1, 2. (a) Ngatta magayaya i totolay na Dios ta maddaggun? (b) Kunnasi moffunan na magana anna elder ira i abbarabbing tapenu malippawada i kebalinan na bawtismo?

“AMMAMMU taka ngana mamegafu paga turi ta neyana ka,” kunna Cristiano nga elder ta 12 anios nga si Christopher, anna “magayaya ngà makaginna nga kayamu ngana i mappabawtiso. Kayà ku mammuan, ‘Ngatta kayamu nga kuan yatun?’ ” Egga  punto na pakkiavu na elder. Siempre, magayaya tam nga masingan i rinivu nga abbarabbing kada ragun ta interu mundo nga mappabawtiso. (Ecl. 12:1) Kayà gapa siguraduan na Cristiano ira nga magana anna elder nga ari laman tu boluntario yatun nga desisiodda, nu ari, malippawada paga i kebalinanna yatun.

² Kagian na Biblia nga gafu paga laman na Cristiano nga pattolay i dedikasion anna bawtismo. Tatun nga tiempo maekspiriensa na Cristiano ira i bendision ni Jehova kunne na gapa i pangokkontra ni Satanas. (Prov.10:22; 1 Ped. 5:8) Yari tu iyetubangngan na magana nga ituddu ta ánada i kebalinan na pabbalin tu disipulo ni Cristo. Ta abbarabbing nga ari tu Cristiano i maganada, meddu nga uffunan ira na elder tapenu malippawada i kebalinan na pabbalin tu disipulo. (Bibbigan i Lucas 14:27-30.) Nu kunnasi nga mawag i plano ta pappataddag tu balay, mawag gapa i papprepara tapenu matalo nga makapasserbi kani Jehova “adde ta panuppalan.” (Mat. 24:13) Anni i mawag nga kuan na abbarabbing tapenu determinadu ira nga masserbi kani Jehova ta interu nga pattoleda? Innattam.

3. (a) Anni i ituddu nittam na kinagi da Jesus anni Pedro meyannung ta bawtismo? (Mat. 28:19, 20; 1 Ped. 3:21) (b) Anni ira nga pakkiavu i gigiammuattam, anna ngatta?

³ Tadday ka kari nga abbing nga mayà ngana mappabawtiso? Nu kunnari, makomendakka! Dada-dakal nga pribilehio i mabawtisowan bilang tadday nga Saksi ni Jehova. Fuera paga tatun, mekiddaw ta Cristiano ira i bawtismo, anna importante yaw ta kapaliag. (Mat. 28:19, 20; 1 Ped. 3:21) Megafu ta napafutuan nga kayamu nga tuppalan i promesam kani Jehova, kayamu nga preparadu ka taw nga importante nga dakkua. Mawag gafu nga gigiammuammu tu mapia i tumunug nga tallu nga pakkiavu tapenu mammuammu nu preparadu ka ngana ta bawtismo: (1) Manakam ngà ngana kari nga maddesision? (2) Personal kari nga desisiokku yatun? (3) Mantindiakku kari i kebalinan na pabbalin nga dedikadu kani Jehova? Gigiammuattam yaw ira nga pakkiavu.

4, 5. (a) Ngatta ari laman nga para ta adulto i bawtismo? (b) Anni i kebalinanna para ta Cristiano i pabbalin tu manakam?

⁴ Awan tu nakagi ta Biblia nga adulto onu danuri ari tu menor-de-edad laman i awayyana nga mappabawtiso. Mabibbig ta Proverbio 20:11: “Maski i abbing ay mannammuan gukaban na kukukuanna, nu marenu anna makasta i konduktana.” Maski abbing paga i tadday, awayyana ngana mantindian i kebalinan na pagangngua tu mapia anna paddedika ta Namaratu sa. Yatutta i bawtismo ay importante anna mepangngo nga dakkua para ta abbing nga manakam anna naddedika ngana kani Jehova.​—Prov. 20:7.

