1. Anni ira i gagangay nga mamaganassing nittam?

 IKONSIDERA i tumunug ira nga situasion na wawwaragi tam. Kayà na magatawa nga da Nestor anna María nga mav-volunteer nu sitaw mas dakal i pakawagan. * Mawag tu mappasimple ira tapenu makua da yatun. Ngem maganassing ira ta baka ari ngana saw ira kurug nga magayayya nu baddi ngana laman i kuartu da. Nabbalin gapa tu Saksi ni Jehova si Biniam ta nasion nu sitaw makokkontra i trabahu tam. Megafu tatun, nanono na nga baka mapersigi yayya. Ikassing na nga mesimmu yatun. Ngem mas maganassing yayya ta makagi na familia na meyannung ta bagu nga relihion na. Nakannammuan ni Valérie nga egga i cancer na nga alistu nga mawwara. Narigatan yayya nga magaleg tu magopera nisa nga mangirespeto ta sinaddag na meyannung ta daga. Megafu tatun, naganassing yayya nga baka matay yayya.

2. Ngatta mawag nga ikagumattam nga labanan i assing tam?

² Aru ngana ta nittam i nappasa ta kunnatun, ari kari? Nu ari tam ammu nu kunnasi labanan i assing tam, posible nga makangngua ittam tu marake ira nga desision nga awayya na tu makadaral ta relasiottam kani Jehova. Yatun i kayà ni Satanas nga mesimmu. Usu-usan na gapa i assing tam tapenu ari ittam nga tumuttul ta dorob ni Jehova, nelagum tatun i bilin nga ilayyagayya i mapia nga dumug. (Nep. 12:17) Kitaddake si Satanas, awan tu allo na, anna makapangngua yayya. Ngem maprotektammu i baggim kontra ta nisa. Kunnasi?

3. Anni i makoffun tapenu malabanattam i assing?

 ³ Nu kumbinsidu ittam nga ayatan ittam ni Jehova anna kavulu tam yayya, ari nga makua ni Satanas nga ananassingan ittam. (Sal. 118:6) Angngarigan na, aru i mariga nga nappasan na nattura ta Salmo 118. Napakaru i kumokkontra ta nisa, nelagum i prominente ira nga tolay (versikulo 9, 10). Egga gapa ira i tiempo nga ari na ngana nga makaya i madammo ira nga problema na (versikulo 13). Nakalawa gapa yayya tu madammo nga disiplina maggafu kani Jehova (versikulo 18). Ngem kunnaw lagapa i kinansion na salmista: “Ari ngà maganassing.” Ngatta kunnatun i natageno na? Ammu na gare nga maski nu dinisiplina yayya ni Jehova, kuruga iddukan lagapa yayya na Yama na ta langi. Kumbinsidu i salmista nga maski paga nu anni i pappasan na, kanayun yayya nga uffunan na minaggiddu nga Dios na.​—Sal. 118:29.

4. Anni ira nga assing i malabanattam nu kumbinsidu ittam nga ayatan ittam na Dios?

⁴ Mawag nga kumbinsidu ittam nga ayatan ittam ni Jehova. Makoffun yatun tapenu malabanattam yaw nga tallu nga gagangay nga mamaganassing ta nittam: (1) assing nga ari meyawa i pakawagan na familia tam, (2) assing ta tolay, anna (3) assing ta patay. Nalabanan na wawwaragi ta ollu nga parapo i assing da megafu ta kumbinsidu ira nga ayatan ira na Dios.

5. Anni ira i pakavurungan na tadday nga ulu na familia? (Innan i letratu ta vungun.)

⁵ Seriosowan na Cristiano nga ulu na familia i responsibilidad na nga iyawa i pakawagan na familia na. (1 Tim. 5:8) Nu tadday ka nga ulu na familia, awayya na tu navvurung ka nga mawawammu i trabahum durante ta COVID-19 pandemic. Baka navurung ka gapa nga awan saw tu mepakammu ta familiam anna awan tu pappagam ta renta na balenu. Naganassikka nga nu awan ngana tu trabahum, baka awan ngana tu tanakuan nga malegammu. Onu kagitta da Nestor anna María nga nakagi ta gafu, baka magalangan ka nga mangngua tu panguli ta sekular nga trabahum ta baka marigatakka nu mas baddi ngana i kuartum. Aru ngana i napagimmang ni Satanas nga masserbi kani Jehova megafu tatun ira nga assing.

6. Anni i kayà ni Satanas nga kurugattam?

⁶ Kayà ni Satanas nga kurugattam nga ari ittam iddukan ni Jehova anna ari na ittam duffunan ta pakawagan na familia tam. Megafu tatun, awayya na tu kuattam i ngamin tapenu ari ittam malsa ta trabahu tam maski kebalinan natun nga ari tam tuttulan i prinsipio ira na Biblia.

