1-2. Kagitta na mabibbig ta Kingngua 8:27-31, 35-38, anni i namaguyu ta ofisial nga Etiope tapenu mappabawtiso?

KAYÀ mu kari i mappabawtiso bilang tadday nga disipulo ni Cristo? Aya anna appresasion i namaguyu ta aru tapenu kuan yatun. Ikonsidera i angngarigan na tadday nga ofisial nga nasserbi ta reyna na Etiopia.

² Insigida nga nappabawtiso i Etiope turi ta nagigiammuna ta Katurakan nga mawag tu kuanna yatun. (Bibbigan i Kingngua 8:27-31, 35-38.) Anni i namaguyu nisa? Siguradu nga inappresiana i Uvovug na Dios megafu ta bibbibbiganna i libru na Isaias durante nga nakatakay yayya ta karuahe. Anna turi ta kiniyuvovug yayya ni Felipe, inappresia natun nga lalaki i kingngua ni Jesus para nisa. Ngatta tamma nabbiahe yatun nga ofisial mappange ta Jerusalem? Megafu ta egga ngana i pangayana kani Jehova. Ngatta ammu tam yatun? Namegafu ngana yayya nga maddayaw kani Jehova ta Jerusalem. Posible nga nilikuran ngana naw nga lalaki i relihion nga neyanakanna anna pinegafuananna ngana i maddayaw ta kurug nga Dios kavulu i dedikadu nga nasionna. Yatun gabbalaman nga aya kani Jehova i namaguyu nisa nga kuan i tadday paga nga importante nga dakkua​—i mappabawtiso anna mabbalin tu disipulo ni Cristo.​—Mat. 28:19.

3. Anni i posible nga makefugag ta tadday nga mappabawtiso? (Innan i kahon nga “ Anni i Klase na Futum?”)

³ Aya kani Jehova i mamaguyu nikaw nga mappabawtiso. Ngem aya gapa i posible nga makefugag nikaw nga kuan yatun. Kunnasi? Innattam i karuan nga angngarigan. Baka kuruga ayatammu i ari tu Saksi nga kafamiliam anna kokkofummu,  anna mavurukka nga nu mappabawtiso ka, ikalussaw daka. (Mat. 10:37) Onu baka neyugalim ngana i annangngua nga ikalussaw na Dios, anna marigatakka nga iyemmang danatun. (Sal. 97:10) Onu nakasanayammu nga masselebra tu kostumbre ira nga konektadu ta falsu nga relihion. Baka magayayya ka nga daddamman i makasta ira nga nesimmu tatun ira nga selebrasion. Megafu tatun, baka marigatakka nga iyemmang i selebrasion ira nga ikalussaw ni Jehova. (1 Cor. 10:20, 21) Mawag gafu tu maddesisiokka, “Anni onu sinni i pinaka-ayatakku?”

4. Anni i primeru nga motibo tapenu mappabawtiso ka?

⁴ Aru nga makasta nga gannug i puedem nga ayatan anna appresian. Angngariganna, nige mu nakipaggigiammu ta Saksi ira ni Jehova, baka dati ngana nga ikakuam i Biblia. Ayatammu ngana gapa si Jesus. Sangawe ta nakilalam ngana i Saksi ira ni Jehova, baka kakayà mu ngana i makikavulu nira. Ngem ari tu megafu ta ayatammu danatun nga makasta nga gannug ay kebalinanna nga kayà mu ngana nga idedika i baggim kani Jehova anna mappabawtiso. I primeru nga motibo tapenu mappabawtiso ka ay i aya mu mismu kani Jehova nga Dios. Nu si Jehova i pinaka-ayatammu, ariammu ipamavulun i maski anni onu sinni nga makefugag nikaw ta passerbim nisa. Aya kani Jehova i mamaguyu nikaw nga mappabawtiso anna i makoffun nikaw tapenu makapattalupaddiakka nga matalo nisa kabalimmu mappabawtiso.

