1, 2. (a) Ngatta serioso nga dakkua i bawtismo? (b) Anni i mawag nga siguraduan na tadday nige nga mappabawtiso, anna ngatta?

TADDAY ka kari nga abbing nga mappapplano nga mappabawtiso? Nu wan, maginnennag nikaw i kadakallan nga pribilehio nga awayyam malawa. Ngem serioso nga dakkua yatun, kagitta na nagigiammu ta nappasa nga artikulo. Isimbolona yatun i dedikasiommu​—i serioso nga tabbam kani Jehova nga passerbiammu yaya adde noka gukaban na pangipoppollum ta urena nige na maski anni laman nga gannug ta pattolem. Yatutta mabawtisowakka laman nu manakam ka ngana, nu personal nga desisiommu yatun, anna nu malippawamu i kebalinan na dedikasion.

² Kunnasi nu matagenomu nga ari ka paga preparadu para ta bawtismo? Onu kayàmu ngana i mappabawtiso ngem kagian na maganamu nga maginnag ka labbi adde ta umaru paga i ekspiriensam ta pattolay na Cristiano? Maski anni tatun ta dua, ari ka nakuan nga madismaya. Usammu lallagu yatun nga oportunidad nga mapprogreso paga tapenu ari mabbayag, makualipikadu ka gabbalaman ta bawtismo. Nu kunnatun i nonopammu, ikonsideram nu  kunnasi ka nga mapprogreso meyannung ta (1) kurugammu ira, (2) kukukuammu, anna ta (3) appresasiommu.

3, 4. Anni ira i magigiammu na abbarabbing ta ehemplo ni Timoteo?

³ Nonopammu nu anni i tabbagmu taw ira nga pakkiavu: Ngatta mangurug ngà nga egga Dios? Anni nangumbinsi niakan nga Uvovug na Dios i Biblia? Ngatta matageno ku nga mas makasta nga tuttulan i moral nga estandarte na Dios anne ta parigan i estilo na pattolay mundo? Ari nga napalattuag yaw ira nga pakkiavu tapenu madduda ka. Ngem makoffun lallagu nikaw yatun tapenu matuttulmu i nipagaram ni apostol Pablo: ‘Pakurugannu ta bagginu nu anni i mapia anna makasta anna perfekto nga uray na Dios.’ (Roma 12:2, NW) Ngem, ngatta mawag nga pakurugan na Cristiano ira ta Roma i gannug nga nalawada ngana?

⁴ Innattam i tadday nga ehemplo ta Biblia. Familiar ta Katurakan si Timoteo. Sinudduan yaya na yena anna kakona ‘namegafu gari ta kabbinna.’ Kinagi gapa ni Pablo kani Timoteo: “Ngem mannanayun ka paray ta ginigiammum ira anna kinurug mu ta napafutu.” (2 Tim. 3:14, 15) Ta tadday nga referensia, i orihinal nga termino para ta “kinurug,” kaya na kagian nga “kumbinsidu anna siguradu ta kinakurug na tadday nga gannug.” Pinabbalin ni Timoteo nga kukuana i kinakurug. Inakseptana yaw, ari nga megafu ta uray yatun na yenana anna kakona, ngem napafutuan nga pinakurugna ta baggina i kinakurug.​—Bibbigan i Roma 12:1.

5, 6. Ngatta importante para nikaw nga usan i pakawayyam nga marrason maski nu abbikka paga laman?

⁵ Kunnasi ka gapa? Awayyana nga nabayagmu ngana nammuan i kinakurug. Nu kunnatun, ngatta ariammu planuan nga usitakkan tu mapia i rason ira nu ngatta yatun i kurugammu? Yatun i mamatuyag ta pangurugmu anna makoffun nikaw nga ari mainfluwensian na kakavvulumu, propaganda ta mundo, onu maski na mismu nga panagenomu.

