“DIOS! Kamusta kamu?”

Siguradu nga kanayun nga usammu i kunnatun nga paddios. Awayya nga maki-alamanu onu makiggakko ka paga nu maddios ka. Nadduruma i mekagi anna kostumbre ta lugu-lugar, ngem maggi para-parehu i gakkag na paddios. Kakuruganna, nu ari maddios i tadday onu ari tabbagan i paddios, mekonsidera yatun nga kawan tu pangiddu anna pamabbastus.

Ngem egga i tendensia na aru nga tolay nga ari maddios. Magalangan i karuan nga maddios megafu ta pasiran onu ari yayya mepangngo tatun. Marigatan i karuan nga maddios ta tanakuan megafu ta madduma i lahi, kultura, onu estado na pattoleda. Ngem egga i positibo nga efekto maski na simple laman nga paddios.

Iyavu mu ta baggim: ‘Anni i metuppal na paddios? Anni i ituddu na Uvovug na Dios niakan meyannung ta paddios?’

Turi ta inalawa ni apostol Pedro i ollu nga Hentil, si Cornelio, ta Cristiano nga kongregasion, kinagina: “I Dios ay arian na nga padduma-ruman i pangikakua na ta totolay.” (King. 10:34) Nitura ni Pedro nga “ikaya na [Dios] tu pallikuran na ngamin nga totolay i katagaruliad-da.” (2 Ped. 3:9) Awayya nga insigida tam nga ikonekta yatun nga teksto ta tadday nga interesadu ta kinakurug. Ngem sinabarangngan gapa ni Pedro i Cristiano ira: “Ikakua nu ngamin i totolay, ayatan nu i wawwagi nu ta angngurug.” (1 Ped. 2:17) Ari kari nga makasta gafu para nittam nga maddios ta tanakuan maski anni i lahi, kultura, onu naggafuadda? Nelagum yatun ta pangipasingan tu pangikakua anna aya nira.

Pinagaram ni apostol Pablo danuri miembro na kongregasion: “Nu kunnasi na nipangalawa ni Cristo nikamu, kunnatun gafu i pangalawa nu ta kataggi-tadday.” (Roma 15:7) Tinukoy mismu ni Pablo i espesipiko nga ngagan danuri wawwaragi nga “kuruga dakal i meyuffud-da onu namasikan” sa. Yammanno ta maddaggun durante nga maekspiriensa tam i grabe nga pangatake ni Satanas, mas magawag tu pamasikan i wawwaragi.​—Col. 4:11; Nep. 12:12, 17.

Ipasingan na ehemplo ira ta Biblia nga fuera paga ta pakatageno na tanakuan nga nalawà ira, mas aru paga i meyuffun na paddios.

Turi ta mawag ngana nga meyali i inango na Ana na Dios ta san ni Maria, nammandu si Jehova tu anghel tapenu kiyuvovugan yayya. Pinagollu nga kinagi na anghel, “Dios nikaw, Maria!” anna kunna paga, “I Yafu i egga nikaw anna kuruga binendisionan naka!” “Nepallo i vurung” ni Maria, nga arianna ammu i rason nu ngatta makiyuvovug i anghel sa. Megafu ta napansin yatun na anghel, kinagina: “Ari ka maganassing, Maria, ta binendisionan naka na Dios.” Niyesplikana nga ginakkag na Dios nga iyanana i Mesias. Imbes nga mavurung, masippo nga kinagi ni Maria: “Doroban nà na Yafu. Makua paray niakan yatun nga kinagim.”​—Luc. 1:26-38.

Pribilehio para ta anghel nga masserbi nga kunna mensaheru ni Jehova; ngem, arianna ninono nga meyalinno yayya nu maddios yayya ta tadday nga imperfekto nga tolay. Naddios labbi yayya. Egga kari magigiammu tam tatun nga ehemplo? Sigga-paran tam nakuan nga maddios ta tanakuan anna pasikannan ira. Maski ta piga laman nga uvovug, moffunattam i tanakuan anna mepatageno tam nira nga talaga parte ira na ili ni Jehova.