5. Anni ira nga pakkiavu i ikonsidera tam?

⁵ Kinagi ni Jesus nga mawag tu ayatattam si Jehova ta interu futu, kararua, nono, anna sikattam. (Mar. 12:30) Kunnasim magigiammu nga monag nga ayatan anna irespeto si Jehova? Nu pannonopattam i aya ni Jehova nittam, mapaguyu ittam nga ayatan gapa yayya. (1 Juan 4:19) Nu si Jehova i pinaka-ayatammu, anni paga nga pagimamma anna agguyu-guyu i makultibam? *

6. Segun ta Roma 1:20, anni i tadday nga makuam tapenu magigiammum i meyannung kani Jehova?

⁶ Gigiammuan i meyannung kani Jehova gukaban na pinaratuna. (Bibbigan i Roma 1:20; Nep. 4:11) Monag nga pannonopan i kinasirib nga masingan ta disenio na mulu-mula anna aya-ayam. Gigiammuan i meyannung ta makapabbaw nga nikaparatu na baggi tam. (Sal. 139:14) Tadday laman i bilag ta binillion ira nga bitun, ngem nonopan i enerhia nga nipay ni Jehova tatun. * (Isa. 40:26) Durante nga kuammu yatun, mas nga maponag i pangirespetom kani Jehova. Ngem i pakannammum nga masirib anna makapangngua si Jehova ay parte laman na fundasion na relasiommu nisa. Tapenu mapeggan tu maladda nga aya kani Jehova, mawag tu mas makilalam paga yayya.

7. Tapenu mas maponag i aya mu kani Jehova, ta anni ka nakuan nga kumbinsidu?

⁷ Kumbinsidu ka nakuan nga personal nga ikavurungan naka ni Jehova. Marigatakka kari nga kurugan nga i Namaratu ta langi anna ta davvun ay masingi-singan naka anna ikavurungan naka? Nu kunnatun, daddamman nga “ari tu arayyu [si Jehova] ta kataggi-tadday nittam.” (King. 17:26-28) ‘Usitakkanna i ngamin nga futu,’ anna ipromesana gapa nikaw i kunna nikagi ni David kani Solomon nga “nu alegammu yayya, ipamavulunna nga malegammu yayya.” (1 Cro. 28:9) Kakuruganna, i rason nu ngatta maggigiammu ka sangawe tu Biblia, ay  megafu ta kinagi ni Jehova, “niyaranni taka niakan.” (Jer. 31:3) Durante nga mas malippawa mu i ngamin nga kiningngua ni Jehova para nikaw, mas maponag i aya mu nisa.

8. Kunnasim mepasingan i appabalo mu ta aya ni Jehova?

⁸ I tadday nga makua tam tapenu mepasingattam i aya kani Jehova ay gukaban na pakibbida nisa ta pakimallo. Mas dumakal i aya mu ta Dios durante nga ikagim nisa i ikavurungammu ira anna mappabalo ka ta ngamin nga kukukuanna para nikaw. Mas paga nga maddukko i pakkofunnu dua ni Jehova durante nga masingi-singammu i panabbagna ta pakimallo mu ira. (Sal. 116:1) Mas makumbinsi ka nga malippawa naka. Ngem tapenu maddukko kani Jehova, mawag tu ammuammu i appana-panonona. Anna mawag tu ammuammu nu anni i kayàna nga kuammu. Mala mu laman yatun gukaban na paggigiammum ta Uvovugna, i Biblia.

9. Kunnasim mepasingan nga appresiammu i Biblia?

⁹ Gigiammuan nga appresian i Uvovug na Dios, i Biblia. Ta Biblia tam laman nga mabibbig i kinakurug meyannung kani Jehova anna i gakkagna para nikaw. Mepasingammu nga appresiammu i Biblia nu inaggaw nga bibbigammu yatun, mapprepara ka ta Bible study, anna nu iyaplikam i nagigiammum. (Sal. 119:97, 99; Juan 17:17) Egga kari i iskediul mu ta pabbibbig tu Biblia? Tuttuttulammu kari yatun nga iskediul anna siguraduammu kari nga inaggaw mu nga mabibbig i Biblia?