⁵ Anni i kebalinan na manakam ngana? Ari laman tu pisikal i tukuyan na kinamanakam. Kagian na Biblia nga i manakam nga totolay ay “napenam ngana nga maningan ta nadduman na mapia anna marakay.” (Heb. 5:14) Yari tu ammu na manakam nga totolay i mapia ta mata ni Jehova anna napafutuan i determinasiodda nga tuttulan yatun. Yatutta ari ira babbasta nga matenta nga kuan i mali; onu mawagda paga i kanayun nga makagianan nga kuan nu anni i fustu. Rasonable gafu nga mekiddaw ta abbarabbing nga mappabawtiso nga itaddaggadda i estandarte na Dios maski nu ariadda kavulu i maganada onu i adulto ira.​—Ikumpara i Filipos 2:12.

6, 7. (a) Anni i mariga nga nepa-arubang kani Daniel ta Babilonia? (b) Kunnasi nga nipasingan ni Daniel i kinamanakam?

⁶ Talaga kari nga mepasingan na abbarabbing i kunnatun nga kinamanakam? Gigiammuattam i ehemplo ni Daniel ta Biblia. Awayyana tu menor-de-edad paga laman yaya turi ta fuersadu nga neyarayyu yaya ta maganana tapenu maddian ta Babilonia. Nattolay yaya kavulu i totolay nga kuruga neruma i pagimammada ta kebalinan na mapia anna marake. Egga paga i mariga nga nepa-arubang sa: Espesial i pattratu sa ta Babilonia. Kakuruganna, tadday yaya ta abbarabbing nga napili nga masserbi ta patul! (Dan. 1:3-5, 13) Gittana egga mas makasta nga oportunidad ni Daniel ta Babilonia nga arianna malegan nu egga yaya ta Israel.

⁷ Anni i reaksion na mabbing nga si Daniel? Natenta kari yaya ta riku anna kasta na paddia-paddian ta Babilonia? Nipamavulunna kari nga ulian na bagu nga paddiananna i kata-katolena onu pakkafian i pangurugna? Ari vuluvuga! Kunnaw i kagian na Biblia turi ta egga ta Babilonia si Daniel: “Nipafutuna i determinasionna nga arianna dapingan i baggina” tu maski anni nga egga koneksionna ta falso nga paddayarayaw. (Dan. 1:8) Nerumu-ruma i kinamanakam ni Daniel!

8. Anni i magigiammum ta ehemplo ni Daniel?

⁸ Anni i magigiammum ta ehemplo ni Daniel? I tadday, itaddaggan na manakam nga tolay i pangurugna. Ari tu kagitta yaya na turku onu uringan, nga manguli i kolorna tapenu megitta ta pallevuna. Ari yaya magakto nga kofun na Dios ta Kingdom Hall ngem kofun gapa na mundo ta eskuela. Imbes nga mabi laman yaya nga manguli, itaddagganna lallagu i pangurugna maski nu mapurueban yaya.​—Bibbigan i Efeso 4:14, 15.

9, 10. (a) Kunnasi nga mabenefisiowan i abbing nu panonotanna nu kunnasina nga inarubang i nikapurueba na pangurugna? (b) Anni i kebalinan na bawtismo?

⁹ Siempre, awan tu perfekto nittam. Makaliwa tam ngamin​—abbing man onu mannakam. (Ecl. 7:20) Ngem megafu ta kayamu i mappabawtiso, masirib nga panonotammu nu kunnasi kadeterminadum nga tuttulan i estandarte ira ni Jehova. Kunnasim  magukug i kaladdana yatun nga determinasiommu? Iyavumu ta baggim, ‘Anni ngana kari i nakuà meyannung ta panuttul ta estandarte ira ni Jehova?’ Nonopammu nu kunnasim inarubang i kapurueba ira ta pangurugmu. Nepasingammu kari nga mapaddumam i mapia ta marake? Kunnasi nu kagitta ni Daniel nga espesial i pattratu nikaw na mundo ni Satanas? Mawayyam kari nga ‘aleran i ikaya na Yafu nga ipakua nikaw’ maski nu mekontra i uray na Dios ta kayamu nakuan nga kuan?​—Efe. 5:17.