7. Anni i nipasiguradu ni Jesus ta nittam?

⁷ Mas kilala ni Jesus i Yama na anne ta maski sinni nga tolay. Nipasiguradu na nga ‘ammu gammabba ngana na Yama tam i mawag tam nage tam nga kiddawan.’ (Mat. 6:8) Ammu gapa ni Jesus nga sigga-paran si Jehova nga mangiyawa ta kawagattam. Bilang Cristiano, miembro ittam na familia na Dios. Masiguradu tam gafu nga tuttulan na Ulu na familia tam nga si Jehova i prinsipio nga nipetura na ta 1 Timoteo 5:8.

8. (a) Anni i makaduffun ta nittam nga malabanan i assing nga ari tam meyawa i pakawagan na familia tam? (Mateo 6:31-33) (b) Kunnasi tam maparigan i ehemplo na magatawa ta picture nga nangiyawa tu makan ta sister?

⁸ Nu kumbinsidu ittam nga iddukan ittam ni Jehova kunne na gapa i familia tam, awan vuluvuga tu padduda tam nga meyawa i pakawagattam. (Bibbigan i Mateo 6:31-33.) Kakayà ni Jehova nga iyawa i pakawagattam  megafu ta minaggiddu yayya anna vuka-palag! Turi ta pinaratu na i davvun, ari laman tu i primeru nga kawagattam tapenu matolay i niyawa na. Napakaru gapa i pinaratu na ta davvun tapenu fermi i pagayayya tam. (Gen. 2:9) Maski makalanno laman ta kadaggaw nga pakawagattam i egga ta nittam, ariattam nakuan kattaman tu yatun i mangipasingan nga ari ittam vuluvuga pinagurayan ni Jehova. (Mat. 6:11) Kanayuttam nga nonopan nga maski anni laman nga isakrifisio tam ta material sangawe ay balabaddi nu mekumpara ta bendision nga iyawa na minaggiddu nga Dios tam sangawe anna ta mappange. Yatun i nagigiammu ni Nestor anna ni María.​—Isa. 65:21, 22.

9. Anni i nagigiammum kadi Nestor anna María?

⁹ Komfortable bi i pattolay ni Nestor anna ni María nga taga-Colombia. “Ninono mi nga mappasimple anna palawan i ministerio mi,” kinagi da, “ngem naganassing kami nga baka ari kami saw kurug nga magayayya nu mas baddi ngana i kuartu mi.” Anni i nakaduffun ta nira nga malabanan i assing da? Ninonono da nu anni ngana i kingngua ira ni Jehova tapenu pakurugan i pangiddu na ta nira. Megafu ta kumbinsidu ira nga kanayun na ira nga tangngallan, pinanawadda i trabahu da nga atannang i sueldu na, nilaku da i baleda, anna nagali ira ta parte na nasiodda nga mas dakal i pakawagan ta mallayyagayya. Anni i matageno da ta desisiodda? Kinagi ni Nestor: “Talaga kuru-kurug i kinagi na ta Mateo 6:33. Ari kami vuluvuga nakkurang tu maski anni anna mas magayayya kami sangawe.”

10. Ngatta ari ittam makaddag nga ikassing na tolay i kasittolena?

¹⁰ Namegafu turi ta narrebelde da Adan anni Eva kontra kani Jehova, naperwisiu i totolay megafu lagapa ta kasittoleda. (Ecl. 8:9) Angngarigan na, abusowan na totolay i autoridad da, mangngua tu marake i kriminal ira, mamu-bully i estudiante ira ta eskuela, anna takitan na karuan i mismu nga kafamilia da. Ari ittam ngana gafu makaddag tu ikassing na tolay i kasittolena! Kunnasi nga approbetchan ni Satanas yatun nga assing tam ta tolay?

11-12. Kunnasi nga usu-usan ni Satanas i assing ta tolay kontra nittam?

