MAGIGIAMMU NGA ARTIKULO 24
Si Jehova i Pinakaminammakoma
“Mapia ka anna minammakoma ka, AFU; ta totolay nga makimallo nikaw, ari manguli i pangaya mu.”—SAL. 86:5.
KANSION 42 Ang Panalangin ng Lingkod ng Diyos
SUMARIO *
1. Anni i magigiammu tam ta kinagi ni Patul Solomon ta Eclesiastes 7:20?
NITURA ni Patul Solomon: “Awan tu matunung nga tolay ta davvun nga kanayun nga magangngua tu mapia anna ari vuluvuga nga makaliwa.” (Ecl. 7:20) Kuru-kurug yatun! Makaliwa ittam ngamin. (1 Juan 1:8) Yayya nga kawagattam ngamin i pamakoma na Dios anna na kasittoletam.
2. Anni i matageno mu nu pakoman naka na madukko nga kofummu?
2 Magga meraddammammu i tiempo turi ta natakitammu i tadday nga madukko nga kofummu. Kayà mu nga itunung i nakaliwatammu anna metoli i makasta nga pavvulu nu. Yayya nga nakkiddaw ka tu napafutuan nga pamakoma ta nisa. Anni i natageno mu turi ta pinakoma naka na kofummu? Siguradu nga nalappawakka anna magayayya ka!
3. Anni ira i gigiammuattam taw nga artikulo?
3 Kayà tam nga mabbalin tu kadukkotan nga Kofuttam si Jehova, ngem nu karuan makekagi onu makangngua ittam tu makapataki ta nisa. Ngatta makasiguradu ittam nga kayà ittam nga pakoman ni Jehova? Ngatta nerumu-ruma i pamakoma ni Jehova kumpara ta pamakoma tam? Sinni danuri pakoman na Dios?
KAYÀ ITTAM NGA PAKOMAN NI JEHOVA
4. Ngatta siguradu ittam nga kayà ni Jehova i mamakoma?
4 Ipasiguradu nittam na Uvovug na Dios nga kayà ni Jehova i mamakoma. Turi ta kinibbida ni Jehova si Moises ta Vukig Sinai gukaban na tadday nga anghel, kinagi na nisa nu anni nga klase yayya na Dios: “Si Jehova, si Jehova, tadday nga Dios nga minangngikallo anna minangngikabbi, ari insigida nga mapporay anna abundansia ta matalo nga aya anna kinakurug, mangipasingan tu matalo nga aya ta rinivu, mamakoma ta kamali anna tagaruli anna liwa.” (Ex. 34:6, 7) Masippo anna minangngikallo si Jehova. Kanayun nga kayà na nga pakoman danuri nakaliwa nga mabbabawi.—Neh. 9:17; Sal. 86:15.
Ammu ni Jehova i ngamin nga nappasa-pasattam nga nakafekto ta kata-katoletam (Innan i parapo 5)
5. Base ta Salmo 103:13, 14, anni i kuan ni Jehova megafu ta ammammu na tu mapia i totolay?
5 Si Jehova i Namaratu ta nittam, yayya nga ammu na i ngamin meyannung ta nittam. Fugurammu yatun! Ammu na i ngamin nga detalye meyannung ta kada tolay taw ta davvun. (Sal. 139:15-17) Yayya nga masingan na i ngamin nga kina-imperfekto nga narensia tam ta magana tam ira. Fuera tatun, ammu na i ngamin nga nappasa-pasattam nga nakafekto ta kata-katoletam. Megafu ta ammammu tu mapia ni Jehova i totolay, mapaguyu yayya nga ikallo ittam.—Sal. 78:39; bibbigan i Salmo 103:13, 14.
6. Kunnasi nga pinakurug ni Jehova nga kayà na i mamakoma?
6 Pinakurug ni Jehova nga kayà na i mamakoma. Ammu na nga megafu ta nakaliwatan ira na ollu nga tolay nga si Adan, minattagaruli anna matay ittam ngamin. (Roma 5:12) Awan vuluvuga tu makua tam tapenu fugaddan i kesimmu natun ta nittam onu ta maski sinni nga tolay. (Sal. 49:7-9) Ngem minaggiddu i Dios yayya nga nikabbi na ittam anna egga i kingngua na tapenu mapalubbangan ittam ta liwa anna patay. Segun ta Juan 3:16, zinog ni Jehova i tattadday nga Ana na tapenu matay para ta nittam. (Mat. 20:28; Roma 5:19) Imbes tu sittam i matay, natay si Jesus tapenu mapalubbangan i maski sinni nga mangurug ta nisa. (Heb. 2:9) Magga kitettaki kani Jehova nga masingan i kaziga-riga anna kappasiran nga patay na meddu nga Ana na! Siempre, nu manaki ittam nga pakoman ni Jehova, magga ari na nipamavulun nga matay i Ana na.