¹⁰ Ngatta mawag tu tabbagammu yaw ira nga direkta nga pakkiavu? Makoffun yatun nikaw tapenu malippawamu nu kunnasi kaserioso i bawtismo. Kagitta na nagigiammum ngana, kebalinan na bawtismo nga nagangngua ka tu serioso nga tabba kani Jehova mismu. Nitabbam nga interu-futu nga ayatan anna passerbiammu yaya adde noka. (Mar. 12:30) Mawag tu determinadu nga tuppalan na ngamin nga mappabawtiso yatun nga promesa.​—Bibbigan i Eclesiastes 5:4, 5.

11, 12. (a) Anni i mawag nga siguraduan na mannonono nga mappabawtiso? (b) Anni makoffun nikaw tapenu fustu i pagimammamu ta unnug ni Jehova ta bawtismo?

¹¹ Kinagi na Biblia nga “sigga-paran nga mevulu” i totolay ni Jehova maski i abbarabbing. (Sal. 110:3) Nu kayà ngana na tadday i mappabawtiso, mawag tu siguraduanna nga personal nga desisionna yatun. Kawagan nga usitakkammu i baggim. Ngatta? Awayyana tu espesial i sirkumstansiam ta kabbimmu. Angngariganna, awayyana gapa nga napadakal ka nga Saksi i maganamu.

¹² Ta nappasa ira nga dagun, aru ngana i nasingammu nga nappabawtiso​—kasiddagunammu anna maski paga mismu kafamiliam. Nu kunnatun i situasiommu, anni i pagimmugurammu? Ariammu nonopan nga mawagmu ngana i mappabawtiso megafu ta dakal ka ngana anna kuan yatun na ngamin nga mabbing. Anni i mawag nga kuammu tapenu masiguradu nga mapattalupaddiammu i fustu nga pagimamma ta unnug ni Jehova ta bawtismo? Kanayummu nga nonopan tu mapia i rason ira nu ngatta importante i mappabawtiso. Ta kakuruganna, masingan taw nga artikulo anna ta tumunug i aru nga makasta nga rason.

13. Kunnasim mammuan nu napafutuan i desisiommu nga mappabawtiso?

¹³ Egga ira i makoffun nikaw tapenu mannammuammu nu napafutuan i desisiommu nga mappabawtiso. Angngariganna, masingan ta pakimallomu ira nu napafutuan i pakkaragamu ta passerbi kani Jehova. Mepasingan nu kunnasi i kadukko na relasiommu kani Jehova nu mamippiga anna kunnasi ka-espesipiko i pakimallomu ira sa. (Sal. 25:4) I Biblia i tadday nga importante nga gannug nga usu-usan ni Jehova tapenu matabbag i pakimallo tam ira. Yatutta, i paggigiammum ta Biblia i mangipasingan nga talaga kayamu nga maddukko i relasiommu kani Jehova anna napafutuan i passerbim sa. (Jos. 1:8) Iyavumu ta baggim: ‘Kunnasi ka-espesipiko i pakimallo ku ira? Regular kari nga gigiammuakku i Biblia?’ Nu egga i paddayarayaw na familianu, iyavumu ta baggim: ‘Sussuportakku kari yatun nga unnug?’ I tabbagmu taw ira nga pakkiavu i makoffun nikaw tapenu masingammu nu personal nga desisiommu i mappabawtiso.

14. Anni i nadduman na dedikasion ta bawtismo?

¹⁴ Ari ammu na karuan i nadduman na dedikasion anna bawtismo. Angngariganna,  kagian na karuan nga abbing nga naddedika ngana ira ngem manakida paga i mappabawtiso. Fustu kari yatun? Nu maddedika i tadday, kakkagianna kani Jehova nga masserbi yaya sa adde noka. Ta bawtismo, ipasingan na tadday nga dedikado ngana yaya. Yatutta i bawtismo ay publiko nga pangilammuyag ta pribado nga dedikasiommu kani Jehova gukaban na pakimallo. Nigem mappabawtiso, kawagan nga nalippawamu ngana i kebalinan na dedikasion.

