“I KINASIPPO na wawwaragi i talaga nakaduffun niakan,” kinagi ni Lisa. * Tuktukuyan na i ollu nga nakala ta interes na ta kinakurug. Kunnatun gapa i natageno ni Anne. Inamin na, “Ta ollu, mas naginteres ngà ta kinakurug megafu ta masippo i Saksi ira, ari tu gafu ta ituttuddu da.” Sangawe, parefu nga enjoy da ngana nga bibbigan i Biblia anna pannonopan yatun, ngem dakal i efekto ta nira na kinasippo.

Kunnasi tam mepasingan i kinasippo nga makatukkal ta futu na totolay ta pallevu tam? Gigiammuattam i dua: gukaban na zila anna gukaban na annangngua tam. Tapus ikonsidera tam nu sinni nakuan i pangipasingannattam tu kinasippo.

I mapia nga atawa nga babay nga mabibbig ta Proverbio kapitulo 31 ay egga ta zila na “i dob na kinasippo.” (Prov. 31:26) Ipamavulun na nga yatun nga “dob” i makafekto ta kakkagian na anna ta tono na pakkagi na tatun. Egga nakuan gapa ta zila na yama ira yatun nga “dob.” Aru nga magana i makannammu nga negatibo i efekto ta ána da nu makkukkulle i pabbida da. Nu bastus gare anna awan tu konsiderasion na pakibbida na magana, magga ari nga magginna i ána da. Tapenu gafu ginnan ira na ána da, ikaguman nakuan na magana ira nga mabbida tu masippo.

Magana ka man onu ari, kunnasim makontrol i zilam tapenu maguvovug tu masippo? Egga i magigiammu tam ta ollu nga parte na Proverbio 31:26: “Masingan i sirib ta kakkagian na.” Nelavu tatun i masirib nga pappili nu anni i kagiattam anna i tono na pakkagi tam. Kanayun nga makaduffun nu iyavu tam ta baggi tam, ‘Yaw kari nga kagiakku ay mamappatu tu ulu, onu mamakkalma ta tensionadu nga situasion?’ (Prov. 15:1) Mas makasta gafu nu mannono ittam labbi nige mabbida.

Kunnaw paga i kagian na tadday nga proverbio: “I ari napannonopan nga uvovug ay gitta na duddug na espada.” (Prov. 12:18) Nu nonopattam i efekto ta tanakuan na kakkagiattam anna tono na pabbida tam, makontrol tam i zila tam. Nu tuttulattam “i dob na kinasippo,” ari tam mangusa tu makapataki nga uvovug anna ari tu bastus i tono tam. (Efe. 4:31, 32) Talianattam i negatibo nga appana-panono anna paguvovug tu positibo ira nga uvovug anna masippo nga pabbida. Nangiyawa tu ehemplo si Jehova meyannung taw. Turi ta pinasikan na i nono na magana-anassing nga aripan na nga si Elias, “malumamo anna makafi nga ngaral” i pinakibbida na anghel nga mangirepresenta kani Jehova. (1 Pat. 19:12) Ngem ari laman nakuan tu masippo ittam nga maguvovug. Mawag gapa nga masingan yatun ta annangngua tam. Kunnasi?

Nu parigattam si Jehova, masippo i paguvovug tam pati i annangngua tam. (Efe. 4:32; 5:1, 2) Kunnaw i istorian ni Lisa nga nakagi ta gafu meyannung ta kinasippo na Saksi ira: “Turi ta kala-kalanna nga mawag nga magali tu paddianan i familia mi, dua nga magatawa ta kongregasion i nad-day off tapenu  manguffun nikami nga magimpake. Tatun nga tiempo, ari ngà paga nga Bible study!” Yatun ira nga masippo nga annangngua i namaguyu kani Lisa tapenu gigiammuan i kinakurug.

Naappresia ni Anne nga nakagi ta gafu i kinasippo na Saksi ira. Kinagi na: “Megafu ta ugali na totolay taw ta mundo, nabbalin ngà tu minadduda. Marigatan ngà nga mattiwala ta totolay.” Kinagi na paga: “Turi ta nakilalà i Saksi ira, paddudakku ira. Nattaka ngà. Kukku, ‘Ngatta tamma ta kitassippo ira niakan?’ Ngem megafu ta talaga masippo i nanuddu nio tu Biblia, nattiwala ngà gabbalaman ta nisa.” Anni i makasta nga resulta natun? “Turi kua, naffokus ngà ngana ta giggigiammuakku.”

