1. Ngatta nu karuan matageno danuri na maddayaw kani Jehova nga magitetadday ira?

ARU nittam i makatageno nga magitetadday nu mittan. Para ta karuan, mabi laman nga mappasa yatun. Ngem ta karuan gapa, mabbayag yatun. Awayyana nga matageno tam nga magitetadday ittam maski nu aru i totolay nga kavulu tam. Marigatan i karuan nga magaleg tu kokkofun ta bagu nga kongregasion. Madukko gapa i karuan ta kafamiliada, yatutta matagenoda nga magitetadday ira nu meyarayyu ira. Kanappan gapa na karuan nga makavulu i natay nga iddeddukadda. Matageno gapa na karuan nga Cristiano, mas ngana danuri bagu pagalaman ta kinakurug, nga magitetadday ira nu pammanakitan onu persigian ira na ari Saksi nga kafamiliada anna dati nga kokkofudda.

2. Anni ira nga pakkiavu i tabbagattam?

² Ammu anna matindian ni Jehova i ngamin nga mesissimmu nittam. Nu matageno tam nga magitetadday ittam, ammuna i mataga-tageno tam, anna kayàna ittam uffunan. Kunnasi ittam uffunan ni Jehova? Anni i kuammu nu kunnatun i matageno mu? Kunnasi tam gapa moffunan i kakongregasiottam nga makatageno nga magitetadday ira? Innattam i tabbag ira tatun.

3. Kunnasi nipasingan ni Jehova nga ikavurunganna si Elias?

³ Kayà ni Jehova nga magayayya i ngamin nga massesserbi nisa. Aranni yayya ta kataggi-tadday nittam anna ammuna nu maraddam ittam onu nu nakkafi i nono tam. (Sal. 145:18, 19) Innattam nu kunnasi nikavurungan ni Jehova i profetana nga  si Elias. Nattolay yaw nga matalo nga lalaki ta tiempo nga mariga i paddia-paddian ta Israel. Kumokkontra ta Dios danuri egga ta autoridad. Pineppersigida danuri maddayaw kani Jehova anna kayàda nga patayan si Elias. (1 Pat. 19:1, 2) Abbo paga ni Elias nga magitetaddena ngana laman nga profeta nga massesserbi kani Jehova yatutta mas narraddam yayya. (1 Pat. 19:10) Insigida nga inuffunan ni Jehova si Elias. Nangidog yayya tu tadday nga anghel tapenu ipasiguradu kani Elias nga ari yayya magitetadday. Kinagi na anghel kani Elias nga aru paga nga Israelita i matalo nga massesserbi kani Jehova!—1 Pat. 19:5, 18.

4. Kunnasi masingan ta Marcos 10:29, 30 nga ikavurungan ni Jehova danuri ari ngana suportan na kafamilia onu kokkofudda?

⁴ Ammu ni Jehova nga aru i isakrifisio na karuan nittam nu piliattam yayya nga passerbian. Nelagum tatun i suporta na ari Saksi nga kaparientes tam anna dati ira nga kokkofuttam. Megafu ta mavurung si apostol Pedro, niyavuna kani Jesus: “Pinanawam-mi ngamin i adde na anna siminuttul kami nikaw. Anni gafu noka i bala-balo mi?” (Mat. 19:27) Ngem nipasiguradu ni Jesus ta disipulosna nga aru i mabbalin tu espiritual nga kafamiliada. (Bibbigan i Marcos 10:29, 30.) Nipromesa gapa na nelangitan nga Yama tam nga si Jehova nga uffunanna danuri maya nga masserbi nisa. (Sal. 9:10) Gigiammuattam i makua tam tapenu malawa tam i uffun ni Jehova nu laba-labanattam i panageno nga magitetadday ittam.

5. Ngatta makasta nu pannonopammu nu kunnasi naka uuffunan ni Jehova?

⁵ Nonopan nu kunnasi naka uuffunan ni Jehova. (Sal. 55:22) Makoffun yaw tapenu ariammu matageno nga magitetadday ka. Single si Sister Carol * anna awan tu Saksi nga kafamiliana. Kinagina: “Nu nonopakku nu kunnasinà inuffunan ni Jehova tapenu maattammakku i mariga ira nga tiempo, matageno ku nga ari ngà magitetadday. Yatutta kumbinsidu ngà nga kanayunnà uffunan ni Jehova.”

