1, 2. (a) Anni nga karatula i aru ngana i napaliagna nga inango? (Innan i letratu ta gafu na artikulo.) (b) Anni i giya nga makapaliag ta totolay na Dios?

“STOP, LOOK, LISTEN.” Aru ngana i napaliag megafu tatun ira nga uvovug. Maturu nga 100 dagun ngana i nappasa, aru i kunnatun nga karatula nga egga ta dian na riles na tren ta North America. Ngatta? Tapenu ari nga aksidente nga madumpar na tren i takay ira nga maddalan ta riles. Wan, nakapaliag ngana tu inango ira i panuttul tatun nga karatula.

² Ari laman nga basta mangipay tu karatula si Jehova. Umarubang yaya ta totolena, gittana ituttudduna nira nu kunnasi maddetan i mannanayun nga inango anna iyarayyuna ira ta peligro. Kagittana i minaggiddu nga pastor ta karneruna ira, nga igiyana ira ta fustu nga direksion anna iyarayyuna ira ta peligroso ira nga dalan.​—Bibbigan i Isaias 30:20, 21.

3. Ngatta patay i pappangetan na totolay?

³ Nabayag ngana mangiyayawa tu espesipiko ira nga instruksion anna giya si Jehova. Angngariganna, ta hardin na Eden,  nangiyawa si Jehova tu klaro ira nga instruksion nga mangigiya ta totolay tapenu mattolay ira nga mannanayun anna magayaya. (Gen. 2:15-17) Nu sinuttul laman da Adan anni Eva i giyana, nalillitadda nakuan i kaddaraddam nga resultana​—i pattolay nga napannu tu taki anna nattuppal ta pateda anna awan ngana tu iddanamada. Imbes nga mattuppal, mas lallagu nga gininna ni Eva i tabarang na ordinario nga ayam. Nagginna gapa sa si Adan, ta boses na tadday nga mortal nga tolay. Ariadda sinuttul i pangigiya na minaggiddu nga yamada. Yatutta patay i pappangetan na totolay.

4. (a) Ngatta mawag i bagu ira nga panuttulan kabalin na Delubio? (b) Kunnasi nga nipasingan na panguli i pagimamma na Dios?

⁴ Turi ta tiempo ni Noe, nattuppal ta kapaliag i giya ni Jehova. Kabalin na delubio, nangiyawa si Jehova tu espesipiko nga pangigamma meyannung ta daga. Ngatta mawag yatun? Megafu ta bagu ira nga situasion. Ipamavulun ngana ni Jehova nga kuman i totolay tu pattag na ayam. Yatutta egga bagu ira nga panuttulan: “I pattag nga egga inangona​—i dágana​—ariannu kanan.” (Gen. 9:1-4) Manawag nga nipasinganna yatun nga panguli i pagimamma ni Jehova meyannung ta kukuana​—i inango. Megafu ta yaya i Namaratu anna Minangngiyawa-Inango, yaya i egga kepangngattanna nga mamadday tu bilin meyannung ta inango. Angngariganna, nidobna ta totolay nga ariadda mamatay tu kassittoleda. Imammatan na Dios nga sagrado i inango anna i daga, yatutta panabbaganna i maski sinni nu ari fustu i pangiyusada tatun.​—Gen. 9:5, 6.

5. Anni i gigiammuattam, anna ngatta?

⁵ Gigiammuattam i karuan nga angngarigan nu kunnasi i pangigiya na Dios ta nappasa ira nga siglo. Yatun i mamasikan ta determinasiottam nga tuttulan i pangiyorollu ni Jehova mappange ta napabagu nga mundo.

6. Ngatta importante nga tuttulan na totolay na Dios i Mosaiko nga Dob, anna anni nakuan i pagimamma na Israelita ira tatun?

