“Turi ta naddama kami na kapittà, kinaralokku yayya anna pinaggal ku. Kayà ku yayya patayan.”​—Paul.

“Ta balemi, mabi laman nga mappatu i ulù maski ta baraddi ira nga gannug. Daralakku i muebles, gayam ira na ána ku, anna maski anni nga matammi ku.”​—Marco.

Baka ari gapa tu kunnatun i kavayolente tam. Ngem egga ira i tiempo nga sittam ngamin ay marigatan nga fugaddan i baggi tam. Megafu yatun ta narensia tam nga liwa kani Adan. (Roma 5:12) Egga ira i karuan nga marigatan nga kontrolan i poreda, kagitta da Paul anni Marco. Marigatan gapa i karuan nga kontrolan i nononopadda. Angngariganna, agga-nonoda i ikassidda onu i gannug ira nga mamakkafi ta nonoda. Egga gapa i karuan nga marigatan nga labanan i tentasion nga magangngua tu imoral, magillellaw, onu maddroga.

Danuri ariadda nga kontrolan i nononopadda, i pakkaragada, anna i annangnguada ay awayyada nga madaral i pattoleda. Ngem malillitattam danatun. Kunnasi? Nu kultibattam i pangifugag ta baggi. Tapenu makua tam yatun, tabbagattam i tallu nga pakkiavu: (1) Anni i pangifugag ta baggi? (2) Ngatta kawagan yatun? (3) Kunnasi tam makultiba yaw nga kualidad nga tadday nga aspeto na “vunga na Espiritu”? (Gal. 5:22, 23) Tapus innattam nu anni i makua tam nu egga ira i tiempo nga ariattam nafugaddan i baggi tam.

Nu egga i pangifugag ta baggi na tadday nga tolay, arianna insigida kuan i manonona. Imbes tu kunna, gaggaddanna i baggina tapenu ari yayya nga maguvovug anna magguyu nga mamallussaw ta Dios.

Nipasingan ni Jesus nu anni i kebalinan na pangifugag ta baggi. Kagian na Biblia: “Turi ta inuyu-uyaw da yaya, ari nga nangibalo; turi ta naziga-riga, ari nga nangana-anassing, nu ari nammakatalo ta Dios nga matunung nga manentensia.” (1 Ped. 2:23) Finugaddan ni Jesus i baggina turi ta pinaguyoyungan yayya na kumokkontra nisa durante nga nepato yayya ta estaka. (Mat. 27:39-44) Nige natun, masikan gapa i pangifugagna ta baggi turi ta pinurueban yayya na relihioso ira nga lider nga gafutan ta uvovugna lagapa. (Mat. 22:15-22) Anna makasta gapa i ehemplona turi ta naddadammo tu batu i makaporay ira nga Judio nga pamaragda nisa! Imbes nga mangibalo, ‘nattagu yayya anna nanaw ta Templo.’​—Juan 8:57-59.

Maparigattam kari i ehemplo ni Jesus? Wan, posible yatun. Nitura ni apostol Pedro: “Si Cristo ay naziga-riga megafu nikamu. Kingngua na yaw nga apparigan nu tapenu tuttulan nu yaya.” (1 Ped. 2:21) Maski nu imperfekto ittam, matuttul tam lagapa i ehemplo ni Jesus ta pangifugag ta baggi. Ngatta mawag nga kuattam yatun?

Mawag tam i pangifugag ta baggi tapenu mala tam i fabor ni Jehova. Maski nu nabayag ittam ngana nga matalo nga massesserbi kani Jehova, posible nga mawawattam yatun nga pakikkofun nu ariattam nga kontrolan i kukukuattam anna i kakkagiattam.

Si Moises i “pinakamasippo ta ngamin nga totolay ta utun na davvun” ta kaggawanna. (Num. 12:3) Piga dagun nga mapasensia nga gininna ni Moises i reklamo na Israelita ira. Ngem tadday nga aggaw, arianna nafugaddan i baggina. Nakaporay yayya turi ta narreklamo mangana i Israelita ira nga mapanga-pangal ngana ira. Pinoryanna i totolay anna kunna: “Ginnannu yaw sikamu nga rebelde! Mawag kari tu mangilawakkami tu danum para nikamu maggafu taw nga batu?”​—Num. 20:2-11.

Ari nga nafugaddan ni Moises i baggina. Arianna nga niyawa i dayaw kani Jehova nga Naggafuan na milagro nga danum. (Sal. 106:32, 33) Anni i resulta natun? Ari nga nipamavulun ni Jehova nga tullung si Moises ta Nepromesa nga Davvun. (Num. 20:12) Adde ta patena, pinabbabawyan ni Moises nga arianna finugaddan i baggina.​—Deut. 3:23-27.