6. Ngatta mapagaram ta 1 Pedro 5:9, 10 danuri laba-labanadda i pakatageno tu pagitetadday?

 ⁶ Nonopan nu kunnasi uuffunan ni Jehova i wawwaragi nga makatageno tu pagitetadday. (Bibbigan i 1 Pedro 5:9, 10.) Tattadday nga Saksi ni Brother Hiroshi ta familiana. Kinagina: “Ta kongregasion, masingammu nga egga i problema na ngamin. Ammu mi nga kukukuan na ngamin i adde na mawayyada nga masserbi kani Jehova yatutta mapagaram kami, sikami nga magitetadday nga Saksi ta familia.”

7. Kunnasi makoffun nikaw i pakimallo?

⁷ Kanayun nga makimallo, mabbibbig tu Biblia, anna makistudy. Mawag nga ikagim kani Jehova i talaga mataga-tageno mu. (1 Ped. 5:7) “I napafutuan nga pakimallo kani Jehova i tadday ta talaga nakoffun niakan tapenu malabanan i panageno nga magitetadday ngà,” kunni Massiel. Natageno naw nga kabataan nga sister nga nesina yayya ta familiana turi ta masserbi ngana yayya kani Jehova. “Talaga kuru-kurug yayya nga Yama niakan, anna mamippiga ngà nga makimallo nisa kadaggaw, ikagì nisa i talaga mataga-tageno ku.”

8. Kunnasi makoffun nikaw i pabbibbig tu Biblia anna pannono tu mapia tatun?

⁸ Regular nga bibbigan i Biblia anna pannonopan i teksto ira nga mangipasingan nga ayatan naka ni Jehova. Inattamman ni Sister Bianca i makadismaya ira nga komento na kafamiliana nisa. Kinagina: “Talaga nakoffun niakan i pabbibbig anna pannono tu mapia ta istoria ira ta Biblia anna istoria na pattolay na aripan ira ni Jehova nga kaparehù tu situasion.” Kabisaduan gapa na karuan nga Cristiano i makapabannay ira nga teksto gitta na Salmo 27:10 anna Isaias 41:10. Magginna gapa i karuan ta audio recording nu mapprepara ira para ta study onu nu mabbibbig ira tu Biblia. Kudda nga makoffun yatun nira tapenu ariadda kuruga matageno nga magitetadday ira.

9. Kunnasi makoffun nikaw i pakistudy?

⁹ Kuammu i ngamin tapenu regular ka nga maka-atende ta study. Mapagaram naka na magigiammum tatun anna mas makilalam paga i wawwaragi. (Heb. 10:24, 25) Kinagi ni Massiel nga nakagi ganguri: “Maski nu minappasirang ngà, kingnguà i ngamin nga mawayyà tapenu makistudy anna makkomento. Yayya nga natageno ku nga parte ngà na kongregasion.”

10. Ngatta importante nga makikkoffun ittam ta matalo ira nga Cristiano?

¹⁰ Makikkofun ta matalo ira nga Cristiano. Makikkofukka ta wawwaragi ta kongregasion megafu ta egga i magigiammum nira, maski  yuri ira ariammu ka-edad onu tanakuan i kulturada. Kagian nittam na Biblia nga i sirib ay “egga ta manakam ira.” (Job 12:12) Aru gapa i magigiammu na mannakam ta mabbing ira. Arayyu nga mas abbing si David anne kani Jonatan, ngem nabbalin lagapa ira tu madukko nga makkofun. (1 Sam. 18:1) Nakkaduffun si David anna si Jonatan tapenu passerbian si Jehova maski nu aru i kapurueba. (1 Sam. 23:16-18) Kinagi ni Sister Irina nga magitetadday nga Saksi ta familiada: “Gittana magana onu wagi tam i kapangngurug tam ira. Mawayya ira nga usan ni Jehova tapenu mabbalin tu kafamilia nga kawagattam.”

