1. Anni i nipasiguradu ni Jehova tari ira ta nakaliwa nga mabbabawi?

 MASKI NU si Jehova i Namaratu, Minangngiyawa tu Dorob, anna Hues, yayya gapa i minaggiddu nga Yama tam ta langi. (Sal. 100:3; Isa. 33:22) Nu nakaliwa ittam ta nisa anna kurug ittam nga mabbabawi, ari laman tu egga i pakawayya na nga pakoman ittam. Kakayà na gapa nga kuan yatun. (Sal. 86:5) Meddu nga nipasiguradu ni Jehova gukaban ni profeta Isaias: “Maski nu kagitta na eskarlata i liwi-liwa nu, mapafuraw yatun nga kagitta na niebe.”​—Isa. 1:18.

2. Anni i mawag tu kuattam nu kayà tam i memammo nga relasion ta tanakuan?

² Megafu ta imperfekto ittam, makekagi anna makakua ittam tu gannug ira nga makataki ta tanakuan. (Sant. 3:2) Ngem ari tu yatun i rason tapenu ari ittam ngana nga makiddukko ta nira. Awayya tam lagapa nga kuan yatun nu minammakoma ittam. (Prov. 17:9; 19:11; Mat. 18:21, 22) Nu baddi laman mabba i nakaliwatan na tanakuan ta nittam, kayà ni Jehova nga pakomattam ira. (Col. 3:13) Yatun i makasta nga kuattam megafu ta “dakal i pamakoma” ni Jehova ta nittam.​—Isa. 55:7.

3. Anni i gigiammuattam taw nga artikulo?

³ Taw nga artikulo, gigiammuattam nu kunnasi maparigan na imperfekto nga totolay i pamakoma ni Jehova. Anni ira nga liwa i mawag nga ikagi tam ta elder ira? Ngatta kayà ni Jehova nga pakomattam i tanakuan? Anni i magigiammu tam ta karuan nga wawwaragi nga grabe i efekto ta nira na nakaliwatan na tanakuan?

4. (a) Anni i mawag nga kuan na tadday nga masserbi kani Jehova nu makaliwa yayya tu madammo? (b) Anni i responsibilidad na elder ira nu kibbidadda i nakaliwa?

⁴ Mawag tu mekagi ta elder ira i madammo ira nga liwa. Mabibbig ta 1 Corinto 6:9, 10 i angngarigan ira natun. Mekonsidera nga madammo nga liwa i manawag nga ari pattuppal ta dorob na Dios. Nu nakaliwa tu kunnatun i tadday nga Cristiano, mawag nga makimallo yayya ta Dios nga Jehova anna mawag tu makibbida yayya ta elder ira ta kongregasion. (Sal. 32:5; Sant. 5:14) Anni kari i responsibilidad na elder ira? Si Jehova laman i egga autoridad na nga mangabsuelto ta liwi-liwa. Pinapposible na yatun gukaban na sakrifisio nga tavvu. * Ngem nitalo ni Jehova ta elder ira i responsibilidad nga usan i Katurakan tapenu ammuan nu makapattalupaddian paga ta kongregasion i nakaliwa. (1 Cor. 5:12) Tapenu makua da yatun, mawag tu ammuadda i tabbag taw ira nga pakkiavu: Sinadya na kari i makaliwa? Pinurueban na kari nga itagu i liwa na? Nabayag na ngana kari nga pakakuan yatun? Yaw i pinaka-importante nga ammuadda: Egga kari i ebidensia nga talaga kurug i pabbabawi na? Anni ira i mangipasingan nga talaga pinakoma ngana yayya ni Jehova?​—King. 3:19.

5. Kunnasi nga mabenefisiowan i kongregasion ta kukukuan na elder ira?

⁵ Nu kibbidan na elder ira i nakaliwa, gakkag da nga makangngua tu desision taw ta davvun nga kaparehu na desision nga nakua ngana ni Jehova ta langi. (Mat. 18:18) Kunnasi nga mabbenefisio tatun nga unnug i kongregasion? Ipasiguradu natun nga malsa ta unag na kongregasion danuri nakaliwa nga ari nga mabbabawi nga awayya na nga marake i influwensia da ta nabalor ira nga karneru ni Jehova. (1 Cor. 5:6, 7, 11-13; Tito 3:10, 11) Posible gapa nga makoffun yatun ta nakaliwa tapenu mabbabawi anna mapakoma ni Jehova. (Luc. 5:32) Ipakimallo na elder ira yatun nga mabbabawi anna ikiddoda kani Jehova nga uffunan na yayya nga mammapia ta espiritual.​—Sant. 5:15.

