Neyana ngà turi ta Mayo 19, 1940, ta ili na Amioûn, Lebanon. Nappasa i piga ragun, nagali i familia mi ta siudad na Tripoli. Minaggiddu anna magayayya i familia mi. Ammammu mi anna iddeddukammi si Jehova nga Dios. Sò i burido ta nikami nga lima nga mawwaragi, nu sitaw tallu i babay anna dua i lalaki. Ari tu i pagaleg tu kuartu i pinaka-importante ta magana ku. Pinaka-importante ta nikami i paggigiammu tu Biblia, pagatende ta study ira, anna panguffun ta tanakuan tapenu makannammuadda i Dios.

Aru i nazelugan ta kongregasiommi. Tadday nira si Brother Michel Aboud nga mangikondukta ta paggigiammu tu Biblia na kongregasiommi. Nakannammuanna i kinakurug ta New York tapus yayya i ollu nga nallayyagayya ta Lebanon turi ta 1921. Manono ku paga nga irerrespetona anna uuffunanna i dua nga mabbing nga sister nga naggradua ta Gilead School, da Sister Anne anna Gwen Beavor. Nabbalin ira tu madukko nga kokkofummi. Tapus aru nga dekada i nappasa, kitessaya ngà ta nasingakku uli si Anne ta United States. Tapus nasingakku gapa uli si Gwen nga neyatawa ngana kani Wilfred Gooch anna massesserbi ira ta Bethel ta London, England.

Baddi laman i Saksi ta Lebanon ta kabbikku. Ngem matalikarag nga ilayyagayya mi ta tanakuan i nagigiammu mi ta Biblia. Kingngua mi yatun maski nu kokkontran kami na karuan nga lider na relihion. Egga ira i nesimmu nga ariakku makattaman.

Mittan, nallayyagayya kami na manang ku nga si Sana ta tadday nga apartment. Turi ta maddaggun nga egga i kibbidammi, gavva nga egga i tadday nga pari. Awayyana tu egga i nagagal nisa. Ininsulto natun nga pari i manang ku. Megafu ta vayolente ngana yayya, nitubbana si manang ku nga Sana ta addang yatutta nadisgrasia yayya. Egga i timmawag ta pulis tapus zimittal ira anna siniguraduda nga egga i mangurag kani manang ku nga Sana. Niyangeda ta istasion na pulis i pari tapus nammuadda nga egga balo i palattugna. Niyavu na hepe na pulis ta pari: “Anni ka kari talaga? Lider na relihion onu lider na gang?”

Egga paga i nesimmu nga ariakku vuluvuga makattaman. Mittan, nirentan na kongregasiommi i tadday nga bus mappange ta ili nga arayyu ta siudad tapenu mallayyagayya kami tari. Makasta bi i pallayyagayya mi ngem turi ta nakannammuan na pari tari i kukukuammi, nagagal yayya tu aru nga tolay tapenu atakeyaddakami. Pinatakitadda kami anna binara-barag dakami. Yayya nga nabigaran i yamà. Nasingakku nga napannu ngana tu daga i muka na yamà. Nanoli yayya ta bus kavulu i yenà tapus ziminaddakkami gapa ngamin. Mavuru-vurukkami. Ngem ariakku vuluvuga makattaman i kinagi na yenà turi ta pakarenuanna i bigag ni yamà. Kinagina: “Jehova, pakomammu ira ta ariadda ammu i kukukuadda.”

Mittan binisita mi i familia mi ta lugar nga nikeyanakakku. Nakilala mi ta balay ni kakè i tadday nga obispo nga prominente ta diammi. Ammuna nga Saksi ni Jehova i magana ku ira. Maski nu annam pagalaman i dagukku, pinasiranannà. “Siko nga abbing,” kunna, “ngatta ari ka paga nappabinyag?” Kinagì nisa nga abbing ngà pagalaman anna mawag tu maggigiammu ngà paga tu Biblia anna pasikannakku i pangurug ku. Kalussona i nitabbag ku nisa, yayya nga kinagina ta kakè nga awan tu respetò.

Ngem tallutaggi laman i kuddanatun nga marake nga ekspiriensa. Mas magaru ta Lebanese ira i minakkikofun anna minammadulo. Yatutta aru i naka-uvovug mi meyannung ta Biblia anna aru ta nira i na-Bible study mi.