11. Anni i mawag nga kuattam tapenu mapeggattam tu madukko nga kofun?

¹¹ Ari tu mabi i magaleg tu bagu nga kofun, mas ngana nu minappasirakka. Minappasirang si Sister Ratna anna nakannammuanna i kinakurug maski nu nakokkontra yayya. Kinagina: “Ammù nga kawagakku i uffun na wawwaragi.” Kurug tu mariga nga ikagi ta tadday nga wagi i mataga-tageno mu. Ngem nu kuammu yatun, mas maddukko kamu. Kayà naka pagaramman anna uffunan na kokkofummu, ngem mawag nga ikagim nira nu kunnasida makua yatun.

12. Kunnasi nga makoffun i ministerio tapenu makaleg tam tu mapia nga kokkofun?

¹² I tadday ta pinakamakasta nga makua tam tapenu makaleg tu kofun ay mallayyagayya kavulu i wawwaragi. Kinagi ni Carol nga nakagi ganguri: “Aru i nabbalin tu mapia nga kofukku megafu ta pakikavulu ku ta sister ira ta ministerio anna karuan paga nga teokratiko nga aktibidad. Aru nga dagun nga inuffunannà ni Jehova. Inusana yaw ira nga kokkofukku.” Kanayun nga pammakapianattam nu makikkofun ittam ta matalo ira nga Cristiano. Usu-usan ira ni Jehova tapenu labanan i pakkafi na nono, gitta na pakatageno nga magitetadday ka.​—Prov. 17:17.

13. Anni i makua na kada tadday ta kongregasion?

¹³ Egga i makua na ngamin tapenu makka-iddu-iddu anna memammo i kongregasion, anna awan tu makatageno nga napagurayan yayya. (Juan 13:35) Makapagaram ta tanakuan i kukukuan anna kakkagiattam! Kunnaw i kagian na tadday nga sister: “Turi ta nakannammuakku i kinakurug, nabbalin tu familià i kongregasion. Ari ngà nakuan nabbalin tu Saksi ni Jehova nu awan tu uffun na wawwaragi.” Kunnasim mepatageno turi ira ta tattaddeda nga Saksi ta familiada nga iddukan ira na wawwaragi ta kongregasion?

14. Kunnasi ittam mabbalin tu mapia nga kofun ta bagu ira ta kongregasion?

¹⁴ Makikkofun ta bagu ira ta kongregasion. Makua tam yatun nu alawatattam ira. (Roma 15:7) Ngem ariattam laman ira basta kumustan. Kayà tam nga mabbalin tu mapia nga kofun ta nira ta pappasa na tiempo. Yatutta mabbalikka nakuan tu masippo anna ipasingammu nga talaga ikavurungammu i bagu ira. Alippawatammu nu anni talaga i problemada ngem irespetom i pribadu nga pattoleda. Baka marigatan i karuan nga ikagi i talaga mataga-tagenoda, yatutta ariammu ira pilitan nga ikagi yatun. Masippo anna mataktika lallagu nga makkiavu anna mapasensia nga magginna ta tabbagda. Angngariganna, awayyam iyavu nu kunnasida nakannammuan i kinakurug.

15. Kunnasi moffunan na manakam ta espiritual i tanakuan ta kongregasion?

¹⁵ Mapatuyag i pangurug na ngamin ta kongregasion nu ikavurungattam i kataggi-tadday, mas ngana nu elder anna manakam ta  espiritual i magangngua taw. Kinagi ni Melissa nga pinadakal na yenana ta kinakurug: “Dakal i pappabalo ku ta brother ira nga nabbalin tu gittana yamà. Kanayun nga egga i tiempoda para nio anna talaga ikavurungaddà. Kada egga i kayà ku nga kagian, kanayun nga egga i magginna niakan.” Natageno gapa na kabataan nga si Brother Mauricio nga magitetadday yayya turi ta nabbalin tu inactive i nangi-Bible study nisa. Kinagina: “Nipasingan na elder ira nga talaga ikavurungaddà anna napakaru i neyuffudda niakan. Kanayuddà kibbidan. Vulunaddà ta ministerio, mangibillay ira niakan tu espiritual nga minas ta pappersonal study-da, anna maggarayakkami lagu paga.” Parehu ngana nga massesserbi ta ngamin tiempo si Melissa anna Mauricio.