6. Posible kari nga mapakoma i tadday maski nu nadisfellowship yayya? Ipakanawag.

⁶ Ngem kunnasi nu ari nga mabbabawi i tadday turi ta kinibbida ngana yayya na elder ira? Madisfellowship yayya ta kongregasion. Nu egga gapa i krimen nga kingngua na onu niladda na i dob na gobiernu, ari yayya nga ilisi na elder ira ta marake nga resulta na kingngua na. Ipamavulun ni Jehova i gobiernu ira tapenu manentensia anna mangastigo ta maski sinni nga nakaliwa—mabbabawi man yayya onu ari. (Roma 13:4) Ngem sonu manono natun nga tolay nga marake i kingngua na anna mabbabawi yayya tapus manguli, pakoman yayya ni Jehova. (Luc. 15:17-24) Kuan yatun ni Jehova maski nu kitaddammo i liwa natun nga tolay.​—2 Cro. 33:9, 12, 13; 1 Tim. 1:15.

7. Anni i kayà kagian na pakomattam i nakaliwa ta nittam?

⁷ Pia ngana laman ta ari tu sittam i makarresponsibilidad nga maddesision nu pakoman ni Jehova i tadday nga nakaliwa! Ngem egga i tadday nga mawag tu desisionattam. Anni yatun? Baka nakaliwa i tanakuan ta nittam ngem nakidispensa yayya anna nakkiddaw tu pamakoma tam. Kunnasi gapa nu ari yayya nga makippakoma? Awayya tam lagapa nga pilian nga pakoman yatun nga tolay. Kayà na kagian, alsattam ngana i taki na  nono tam anna ari tam ngana mapporay ta nisa. I kurug, mawag i tiempo anna pangikagumattam netallugaring ngana nu fermi ittam nga natakitan. Kagian na Setiembre 15, 1994 nga isyu na Ang Bantayan: “Nu pakomammu i nakaliwa, ari na kayà kagian nga kunsintiammu i kingngua na. Nu mamakoma i tadday nga Cristiano, kayà na laman kagian nga italo na ngana i ganna-gannug kani Jehova. Yayya i matunung nga Hues ta interu uniberso, yatun ta siguraduan na nga malawa tam i hustisia ta mepangngo nga tiempo.” Ngatta kayà ni Jehova nga mamakoma ittam anna mattalo ittam nga yayya ngana i bahala ta hustisia?

8. Kunnasi tam mepasingan i appresasiottam ta allo ni Jehova?

⁸ Pangipasingan tu appresasion i pabbalin tu minammakoma. Ta tadday nga angngarigan, nikumpara ni Jesus si Jehova ta tadday nga patul nga ari na ngana nipapaga i daka-dakal nga gatu na doroban na ta ari yayya makapaga. Ngem ari nga nikallo natun nga doroban i kaparehu na nga doroban nga mas baddi i gatu na ta nisa. (Mat. 18:23-35) Anni i kayà nga ituddu ni Jesus ta nittam? Nu talaga appresiattam i dakal nga allo ni Jehova ta nittam, mapaguyu ittam nga pakoman i tanakuan. (Sal. 103:9) Kunnaw i kinagi na The Watchtower aru dagun ngana i nappasa: “Maski nu mamippiga tam nga pakoman i kasittoletam, ari tam vuluvuga mapantayan i pamakoma anna allo na Dios ta nittam gukaban ni Cristo.”

9. Sinni danuri ikallo ni Jehova? (Mateo 6:14, 15)

⁹ Mapakoma danuri mamakoma. Ikallo ni Jehova danuri minaggallallo. (Mat. 5:7; Sant. 2:13) Magigiammu tam yatun turi ta sinudduan ni Jesus i disipulos na nu kunnasi i makimallo. (Bibbigan i Mateo 6:14, 15.) Kunnatun gapa i magigiammu tam ta kinagi ni Jehova ta aripan na nga si Job. Fermi nga natakitan yatun nga matalo nga lalaki megafu ta makapa-insulto nga kinakkagi da Elifaz, Bildad, anna Zofar. Zinog ni Jehova si Job nga ipakimallo ira. Kabalin nga kingngua yatun ni Job, binendisionan yayya ni Jehova.​—Job 42:8-10.

