Yama ni Rehoboam si Solomon, nga 40 dagun nammaguray ta Israel. (1 Pat. 11:42) Natay si Solomon turi ta 997 B.C.E. Tapus minay si Rehoboam ta sigiran ta Jerusalem mappange ta Sikem tapenu mazelugan nga patul. (2 Cro. 10:1) Manono mu kari nga magalangan yayya ta pattuttul ta dakkua ni Solomon, nga kilala ta kappabbaw nga ka-utona? Kunnasi mammuan ni Rehoboam nga mapurueban i siribna ta passolba ta komplikadu ira nga isyu?

Awayyana nga matageno ni Rehoboam nga tensionadu ta Israel. Turi kua, minay i mangibaggi na magili anna direkta nga kinagida sa i problemada ira: “Pinadammo na yamam i nipakattuna nikami. Ngem nu palogonammu i mariga nga ipakua na yamam anna palappawammu i nipakattuna nikami, masserbi kami nikaw.”​—2 Cro. 10:3, 4.

Matageno ni Rehoboam nga maipit yayya ta situasion! Nu kuanna i ikiddaw na magili, yayya anna i familiana tuange ta maddian ira ta palasiona ay mawagda nga pakarianan i karuan nga nakasanayadda nga makasta nga pattolay. Ngem nu mammanaki yayya, baka marrebelde i ili. Anni i kuanna? Ollu nga kinonsulta na bagu nga patul nga si Rehoboam i manakam ira nga dati nga gumattabarang ni Solomon. Ngem kabalin natun, nappatabarang gapa yayya ta lallaki nga kadagunanna. Megafu ta sinuttul ni Rehoboam i tabarang na mas mabbing nga lallaki, nadisidina nga tratuan tu marake i totolay. Kunna: “Mas padammokakku i ipakattù nikamu, anna ammungakku paga yatun. Kinastigo kamu na yamà gukaban na pamisi nikamu, ngem latigowattakamu.”​—2 Cro. 10:6-14.

Egga kari i mala tam nga leksion tatun? Manawag, maruddu nga masirib i magginna ta manakam ira—danuri manakam ta espiritual. Megafu ta ekspiriensada, awayyana nga ammuda ngana i resulta na tadday nga desision yatutta makeyawa ira tu makasta nga tabarang.​—Job 12:12.

Megafu ta rebelyon, inunnug ni Rehoboam i suddaluna ira. Ngem zinog ni Jehova si profeta Semaias, nga kunna: “Ariannu gumong anna gerran i wawwaraginu nga Israelita. Manoli lallagu nakuan i kada tadday nikamu ta gibbalayannu, megafu ta urè nga mesimmu yaw.”—1 Pat. 12:21-24. *

Ariadda vuluvuga nga makillaban? Nonopan ngana laman nu kunnasi kaproblemadu si Rehoboam! Anni i nonopan na totolay ta patul nga nangananassing nira tu kastigowanna ira gukaban na ‘latigo’ tapus napakummag mabba taw nga manawag nga rebelyon? (Ikumpara i 2 Cronicas 13:7.) Ngem maski kunna, i patul anna i suddaluna ira ay “sinuttulda i kinagi ni Jehova tapus nanoli ira ta gibbalayadda, nga kunna kinagi ni Jehova nira.”

Anni i leksion para ta nittam? Masirib nga tuttulan i Dios maski paga awayyana nga ke-uyawattam i pagangngua tatun. Marresulta ta fabor anna bendision na Dios i pamarulo.​—Deut. 28:2.

Nabendisionan kari si Rehoboam ta pattuppalna? Nattalupaddian yayya nga patul na Juda anna Benjamin, anna naffokus yayya ta pamataddag tu bagu ira nga siudad. Aru nga siudad i “fermi nga pinatuyagna.” (2 Cro. 11:5-12) I pinaka-importante, egga i tiempo nga sinuttulna i dorob ni Jehova. Durante nga nelammag ta idolatria i mafulu-tribu na Israel nga sakup ni Jeroboam, aru tatun i ‘nassuporta kani Rehoboam’ gukaban na paggangay ta Jerusalem tapenu itaddaggan i kurug nga paddayaw. (2 Cro. 11:16, 17) Yatutta, i pattuttul ni Rehoboam i namatuyag ta pappatulna.