⁶ Nu magigiammum nga usan i pakawayya nga marrason maski nu abbikka paga laman, makoffun yatun tapenu makaprepara ka nga tabbagan nu egga i pakkiavu na kakavvulumu nga kagitta na: ‘Kunnasi ka makasiguradu nga egga i Dios? Ngatta pinamavulunan na minaggiddu nga Dios i kinamarake? Ngatta awan tu namaratu ta Dios?’ Nu nakaprepara ka, imbes nga makkafi i pangurugmu ta kunnatun ira nga pakkiavu, mas lallagu nga gigiammuammu i tabbag ta Biblia.

7-9. Kunnasi makoffun i online feature nga “Ano ba Talaga ang Itinuturo ng Bibliya?,” nga giya ta paggigiammu tapenu mapaladda i pangurugmu?

⁷ Makoffun i malappo nga paggigiammu tu Biblia tapenu matabbag i pakkiavu ira, malsa i padduda ira, anna mapaladda i pangurugmu. (King. 17:11) Egga ira i publikasiottam nga makoffun nittam nga kuan yatun. Napakurug na magaru nga nakoffun nira i brosiur nga The Origin of Life​—⁠Five Questions Worth Asking anna i libru nga Is There a Creator Who Cares About You? Aru paga nga abbarabbing i nabenefisiowan ta online feature nga “Ano ba Talaga ang Itinuturo ng Bibliya?” Masingan yaw nga serye na giya ta paggigiammu ta jw.org/tl. Innan i TURO NG BIBLIYA. Nadisenio i kada giya ta paggigiammu tapenu moffunakka nga mapaladda i pangurugmu meyannung ta topiko ta Biblia.

⁸ Familiar ka ngana ta Biblia yari tu alistum laman matabbag i pakkiavu ira nga egga tatun nga giya ta paggigiammu. Ngem ngatta siguradu ka ta tabbagmu ira? Uffunannaka na giya ta paggigiammu nga marrason ta karuan ira nga teksto anna itura i nalippawamu meyannung taw ira nga teksto. Makoffun  yaw tapenu meplanom nu kunnasim iyesplika i nebase-Biblia nga pangurugmu. Uffunan na online feature nga “Ano ba Talaga ang Itinuturo ng Bibliya?” i aru nga abbarabbing nga mapaladda i pangurugda. Nu egga i access mu taw, ngatta ariammu pabbalinan yaw nga parte na personal nga paggigiammum?

⁹ Gukaban na pamaladdam ta pangurugmu, kukukuammu i importante nga dakkua mappange ta bawtismo. Kunna sister nga tinedyer: “Nigè nga naddesision nga mappabawtiso, ginigiammù i Biblia anna nasingakku nga yaw i kurug nga relihion. Ta pappasa na kada aggaw, mas nalladda yatun nga pangurug ku.”

10. Ngatta rasonable nga mekunnay ta pangurug na bawtisado nga Cristiano i kukukuanna?

¹⁰ Kinagi na Biblia: “Kunnatun gapa i angngurug: natay nu ari nga mepasingan ta annangngua.” (Sant. 2:17) Nu maladda i pangurugmu, rasonable laman nga ipasingammu nakuan yatun ta kukukuammu. Anni nga kukukuan? Tukuyan na Biblia i meyannung ta ‘attolay nga masanto anna mekunnay ta Dios.’​—Bibbigan i 2 Pedro 3:11.

11. Ipakanawag i kebalinan na “masanto nga attolay.”

¹¹ Tapenu mepasingan i ‘masanto nga attolay,’ mawag tu marenu ka ta moral. Kumusta ka taw nga gannug? Angngariganna, nonopammu i nappasa nga annam nga vulan. Kunnasim nga nipasingan nga ‘napenam ka ngana nga maningan ta nadduman na mapia anna marakay?’ (Heb. 5:14) Makanono ka kari tu situasion ira nga ari ka natenta onu nainfluwensian na kakavvulumu? Masingan kari ta konduktam ta eskuela i pangurugmu? Awayyam kari itaddaggan i pangurugmu onu paparigammu i kaklasem tapenu ari ka laman mepasiranan? (1 Ped. 4:3, 4) Kurug nga awan tu perfekto. Maski i nabayabayag ngana ira nga massesserbi kani Jehova, nu mittan maganassing ira nga itaddaggan i pangurugda. Ngem i tadday nga naddedika kani Jehova mawag nga pribilehio sa i magalan ta ngagan na Dios, anna masingan yaw ta konduktana.