¹¹ Usu-usan ni Satanas i assing ta tolay tapenu fersan ittam nga makkompromiso anna pagimmangan ittam ta pallayyagayya. Aru nga gobiernu i mangigamma ta trabahu tam  anna peppersigiadda ittam megafu ta influwensia ni Satanas. (Luc. 21:12; Nep. 2:10) Aru nga totolay taw nga mundo ni Satanas i mangiwara-wara tu kinaladdug anna makelogo nga informasion meyannung ta Saksi ira ni Jehova. Danuri mangurug tatun ira ay uyu-uyawadda ittam onu takitadda paga lagu ittam ta pisikal. (Mat. 10:36) Makaddag kari ittam ta taktika ira nga usu-usan ni Satanas? Ari vuluvuga. Usu-usan na ngana gare danatun ta ollu paga nga siglo.​—King. 5:27, 28, 40

¹² Ari laman tu i assing ta pangokkontra na gobiernu i taktika nga usu-usan ni Satanas. Oras tu mabbalin ngana tu Saksi i karuan, mas maganassing ira ta makagi na kafamilia da anne ta pisikal nga pangabuso. Iddeddu da gare i kafamilia da anna kayà da nga makannammuan anna iddukan gapa nakuan na kafamilia da si Jehova. Matakitan gapa ira ta marake nga ikakkagi na kafamilia da meyannung ta kurug nga Dios anna ta maddayaw ira ta nisa. Egga ira i nabbalin tu Saksi danuri kafamilia da nga dati nga mangokkontra. Ngem anni gapa i reaksiommu nu pinapanaw naka na kafamiliam megafu ta nanguli ngana i pangurug mu?

13. Anni i makoffun nu pinagurayan ittam na kafamilia tam? (Salmo 27:10)

¹³ Massikan i nono tam ta mabibbig ta Salmo 27:10. (Bibbigan.) Nu manono tam nga talaga iddeddukan ittam ni Jehova, ari ittam maganassing ta maski anni nga mesimmu maski paga nu pagurayan ittam na kafamilia tam. Komfiansa ittam gapa nga bala-balakkan na i pagattattam tam. Si Jehova i manangngal ta pisikal, emosional, anna espiritual nga pakawagattam. Yayya i kapianan nga makeyawa nittam tatun ira! Kunnatun i naekspiriensa ni Biniam nga nakagi ta gafu.

14. Anni i nagigiammum ta ekspiriensa ni Biniam?

¹⁴ Nabbalin tu Saksi si Biniam maski nu ammu na nga meparubang yayya ta grabe nga pamersigi na gobiernu ta diadda. Megafu ta ammu ni Biniam nga iddeddukan yayya ni Jehova, nalabanan na i assing ta tolay. Kinagi na: “Grabe i pinamersigi da nio, ngem mas ikassikku i pangokkontra na familià anne ta pamersigi na gobiernu. Ikassikku tu baka madismaya i ari tu Saksi nga yamà ta desisiokku nga mabbalin tu Saksi ni Jehova anna baka nonopan na familià nga awan tu sesserbì.” Ngem kumbinsidu si Biniam nga kanayun nga tangngallan ni Jehova danuri iddeddukan na.  Istorian ni Biniam: “Ninonono ku nu kunnasi nga inuffunan ni Jehova i tanakuan tapenu maattammadda i ziga na pattolay, pangireruma, anna kinavayolente. Ammù nga nu matalo ngà kani Jehova, bendisionan nà. Turi ta namippiga nga inaresto dà anna binubbubbug, naekspiriensà mismu i panguffun ni Jehova ta tiempo na pakawagattam nu matalo ittam nisa.” Nabbalin tu kuru-kurug nga Yama ni Biniam si Jehova anna nabbalin gapa tu kurug nga familia na danuri masserbi kani Jehova.

15. Ngatta gagangay laman nga ikassittam i matay?

¹⁵ Kagian na Biblia nga tadday nga kalaban i patay. (1 Cor. 15:25, 26) Awayya na tu maganassing ittam ta patay, mas ngana nu grabe i taki tam onu na iddeddukattam. Ngatta ikassittam i matay? Megafu ta pinaratu ittam ni Jehova nga egga i pakkaraga na nga mattolay tu mannanayun. (Ecl. 3:11) Ngem makoffun gapa i assing tam ta patay tapenu protektattam i inango tam. Angngarigan na, mapaguyu ittam nga kuman tu masustansia anna magexercise, mappadoktor, anna mattuma tu medisina nu kawagan, anna lillitan i situasion ira nga mamappeligro ta inango tam.

16. Kunnasi nga approbetchan ni Satanas i negagangay nga assing tam ta patay?

¹⁶ Ammu ni Satanas nga tagibalorattam i inango tam. Ngem kakkagian na nga isakrifisio tam i ngamin nga egga nittam maski i pakikkofuttam kani Jehova tapenu laman ari ittam nga matay. (Job 2:4, 5) Mali si Satanas! Ngem gafu ta “egga i pakawayya na ta patay,” approbetchan na i negagangay nga assing tam ta patay tapenu pagimmangan ittam nga masserbi kani Jehova. (Heb. 2:14, 15) Nu karuan, ananassingan ittam na totolay nga ininfluwensian ni Satanas nga patayadda ittam nu ari tam nga ikompromiso i pangurug tam. Nu egga gapa ira i emergency nga situasion nga mamappeligro ta inango tam, approbetchan yatun ni Satanas tapenu makkompromiso ittam. Awayya na nga fersan ittam na doktor onu na kafamilia tam nga ari tu Saksi nga mappatubbo tu daga maski nu mekontra yatun ta dob na Dios. Awayya na gapa nga kumbinsiadda ittam nga purueban i klase na panguru nga mekontra ta prinsipio na Biblia.