⁶ Ta kaggawan ni Moises, kawagan i manawag ira nga panuttulan ta mepangngo nga kondukta anna ta fustu nga paddayarayaw. Ngatta? Egga mangana i panguli na situasion. Ta maturu nga dua siglo, nattolay i gaka ni Jacob ta pammaguray na Ehipto​—nasion nga napannu tu paddayarayaw ta natay, imahe ira, anna tanakuan paga nga annangngua nga ari makedayaw ta Dios. Turi ta nakapanaw ira ta panattazzi na Ehipto, kawagan mangana i bagu ira nga panuttulan. Ari ngana nga aripan i totolay na Dios, nu ari, nasion nga egga i lallagurena. Mamegafu tatun, igiya ngana ira na Dob ni Jehova. Segun gapa ta karuan nga referensia, konektadu i kebalinan na Hebreo nga termino nga “dob” ta “itunung, igiya, ituddu.” Nabbalin nga proteksion i Mosaiko nga Dob kontra ta alinno nga moral anna relihioso nga estandarte na tanakuan nga nasion ira. Nu ginnan na Israel i Dios, malawada i bendisionna. Nu ariadda yaya ginnan, marake i resultana nira.​—Bibbigan i Deuteronomio 28:1, 2, 15.

7. (a) Ngatta nangiyawa tu giya si Jehova ta totolena? (b) Kunnasi nga nabbalin nga manangngal i Dob para ta Israel?

⁷ Egga paga tanakuan nga rason nu ngatta mawag i pangigiya. Ituddu na Dob i importante nga panguli ta uray ni Jehova. Yatun i paddattal na Mesias, si Jesu-Cristo. Mas paga nipasingan na Dob i kina-imperfekto na Israelita ira. Niperaddamna yaw nga kawagan i tavvu, i mepangngo nga sakrifisio nga mangalsa ta katagarulian ira. (Gal. 3:19; Heb. 10:1-10) Nakoffun paga i Dob tapenu ari magappo i linia nga paggafuan na Mesias anna mannammuan nu sinni yaya sonu paddattalna. Nasserbi yatun nga temporario  nga gumattuddu onu “manangngal adde ta dattal ni Cristo.”​—Gal. 3:23, 24.

8. Ngatta mawag nga mappagiya ittam ta prinsipio ira ta Mosaiko nga Dob?

⁸ Mabenefisiowan ittam gapa nga Cristiano ta panuttulan nga neyawa gukaban na Mosaiko nga Dob ta Israel gari. Kunnasi? Awayya tam magimmang anna innan i prinsipio ira tatun nga Dob. Maski nu ariattam ngana nelagum tatun ira nga dob, imammatattam yatun ira nga mapattalakkan nga giya ta inaggaw nga pattolay anna paddayarayaw tam ta masanto nga Dios nga si Jehova. Nipeturana yatun nga dorob ta Biblia tapenu egga magigiammu tam, megiya ittam gukaban ira na prinsipio, anna appresian i atannang ira nga estandarte ta moral para ta Cristiano. Ginnan i kinagi ni Jesus: “Naginna nu tu netuddu gari ta totolay. ‘Ari ka manallaw onu makidallaw.’ Ngem kagiak-ku nikamu sangoye: i sinni laman nga lalaki nga patallungan na ta nono na i maritta nu innan na i babay, nakaliwa ngana ta panallaw.” Yari tu ari tam laman lillitan i pagangngua tu immoralidad, nu ari, maski paga i appana-panono nga mekunnay tatun.​—Mat. 5:27, 28.

9. Anni i bagu nga situasion na totolay na Dios yari tu kawagan i bagu nga instruksion?

⁹ Ta paddattal ni Jesus bilang Mesias, kawagan i bagu nga instruksion anna pangipakanawag paga ta gakkag ni Jehova. Ngatta? Megafu ta inalsana ngana i faborna ta nasion na Israel anna pinilina i kongregasion Cristiano turi 33 C.E. Yari tu bagu mangana i situasion na totolay na Dios.

