1. Anni i kingngua ni Jehova para ta kada tadday nittam?

NIYARANNI ni Jehova i kada tadday nisa. (Juan 6:44) Anni i kayà kagian natun? Nonopammu yaw: Ta binillion nga totolay taw ta mundo, nabibbig ni Jehova i futum. Ammuna nga mawayyam yayya nga ayatan anna nabalor ka nisa. (1 Cro. 28:9) Ammammu naka ni Jehova, malippawa naka, anna ayatan naka. Talaga makapasikan yatun!

2. Anni nga ilustrasion ni Jesus i mangipasingan nga importante kani Jehova i kada karneruna?

² Kuruga ikavurungan naka ni Jehova kunne na gapa i ngamin nga kapangngurug mu. Tapenu matindiattam yaw, nikumpara ni Jesus si Jehova ta tadday nga pastor. Nu mawawan i 1 ta 100 nga karneru, anni i kuan na pastor? “Magga panawan na i siam-ma-fulu-siam ta appastoran, anna en-na nga aleran i tadday nga nawawan.” Sonu maleganna ngana yatun, ari yayya nga makaporay, nu ari, magayayya yayya. Anni i punto? Importante kani Jehova i kada karneru. Kinagi ni Jesus: “Kunnatun gapa i Yama nu ta langi. Arian na nga ikaya tu mawawan i maski tadday laman toye ta abbing ira.”​—Mat. 18:12-14.

3. Anni i gigiammuattam taw nga artikulo?

³ Magga manaki tam nga makkafi i nono na wawwaragi tam megafu nittam. Anni gafu i kuattam tapenu ari nga mesiddukal i tanakuan? Anni gapa i kuattam nu egga i nakataki nittam? Matabbag yatun taw nga artikulo. Ngem ammuattam labbi i meyannung ta “abbing ira” nga nakagi ta Mateo kapitulo 18.

4. Sinni i “abbing ira”?

⁴ Tukuyan na “abbing ira” i ngamin nga disipulos ni Jesus. Maski nu anni paga i edadda, “kagitta na abbing” i ngamin nga  disipulos ni Jesus megafu ta sigga-paran ira nga mappetuddu nisa. (Mat. 18:3) Maski nu nadduruma i naggafuadda, i kulturada, anna i personalidadda, mangurug ira ngamin kani Jesu-Cristo. Kuruga ayatan gapa ira ni Cristo.​—Mat. 18:6; Juan 1:12.

5. Anni i matageno ni Jehova nu isiddukal onu takitan na maski sinni i tadday ta totolena?

⁵ Nabalor kani Jehova i ngamin nga “abbing ira.” Tapenu malippawa tam i mataga-tagenona, nonopattam i mataga-tageno tam para ta abbing ira. Nabalor ira nittam. Kayà tam ira nga protektan gafu ta mas makafi ira anna kurang i ekspiriensa anna siribda kumpara ta adulto ira. Manaki tam gapa nga masingan nga matakitan i maski sinni anna mas ngana nga makaporay ittam nu abbing i matakitan. Kunnatun gapa si Jehova. Kakayàna ittam nga protektan anna makaporay yayya nu isiddukal onu takitan na maski sinni i tadday ta totolena!—Isa. 63:9; Mar. 9:42.

6. Segun ta 1 Corinto 1:26-29, kunnasi nga imammatan na mundo i disipulos ira ni Jesus?

⁶ Ngatta makagi tam paga nga kagittana “abbing ira” i disipulos ni Jesus? Sinni kari i importante taw nga mundo? Ari kari nga i mariku, i sikat, anna i egga autoridadna? Ngem ari tu kunnatun i disipulos ni Jesus, yatutta tagibadditan ira na mundo nga gittana “abbing ira.” (Bibbigan i 1 Corinto 1:26-29.) Ngem ari tu kunnatun i pagimamma ni Jehova ta nira.