12. Anni ira i kasali ta pattolay mekunnay ta Dios, anna kunnasi nakuan i pagimammamu tatun?

¹² Kunnasi gapa i ‘attolay mekunnay ta Dios’? Kasali taw i aktibidad ira ta kongregasion, kagitta na paki-study anna pakipartem ta ministerio. Kunne na gapa ta espiritual ira nga aktibidad nga ari masingan na tanakuan, kagitta na pribadu nga pakimallo anna personal nga paggigiammu tu Biblia. Ari nga tagidammakkan na tolay nga naddedika kani Jehova yaw ira nga aktibidad. Ngem parehu nakuan i pagimammana kani Patul David, nga kunna: “Pagayaya ku nga kuan i urem, Dios ku! Pinappannak-ku ta futù i dorob mu.”​—Sal. 40:8.

13, 14. Anni nga probision i makoffun nikaw tapenu makapattoleka mekunnay ta Dios, anna kunnasi nga nabenefisiowan i karuan nga abbarabbing tatun?

¹³ Tapenu mapprogreso ka paga, egga worksheet ta pahina 308 anna 309 ta libru nga Ang mga Tanong ng mga Kabataan​—⁠Mga Sagot na Lumulutas, Tomo 2. Ipagaramna yaw nga worksheet nga ituramu i tabbagmu ta pakkiavu nga kagitta na “Kunnasi ka-espesipiko i pakimallomu, anna anni i ipasinganna yatun ta ayamu kani Jehova?” “Anni i ilagummu ta personal nga paggigiammum?” “Makiparte ka kari ta pallayyagayya maski nu ari makiparte i maganamu?” Egga paga espasio ta worksheet tapenu ituramu nu anni i kayàmu nga papprogresuan meyannung ta pakimallo, personal nga paggigiammu, anna ministeriom.

¹⁴ Nasingan na abbarabbing nga mannonono nga mappabawtiso nga dakal nga uffun  yaw nga worksheet. Kinagi ni Tilda nga mabbing nga sister: “Inusà yaw nga worksheet tapenu itura ku i espiritual nga addetakku. Taggi-taradday ku nga nakua ngamin yaw, yatutta nappasa i tanga-ragun, preparadu ngà ngana ta bawtismo.” Nabenefisiowan gapa tatun si Patrick, mabbing nga brother. “Dati ngana nga ammù i espiritual ira nga addetakku,” kunna, “ngem mas nappursigi ngà nga gawatan yatun ira turi ta nitura ku.”

15. Ngatta personal nakuan nga desision i paddedika?

¹⁵ Yaw i tadday ta makapa-interes nga pakkiavu ira ta worksheet: “Passerbiammu kari si Jehova maski nu nagimmang masserbi i magana anna kokkofummu?” Daddammammu nga megafu ta dedikadu anna bawtisado ka nga Cristiano, egga lagapa i personal nga relasiommu kani Jehova. Ari nakuan nga nakadepende ta tanakuan i passerbim kani Jehova, maski paga ta maganamu. Ipasingan na pattolem nga masanto anna mekunnay ta Dios, nga napakurugmu mismu ta baggim i kinakurug anna mappopprogreso ka mappange ta bawtismo.

16, 17. (a) Anni nakuan i motibo tam ta pabbalin tu Cristiano? (b) Kunnasi nga meyilustra i appresasion ta tavvu?