10. Ngatta neddan tu bagu nga dorob i kongregasion Cristiano, anna anni i nerumanna ta neyawa ta Israelita ira?

¹⁰ Turi ta ollu siglo, nakalawa tu bagu onu mas aru nga instruksion ta paddayarayaw anna kondukta i totolay na Dios nga nattallung ta unnug na Cristiano. Napalagum ta bagu nga pakkasinabban yaw ira nga totolay na Dios. Neyawa i Mosaiko nga Dob ta tadday nga nasion​—nasion na Israel gari. Ngem naggafu ta naddumu-ruma nga nasion anna paddia-paddian i totolay ta espiritual nga Israel. Kurug tu “i Dios ay arianna padduma-ruman i pangikakua na ta totolay. Ta alawatan na laman i sinni nga matunung anna minakkimoray sa.” (King. 10:34, 35) Nigiya na Mosaiko nga Dob i Israelita gari ta Nepromesa nga Davvun gukaban na dorob nga naka-ukit ta batu. Para ta espiritual nga Israelita, i “dob na Cristo” ay nebase ta prinsipio ira nga neyukit ta futuda. Magaplika anna mabenefisiowan i Cristiano ira ta “dob na Cristo” maski nu sitaw i paddianadda.​—Gal. 6:2.

11. Anni i dua nga aspeto na pattolay na Cristiano i afektan na “dob na Cristo”?

¹¹ Kuruga dakal i benefisio nga malawa na espiritual nga Israel ta giya na Dios gukaban na Anana. Nige nga nabuu i bagu nga pakkasinabban, nangiyawa si Jesus tu dua nga importante nga bilin. Egga koneksionna ta pallayyagayya i ollu. Nakafokus gapa i mekadua ta kondukta na disipulos ni Jesus anna nu kunnasi i pattratuda ta kapangngurugda. Para ta ngamin nga Cristiano yaw nga bilin; ta langi man onu ta davvun i iddanamada.

12. Anni i bagu meyannung ta pallayyagayya?

¹² Ikonsidera tam i pallayyagayya ta mapia nga dumug nga nibilin ni Jesus nga kuan na disipulosna. Bagu i proseso anna i kalawa na pangilayyagayya. Ta nappasa nga siglo, malawà i totolay na nasa-nasion nga masserbi kani Jehova nu umay ira ta Israel. (1 Pat. 8:41-43) Yatun ay nige na pinangiyawa ni Jesus tu bilin nga egga ta Mateo 28:19, 20. (Bibbigan.) Nebilin ta disipulos ni Jesus nga “umay” ira ta ngamin nga totolay. Ta aggaw na Pentecostes 33 C.E., egga ngana i ebidensia nga masingan ta panguli na  estratehiya ni Jehova​—i pallayyagayya ta interu mundo. Inuffunan na masanto nga espirituna i 120 miembro na bagu nga kongregasion nga maka-uvovug ta naddumu-ruma nga lengguahe na Judio anna proselita ira. (King. 2:4-11) Tumunug, minalawa i teritoriada nagadde ta Samaritano ira. Tapus, ta 36 C.E., nagadde i pallayyagayya ta nasion ira na ari nakugi nga Hentil. Awayyana nga makagim tu minalawa i teritoria nga malayyagayyan, namegafu ta “weg” onu grupo na Judio ira, nga nagadde ta “bebay” onu ta ngamin nga totolay.

13, 14. (a) Anni i kasali ta “bagu nga dob” ni Jesus? (b) Anni i magigiammu tam ta nipasingan ni Jesus nga ehemplo?

¹³ Innattam nu kunnasi i pattratu tam ta kapangngurug tam. Nangiyawa si Jesus tu “bagu nga dob.” (Bibbigan i Juan 13:​34, 35.) Yatun nga dob, arianna laman kebalinan nga ayatan i kataggi-tadday ta gagangay nga aspeto na inaggaw nga pattoletam. Kebalinanna gapa nga sigga-paran ittam nga isakrifisio i inango tam para ta kapangngurug tam. Ari nga nikiddaw yatun na Mosaiko nga Dob.​—Mat. 22:39; 1 Juan 3:16.

¹⁴ Nangipasingan si Jesus tu kapianan nga ehemplo. Nisakrifisiona i inangona megafu ta ayana ta disipulosna. Kebalinanna yatun nga kawagan nga matay yaya para ta disipulosna, anna sigga-paran gamma si Jesus nga matay. Ekspektanna nga sigga-paran gapa nga kuan yatun na disipulosna, kunne na gapa nittam. Awayyana nga massakrifisio anna matay tam paga lagu para ta kapangngurug tam ira.​—1 Tes. 2:8.

15, 16. Anni ira i bagu nga sirkumstansia tam, anna kunnasi nga igiggiya ittam na Dios ta maddaggun?