7. Anni i kayà ni Jehova nga pattratu tam ta wawwaragi tam?

⁷ Ayatan ni Jehova i ngamin nga aripanna maski nu bagu laman ira nga masserbi nisa onu nabayag ngana ira ta kinakurug. Importante kani Jehova i ngamin nga wawwaragi tam yayya nga importante nakuan gapa ira nittam. Ariattam nakuan nga pilian nu sinni laman i ‘ayatattam ta wawwagi tam ta angngurug.’ Mawag tu ayatattam ira ngamin. (1 Ped. 2:17) Kuattam nakuan i adde na mawayya tam tapenu protektan i wawwaragi tam anna ipasingan nga ikavurungattam ira. Nu nammuattam nga natakitan onu nallussaw i tadday nga wagi nittam, ari nakuan tu gittana awan tu nesimmu, tapus kagiattam nga minassinti yatun nga wagi anna mawag tu kattamanna ngana laman i nesimmu. Ngatta kari ta mallussaw i karuan nga wawwaragi tam? Awayyana nga alalinno i anningadda ta baggida megafu ta nikapadakalda. Bagu gapa i karuan ta kinakurug yayya nga kadda paga ammu nu kunnasi nga pakoman danuri nakataki nira. Ngem maski anni paga i rason, kuattam nakuan i adde na mawayya tam tapenu metoli i imammo. Ngem kunnasi gapa nu kanayun nga mallussaw i tadday nga wagi? Mawag tu akseptanna gapa nga egga i marake nga ugali nga mawag tu ulianna. Kuanna nakuan yatun tapenu magayayya yayya anna makasta i pakikavuluna ta wawwaragi.

8. Anni nga ugali i nanginfluwensia ta disipulos ni Jesus?

⁸ Ngatta kinagi ni Jesus i meyannung ta “abbing ira”? Kunnaw gare i niyavu na disipulosna nisa: “Sinni i mekwenta tu katannangan tu paddian ta Pammagurayan ta langi?” (Mat. 18:1) Tatun nga tiempo, kuruga importante ta aru nga Judio i posision anna ranggo. Kunnaw paga i kagian na tadday nga iskolar: “I pangidayaw na tanakuan anna i pabbalin tu sikat i pinaka-importante ta pattoleda.”

9. Anni i mawag nga kuan na disipulos ni Jesus?

⁹ Ammu ni Jesus nga mawag nga mappursigi i disipulosna tapenu malsada i appana-panono nga mas malalaki ira anne ta tanakuan. Negamu gare yatun nga appana-panono ta kultura na Judio ira. Yatutta kinagina nira: “Yuri i katannangan tu paddian ay mabbalin  tu kagitta na i kabbingan, anna i mammaguray ay yaya i masserbi.” (Luc. 22:26) Mabbalin nga gittana sittam “i kabbingan” nu ‘ipay tam nga kanayun ta nono tam tu mas mapia i karuan ira nga totolay anne nittam.’ (Fil. 2:3) Nu kunnatun i kuattam, ariattam mesiddukal i tanakuan.

10. Anni nga tabarang ni Pablo i mawag nga ipafutu tam?

¹⁰ Magga egga ira i gannug nga mas malalaki i wawwaragi anne nittam. Mabi tam laman nga masingan yatun nu maffokus ittam ta makasta nga kualidadda. Ipafutu tam nakuan i tabarang ni apostol Pablo ta taga-Corinto ira: “Sinni kari i nangngua nikamu tu mas atannang anne ta karuan nga totolay? Ari kari tu i Dios i nangiyawa nikamu ta ngamin nga egga nikamu? Ngatta gafu ta mappara-parayag kamu nga kagitta na ari tu regalu na Dios ngamin i egga nikamu?” (1 Cor. 4:7) Ibita tam nakuan nga sittam i dayawan na totolay onu nonopan nga mas atannang ittam anne ta tanakuan. Nu medayaw i tadday nga brother nga malalaki nga mappalappa onu i sister nga mabi laman nga makegafu tu Bible study, kanayun nakuan nga iyawada i dayaw kani Jehova.