Turi ta magiskuela ngà paga, egga i nabbisita ta Lebanon nga kabataan nga brother maggafu ta Venezuela. Nakikkistudy yayya nikami tapus inayana i manang ku nga si Wafa. Nakkasal ira tapus naddian ngana ira ta Venezuela. Turu-turakan nakami na manang ku nga si Wafa anna kukkumbinsianna si yamà nga magali kami ngana ta Venezuela ta kuruga kakanappan nakami ngana. Nakumbinsi gabbalaman i yamà yayya nga nagali kami tatun nga nasion.

 Zimittal kami ta Venezuela turi ta 1953 anna naddiakkami ta Caracas aranni ta palasio na presidente. Megafu ta abbing ngà pagalaman, kakayà ku nga abangan i pattalebag na presidente nga nu mittan ay agga-takay ta mangini-ngina nga kotchena. Narigatan i magana ku nga makibagay ta bagu nga nasion, lengguahe, kultura, makan, anna klima. Kakuruganna, turi ta mamepegafu pagalaman ira nga masanay, egga i marake nga nesimmu.

Nattaki i yamà. Ariammi nga inekspekta yatun ta masikan anna magawa-gawayyan yayya nga tolay. Ari paga yayya vuluvuga nga nattaki. Ngem kinagi na doktor nga egga i cancer-na ta pancreas yayya nga naopera yayya. Kaddaraddam ta tanga-ligguan laman i nappasa, natay yayya.

Kakku makagi nu kunnasi kataki yatun nikami. Trese anios ngà pagalaman tatun nga tiempo. Nakaddagakkami ta nesimmu. Abbo mi tu ari kami ngana mabbalin tu magayayya uli. Nabayag nige nga naaksepta na yenà nga awan ngana i atawana. Ngem mawag tu itulu-tuloy mi lagapa i pattolemi. Ta uffun ni Jehova, nakapagattam kami. Turi ta 16 anios ngà ngana, naggradua ngà ta haiskul ta Caracas. Kakayà ku ngana talaga nga uffunan ta finansial i familia mi.

Nakitawa gapa si manang ku Sana kani Brother Rubén Araujo nga nanoli ta Venezuela kabalinna nga naggradua ta Gilead. Dinesisiodda nga magali ta New York. Dinesision gapa na familia mi nga magiskuela ngà ta unibersidad ta New York, nu sitaw makipaddian ngà kani manang ku Sana anna ta bayaw ku. Daka-dakal i neyuffudda ta papprogresò ta espiritual. Aru gapa i nammammù nga manakam ta espiritual nga brother ta Brooklyn Spanish congregation. Kasali tatun da Brother Milton Henschel anna Frederick Franz nga parefu nga Bethelite ta Brooklyn.

Ta paf-first year college ku ta unibersidad ta New York, ninono ku nu anni i kukukuakku ta pattolè. Binibbig ku ta Passifusifutan i meyannung ta Cristiano ira nga egga i goal-da ta passerbi kani Jehova anna pinannonopakku danatun tu mapia. Nasingakku gapa nga magayayya i payunir anna Bethelite ira ta kongregasiommi anna kakayà ku nakuan nga mabbalin tu kagittada. Ngem ari ngà paga bawtisadu. Nanono ku nga mawag tu idedikà i pattolè kani Jehova. Kingnguà yatun anna nappabawtiso ngà turi ta Marso 30, 1957.

Kabalikku nga nabawtisowan, kayà ku gapa i mappayunir ngem ammù tu marigatan ngà. Kunnasì tamma nga mapaggiddan i pappayunir ku anna i pagiskuelà ta unibersidad? Nakkatutura kami na familià ta Venezuela anna nipakanawag ku ta yenà anna ta wawwaragì i desisiokku nga iyemmang ngana i pagiskuelà ta unibersidad. Manoli ngà ngana ta Venezuela anna mappayunir tari.

Nanoli ngà ta Caracas turi ta Hunio 1957. Ngem masingakku nga marigatan ta finansial i familia mi. Kawagadda i tadday paga nga magaleg tapenu masuportan i pakawagammi. Kunnasi  ngà tamma makoffun? Neyofer nio i trabahu ta bangku ngem kakayà ku gapa i mappayunir. Yatun mabba talaga i rason nu ngatta nanoli ngà. Yayya nga determinadu ngà nga paggiddanan yatun. Piga ragun gapa nga nattrabahu ngà tu full time anna payunir ngà gapa. Busy ngà kanayun ngem magayayya ngà gapa!

Mas paga nga nagayayya ngà turi ta nakilalà anna inatawà si Sylvia nga tadday nga guaguapa nga German nga sister anna kuruga ayatanna si Jehova. Nagali yayya ta Venezuela kavulu i maganana. Dua i nabbalin tu ána mi, si Michel (Mike) anna si Samira. Sakan ngana gapa i nanangngaw ta yenà anna naddian ngana yayya nikami. Maski nu niyemmakku i pappayunir megafu ta obligasiokku ira ta familià, ariakku lagapa nawawan i espiritu na payunir. Nu posible, magauxiliary payunir kami ni Sylvia kada bakasion.