7. Sinni i karuan ta Biblia nga pinakoma ni Jehova?
7 Aru i mabibbig tam ta Biblia nga pinakoma ni Jehova. (Efe. 4:32) Sinni i karuan tatun? Baka manono mu si Patul Manases. Grabe i nakaliwatan ira natun nga marake nga tolay kani Jehova. Nirolluan na i paddayaw ta falsu ira nga dios. Pinatay na gapa i mismu nga ána na. Nitavvung na ira ta pagano ira nga dios. Ari laman tu yatun. Nangipuestu paga yayya tu inukit nga imahen na falsu nga dios ta unag na sagradu nga templo ni Jehova. Kunnaw i kagian na Biblia meyannung ta nisa: “Aru i kingngua na nga marake ta paningan ni Jehova tapenu papporayan si Jehova.” (2 Cro. 33:2-7) Ngem pinakoma ni Jehova si Manases megafu ta kurug i pabbabawi na. Nipamavulun paga lagu na Dios nga metoli yayya bilang patul. (2 Cro. 33:12, 13) Baka manono mu gapa si Patul David. Madammo ira i nakaliwatan na kani Jehova, nelagum ngana i panallaw anna pamatay. Ngem pinakoma gapa ni Jehova si David megafu ta napafutuan i pinabbabawi na anna inamin na i nakaliwatan na. (2 Sam. 12:9, 10, 13, 14) Makasiguradu ittam gafu nga kayà ni Jehova i mamakoma. Ammuattam ngana nu ngatta nerumu-ruma i pamakoma ni Jehova ta pamakoma na totolay.
NERUMU-RUMA I PAMAKOMA NI JEHOVA
8. Ngatta makagi tam tu kapianan nga Hues si Jehova?
8 Si Jehova i “Hues na interu davvun.” (Gen. 18:25) Mawag tu mantindian tu mapia na tadday nga hues i dorob tapenu makagi tu mapia yayya. Kunnatun mismu si Jehova bilang Hues tam. Mantindian na tu mapia i dorob megafu ta yayya i Minangngiyawa tu Dorob tam. (Isa. 33:22) Si Jehova laman i makekagi nu anni talaga i fustu anna nu anni i ugal. Anni paga i kawagan tapenu makagi nga mapia i tadday tu hues? Mawag tu mekonsidera na i ngamin nga detalye na tadday nga kaso nige na nga maddesision. Si Jehova laman i makakua tu kunnatun.
9. Anni i ammu ni Jehova nu desisionan na nga pakoman i tadday onu ari?
9 Neruma si Jehova ta totolay nga hues megafu ta kanayun nga ammu na i ngamin nga detalye na maski anni nga kaso. (Gen. 18:20, 21; Sal. 90:8) Ari yayya tu kagitta na tolay nga mabbase laman ta masingan na onu maginna na. Ammu ni Jehova i kualidad anna ugali ira nga narensia na tadday nga tolay ta magana na, i nikapadakal na, i pallevu na, kunne na gapa i panageno anna appana-panono na. Yayya nga mantindian ni Jehova nu kunnasi nga afektan danatun i kukukuan na tolay. Mabibbig gapa ni Jehova i mayan na futu. Ammu na nu ngatta kukukuan na tolay i tadday nga gannug. Awan vuluvuga tu metagu kani Jehova. (Heb. 4:13) Yayya nga nu pakoman ni Jehova i tadday nga tolay, megafu yatun ta ammu na i ngamin nga detalye na situasion.
Patas si Jehova anna ari yayya mangireruma. Ari yayya nga mangalawa tu suhul (Innan i parapo 10)
10. Ngatta makagi tam nga kanayun tu patas i desision ira ni Jehova? (Deuteronomio 32:4)
10 Kanayun nga patas i desision ira ni Jehova. Ari yayya mangireruma. Ari na nga pakoman i tadday nga tolay megafu laman ta makasta i itchura na, mariku, prominente, onu maabilidad. (1 Sam. 16:7; Sant. 2:1-4) Awan tu makafersa kani Jehova nga kuan i maski anni anna ari yayya nga mangalawa tu suhul. (2 Cro. 19:7) Ari vuluvuga maddesision si Jehova megafu laman ta nadismaya yayya onu megafu ta emosion na. (Ex. 34:7) Si Jehova gafu i pinakakualipikadu nga Hues megafu ta mantindian na i ngamin nga ganna-gannug meyannung ta nittam anna ta situasiottam.—Bibbigan i Deuteronomio 32:4.