11. Anni i magigiammu tam ta ilustrasion ni Jesus meyannung ta patul anna ta dorobanna?

¹¹ Kabalin nga sinabarangngan ni Jesus i tagatuttulna ira nga ariadda isiddukal i tanakuan, niyawana i ilustrasion meyannung ta patul anna ta dorobanna. Daka-dakal i gatu na doroban anna arianna vuluvuga mapagan yatun. Ngem ari ngana nga nipapaga na patul yatun nga gatuna. Ngem turi ta nasimmuanna i kavuluna nga doroban nga nakagatu nisa, nipapagana yatun maski nu arayyu nga mas baddi i gatuna. Ta lussaw na patul, nipefukuna yatun nga doroban nga awan tu allona. Anni i magigiammu tam tatun? Kunnaw i kinagi ni Jesus: “Kunnatun gapa noka i kuan na Yamà ta langi ta kataggi-tadday nikamu nu ari nga napafutu i pamakoma nu ta wagi nu nga makaliwa nikamu.”​—Mat. 18:21-35.

12. Kunnasi tam nga matakitan i tanakuan nu ariattam ira pakoman?

¹² Ari laman tu i doroban i naperwisiu ta kingnguana. Naperwisiu gapa i tanakuan. Ollu, naperwisiu i kavuluna nga doroban ta awan tu allo nga ‘nipafukuna yayya adde ta mapaganna i gatuna.’ Mekadua, “ta pakasingan na karuan nga doroban taw nga nesimmu, nepallo i lussaw da” anna natakitan ira. Kunnatun ittam gapa. Mafektan i tanakuan ta kukukuattam. Nu egga i nakataki nittam tapus manaki tam yayya nga pakoman, anni i mesimmu? Ollu, matakitattam yayya megafu ta ariattam yayya nga pakoman, pansinan, anna ayatan. Mekadua, ari nga komfortable i kakongregasiottam ira nu mapansidda nga egga i ariattam nga pakkarantindian tatun nga tolay.

13. Anni i magigiammum ta ekspiriensa na tadday nga payunir?

¹³ Mammakapia ittam anna i tanakuan nu pakomattam i wawwaragi tam. Kunnatun i naekspiriensa na payunir nga ngaganattam tu Crystal. Natakitan yayya na tadday nga sister nga kakongregasionna. Kunnaw i niyistoriana: “Nu karuan, gittana mabigaran ngà megafu ta mataka-taki i kakkagianna. Manaki ku yayya nga makavulu ta ministerio. Awan ngana tu ganas ku nga mallayyagayya anna ari ngà ngana magayayya.” Natageno ni Crystal nga puede nakuan nga mattaki i nonona ngem arianna nga nipamavulun yatun anna arianna gapa nikakkabbi i baggina. Niyaplikana i tabarang na Biblia nga nabibbigna ta artikulo nga “Magpatawad Mula sa Iyong Puso” ta Oktubre  15, 1999 nga isyu na Ang Bantayan. Pinakoma ni Crystal yatun nga sister. Kinagina: “Nanono ku nga mappursigi ittam ngamin nga manguli, anna kagaggaw ittam nga pakoman ni Jehova. Yatun ta nalappawan ngà anna magayayya ngà ngana uli.”