10. Ngatta marake i pangipappan tu taki na nono? (Efeso 4:31, 32)

¹⁰ Marake i efekto na pangipappan tu taki na nono. Kayà ni Jehova nga alsattam i taki na nono tam tapenu memammo i panageno tam. (Bibbigan i Efeso 4:31, 32.) Kayà na nga ari ittam nga “mavvuru-vurung anna mappoporay.” (Sal. 37:8) Pammakapianattam nu tuttulattam yatun nga tabarang. Sittam lagapa i kakkallo nu mangipappan ittam tu taki na nono. Afektan natun i pisikal anna mental nga gawa-gawayyattam. (Prov. 14:30) Nu mangipappan ittam tu taki na nono, gitta na minum ittam tu poison. Sittam lagapa i maperwisiu, ari tu yari nakataki nittam. Sittam gafu lagapa i mammakapia nu mamakoma ittam. (Prov. 11:17) Mabbalin gare tu memammo i nono anna i futu tam anna metulu-tuloy tam i masserbi kani Jehova.

11. Anni i kagian na Biblia meyannung ta pangibalo? (Roma 12:19-21)

¹¹ Kukua ni Jehova i pangibalo. Ari ittam niddan ni Jehova tu autoridad nga mangibalo nu egga i nakaliwa ta nittam. (Bibbigan i Roma 12:19-21.) I Dios laman i makekagi nu anni i fustu. Ari tam nga makua yatun megafu ta limitadu laman i ammu tam anna imperfekto ittam. (Heb. 4:13) Nu mittan gapa, ari tam ammu nu anni i fustu nga kuattam megafu ta emosiottam. Kunnaw i nipetura ni Jehova  kani Santiago: “I pallussaw ay awan tu meyuffun na ta kaparulo na matunung nga uray na Dios.” (Sant. 1:20) Makasiguradu ittam gafu nga kuan ni Jehova i fustu anna mala tam gabbalaman noka i hustisia.

12. Kunnasi tam mepasingan nga mattalo ittam ta hustisia ni Jehova?

¹² Nu mamakoma ittam, ipasingattam nga mattalo tam ta hustisia ni Jehova. Nu italo tam kani Jehova i ganna-gannug, ipasingattam nga mattalo ittam ta nisa nga pakappian na noka i ngamin nga marake nga efekto na liwa. Ta nipromesa na nga napabagu nga mundo, ‘ari ngana noka manono’ uli i marake ira nga nappasa-pasattam, “ni tu mepafutu paga danatun” uli. (Isa. 65:17) Nu fermi ittam nga natakitan, posible kari nga malsa tam i poray anna i taki na nono tam ta nakataki ta nittam? Ammuattam nu kunnasi nga nakua yatun na karuan.

13-14. Anni i nagigiammum ta ekspiriensa ni Tony anna ni José meyannung ta pamakoma?

¹³ Maski nu mataka-taki i nakua ta karuan nga wawwaragi tam, dinesisiodda nga mamakoma. Anni ira nga bendision i nalawa da megafu tatun?

¹⁴ Aru nga dagun nige nga nabbalin tu Saksi si Tony * nga taga-Pilipinas, nakannammuan na nga pinatay na lalaki nga mangngagan tu José i tadday ta manung na. Tatun nga tiempo, vayolente si Tony anna kayà na nga mangibalo. Megafu tatun nga krimen, nefuku si José. Turi ta napalawan ngana yayya ta affukutan, nigato ni Tony tu patayan yayya. Yari tu giminatang si Tony tu palattug. Turi kua, naki-Bible study yayya ta Saksi ira ni Jehova. Kinagi na, “Habang mab-Bible study ngà, nakannammuakku nga mawag nga uliakku i kata-katolè anna mawag nga alsakku i taki na nono ku.” Ta pappasa na tiempo, nappa-baptize si Tony anna nabbalin yayya tu elder. Imajinammu i reaksion na turi ta nammuan na nga Saksi ngana gapa si José! Turi ta nassingan ira dua, nakkagakko ira anna kinagi ni Tony kani José nga pinakoma na ngana yayya. Niyistoria ni Tony nga ta sobra nga ayayya na, marigatan yayya nga iyesplika nu anni i mataga-tageno na megafu ta pinakoma  na si José. Talaga binendisionan ni Jehova si Tony megafu ta sigga-paran yayya nga mamakoma.

15-16. Anni i nagigiammum ta ekspiriensa da Peter anni Sue meyannung ta pamakoma?