Napaguyu si Lisa anna si Anne megafu ta masippo nga annangngua na wawwaragi ta kongregasion. Nakaduffun yatun tapenu gigiammuadda i kinakurug. I kinasippo nga nipasingan na kongregasion i nakaduffun ta nira nga vukatan i giffutuadda.

Gagangay laman ta karuan i maguvovug tu masippo anna mangngizzi megafu ta  nikapadakal da. Makasta gapa nu mapaguyu i karuan nga mabbalin tu masippo megafu ta kultura anna personalidad da. Ngem nu yatun laman i rason, awayya na tu ari tam mepasingan i makadios nga kinasippo.​—Ikumpara i Kingngua 28:2.

I kurug nga makadios nga kinasippo ay tadday nga aspeto na vunga na masanto nga espiritu na Dios. (Gal. 5:22, 23) Mawag gafu tu ipamavuluttam nga influwensian na masanto nga espiritu na Dios i appana-panono anna kukukuattam tapenu mabbalin ittam tu kurug nga masippo. Nu kuattam yatun, maparigattam si Jehova anna si Jesus. Kagitta gapa ni Jesus, kuru-kurug i interes tam ta tanakuan. Yari tu paguyuan ittam na pangiddu tam kani Jehova nga Dios anna pangiddu tam ta kasittoletam. Nu kunnatun i kinasippo tam, mabbalin yatun tu mafuersa nga kualidad nga maggafu ta futu anna faboran yatun na Dios.

Natural laman nga mangipasingattam tu kinasippo ta totolay nga masippo gapa nittam onu ta kakilala tam. (2 Sam. 2:6) Tadday nga makua tam ay mappabalo ittam ta nira. (Col. 3:15) Ngem kunnasi nu matageno tam nga ari tu mepappangngo ta kinasippo i tadday nga tolay?

Ikonsidera yaw: Si Jehova i kakastan nga ehemplo ta pangipasingan tu ari mepappangngo nga kinasippo. Tudduan ittam na Uvovug na tu importante ira nga leksion nu kunnasi mepasingan yatun nga kualidad. Namikkaru nga neyusa ta Cristiano nga Griego nga Katurakan i termino nga “ari mepappangngo nga kinasippo.” Kunnasi kari nga ipasa-pasingan yatun na Dios ta nittam?

Namegafu tagga, nangipasingan ngana si Jehova tu kinasippo ta ngamin nga tolay gukaban na pangiyawa ta kawagadda tapenu matolay. (Mat. 5:45) Kakurugan na, nige paga makilala na totolay si Jehova, dati ngana nga nipasingan na i kinasippo ta nira. (Efe. 2:4, 5, 8) Angngarigan na, niyawa na i pinakamapia, i tattadday nga Ana na, para ta ngamin nga totolay. Nitura ni apostol Pablo nga niyawa ni Jehova i tavvu megafu ta “kadakal na inaggallallo” onu ari mepappangngo nga kinasippo na. (Efe. 1:7) Fuera paga tatun, maski nu makaliwa ittam anna maparraddam tam si Jehova, tulu-tuloy lagapa nga igiya anna tudduan na ittam. I instruksion na anna i uvovug na ira ay “kagitta na afafu.” (Deut. 32:2) Siguradu nga ari tam vuluvuga makabalo ta ngamin nga kinasippo nga ipasa-pasingan na ta nittam. Kakurugan na, nakadepende ta kinasippo ni Jehova i mappange tam.​—Ikumpara i 1 Pedro 1:13.

Siguradu nga mas maddukko tam kani Jehova megafu ta kinasippo na anna mapaguyu ittam nga mangipasingan gapa tu kinasippo. Ari tam laman gafu nga pilian nu sinni i pangipasingannattam tu kinasippo. Ikagumattam nga parigan si Jehova gukaban na pabbalin tu masippo ta kadaggaw. (1 Tes. 5:15) Nu kanayun nga ipasingattam i kinasippo, megitta ittam ta mapatu nga afi ta malammin nga aggaw. Mabanna-bannayattam i kafamilia tam, kapangngurug, katrabahu, kaeskuela, anna i karruba tam.

Nonopan nu sinni ta kafamiliam onu ta kongregasiommu i mabbenefisio ta masippo nga uvovug anna annangnguam. Awayya na tu egga i kakongregasiommu nga talaga makawag tu uffun ta trabahu ta balay onu ta pamalengke. Fuera paga tatun, nu egga masimmuammu ta ministerio nga makawag tu uffun, puedem kari yayya nga uffunan?

Kunna pamarig tam kani Jehova, paray nakuan tu i uvovug anna i annangngua tam ay kanayun nga nebase ta “dob na kinasippo.”