Aru i nakilala ni Pablo ta kongregasion ira ta Asia Minor adde ta Europe. Egga ira i espesipiko nga paddios ta turana ira. Mabibbig tam yatun ta Roma kapitulo 16. Nappadios si Pablo ta aru nga kasi-Cristianona.  Tinukoyna si Febe nga “wagi tam,” anna pinagaramna i wawwaragi nga ‘alawatadda yaya ta ngagan na Yafu, ta kunna mepangngo nga kuan na totolay na Dios anna uffunadda yaya ta anni laman nga pagawagan na.’ Naddios gapa si Pablo kada Priscila anni Akila, nga “ari laman tu sakan i mabbala-balo nira, nu ari ngamin i iglesia [onu kongregasion, NW] na Hentil ira.” Naddios yayya ta karuan nga ari talaga nga kilala ta maddaggun​—“Epeneto nga ideddukak-ku nga kofun” kunne na gapa kani “Trifina anni Trifosa nga masserbi ta Yafu.” Wan, magayayya nga naddios si Pablo ta wawwaragi.​—Roma 16:1-16.

Nonopan ngana laman i ayayyada megafu ta egga i nakeraddam nira. Talaga mas napasikkal i ayada kani Pablo anna ta kataggi-tadday! Siguradu gapa nga napagaram i tanakuan nga Cristiano ta pakaginnada tatun nga meddu ira nga paddios, nga nakoffun nira tapenu mas mattuyag ta pangurug. Wan, i napafutuan nga paddios anna pakkomenda i mamatuyag ta pakkorofun anna mamattaradday ta matalo ira nga aripan na Dios.

Ta paddattal ni Pablo ta pantalan na Puteoli tapus mappange ta Roma, minay i wawwaragi ta zita tapenu dafungan yayya. Ta pakasingan ni Pablo nira, “nabbala-balo yaya ta Dios, ay nassikan i nono na.” (King. 28:13-15) Nu mittan, ngizzi onu wewweg laman i paddios tam. Ngem maski yatun ira ay makapasikan ngana ta nono na tadday nga tolay nga nadepres onu maddaddam.

Mawag ni Santiago nga mangiyawa tu serioso nga tabarang. Makigannug ta espiritual i karuan nga Cristiano gari gukaban na pakikkofun ta mundo. (Sant. 4:4) Ngem sifutan nu kunnasi nigafu ni Santiago i turana:

“Sakan si Santiago nga doroban na Dios anni Yafu Jesu-Cristo. Maddios ngà nikamu ngamin nga totolay na Dios nga newara-wara ta tanga-ravvunan.” (Sant. 1:1) Siguradu nga mas alappaw nga inaksepta na sinurakkanna i tabaranna turi ta nabibbigda ta paddiosna nga parehu laman ira nga doroban na Dios. Wan, i mapakalinno nga paddios ay awayyana nga mangivuka ta paguvovug maski ta serioso ira nga gannug.

Tapenu talaga efektibo i paddios, mawag nga sinsero anna mangipasingan tu kurug nga aya, maski paga ababba. Maski paga nu awan tu makapansin tatun. (Mat. 22:39) Aranni ngana mamegafu i study sa zimittal i tadday nga sister nga taga-Ireland ta Kingdom Hall. Durante nga mappabibibi yayya nga tullung, nallipay i tadday nga brother anna agga-ngizzi nga naddios: “Hello. Makasta ta egga ka.” Basta nagitubang ngana laman i sister.

Kabalin na piga ligguan, inarannian na sister yatun nga brother anna kinagina nga aru i problemana ta baleda ta nappasa ira nga aggaw. “Talaga ari tu makasta i urè tatun nga gabi,” kunna, “anna maggi kakku minay ta Kingdom Hall. Awan kuruga tu nebattakku ta study, fuera laman ta pinaddios mu. Nabanna-bannayan ngà. Mabbalo.”

Ari nga ammu na brother i makakkasta nga efekto natun nga simple nga paddios. “Turi ta kinagi na sister nga dakal i efekto na ababba laman nga kinagì,” kunna, “magayayya ngà nga kingnguà yatun. Nakkasta gapa i panageno ku.”

Nitura ni Solomon: “Itabbo mu i pan mu ta dana-danum, megafu ta pappasa na aru nga aggaw ay malegammu uli yatun.” (Ecl. 11:1) Nu sigga-nono tam ta balor na paddios, netallugaring ta kasi-Cristiano tam ira, mapatuyag tam i tanakuan anna i baggi tam. Ariattam nakuan gafu vuluvuga tagibadditan i pakapangngua na paddios.