¹⁵ Turi ta 1985, durante nga makistudy ta Kingdom Hall da Peter anni Sue, gavva laman nga egga i masiki-sikan nga passabug. Egga i lalaki nga nangipay tu bomba ta unag na Kingdom Hall! Megafu tatun nga passabug, permanente nga nafektan i paningan anna pagginna ni Sue. Ari ngana gapa yayya nga makagug. * Kanayun nga nononopan da Peter anna Sue, ‘Anni nga klase nga tolay i magangngua tu kunnatun karake nga gannug?’ Pappasa na aru nga dagun, nagafu anna nasentensian nga mefuku ta interu pattolena yari i lalaki nga nangipay tu bomba nga ari tu Saksi. Napakoma ngana kari ni Peter anna ni Sue yatun nga lalaki? Kagiadda: “Nituddu ni Jehova ta nittam nga nu mangipappan ittam tu taki na nono anna mappoporay ittam, afektan natun i pisikal, emosional, anna mental nga gawa-gawayyattam. Yayya nga ta gafu pagalaman, nappoffukkami ngana kani Jehova tapenu malsa danatun nga mataga-tageno mi anna makapattolay kami tu memammo.”

¹⁶ Mabi laman kari para ta nira nga mamakoma? Ari tu kanayun. Istoriadda: “Kada marigi-rigatan si Sue megafu ta marake ira nga efekto nisa na passabug, makaporay kami. Ngem ari mi nga agga-nono yatun, yayya nga mabi laman nga mawawan yatun nga panageno. Kakurugan na, nu mabbalin tu Saksi yari lalaki nga nangipay tu bomba, makagi mi nga magga alawatammi yayya. Nituddu nikami natun nga ekspiriensa nga talaga mapalubbangan ittam nu iyaplika tam i prinsipio ira na Biblia. Mapalubbangan ittam maski ta ganna-gannug ira nga gitta na imposible nga malabanattam! Mabanna-bannayakkami gapa ta ammu mi nga pakappian noka ni Jehova i ngamin nga marake nga efekto na nappasa-pasammi.”

17. Anni i nagigiammum ta ekspiriensa ni Myra meyannung ta pamakoma?

 ¹⁷ Turi ta nabbalin tu Saksi si Myra, egga ngana i atawa na anna dua tu baddi nga ana na. Ngem ari nga nabbalin tu Saksi i atawa na. Turi kua, namabay i atawa na anna pinanawan na ira. Kinagi ni Myra: “Turi ta inabanduna nakami na atawà, natageno ku i mataga-tageno danuri trinaydor na iddeddukadda. Nakaddag ngà, narraddam, nabbabawi, pinaliwa ku i baggì, anna nappoporay ngà.” Nassina ngana ira ngem matakitan lagapa si Myra megafu ta inilloku yayya na atawa na. Kagian na paga: “Piga vulan nga mavuru-vurung ngà anna mataki i nono ku. Ngem na-realize ku nga afektan ngana balo natun i relasiokku kani Jehova anna ta tanakuan.” Makagi ni Myra nga ari ngana yayya nga mappoporay anna ari ngana yayya nga mannono nga egga nakuan i marake nga mesimmu ta dati nga atawa na. Iddanaman na nga duttal nakuan i tiempo nga makilala na dati nga atawa na si Jehova. Makapaffokus ngana si Myra ta mappange. Maski nu single mother yayya, napadakal na i dua nga ana na ta kinakurug. Sangawe, magayayya ngana nga massesserbi kani Jehova si Myra kavulu i ána na anna i giffamiliadda.

18. Ngatta makapattalo ittam ta pamanunnu na Katannangan nga Hues nga si Jehova?

¹⁸ Mappappabalo ittam ta ari tu sittam i makarresponsibilidad ta paddesision nu kunnasi i pamanunnu ta kada tolay! Si Jehova ngana i bahala tatun nga importante nga trabahu ta yayya mabba i Katannangan nga Hues. (Roma 14:10-12) Makapattalo ittam nga kanayun nga nebase i pamanunnu na ta perfekto nga estandarte na ta mapia anna marake. (Gen. 18:25; 1 Pat. 8:32) Ari yayya vuluvuga nga mangngua tu marake!

19. Anni noka i metuppal na perfekto nga hustisia ni Jehova?

¹⁹ Iddanamattam i tiempo sonu pakappian ni Jehova i ngamin nga marake nga efekto na kina-imperfekto anna liwa na tolay. Tatun nga tiempo, permanente ngana nga mammapia i ngamin nga pisikal nga taki kunne na gapa danuri bigag tam ta emosion. (Sal. 72:12-14; Nep. 21:3, 4) Ari tam ngana vuluvuga manono yatun uli. Durante nga innaggattam yatun nga kappagayayya nga tiempo, mappappabalo ittam kani Jehova ta niddan na ittam tu abilidad nga maparigan yayya ta pabbalin tu minammakoma.