17. Base ta Roma 8:37-39, ngatta ari tam nakuan ikassing i matay?

¹⁷ Kurug tu manaki tam i matay, ngem maski nu matay ittam, ayatan ittam lagapa ni Jehova. (Bibbigan i Roma 8:37-39.) Nu matay i kokkofun ni Jehova, meraddamman na ira nga gitta na matolay lagapa ira. (Luc. 20:37, 38) Kakayà na nga paginnolayan ira. (Job 14:15) Daka-dakal i nisakrifisio ni Jehova tapenu ‘matolay ittam adde ta ngangangay.’ (Juan 3:16) Ammu tam nga kuruga ayatan anna ikavurungan na ittam. Yayya nga imbes tu pallikurattam si Jehova nu mattaki ittam onu nu ananassingadda ittam nga matay, mattalo ittam ta nisa nga banna-bannayan anna iddan na ittam tu sirib anna sikan. Kunnatun mismu i kingngua ni Valérie anna na atawa na.​—Sal. 41:3.

18. Anni i nagigiammum ta ekspiriensa ni Valérie?

¹⁸ Turi ta 35 anios si Valérie, nakannammuan na nga egga i cancer na nga bibihira anna paspas i pawwara na. Nakoffun nisa i aya tapenu malabanan na i assing ta patay. Niyistoria na: “Turi ta nammuammi nga egga i cancer ku, nagavvatakkami na atawà. Mawag ku i major nga operasion tapenu matolay ngà. Nakkonsulta ngà ta aru nga doktor, ngem manaki da nga magopera nga awan tu daga. Maganassing ngà. Ngem ammù i bilin na Dios yari tu kakku vuluvuga mappatubbo tu daga!  Tagga paga, ipasa-pasingan ngana ni Jehova i dakal nga pangiddu na niakan. Sangawe, chansà labbi gapa tapenu ipasingan i pangiddu ku ta nisa. Kada mammanaki i doktor ira nga magopera nga awan tu daga, mas massikan i nono ku nga ari mappaffu kani Satanas, ta kayà ku nga mabbalin tu proud niakan si Jehova. Turi kua, naoperan ngà gabbalaman nga awan tu daga na. Maski nu aru lagapa i taka-takitakku, kanayun nga iyawa ni Jehova i pakawagammi. Angngarigan na, ta study mi ta weekend, nige ku nammuan nga egga i taki ku, ginigiammu mi i artikulo nga ‘Harapin ang mga Kapighatian Nang May Lakas ng Loob.’ * Fermi nga nabanna-bannayakkami tatun nga artikulo. Namippiga mi nga binibbig yatun. Nakoffun i kunnatun ira nga artikulo anna i makasta nga rutina mi ta espiritual tapenu memammo i nono mi na atawà anna makangngua kami tu masirib ira nga desision.”

19. Anni i aranni ngana nga mesimmu?

¹⁹ Ta uffun ni Jehova, aru nga Cristiano ta interu mundo i nalampasadda i mariga ira nga situasion anna nalabanadda i Diablo. (1 Ped. 5:8, 9) Mawayyam gapa yatun. Aranni ngana nga doban ni Jehova si Jesus anna i kakavvulu na nga mammaguray ‘tapenu daraladda i kukukuan ira na Demonio.’ (1 Juan 3:8) Kabalin natun, i totolay na Dios taw ta davvun ay ‘awan vuluvuga noka tu ikassidda anna awan tu rason tapenu mamippig ira.’ (Isa. 54:14; Mik. 4:4) Habang awan tam paga tatun nga tiempo, mawag nga ikagumattam nga labanan i assing tam ira.

20. Anni i makaduffun ta nittam tapenu malabanattam i assing tam ira?

²⁰ Mawag tu itulu-tuloy tam nga pasikannan i pattalo tam nga iddukan anna protektan ni Jehova i aripan na ira. Makua tam yatun nu nonopan anna paggiristoriattam nu kunnasi nga prinotektan ni Jehova i aripan na ira tagga. Agga-nono tam nakuan gapa nu kunnasi na ittam zinuffunan ta mariga ira nga situasion. Ta uffun ni Jehova, malabanattam i assing tam ira!—Sal. 34:4.