11. Ngatta nerumu-ruma i pamakoma ni Jehova?
11 Ammu na nattura ira ta Hebreo nga Katurakan nga nerumu-ruma i pamakoma ni Jehova. Nangusa ira tu tadday nga Hebreo nga termino nga segun ta tadday nga referensia ay “tumukoy laman ta pamakoma na Dios ta nakaliwa, anna ari vuluvuga nga meyusa yatun nga termino ta pamakoma na tolay ta kasittolena.” Si Jehova laman i egga pakawayya na nga interamente nga mangabsuelto ta nakaliwa nga mabbabbabawi. Anni gafu ira i mesimmu oras tu pakoman ittam ni Jehova?
12-13. (a) Anni i matageno na tadday nga tolay nga pinakoma ni Jehova? (b) Kunnasi kabayag i efekto na pamakoma ni Jehova?
12 Nu kurugattam nga pinakoma ittam ngana ni Jehova, ‘mabanna-bannayan’ ittam megafu ta memammo ngana i nono tam anna marenu i konsensia tam. Ari tu tolay i naggafuan natun nga pamakoma, nu ari, naggafu mismu ta “Yafu” nga Jehova. (King. 3:19, 20) Nu pakoman ittam ni Jehova, itoli na i dati nga relasion na ta nittam nga gitta na ari ittam vuluvuga nakaliwa.
13 Oras tu pakoman ittam ni Jehova, ari na ittam ngana vuluvuga tukian onu kastigowan tatun nga nakaliwatattam. (Isa. 43:25; Jer. 31:34) “Nu kunnasi i karayyu na zigattu ta taggappan,” kunnari karayyu i pagipayyan ni Jehova ta liwi-liwa tam. * (Sal. 103:12) Nu pannonopattam nu kunnasi kadakal i pamakoma ni Jehova, kuruga mappappabalo ittam anna ikakua tam yayya. (Sal. 130:4) Ngem sinni kari danuri pakoman ni Jehova?
SINNI DANURI PAKOMAN NI JEHOVA?
14. Anni ngana ira i nammuattam nu maddesision si Jehova nga pakoman i tadday nga tolay?
14 Nammuattam ngana nga nu maddesision si Jehova nga pakoman i tadday nga tolay, ari na nga ibase yatun ta kadakal onu kabaddi na liwa. Nammuattam nga usu-usan ni Jehova i pakannammu na bilang Namaratu ta nittam, Minangngiyawa tu Dorob, anna Hues nu desisionan na nga pakoman i tadday nga tolay. Anni ira i ikonsidera ni Jehova nu mamakoma yayya?
15. Base ta Lucas 12:47, 48, anni i tadday nga ikokkonsidera ni Jehova?
15 Tadday nga ikokkonsidera ni Jehova ay nu ammu kari na nakaliwa nga marake i kukukuan na. Manawag yatun nga punto ta kinagi ni Jesus ta Lucas 12:47, 48. (Bibbigan.) Makaliwa tu madammo i tadday nga tolay nu sadyaan na nga kuan i tadday nga gannug nga ammu na mabba nga ikalussaw ni Jehova. Posible nga maddesision si Jehova nga ari nga pakoman i kunnatun nga tolay. (Mar. 3:29; Juan 9:41) Ngem i kurug, nu mittan, ammu tam mabba nga marake i nakua tam. Mapakoma kari ittam paga? Wan! Megafu ta egga paga i tadday nga ikokkonsidera ni Jehova.
Makapattalo ittam nga mapakoma ittam ni Jehova nu kurug i pabbabawi tam (Innan i parapo 16-17)
16. Anni i pabbabawi, anna ngatta importante yatun tapenu pakoman ittam ni Jehova?
16 Tadday paga nga ikokkonsidera ni Jehova ay nu napafutuan kari i pabbabawi na nakaliwa. Anni kari i kayà kagian na pabbabawi? Kayà kagian natun nga “ulian na tadday nga tolay i appana-panono na, pagimamma na, onu i gakkag na.” Makagi nga mabbabawi i tadday nga tolay nu manono na nga marake i kinikkingngua na anna kuruga maraddam yayya tatun onu maraddam yayya ta ari na nga nakua i fustu nakuan tu kuan na. Nu talaga mabbabawi i tadday nga tolay, maraddam yayya ari laman tu megafu ta ugal ira i kinikkingngua na. Maraddam gapa yayya ta pinagurayan na nga makkafi i relasion na kani Jehova yari tu nakua na i marake. Daddamman nga parefu nga madammo i nakaliwatan ni Patul Manases anna ni Patul David ngem pinakoma ira ni Jehova megafu ta napafutuan i pabbabawi da. (1 Pat. 14:8) Pakoman ittam laman gafu ni Jehova nu masingan na nga mabbabawi ittam. Ngem ari tu makalanno nga basta maraddam ittam ta nakaliwatattam ira. Mawag tu ipasingattam yatun ta annangngua tam. * Yatun paga i ikokkonsidera ni Jehova.
