafutuan anna sinsero nga appursigi na magatawa i namaguyu ta tadday nga yama nga akseptan i paggigiammu tu Biblia.

7. Anni i meyuffummu ta bagu ira nga nagali ta lugarnu?

⁷ Ta nappasa ira nga dagun, naekspiriensa na aru nga nasion i paddattal na aru nga refugee. Anni i makuam tapenu uffunan danatun nga mammuan si Jehova anna i gakkagna? Ngatta ariammu igafu gukaban na paggigiammu tu paddios ta lengguaheda? Makoffun i JW Language application tapenu makuam yatun. Kunne na gapa, ngatta ariammu maggigiammu tu piga nga linia nga makala ta interesda? Tapus awayyam gapa idirekta ira ta jw.org anna ipagiraw nira i nadduruma nga video anna ipasingan i publikasion ta lengguaheda.​—Deut. 10:19.

8, 9. (a) Anni nga praktikal nga uffun i nalawà tam ta study tam ta midweek? (b) Kunnasi moffunan na magana i ánada tapenu makipartisipa ta study?

 ⁸ Meddu nga niyawa ni Jehova i Study nga Pattolay Anna Ministerio tapenu mabbalin ittam tu mas efektibo ta tana na ministerio. Makoffun nittam i praktikal nga instruksion taw nga study tapenu mas makkomfiansa ta passinoli anna pangikondukta tu paggigiammu ira tu Biblia.

⁹ Naobserba na bagu ira nga makipartisipa ta study maski i ána tam. Sikamu nga magana, uffunannu i ánanu nga pannawagadda i tuluda gukaban na pattuddu nira nga makkomento ta sarilida nga uvovug. Nu mittan i simple anna napafutuan nga uvovugda i namaginteres ta interesadu ira ta kinakurug.​—1 Cor. 14:25.

10. Anni i makua tam tapenu mapasikan i pattaradday na familia tam?

¹⁰ Tadday paga nga makua tapenu pannawagan i tulum ay gukaban na pamasikan ta pattaradday na familiam anna na kongregasiommu. Makua yatun na magana nu iyunnugda i regular nga programa na Paddayarayaw na Familia. Aru i tanga-familia nga maggiraw tu JW Broadcasting. Kabalinnu maggiraw, ngatta ariannu paguvovugan nu kunnasi meyaplika i punto ira nga napalawan? Nu iyorollu na tadday nga magana i paddayarayaw na familia, daddammanna nakuan nga madduma i giya nga mawag na abbing ta giya nga mawag na tinedyer. Mannono tu mepangngo nga aplikasion na nagigiammu nga material para ta pammakapianan na kada miembro na familia.​—Sal. 148:12, 13.

11-13. Kunnasi nga makoffun i ngamin ta kongregasion ta pattaradday anna moffunan i tanakuan nga pannawagan i tuluda?

¹¹ Kunnasi nga makoffun i abbarabbing ta pattaradday na kongregasion, anna moffunadda i tanakuan nga pannawagan i tuluda? Nu tadday ka nga kabataan, ngatta ariammu kuan nga addetan i makikofun ta mannakam ira? Awayyam pagistorian ira tu ekspiriensada ira ta passerbi. Parehu nga makapagaram nikamu yatun, anna mas paga nga makoffun tapenu pannawagan i tulu na kinakurug. Sittam ngamin, abbing onu manakam, ay puede tam nga alawatan danuri magatende ta Kingdom Hall. Nu kunna kuammu, mas mattaradday i ngamin anna mapaguyu i bisita ira nga pannawagan gapa i tuluda. I mawag laman nga kuammu ay maddios ka ta bisita ira, ngizzitammu ira, uffunammu nga makaleg tu itubang, anna iyammammum ira ta tanakuan. Ipatageno nira nga malawà ira.

 ¹² Dakal i meyuffun na elder anna ministerial ira nga mangirollu tu miting para ta tana na serbisio tapenu makapartisipa i lakay anna bako ira ta ministerio. Egga kari i mepangngo nga teritoriada? Awayyam ira nga ipartner ta mas mabbing tapenu egga i mangalalay nira. Makepasingan ka gapa tu pangikavurung anna pangalippawa turi ira ta limitadu ngana i makuada megafu ta gawa-gawayyan anna sirkumstansiada. Nu makonsiderasion anna minangngalippawa ka, moffunan i abbarabbing anna manakam, ekspiriensadu anna babbaragu, tapenu matalikarag nga mallayyagayya.​—Lev. 19:32.

¹³ Natukkal i salmista nga mangisikka: “Kuruga makapabbaw, kuruga makasta nu i totolay na Dios ay mattaradday ira!” (Bibbigan i Salmo 133:1, 2.) Megafu ta makkaravulu i Israelita ira, nabenefisiowan ira ta makasta nga influwensia na tanakuan nga maddayaw kani Jehova. Negitta yatun ta denu nga parehu nga mabangug anna makarefresko. Determinadu ka kari nga mabbalin tu positibo nga influwensia, nga manguffun ta pattaradday ta nallatanan na wawwaragi? Nu kukukuammu yatun, makomendakka. Posible kari nga mas paga nga ‘vukatammu ta mapia i futum’ (“mappalawa,” NW) anna mas kanayun nga kuan yatun?​—2 Cor. 6:11-13.