15. Anni i kebalinan na dedikasion?

¹⁵ Nu naddedika ka ngana kani Jehova, kayana kagian nga ariammu ngana kukua i baggim. Nipromesam kani Jehova nga pagolluammu i urena nige na maski anni laman nga gannug ta pattolem. (Bibbigan i Mateo 16:24.) Serioso ngamin i promesa, mas ngana nu nappromesa ka kani Jehova! (Mat. 5:33) Kunnasim nga mepasingan tu ariammu ngana kukua i baggim, nu ari, kukua naka ngana ni Jehova?​—Roma 14:8.

16, 17. (a) Anni i kaya na kagian na ariammu ngana kukua i baggim? (b) Nu naddedika i tadday kani Jehova, gittana kakkagianna i anni?

¹⁶ Angngariganna, iniddannaka na kofummu tu kotse. Niyawana nikaw i rehistrona anna kinagina: “Kuam ngana i takay.” Ngem kunnasi nu kinagina paga: “Sakan i mamappan ta annusi, anna sakan i mad-drive, ari tu sikaw.” Anni matagenomu tatun nga “regalu”? Anni gapa makagim ta narregalu?

¹⁷ Nonopammu nu anni i ekspektan ni Jehova ta tadday nga naddedika sa, tapus kagianna: “Iyawa ku nikaw i inango ku. Sikaw ngana makakkua niakan.” Kunnasi nu doble-kara i pattolena? Awayyana nga maki-date yaya ta ari nga Saksi. Kunnasi nu daralan na alawatanna nga trabahu i iskediul na palayyagayya onu pagatende ta study ira? Ari kari nga gittana ipappappanna i annusi na kotse? Nu naddedika i tolay kani Jehova, gittana kakkagianna: “Sikaw ngana i makakkua niakan, ari ngana tu sakan. Nu ari parehu i kaya ku ta kayamu, kanayun nga matuttul nu anni i kayamu.” Turi ta egga ta davvun si Jesus, kunnatun i pagimammana. Kinagina: “Ta minulug ngà nga naggafu ta langi tapenu kuak-ku i uray na naddog niakan, ari tu i urè laggapa.”​—Juan 6:38.

18, 19. (a) Segun kada Rose anni Christopher, ngatta pribilehio nga mattuppal ta aru nga bendision i pabbalin nga bawtisado? (b) Anni makagim ta pribilehio nga bawtismo?

¹⁸ Manawag nga serioso nga desision i bawtismo nga ari nakuan nga tagilappawan na maski sinni. Kunnari gapa, dakal nga pribilehio i maddedika anna mappabawtiso. I abbarabbing nga mangaya kani Jehova anna malippawada i kebalinan na dedikasion, siguradu nga mappabawtiso ira; ariadda mabbabawi ta desisiodda. “Ideddukakku si Jehova anna i passerbi sa i kuruga mamagayaya niakan,” kinagi ni Rose, bawtisado nga tinedyer. “I pappabawtiso paga laman i pinakasiguradu tu desision nga kingnguà.”

¹⁹ Kunnasi gapa si Christopher ta gafu na artikulo? Fustu kari i desisionna nga mappabawtiso turi 12 anios paga laman yaya? Arianna pinabbabawyan i dedikasion anna bawtismona. Kuruga appresianna yatun. Disi-siete i dagunna turi ta narregular payunir yaya, anna nabbalin yaya nga ministerial nga aripan turi ta 18 anios. Ta maddaggun, Bethelite ngana yaya. Kinagina: “Fustu i desisiokku nga mappabawtiso. Napannu i pattolè tu makakontento nga trabahu kani Jehova anna ta organisasionna.” Nu kayamu ngana mappabawtiso, kunnasi ka makaprepara? Tabbagan yatun na tumunug nga artikulo.