17. Anni i pakkumberte, anna ngatta importante yatun tapenu ari tam ngana nga makua uli i dati ira nga nakaliwatattam? (Isaias 55:7)
17 Tadday paga nga ikokkonsidera ni Jehova ay i pakkumberte. Kebalinan na pakkumberte ay “pallikug.” Kayà kagian natun nga mawag tu panawan ngana na tadday nga tolay i dati nga marake nga pattolay na anna mamegafu ngana yayya nga mattolay segun ta kayà ni Jehova. (Bibbigan i Isaias 55:7.) Mawag tu talibaguan natun nga tolay i appana-panono na tapenu megiya yayya na appana-panono ni Jehova. (Roma 12:2; Efe. 4:23) Determinadu nakuan gapa yayya nga iyemmang ngana i marake ira nga appana-panono anna annangngua na. (Col. 3:7-10) Siempre, pakoman ittam laman ni Jehova anna pakarenuan na ittam ta tagaruli nu mangurug ittam ta tavvu ni Cristo. Pakoman ittam ni Jehova base tatun nga tavvu nu masingi-singan na nga talaga ikakkagumattam nga ulian ngana i kondukta tam.—1 Juan 1:7.
MANGURUG NGA MAPAKOMA NAKA NI JEHOVA
18. Anni ngana ira i nagigiammu tam meyannung ta pamakoma ni Jehova?
18 Anni ngana ira i importante nga nagigiammu tam? Si Jehova talaga i pinakaminammakoma ta uniberso. Ngatta makagi tam yatun? Ollu, kanayun nga kayà na i mamakoma. Mekadua, ammammu na ittam tu mapia. Ammu na i ngamin nga detalye meyannung ta nittam anna yayya i kapianan nga makekagi nu talaga kurug i pabbabawi tam. Mekatallu, oras tu pakoman ittam ni Jehova, vurran na ngana i liwi-liwa tam nga gitta na ari tam vuluvuga nakaliwa nisa. Megafu tatun, mapeggan ittam tu marenu nga konsensia anna mala tam i fabor na.
19. Maski nu imperfekto anna makaliwa ittam, ngatta awayya tam lagapa i mabbalin tu magayayya?
19 Siempre, adde ta imperfekto ittam paga, makaliwa ittam lagapa. Ngem mabanna-bannayan ittam taw ta kinagi na Kaunawaan sa Kasulatan, Tomo 2, pahina 712: “Megafu ta minangngikallo si Jehova anna ammu na i pakkafian ta pattag na aripan na ira, ari nakuan tu kanayun ngana laman ira nga maraddam megafu ta liwi-liwa nga nakua da nga resulta na kina-imperfekto da. (Sal 103:8-14; 130:3) Nu kukukuadda i adde na mawayya da nga mattolay segun ta estandarte ira na Dios, awayya da lagapa i mabbalin tu magayayya. (Fil 4:4-6; 1Jn 3:19-22).” Makapagaram nga nonopan yatun!
20. Anni i ikonsidera tam ta tumunug nga artikulo?
20 Mappappabalo ittam ta sigga-paran si Jehova nga pakoman ittam nu kurug i pabbabawi tam ta nakaliwatattam ira. Ngem kunnasi tam kari maparigan i pamakoma ni Jehova? Anni ira i napparefuan na pamakoma tam ta pamakoma ni Jehova? Anni gapa ira i nadduman natun? Ngatta importante nga malippawa tam i nadduman natun? Tabbagan na tumunug nga artikulo danatun.
KANSION 45 I Appana-panono Ku
^ Ta Uvovug ni Jehova, ipasiguradu na ta nittam nga kayà na nga pakoman danuri mabbabawi nga nakaliwa. Ngem nu karuan, matageno tam nga ari ittam mepappangngo ta pamakoma na. Gigiammuattam taw nga artikulo nu ngatta makasiguradu ittam nga kanayun nga kayà na Dios tam nga pakoman ittam nu talaga pabbabawyattam i liwa ira nga nakua tam.
^ Innan i libru nga Maging Malapít Kay Jehova, kap. 26, par. 9.
^ KEBALINAN NA TERMINO: I “pabbabawi” ay tumukoy ta panguli na appana-panono, nelagum ngana i napafutuan nga parraddam na tadday nga tolay ta dati nga marake nga nipattolay na, ta marake ira nga kinikkingngua na, onu ta gannug nga ari na nakua. Makagi nga kurug i pabbabawi nu masingan yatun ta annangngua. Kayà na kagian ay nanguli ngana i kondukta na.