14. Kunnasim mas paga nga pannawagan i tulum ta lugarnu?

¹⁴ Kunnasim gapa nga mas paga nga pannawagan i tulu na kinakurug na Biblia ta lugarnu? I masippo nga paguvovug anna konduktam i maka-engganio ta karrubam nga maginteres. Iyavu ta baggim, ‘Kunnasinà imammatan na karrubà? Kanayun kari nga marenu anna maayus i balè anna pallevu ku, nga makasta innan ta komunidad? Sigga-paran ngà kari nga uffunan i tanakuan?’ Nu makiyuvovug ka ta kapangngurug mu, ngatta ariammu iyavu nira nu anni ira i efekto na kinasippo anna makasta nga konduktada ta parientes, kakarruba, katrabahu, onu kaeskuelada? Siguradu nga makaginna ka tu positibo ira nga ekspiriensa.​—Efe. 5:9.

15. Ngatta importante nga mappara-paran ittam?

¹⁵ Nu kayà tam nga tulu-tuloy nga mannawag i tulu tam, mawag tu ammu tam nu anni ngana nga tiempo i pattolayattam. Namippiga nga kinagi ni Jesus ta disipulosna: “Mappara-parak-kamu.” (Mat. 24:42; 25:13; 26:41) Kakuruganna, nu mangurug ittam nga talaga mabayag paga i dakal nga ziga, anna ari yatun mesimmu durante nga matolay ittam, mawawattam i pakatageno tu pagapura meyannung ta trabahu nga pallayyagayya. (Mat. 24:21) Imbes nga maddallangarang i tulu tam ta lugar tam, baka mammaddo yatun adde ta maddo ngana talaga.

16, 17. Anni i makuam tapenu mattalupaddian nga mappara-paran?

¹⁶ Durante nga maggrabe yaw nga kritikal nga tiempo, mawag tu mappara-paran ittam. Sonu magguyu si Jehova, yatun noka i fustu nga tiempo. Awan tu maski sinni nga manguestion tatun. (Mat. 24:42-44) Sangawe gapa, mappasa-pasensia, anna kanayun nga mappara-paran. Bibbigan i Biblia kadaggaw, anna maddasa-dasal durante nga sigga-alerto. (1 Ped. 4:7) Daddamman i makasta ira nga ehemplo na wawwaragi nga magayayya nga nattalupaddian nga sigga-sifu durante nga pannawagadda i tuluda. Tadday tatun ay i ekspiriensa nga mabibbig ta artikulo nga “Pitumpung-Taóng Pagtangan sa Laylayan ng Isang Judio,” nga nepublisa ta Ang Bantayan, Abril 15, 2012, pahina 18-21.

¹⁷ Mabbalin tu okupadu ta makapagaram nga aktibidad anna pakikavulu. Makeyawa yatun nikaw tu dakal nga pagayayya, anna matageno mu nga gittana alistu laman nga mappasa i tiempo. (Efe. 5:16) Tanga-siglo i nappasa, okupadu i wawwaragi tam yatutta daka-dakal i netuppalda. Ngem mas dakal i metuttuppal tam ta maddaggun megafu ta  uffun ni Jehova. Mas nga pannawagattam i tulu tam sangawe anne ta maski anni nga tiempo ta nappasa.

18, 19. Kunnasi makoffun nittam i elder ira ta kongregasion tapenu sigga-alerto anna aktibo ittam? Mangikagi tu ekspiriensa.

¹⁸ Makapagaram nga maski nu mamippiga tam nga makaliwa, ipamavulun lagapa ni Jehova nga masserbi tam sa. Yatun ta appresiattam i probision ni Jehova nga “regalu ta totolay,” i elder ira ta kongregasion. (Bibbigan i Efeso 4:8, 11, 12.) Sonu uli nga bisitan naka na tadday nga elder nu, apan yaw nga oportunidad tapenu makala tu sirib anna mammakapia ta tabaranna.

¹⁹ Angngariganna, egga i problemadu nga magatawa ta England nga nappoffun ta dua nga elder. Matageno na atawa nga babay nga ari nga irolluan na atawana i passerbi na familiada kani Jehova. Aminadu i lalaki nga ari yayya malalaki nga manuddu anna awan tu regular nga unnugda para ta paddayarayaw na familia. Inuffunan na elder ira i magatawa nga daddamman i ehemplo ni Jesus. Sinangngallan ni Jesus i disipulosna anna niyawana i pakawagadda ira. Sinabarangngan danaw nga elder i atawa nga lalaki nga parigan si Jesus. Pinagaramda i atawa nga babay nga mappasa-pasensia gitta ni Jesus. Niddan paga ira na elder tu praktikal ira nga suhestion nu kunnasi ira nga makka-uffu-uffun tapenu mapeggan tu paddayarayaw na familia kavulu i dua nga ánada. (Efe. 5:21-29) Kinomendan na elder ira i lalaki megafu ta appursigina ira. Pinagaramda yayya nga ari magimmang anna mattalo ta masanto nga espiritu nga uffunan yayya nga mabbalin tu mapia nga ulu ta espiritual. Nakoffun i meddu nga interes anna i suporta taw nga familia tapenu pannawagadda i tuluda.

20. Anni i ekspektammu durante nga pannawagammu i tulum?

²⁰ “Mapalag danuri totolay ira nga i YAFU i pammakakuad-da; danuri i mattolay nga mekunnay ta ikaya na,” kunna salmista. (Sal. 128:1) Nu pannawagammu i tulum—gukaban na pangimbita ta tanakuan nga masserbi ta Dios, anna gukaban na pattalupaddian nga sigga-alerto—mas mabbalikka tu magayayya. Masingan na tanakuan i mapia ira nga annangnguam, anna aru i mapaguyu nga mangidayaw ta Yama tam.​—Mat. 5:16.