Anni i magigiammu tam tatun? Maski nu nabayag ittam ngana nga massesserbi, ari ittam nakuan nga abusadu ta pakiyuvovug ta totolay nga mamappatu ta ulu tam onu ta totolay nga mawag tu mevuya. (Efe. 4:32; Col. 3:12) Kurug nga durante nga mammanakam ittam, mas mariga i mappasensia. Ngem daddammattam si Moises. Manaki tam nga daralan i makasta nga reputasiottam kani Jehova megafu laman ta ariattam nafugaddan i baggi tam. Kunnasi tam nga makultiba yatun nga nabalor nga kualidad?

Ipakimallo i uffun na masanto nga espiritu. Ngatta? Megafu ta tadday ta aspeto na vunga na espiritu ni Jehova i pangifugag ta baggi, anna iddanna ittam tu espirituna nu kiddawattam yatun. (Luc. 11:13) Gukaban gapa na espiritu ni Jehova, iddanna ittam tu sikan tapenu mafugaddan i baggi tam. (Fil. 4:13) Uffunanna gapa ittam nga kultiban i karuan paga nga aspeto na vunga na espiritu gitta na aya, nga makoffun gapa nittam tapenu mas mabi tam nga mafugaddan i baggi tam.​—1 Cor. 13:5.

Lillitan i gannug ira nga mamakkafi ta pangifugag mu ta baggim. Angngariganna, ibitam i website ira ta Internet anna dibersion nga mangipagaram ta marake nga annangngua. (Efe. 5:3, 4) Mawag gapa nga ibita tam i maski anni nga  manenta nittam nga magangngua tu marake. (Prov. 22:3; 1 Cor. 6:12) Angngariganna, mawag tu interamente nga lillitan na tolay nga alistu nga matenta nga magangngua tu imoral i libru onu i pagiraw ira nga manikkag ta seksual nga pakkaraga.

Baka marigatan ittam nga iyaplika yatun nga tabarang. Ngem nu kuattam i adde na mawayya tam, iddan ittam ni Jehova tu pakawayya nga kawagattam tapenu mafugaddan i baggi tam. (2 Ped. 1:5-8) Uffunanna ittam nga kontrolan i appana-panono, paguvovug, anna kondukta tam. Napakurug yatun ni Paul anni Marco nga nakagi ta gafu. Sangawe, makontrolda ngana i poreda. Egga gapa i brother nga kanayun nga makaporay nu mammaneho. Makiddama paga lagu yayya ta kavuluna ira nga driver. Anni i kingnguana? “Fermi i pappakimallo ku kadaggaw. Ginigiammù i artikulo ira meyannung ta pangifugag ta baggi anna kinabisadù i makoffun ira nga teksto ta Biblia. Maski nu piga dagukku ngana nga laba-labanan yaw, ikagì lagapa ta baggì ta kada umma nga ikaya ku i mattalupaddian tu kalmadu. Ummumma ngà gapa nga manaw ta balay tapenu ari ngà mappabibibi.”

Egga ira i tiempo nga ariattam nafugaddan i baggi tam. Gafu tatun, baka sobra i pasirattam nga makimallo kani Jehova nu mesimmu yatun. Ngem yatun nga tiempo i pinakakawagattam i makimallo nisa. Yatutta, insigida ka nakuan nga makimallo kani Jehova. Makimemallo ka para ta pamakomana, ikiddaw mu i uffunna, anna determinadu ka nakuan nga ari ngana kuan uli i nakkamaliammu. (Sal. 51:9-11) Ariammu nonopan nga manaki ni Jehova nga ginnan i napafutuan nga pakimallo mu para ta allo. (Sal. 102:17) Ipanono ni apostol Juan nittam nga i daga na ana na Dios i “mamakarenu nittam ta ngamin nga katagarulian.” (1 Juan 1:7; 2:1; Sal. 86:5) Daddammammu nga ikikkiddaw ni Jehova ta aripanna ira nga kanayun nga mamakoma. Makasiguradu ka gafu nga kunnatun gapa i kuanna nittam.​—Mat. 18:21, 22; Col. 3:13.

Ari nga nagayayya si Jehova turi ta mittan nga ari nga nafugaddan ni Moises i baggina ta katanapan. Ngem maski paga kunnatun, pinakoma yayya ni Jehova. Kagian paga na Biblia nga matalo nga lalaki si Moises nga makasta nga parigattam. (Deut. 34:10; Heb. 11:24-28) Ari nga pinamavulun ni Jehova si Moises nga tullung ta Nepromesa nga Davvun ngem ipamavulunna noka si Moises nga mattolay ta Paraiso nga davvun anna niddanna yayya tu iddanama nga mattolay tu mannanayun. Kunnatun gapa i iddanama tam nu mappuppursigi ittam nga kultiban i nabalor nga kualidad na pangifugag ta baggi.​—1 Cor. 9:25.