Turi ta matuyag ngana i pappatulan ni Rehoboam, egga i ari menanaman nga kingnguana. Pinanawanna i dob ni Jehova tapus sinuttulna i paddayaw ta pagano! Ngem ngatta? Ininfluwensian kari yayya na yenana, nga tadday nga Ammonita? (1 Pat. 14:21) Maski anni paga i rason, sinuttul yayya na interu nga nasion. Yatutta nipamavulun ni Jehova nga sakupan ni Patul Sisak na Ehipto i aru ta siudad na Juda, maski paga pinatuyag danatun ni Rehoboam!—1 Pat. 14:22-24; 2 Cro. 12:1-4.

Naggrabe i situasion turi ta nadde ni Sisak i Jerusalem, nu sitaw nga nammaguray si Rehoboam. Tatun nga punto, kinagi ni profeta Semaias i mensahe na Dios kani Rehoboam anna ta prinsipena ira: “Pinanawannù, yatutta nibattattakamu gapa ta lima ni Sisak.” Anni i reaksion ni Rehoboam tatun nga disiplina? Positibo! Kagian na Biblia: “I prinsipe ira na Israel anna i patul ay nappakalinno anna kinagida: ‘Matunung si Jehova.’” Yayya nga, nipaliag ni Jehova si Rehoboam anna i Jerusalem ta kadaral.​—2 Cro. 12:5-7, 12.

Kabalin natun, tulu-tuloy nga nammaguray si Rehoboam ta pappatulan na Juda. Nige na patena, niddanna tu aru nga regalu i ánana, tapenu awan tu marrebelde ta wagida nga si Abias nga katalina. (2 Cro. 11:21-23) Taw nga nakepasingan si Rehoboam tu pakalippawa nga arianna nipasingan turi gafu.

Maski egga ira i makasta nga gannug nga kingngua ni Rehoboam, mabibbig ta Biblia: “Kingnguana nu anni i marake.” Ngatta? Megafu ta “ari tu determinadu i futuna nga alegan si Jehova.”​—2 Cro. 12:14.

Nonopan i ipasingan naw: Nu mittan tumuttul si Rehoboam ta Dios. Nagangngua gapa yayya tu karuan nga makasta para ta ili ni Jehova. Ngem arianna nakultiba i meggo nga relasion sa onu i napafutuan nga pakkaraga nga mapagayayya yayya. Yatutta, nataga yayya ta tagaruli anna falsu nga paddayaw. Baka manono mu: ‘Turi ta gininna ni Rehoboam i pangitunung na Dios, kingnguana kari yatun megafu ta influwensia na tanakuan imbes nga ta napafutuan nga pabbabawi anna ta pakkaragana nga pagayayyatan i Dios?’ (2 Cro. 11:3, 4; 12:6) Ta pangultimo na pattolena, nanoli yayya ta pagangngua tu marake. Talaga nerumu-ruma yayya ta kakena nga si Patul David! Wan, nattagaruli si David, ngem masingan ta pattolena  i aya para kani Jehova, debosion para ta kurug nga paddayaw, anna i napafutuan nga pabbabawi ta liwi-liwana.​—1 Pat. 14:8; Sal. 51:1, 17; 63:1.

Talaga egga i mala tam tu leksion kani Rehoboam. Mawag nga iyawa tam i pakawagan na familia tam anna mallallappo ta passerbi kani Jehova. Ngem ari makalanno yatun. Tapenu mala i fabor ni Jehova, masserbi ittam nakuan tu makapagayayya sa, anna mapeggan tu meggo nga relasion sa.

Makua tam yatun nu mappursigi ittam nga pattalupaddianan i monag nga aya kani Jehova. Gittana padduppang ta afi tapenu gumanga-ganga, gumanga-ganga gapa i aya tam ta Dios nu regular nga gigiammuan i Uvovugna, nonopan tu mapia i nabibbig tam, anna kanayun nga maddasal. (Sal. 1:2; Roma 12:12) I aya tam gapa kani Jehova i mamakaddul ta pakkaraga tam nga mapagayayya yayya ta ngamin nga kuattam. Paguyuan ittam natun tapenu kurug nga mabbabawi, nu kawagan. Ari tu gitta ni Rehoboam, ariattam nakuan vuluvuga panawan i kurug nga paddayaw.​—Jud. 20, 21.