¹⁶ Niyavu na tadday nga malalaki ta Mosaiko nga Dob kani Jesus: “Mestru, anni i kuruga importante ta ngamin nga Dorob? Kinagi sa ni Jesus, ‘Ayatam-mu i Yafu nga Dios mu ta interu nga futum, interu nga ikararuam anna ta interu nga nono mu.’ ” (Mat. 22:35-37) Tinukoy ni Jesus tatun nu anni nakuan i motibo tam ta pappabawtiso anna pabbalin tu Cristiano​—interu-futu nga aya kani Jehova. I monag nga pannonono ta kadakallan nga regalu ni Jehova nittam​—i sakrifisio nga tavvu na Anana​—i tadday ta kapianan nga awayyam kuan tapenu mapaladdam i relasiommu sa. (Bibbigan i 2 Corinto 5:14, 15; 1 Juan 4:9, 19.) Nu kunnatun i kuammu, mapaguyu ka nga ipasingan i appresasiommu tatun nga regalu.

¹⁷ Kunnaw i awayya nga keyilustra na appresasiommu ta tavvu: Nonopammu nga egga i nangalaw nikaw turi ta malaggabbakka ngana. Lubbe ka kari laman insigida tapus mappamaga anna kattammammu ngana i nakua nikaw? Siempre ari! Siguradu nga matagenomu nga nakagatu ka ta nangalaw nikaw. Kakuruganna, gatumu sa i inangomu! Mas dakal paga i gatu tam kani Jehova anna kani Jesu-Cristo. Nu awan i tavvu, gittana nalaggabbattam ngana ngamin ta liwa anna patay. Ngem megafu taw ta dakal nga pangipasingan tu aya, egga tiansa tam nga mattolay adde noka ta paraiso nga davvun!

18, 19. (a) Ngatta ari ka nakuan maganassing nga maddedika kani Jehova? (b) Kunnasi nga mas makkasta i pattolem nu masserbi ka kani Jehova?

 ¹⁸ Appresiammu kari i nakua ni Jehova nikaw? Nu wan, mepangngo laman nga idedikam i baggim sa anna mappabawtiso. Daddammammu nga i dedikasion ay serioso nga tabba kani Jehova, maski anni i mesimmu. Maganassikka kari nga kuan yatun nga tabba? Ari! Nonopammu nga kayà ni Jehova i kapianan para nikaw, anna “bala-balattan na Dios danuri i magaleg sa.” (Heb. 11:6) Ari nga mabbalin tu marake i pattolem nu maddedika anna mappabawtiso ka. Kakuruganna, mas makkasta paga yatun. Kinagi na 24 anios nga brother nga nabawtisowan nigena paga nattinedyer: “Mas monag nakuan i pakalippawa ku nu ari ngà nga abbing nga nabawtisowan, ngem megafu ta desisiokku nga maddedika kani Jehova, naprotektannà ta influwensia na mundo.”

¹⁹ Talaga dakal i nadduman ni Jehova kani Satanas, ta puru interes laman ni Satanas i kayàna nikaw! Egga kari meyawa ni Satanas tu mannanayun nga benefisio ta mangurug sa? Kakuruganna, awan vuluvuga talaga. Awan tu makasta nga ipadumugna anna awan tu iddanamana. Kunnasina nga iyawa i gannug nga awan gamma sa? Marake nga pattuppalan laman i meyawana nikaw, megafu ta yatun i pappangetanna!​—Nep. 20:10.

20. Anni mawag nga kuan na abbing tapenu mapprogreso yaya mappange ta dedikasion anna bawtismo? (Innan i kahon nga “ Makoffun Tapenu Mammanakam Ka ta Espiritual.”)

²⁰ Manawag nga i paddedika kani Jehova i pinakamakasta nga desision nga kuammu. Preparadu ka kari ngana nga kuan yaw nga dakkua? Nu kunnatun, ari ka maganassing. Ngem nu mawagmu paga i aru nga tiempo, usammu i suhestion ira taw nga artikulo tapenu mapprogreso ka paga. Nitura ni Pablo ta taga-Filipos ira: “Yaw laman i mawag: tu bala-balinattam i mattolay segun ta tuttuddu ira nga tuttuttulat-tam adde sangoye.” (Fil. 3:16) Nu tuttulammu yatun nga tabarang, kayana kagian nga itulu-tuloymu i mapprogreso, ari mabbayag, kayàmu ngana gapa i maddedika kani Jehova anna mappabawtiso.