16-17. Anni paga i makua tam tapenu moffunan i tanakuan?

¹⁶ Manguffun ta praktikal. (Gal. 6:10) “I kurug, mas maappresiam i simple laman nga uffun nga talaga kawagammu,” kunni Leo nga massesserbi bilang misionero ta nasion nga arayyu ta familiana. “Meraddammakku turi ta naaksidente ngà, grabe i stress ku ta pallabbe ku. Tapus inimbitanà na tadday nga magatawa ta baleda tapenu kuman. Kakku manono nu anni i kinnammi, ngem manono ku i uffudda anna i pagginnada nio yatutta nappipia i panageno ku!”

¹⁷ Magenjoy ittam ngamin ta teokratiko ira nga aktibidad, gitta na asembli anna kombension, megafu ta makavulu tam i wawwaragi anna maka-istoria tam ira meyannung ta programa. Ngem kunni Carol nga nakagi ganguri: “Matageno ku nga magitetadday ngà nu asembli anna kombension.” Ngatta? “Maski nu napalevutan ngà tu ginatu onu rinivu nga wawwaragi, kanayun nga mabbiriko i makkafamilia. Nu masingakku ira, mas matageno ku nga magitetadday ngà.” Marigatan gapa i karuan ta ollu nga pagatendeda ta kombension onu asembli kabalidda nga natayan tu atawa. Egga kari i kilalam nga kunnatun i situasionna? Ngatta ariannu yayya imbitan na familiam ta tumunug nga asembli onu kombension?

18. Kunnasi tam meyaplika i 2 Corinto 6:11-13 nu mamadulo ittam?

¹⁸ Makikavulu ta tanakuan. Ivulu mu i nadduruma  nga wawwaragi ta pattaraddenu, mas ngana danuri makatageno nga magitetadday ira. Kayà tam nga ‘vukatan tu mapia i giffutuattam,’ mas ngana ta kunnatun nga totolay. (Bibbigan i 2 Corinto 6:11-13.) “Talaga magayayya ittam nu imbitan ittam na wawwaragi ta baleda kavulu na familiada onu mappasiar kavulu ira,” kunni Melissa nga nakagi ta gafu. Egga kari i kakongregasiommu nga awayyam ivulu ta kunnatun?

19. Anni ira nga tiempo i talaga maappresia na kapangngurug tam nu makikavulu ittam nira?

¹⁹ Awayyana nga egga ira i tiempo nga talaga maappresia na wawwaragi tam nu makikavulu tam nira. Marigatan i karuan nga makikavulu ta ari Saksi nga kafamiliada nu egga i selebrasion na mundo. Kuruga maraddam gapa i karuan ta fetcha ira gitta na anibersario na patay na iddeddukadda. Nu makikavulu ittam ta wawwaragi nga meparubang ta kunnatun ira nga mariga nga problema, mepasingattam nga kurug i ‘pangikavuruttam’ nira.​—Fil. 2:20.

20. Kunnasi makoffun i kinagi ni Jesus ta Mateo 12:48-50 nu matageno tam nga magitetadday ittam?

²⁰ Napakaru i rason nu ngatta matageno na Cristiano ira nga gittana magitetadday ira nu karuan. Ngem ariattam nakuan vuluvuga kattaman nga ammu ni Jehova i mataga-tageno tam. Kanayun nga usanna i wawwaragi tapenu uffunan ittam. (Bibbigan i Mateo 12:48-50.) Yatutta mepasingattam kani Jehova nga talaga mappabalo ittam ta kongregasion nu kuattam i ngamin nga mawayya tam tapenu uffunan i wawwaragi. Maski nu anni i mataga-tageno tam, ari ittam nga magitetadday megafu ta kanayun nga kavulu tam si Jehova!