14. Segun ta Mateo 18:21, 22, ta anni nga narigatan si Pedro anna anni gapa i magigiammum ta nitabbag ni Jesus?

¹⁴ Ammu tam nga mawag tu mamakoma ittam ta yatun i fustu nga kuattam. Ngem baka marigatan ittam. Natageno gapa yatun ni apostol Pedro. (Bibbigan i Mateo 18:21, 22.) Anni i makoffun nittam? Ollu, pannonopammu i pinamakoma nikaw ni Jehova. (Mat. 18:32, 33) Ari ittam nga mepangngo tatun ngem sigga-paran yayya nga pakoman ittam. (Sal. 103:8-10) Fuera paga tatun, “mawag tu makka-aya-aya ittam gapa.” Ariattam gafu puede nga pilian nu pakomattam i wawwaragi tam onu ari. Obligasiottam nga pakoman ira. (1 Juan 4:11) Mekadua, pannonopattam nu anni i mesimmu nu mamakoma ittam. Moffunattam i nakataki nittam, mattaradday i kongregasion, maprotektan i pakikkofuttam kani Jehova, anna makkasta i panageno tam. (2 Cor. 2:7; Col. 3:14) Pinaka-importante, makimallo ittam kani Jehova ta yayya i mangikiddaw nga mamakoma ittam. Ariattam nakuan ipamavulun nga daralan ni Satanas i imammo ta unag na kongregasiottam. (Efe. 4:26, 27) Kawagattam i uffun ni Jehova tapenu ari ittam nga mataga tatun nga silu ni Satanas.

15. Segun ta Colosas 3:13, anni i kuattam nu sobra nga natakitan ittam ta kingngua na wagi tam?

¹⁵ Anni i kuammu nu sobra i taki na kingngua nikaw na kapangngurug mu? Kuammu nakuan i adde na mawayyam tapenu mattalupaddian i imammo. Ikagim kani Jehova i mataga-tageno mu. Ikiddom nisa nga uffunanna i nakataki nikaw anna mappoffukka gapa  nisa tapenu masingammu i makasta ira nga kualidad natun nga tolay—kualidad ira nga kakayà ni Jehova nisa. (Luc. 6:28) Nu ariammu nga mapalampas i kingngua na wagi nikaw, nonopammu nu kunnasim yayya kibbidan. Makasta nu kanayummu nga nonopan nga arian naka nga sadya nga tinakitan. (Mat. 5:23, 24; 1 Cor. 13:7) Tapus sonu kibbidammu ngana yayya, ariammu nga mannono tu maski anni nga marake meyannung nisa. Ngem kunnasi nu manakina i makippakoma? ‘Pasa-pasensiammu’ lagapa i wagim. (Bibbigan i Colosas 3:13.) Tapus yaw i pinaka-importante nga kuammu: Ari ka nakuan nga mangipappan tu taki na nono ta daralan natun i pakikkofummu kani Jehova. Ari ka nakuan vuluvuga mappesiddukal tapenu mapakurug mu nga ayatammu si Jehova anne ta maski sinni.​—Sal. 119:165.

16. Anni i responsibilidad na kada tadday nittam?

¹⁶ Kuruga mappabalo ittam ta mattaradday ittam ta passerbi kani Jehova bilang “tattadday nga kural” ta pangirollu na “tattadday nga mappastor”! (Juan 10:16) Kunnaw i kagian na libru nga Organisado Upang Gawin ang Kalooban ni Jehova ta pahina 165: “Megafu ta mammakapia ka tatun nga pattaradday, egga i responsibilidad mu nga pattalupaddianan yatun.” Yayya nga “sanayattam i baggi tam nga imammatan i wawwaragi tam nga kunna pagimamma ni Jehova nira.” Para nisa, nabalor ittam ngamin maski nu “pakallallo” ittam. Kunnatun kari gapa i pagimamma mu ta wawwaragim? Masingi-singan anna appresian ni Jehova i ngamin nga kukukuammu tapenu uffunan anna tangngallan ira.​—Mat. 10:42.

17. Anni i igakkag tam nga kuan?

¹⁷ Ayatattam i kapangngurug tam ira. Yayya nga ‘igakkag tam tu awan vuluvuga tu kuattam nga kesiddukallan na wagi tam onu katagatanna ta katagarulian.’ (Roma 14:13) Imammatattam nakuan i wawwaragi tam nga mas atannang nittam anna napafutuan nga pakomattam ira. Ari ittam nakuan mappesiddukal ta maski sinni anna “igakkag tam nga kuan i ganna-gannug ira nga makeyawa ta imammo anna mamasikan ta angngurug na kataggi-tadday.”​—Roma. 14:19.