¹⁵ Nangiyawa si Jesus tu espiritual nga makan ta mepangngo nga tiempo ta totolena, neerulay ta natunno, i “mekatalo anna nannono nga doroban.” (Mat. 24:45-47) Kasali taw nga makan i importante ira nga instruksion megafu ta bagu ira nga sirkumstansia.

¹⁶ Egga tam ngana ta tiempo nga agalan na Biblia tu “pangurianan ira nga aggaw,” tapus mesimmu gapa ta mappange i ziga nga ari paga nesimmu namegafu gari. (2 Tim 3:1; Mar. 13:19) Fuera paga tatun, si Satanas anna i demoniona ira ay napatavvar anna netabbo ta utun na davvun nga narresulta tu pazziga-riga ta totolay. (Nep. 12:9, 12) Nebilin gapa nittam nga kuan i importante anna ari paga nesimmu gari nga pallayyagayya ta ngamin nga totolay anna lengguahe!

17, 18. Ngatta mattuppal tam nakuan ta instruksion nga meyawa?

¹⁷ Mawag nga usattam i rimienta ira ta pallayyagayya nga naggafu ta organisasion na Dios. Kayànu kari nga kuan yatun? Tuttuttulannu kari i giya nga meyawa ta study tam meyannung ta efektibo nga pangusa taw ira nga rimienta? Imammatammu kari nga naggafu yatun nga giya ta Dios?

¹⁸ Wan, tapenu kanayun nga malawa tam i bendision na Dios, mawag tu ginnattam tu mapia i ngamin nga instruksion nga meyawa gukaban na kongregasion Cristiano. Nu minattuppal tam ta maddaggun, makoffun yatun tapenu matuttul tam i instruksion ira nga meyawa ta daka-dakal nga ziga nga mamangultimo ta interu nga marake nga sistema ni Satanas. (Mat. 24:21) Kabalinna, mawag tam mangana i bagu nga instruksion ta pattolay ta davvun nga awan ngana i influwensia ni Satanas.

19, 20. Anni ira nga libru nga naluku i mavullag, anna anni i parresultanna?

¹⁹ Kawagan na nasion na Israel i bagu ira nga instruksion gukaban ni Moises. Turi kua, kawagan gapa yatun na kongregasion  Cristiano gukaban na “dob na Cristo.” Kagian gapa nittam na Biblia nga mavullag i libru ira nga naluku tapenu mangiyawa nittam tu instruksion meyannung ta pattolay ta napabagu nga mundo. (Bibbigan i Nepakannammu 20:12.) Awayyana nga netura taw ira nga libru i kiddaw ira ni Jehova ta totolay tatun nga tiempo. Gukaban na paggigiammu taw, mammuan noka na ngamin nga totolay, kunne na gapa ta napaginnolay ira, i uray na Dios para nira. Siguradu nga mangiyawa yatun nittam tu mas monag nga pakalippawa ta appana-panono ni Jehova. Gukaban na pangigiya na umunu-unag nga pakalippawa ta Biblia kunne na gapa ta melammuyag noka ta libru ira nga naluku, siguradu nga danuri maddian ira ta Paraiso, tratuadda i kasittoleda nga egga aya, respeto, anna dignidad. (Isa. 26:9) Fugurammu i programa nga panuddu nga makua noka gukaban na pangigiya na Patul, si Jesu-Cristo!

²⁰ Mannanayun nga inango i aggi-innag ta ngamin nga manuttul ta “netura ta libru ira.” Danuri mattalupaddian nga matalo ta Dios sonu mappasadda i ultimo nga kapurueba, permanente nga itura ni Jehova i ngagadda ta libru na inango. Awayyana nga yatun i pattuppalattam! Yatutta MAGIMMANG tapenu gigiammuan i Biblia, INNAN anna alippawatan i kebalinanna, anna MAGGINNA gukaban na panuttul ta pangigiya na Dios. Nu kuattam yatun, siguradu nga mapaliag tam sonu dakal nga ziga anna magaya-ayaya ta mannanayun nga katuddu tam meyannung ta masirib anna minangngaya nga Dios tam, si Jehova.​—Ecl. 3:11; Roma 11:33.