Magiskuela paga i ána ku turi ta nesimmu i niyistorià ta gafu. Aminakku nga makasta i pattolemi anna irerrespetonà na kakavvulu ku ta bangku. Ngem mas kayà ku nga aripan ni Jehova i paningadda niakan. Agga-nono ku nu anni i kuakku tapenu kunnatun nakuan i paningan nio na kakarrubà. Yatutta nabbidammi na atawà i finansial nga situasion na familia mi. Nu mar-resign ngà ta bangku, makalawa ngà tu dakal nga separation pay. Megafu ta awan mabba tu gatu mi, nanono mi nga nu mappasimple kami ta pattolay, makalanno i kuartu mi ta pappasa na aru nga tiempo.

Ari tu mabi yatun nga desision ngem buu i suporta nio na meddu nga atawà anna na yenà, yayya nga nappayunir ngà mana uli. Magaya-ayayya ngà tatun ngem gavva gapa nga egga i nesimmu.

Tadday nga aggaw, kinumfirma na doktor mi nga mavussi si Sylvia. Nakaddagakkami tatun! Magaya-ayayya kami ngem nononopakku i pappayunir ku. Kunnasi tamma nga mafektan yaw nga desisiokku? Naka-adjust kami gabbalaman tatun nga panguli anna iinnaggammi ngana i bagu mangana nga miembro na familia mi. Ngem agga-nono ku lagapa nu makapappayunir ngà paga.

Kabalimmi nga pinaguruvovugan i addetammi ira, naddesisiokkami nga kuammi lagapa i ollu nga plano mi. Neyana i ana mi nga si Gabriel turi ta Abril 1985. Ngem nar-resign ngà ta bangku anna narregular payunir ngà mangana turi ta Hunio 1985. Ta pappasa na tiempo, nakkapribilehio ngà nga mabbalin tu miembro na Branch  Committee. Ngem ari tu ta Caracas i dian na ofisina, yayya nga mabbiahe ngà tu dua onu tallu nga aggaw kada ligguan nga 80 kilometro i distansiana.

Egga ta ili na La Victoria i branch office, yayya nga naddesision i familia mi nga magali tatun tapenu mas aranni kami ta Bethel. Dakal nga desision yatun. Talaga appresiakku i passakrifisio na familià. Dakal nga uffun nio i suportada. Sigga-paran paga lagu i manang ku nga si Baha nga tangngawan i yena mi. Egga ngana atawa na ana ku nga si Mike ngem maddian paga ta balemi da Samira anni Gabriel. Mawag gafu nga panawadda i kokkofudda ta Caracas ta pagali mi ta La Victoria. Sanay gapa i meddu nga atawà nga si Sylvia ta pattolay ta okupadu nga siudad. Yayya nga mawag nga makibagay yayya ta baddi nga ili. Mawag gapa nga masanay kami ngamin nga maddian ngana ta mas baddi nga balay. Talaga dakal i nisakrifisio mi ta pagali mi ta La Victoria maggafu ta Caracas.

Ngem nanguli mana i ganna-gannug. Nangatawa si Gabriel tapus nesina ngana tu balay si Samira. Nembitakkami gapa ni Sylvia nga masserbi ta Bethel turi ta 2007. Magadde sangawe yatun i pribilehio mi. Massesserbi nga elder i kaka mi nga si Mike anna payunir ira dua na atawana nga si Monica. Elder gapa si Gabriel anna massesserbi ira na atawana nga si Ambra ta Italy. Payunir gapa anna remote volunteer ta Bethel si Samira.

Kurug tu aru nga dakal nga desision i kingnguà ta pattolè. Ngem awan vuluvuga tu pabbabawyakku. Kuakku uli danatun nga desision nu kawagan. Dakal i appabalo ku ta napakaru nga annungakku anna pribilehio ta passerbi kani Jehova. Ta nappasa nga daga-ragun, nasingakku nga talaga importante nga kanayun nga maladda i relasiottam kani Jehova. Baddi man onu darakal i desision ira nga kawagan nga kuattam, meyawana nittam i imammo nga “ari malippawa na tolay.” (Fil. 4:6, 7) Enjoy mi gapa ni Sylvia i passerbi ta Bethel anna matageno mi nga binendisionan ni Jehova i desisiommi ira megafu ta kanayummi yayya nga pinagollu ta pattolemi.