MANGURUG ittam ngamin nga ta “pangurianan ira nga aggaw,” igiggiya anna iyayawa ni Jehova i pakawagan na totolena tapenu mattalupaddian ira nga madukko nisa. (2 Tim. 3:1) Ngem mawag tu mattuppal ittam ngamin kani Jehova. Megitta i situasiottam ta Israelita ira tagga ta katanapan. Mawag nga magguyu ira nu maginnada i guni na trumpeta.

Kinagi ni Jehova kani Moises nga mangngua yayya tu dua nga trumpeta nga napadday ta napoppo nga pira tapenu ‘usanna nu agalanna i totolay nga maggarammammung anna nu ikagina nira nga magali ngana i kampu.’ (Num. 10:2) Nadduruma i pamaguni na papari ira ta trumpeta tapenu kagian nu anni i mawag nga kuan na totolay. (Num. 10:3-8) Ta maddaggun, madduruma gapa i metodo na pangalawa na totolay na Dios ta direksion ira. Taw nga artikulo, ammuattam i tallu nga metodo na panga tam tu instruksion anna ikumpara tam danatun ta pagguni ira na trumpeta ta Israel tagga. Nelagum taw nga tallu nga metodo ay nu magalan ittam ta darakal nga paggarammammung, nu makalawa i elder ira tu passanay, anna nu egga i moli nga teokratiko ira nga unnug ta kongregasion.

Nu kayà ni Jehova nga maggarammammung “i interu nga ili” ta attallungan na zigattu nga parte na tabernakulo, pagunian na papari i dua nga trumpeta. (Num. 10:3) Maginna na ngamin nga tribu nga nagrupo tu appa nga nakapalevu ta tabernakulo yatun nga paguni. Awayyana nga piga minuto laman makadattal ngana tari danuri nakkampu aranni ta attallungan. Danuri gapa arayyu i nakkampuadda, mawagda i mas aru nga tiempo anna appursigi tapenu makadde tari. Arayyu man ira onu aranni, kayà ni Jehova nga umay i ngamin nga maggarammammung anna magginna ta instruksionna.

Ta maddaggun, ari ittam ngana nga maggarammammung ta tadday nga tabernakulo, nu ari, membitan ittam ta paggarammammung na totolay na Dios. Nelagum tatun i rehional ira nga kombension, anna i tanakuan paga ira nga espesial nga okasion, nu sitaw makalawa ittam tu importante nga informasion anna direksion. Ta ngamin nga nasion ta interu nga mundo, para-parehu laman nga programa i malawa na totolay ni Jehova. Yatutta ngamin danuri nangalawa ta imbitasion taw ira nga paggarammammung ay parte na dakal anna magayayya nga grupo. Mas arayyu i biahe na karuan anne ta tanakuan. Ngem umanugu i ngamin nga nangalawa taw nga imbitasion nga sulit yatun.

Mabbenefisio kari gapa ta darakal nga paggarammammung maski danuri egga ta ararayyu ira nga lugar? Megafu ta moderno nga teknolohia, aru tannira i mabbenefisio ta parehu nga programa anna natagenoda paga lagu nga parte ira na  darakal nga paggarammammung. Angngariganna, ta pabbisita na representante na hedkuarter ta panga na Benin, nepagiraw i programa gukaban na video transmission ta Arlit, Niger, tadday nga pamminan nga ili ta Sahara Desert. Bente uno nga wawwaragi anna interesadu i nagatende. Maski nu ararayyu i diadda, natagenoda nga netadday ira ta dakal nga ammung na 44,131. Nitura na tadday nga brother: “Kuruga mappabalo kami ta pangipagironu ta programa. Natagenomi mangana nu kunnasi kadakal i pagiddunu nikami.”

Nu tadday laman nga trumpeta i pinaguni na Israelita nga pari, “danuri panakallan laman nga ulu na rinivu” i umay ta tolda na paggarammammung. (Num. 10:4) Tari ira makalawa tu informasion anna passanay naggafu kani Moises. Makoffun yatun nira tapenu matangngalladda i responsibilidadda ira ta tribuda. Nu tadday ka tari ira ta panakallan, kuammu kari i adde na mawayyam tapenu presente anna mabbenefisio ka?