10. Anni i kuruga espesial ta Biblia?

¹⁰ Kuruga espesial i Biblia megafu ta makabibbig ka tatun tu rekord na totolay nga nakasingan mismu kani Jesus. Yatun laman i libru nga makkagi tu kurug meyannung ta kingngua ni Jesus para nikaw. Durante nga magigiammum i meyannung ta kinagi anna kingngua ni Jesus, siguradu nga magustuammu i makikkofun nisa.

11. Anni i makoffun nikaw tapenu ayatammu si Jehova?

¹¹ Gigiammuan nga ayatan si Jesus tapenu dumakal i aya mu kani Jehova. Ngatta? Megafu ta perfekto nga naparigan ni Jesus i kualidad ira na Yamana. (Juan 14:9) Yatutta durante nga mas makilalam si Jesus, mas  malippawa mu anna maappresiam si Jehova. Nonopan i allo ni Jesus turi ira ta tattazzian na tanakuan—danuri pobre, mataki, anna awan tu awa-awayyada. Nonopammu gapa i makoffun ira nga nitabaranna nikaw anna nu kunnasi nakkasta i pattolem megafu ta pagginnam nisa.​—Mat. 5:1-11; 7:24-27.

12. Durante nga makilalam si Jesus, mapaguyu ka nga kuan i anni?

¹² Siguradu nga mas malladda i aya mu kani Jesus durante nga monag nga pannonopammu i sakrifisiona tapenu mapakoma i liwi-liwa tam. (Mat. 20:28) Nu malippawa mu nga sigga-paran nga natay si Jesus para nikaw, mapaguyu ka nga mabbabawi anna makkiddaw tu pamakoma ni Jehova. (King. 3:19, 20; 1 Juan 1:9) Durante nga ayatammu si Jesus anna si Jehova, gagangay laman nga kunnatun gapa i matageno mu ta tanakuan nga mangiddu nira.

13. Anni i niyawa ni Jehova para nikaw?

¹³ Gigiammuan nga ayatan i familia ni Jehova. Baka ari malippawa na ari tu Saksi nga kafamiliam anna dati nga kokkofummu nu ngatta kayà mu nga idedika i baggim kani Jehova. Baka kontraddaka paga lagu. Duffunan naka ni Jehova gukaban na pangiyawa nikaw tu wawwaragi ta kongregasion nga mabbalin tu familiam. Nu kanayukka makikavulu nira, mala mu i aya anna suporta nga kawagammu. (Mar. 10:29, 30; Heb. 10:24, 25) Baka duttal lagapa noka i tiempo nga makavulu mu i kafamiliam ta passerbi kani Jehova anna mattolay segun ta estandartena ira.​—1 Ped. 2:12.

14. Kagitta na mabibbig ta 1 Juan 5:3, anni i nammuammu meyannung ta estandarte ira ni Jehova?

¹⁴ Gigiammuan nga appresian anna iyaplika i estandarte ira ni Jehova. Nige mu nga nakilala si Jehova, awayyana nga egga i sarilim nga estandarte, ngem nammuammu ngana sangawe nga mas makasta i estandarte ira ni Jehova. (Sal. 1:1-3; bibbigan i 1 Juan 5:3.) Nonopan i tabarang na Biblia ta atawa nga lallaki, atawa nga babbay, mappagana, anna ta ána. (Efe. 5:22–6:4) Durante nga iyaplikam yatun nga tabarang, masingammu kari nga nakkasta i pattolay na familianu? Nabbalikka kari tu mas mapia nga tolay megafu ta sinuttul mu i tabarang ni Jehova meyannung ta klase nakuan na kofummu? Mas magayayya ka ngana kari sangawe? (Prov. 13:20; 1 Cor. 15:33) Siguradu nga wan i tabbag mu tatun ira nga pakkiavu.

