Nabibbig mu kari tu mapia i nappasa ira nga isyu na Passifusifutan? Innammu nu matabbag mu yaw ira nga pakkiavu:

Anni i appa nga makua tam tapenu mapakasta i pakkansiottam?

Tumaddag tam tu mapia anna iyatannattam i libru nga pakkansionattam. Maginango tam tu aralam. Nu ivuka tam tu mapia i simu tam anna sigga-pagayayya nga makkansion, mas magallu i akkansiottam.—w17.11, p. 5.

Anni i makapainteres nittam meyannung ta lokasion anna dala-dalan nga mappange ta siudad ira nga pakiyegutan ta Israel?

Egga i annam nga siudad nga pakiyegutan nga netaneg tu mapia ta nasion, anna makasta i dala-dalan mappange tatun. Yatutta mas mabi anna insigida nga malegan na pugante yatun.—w17.11, p. 14.

Ngatta i regalu na Dios nga tavvu gukaban ni Jesus i kakastan nga regalu nga malawà tam?

Sakto yatun ta kakayà tam tapenu mattolay nga mannanayun, anna meyawana i kawagattam nga kapalubbang ta liwa anna patay. Megafu ta meddu i pangikavurung na Dios ta gaka-gaka ni Adan, niyawana nittam si Jesus durante nga minattagaruli ittam pagalaman.—wp17.6, p. 6-7.

Kunnasi nga tukuyan na Salmo 118:22 i paginnolay ni Jesus?

Napammanakitan si Jesus nga Mesias anna napapatay. Tapenu mabbalin yayya tu “kuruga importante nga batu na balay,” mawag tu mapaginnolay yayya.—w17.12, p. 9-10.

I linia kari nga ginafuan na Mesias ay nekonekta ta kepangngattan na kaka nga ana?

Egga ira i tiempo nga maddalan i linia na ginafuan ni Jesus ta kaka nga ana nga lalaki, ngem ari tu kanayun nga kunnatun. Si David ay ari tu kaka nga ana ni Jesse; ngem, naggafu kani David i Mesias.—w17.12, p. 14-15.

Anni i karuan ta prinsipio ira ta medisina nga malegan ta Biblia?

Segun ta Dob, danuri mataki ay mawag tu mesinna ta tanakuan. Mawag tu mabbaggaw kabalin manammi tu natay. Nikiddaw gapa na Dob i fustu nga pangitabbo ta daping na tolay. Mawag tu makugi i abbing ta mekawalu nga aggaw na nikeyanana, nga tatun ay normal ngana i abilidad na daga nga mabbalay nga manguffun ta pammapia na bigag.—wp18.1, p. 7.

Ngatta mekiddaw ta tadday nga Cristiano i balanse nga pangaya ta baggi?

Mawag tu ayatattam i kasittoletam nga kunna baggi tam. (Mar. 12:31) Mawag tu “ayatan na lallaki i gi-attawad-da ta kunna pangaya da ta baggi da.” (Efe. 5:28) Ngem siempre, posible nga makillu i pangaya ta baggi.—w18.01, p. 23.

Anni ira i dakkua nga makua tam tapenu mapprogreso ta espiritual?

Mawag tu gigiammuan i Uvovug na Dios anna nonopan tu mapia yatun tapus iyaplika i nagigiammu tam. Mawag gapa nga pattalupaddianan nga vuka i nono anna futu tam ta influwensia na masanto nga espiritu anna sigga-paran nga alawatattam i uffun na tanakuan.—w18.02, p. 26.

Ngatta i astrolohiya anna pallavvun ay ari makekagi ta mappange?

Nadduruma i rason, ngem i primeru nga rason ay megafu ta parehu nga kondenan na Biblia danatun.—wp18.2, p. 4-5.

Kunnasi tam nakuan imammatan i tadday nga imbitasion ta pakkakan?

Nu inalawa tam i tadday nga imbitasion, mappursigi tam nakuan nga mabbalin tu mapammakatalakkan. (Sal. 15:4) Ariattam nakuan basta-basta nga ikansela. Baka napprepara tu mapia i nagimbita nittam.—w18.03, p. 18.

Anni nga leksion i magigiammu na natullo nga lallaki kani Timoteo?

Talaga ikavurungan ni Timoteo i totolay anna nipoppolluna i pallayyagayya. Malallappo yayya ta sagrado nga serbisio anna niyaplikana i nagigiammuna ira. Tulu-tuloy yayya nga nassanay anna nakkomfiansa ta espiritu ni Jehova. Parehu nga matudduan ta ehemplona i elder ira anna i tanakuan.—w18.04, p. 13-14.