Ta maddaggun, ari nga “panakallan” i elder ira ta kongregasion anna ari gapa ira i pakiyafuan na karneru ira na Dios nga tangngalladda. (1 Ped. 5:1-3) Ngem magga kuadda i kapianan tapenu ipastor i karneru ira. Yatutta sigga-paran ira nga alawatan nu membitan ira para ta mas paga nga passanay gitta na Kingdom Ministry School. Taw ira nga passanay, nagigiammu na elder ira nu kunnasi nga mabbalin tu mas efektibo ta panangngal ta kongregasion. Megafu paga taw, mas nga maddukko i ngamin kani Jehova, kasali ngana i elder ira anna danuri tangngalladda ta kongregasion. Maski nu ari ka paga nga naka-atende ta tadday ira taw nga passanay, mabenefisiowakka lagapa megafu ta danuri naka-atende usadda i nagigiammuda tapenu uffunan i kongregasion.

Nu mittan, mamalawan i Israelita ira nga papari tu manguloli nga guni ta trumpeta. Iyanunsio natun nga kayà ni Jehova nga magali i interu nga kampu. (Num. 10:5, 6) Nu iyali na totolay i kampu, kuruga organisadu i pangnguada tatun, ngem dakal nga trabahu yatun para ta ngamin. Nu mittan, egga i karuan ira nga Israelita nga manakida ngana i magali ta tanakuan nga lugar. Ngatta?

Megafu ta matageno na karuan nga kana-kanayun anna gavva-gavva i anunsio na pagali. “Nu mittan, mattalupaddian laman tu pattangagabi i kunam.” Nu karuan gapa, “dua nga aggaw, tanga-vulan, onu mas mabayag paga” nige mangana nga magali. (Num. 9:21, 22) Namippiga kari nga nagali i kampu? Kagian na Numeros kapitulo 33 nga 40 nga lugar i nakkampuan na Israelita ira.

Egga ira i tiempu nga nakkampu i Israelita ira ta lugar nga egga i lirumna. Kuruga makakkasta yatun nga puestu nu egga ka ta alawa anna kananassing nga katanapan. (Deut. 1:19) Yatutta baka manono na karuan nga manakida ngana i magali megafu ta baka ari nga makasta i pagalitadda.

Sonu mamegafu nga magali i kampu, mawag na karuan nga tribu i mappasensia tapenu iddaggan sonu ira ngana gapa i magali. Maginna na ngamin i manguloli nga guni na trumpeta ngem ari ira nga maggiriddang nga manaw. I manguloli nga guni na trumpeta i senial nga mawag ngana nga manaw i tribu ira nga nakkampu ta zigattu​—i tribu na Juda, Isacar, anna Zebulun. (Num. 2:3-7; 10:5, 6) Sonu nakapanaw ngana danatun nga tribu, pagunian mana uli na papari i manguloli nga guni na trumpeta tapenu magali gapa i tallu nga tribu nga nakkampu ta zita. Tulu-tuloy nga kuan danatun na papari adde ta makapanaw i interu nga kampu.

Baka marigatakka nga alawatan i karuan nga panguloli ta organisasion. Ngatta? Baka matageno mu nga gittana napakaru yatun nga panguli. Onu komfortable ka ngana ta dati nga unnug anna manono mu nga ari ngana nakuan nga nanguli yatun. Ngem maski anni paga i rason, baka marigatakka nga mappasensia tapenu laman makibagay tatun nga panguli. Ngem nu mappursigi ittam nga alawatan yatun nga panguli, masingattam nga para yatun ta pammakapianattam anna bendisionan ittam ni Jehova.

Ta kaggawan ni Moises, minillion nga lallaki, babbay, anna abbarabbing i nigiya ni Jehova ta katanapan. Nu ari ira nga tinangngallan anna nigiya ni Jehova, baka natay ngana ira. Ta maddaggun, igiggiya gapa ittam ni Jehova taw nga peligroso nga pangurianan nga aggaw. Uffunanna ittam nga maddukko nisa anna mapaladda i pangurug tam! Yatutta kuattam nakuan i adde na mawayya tam nga parigan i matalo ira nga Israelita nga nanuttul ta nadduruma nga guni na trumpeta!