15. Anni i makuam nu mawag mu i uffun ta pangiyaplika ta prinsipio ira na Biblia?

¹⁵ Nu mittan, baka marigatakka nga iyaplika i prinsipio ira na Biblia nga nagigiammum. Yari tu usu-usan ni Jehova i organisasionna tapenu mangiyawa tu nebase-Biblia nga material nga makoffun nikaw tapenu mapaddumam i fustu ta mali. (Heb. 5:13, 14) Nu bibbigan anna gigiammuammu yatun nga material, mammuammu nga makoffun yatun anna masingammu nu sitaw mu nga meyaplika yatun ta pattolem, anna siguradu nga mas maparanni ka ta organisasion ni Jehova.

16. Kunnasi nga inorganisa ni Jehova i totolena?

¹⁶ Gigiammuan nga ayatan anna suportan i organisasion ni Jehova. Inorganisa ni Jehova i totolena ta kada kongregasion. Anna si Jesus nga Anana, i uluda ngamin. (Efe. 1:22; 5:23) Sinunno ni Jesus i baddi nga grupo na nazelugan nga lallaki tapenu irollu i pangorganisa ta trabahu nga ikayana nga metuppal ta maddaggun. Tinukoy ni Jesus yatun nga grupo na lallaki bilang i “mekatalo anna nannono nga doroban,” anna seriosowadda i responsibilidadda nga pakanan anna protektakka ta espiritual. (Mat. 24:45-47) Tattangngallan naka na matalo nga aripan gukaban na paniguradu nga egga i kualipikadu ira nga elder nga mangipastor nikaw. (Isa. 32:1, 2; Heb. 13:17; 1 Ped. 5:2, 3) Sigga-paran i elder ira  nga kuan i adde na mawayyada tapenu banna-bannayakka, anna uffunaddaka nga mas maddukko kani Jehova. Ngem i tadday ta pinaka-importante nga gannug nga meyuffudda nikaw ay nu kunnasi tudduan i tanakuan meyannung kani Jehova.​—Efe. 4:11-13.

17. Segun ta Roma 10:10, 13, 14, ngatta ilayyagayya tam ta tanakuan i meyannung kani Jehova?

¹⁷ Uffunan i tanakuan nga gigiammuan nga ayatan si Jehova. Kinagi ni Jesus ta disipulosna nga tudduadda i tanakuan meyannung kani Jehova. (Mat. 28:19, 20) Baka mattuppal ittam tatun nga bilin gafu laman ta obligasion. Ngem durante nga dumakal i aya mu kani Jehova, matageno mu gapa i natageno da apostol Pedro anni Juan nga nakkagi: “Arian na awayya tu ariam-mi nga ilammuyag i nasingan anna nagigginna mi ira.” (King. 4:20) Kuruga magayayya ittam nu egga i moffunattam nga ayatan si Jehova. Nonopan ngana laman i ayayya na evanghelisador nga si Felipe turi ta naduffunanna i Etiope nga gigiammuan i kinakurug ta Katurakan anna nappabawtiso! Nu parigammu si Felipe anna tuttulammu i bilin ni Jesus nga mallayyagayya, mapakurug mu nga kayà mu i mabbalin tu Saksi ni Jehova. (Bibbigan i Roma 10:10, 13, 14.) Tatun nga punto, siguradu nga iyavu mu gapa i neyavu na Etiope: “Egga paga kari i makagurun ta kabawtisò?”​—King. 8:36.

18. Anni i ikonsidera tam ta tumunug nga artikulo?

¹⁸ Kuammu i pinaka-importante nga desision ta pattolem sonu maddisidi ka nga mappabawtiso. Megafu ta serioso nga dakkua yatun, mawag tu memmugug mu nga ikonsidera nu anni i kebalinan natun. Anni i mawag tu ammuammu meyannung ta bawtismo? Anni i mawag mu kuan nige anna kabalin na bawtismo? Matabbag danatun nga pakkiavu ta tumunug nga artikulo.