1. Anni nga espesipiko nga bilin i niyawa ni Jesus ta disipulosna? (Innan i letratu ta vungun.)

TA GABI nige na patay ni Jesus, nangiyawa yayya tu espesipiko nga bilin ta disipulosna. Kinagina nira: “Nu kunnasi na pangaya ku nikamu, mawag tu kunnatun gapa i pakka-aya-aya nu.” Niyammunna paga: “Nu egga nikamu i pakka-aya-aya, kannammuan ngamin na totolay tu disipulo takamu.”​—Juan 13:34, 35.

2. Ngatta importante nga makka-aya-aya ittam?

² Kinagi ni Jesus nga manawag nga masingan i kurug nga disipulosna nu ipasingadda i aya nga gitta na aya nga nipasinganna. Kurug yatun ta ollu nga siglo, anna kurug gapa adde sangawe. Yatutta kuruga importante nga makka-aya-aya ittam maski nu mariga!

3. Anni i gigiammuattam taw nga artikulo?

³ Imperfekto ittam ngamin yatutta mariga para nittam nga ipasingan i pakka-aya-aya tu napafutuan. Maski kunnatun, mawag tu parigattam si Cristo. Taw nga artikulo, gigiammuattam nu kunnasi makoffun i aya nittam tapenu mangirattal tu imammo, ari mangireruma, anna mamadulo. Durante nga magigiammu yaw nga material, iyavu ta baggim: ‘Anni i magigiammù ta wawwaragi nga ari nagimmang nga nangipasingan tu aya ta kataggi-tadday maski nu mariga?’

4. Segun ta Mateo 5:23, 24, ngatta kawagan nga makippakoma ittam ta wagi nga mataki i nonona nittam?

⁴ Nituddu nittam ni Jesus i importansia na pakippakoma ta tadday nga wagi nga mataki i nonona nittam. (Bibbigan i Mateo 5:23, 24.) Nipatalattona nga mawag tu pattalupaddianattam nga makasta i relasiottam ta tanakuan nu ikaya tam nga mapagayayya i Dios. Magayayya si Jehova nu kuattam i adde na mawayya tam tapenu makippakoma ta wawwaragi tam. Arianna alawatan i paddayaw tam nu mangipappan ittam tu taki na nono anna manaki tam maski i makippakoma.​—1 Juan 4:20.

5. Anni i namariga kani Mark nga makippakoma?

⁵ Baka marigatan ittam nga makippakoma. Ngatta? Ikonsidera tam i nesimmu kani Mark. * Natakitan yayya turi ta krinitika yayya na tadday nga brother anna nangikagi tu marake nga gannug meyannung nisa ta wawwaragi ta kongregasion. Anni i reaksion ni Mark? “Ariakku nafugaddan i baggì anna nakaporay ngà,” kunna. Ngem kabalinna, nabbabawi yayya ta kingnguana anna nakidispensa ta brother tapenu metoli i imammo. Ngem manaki na brother i makippakoma. Ta ollu, kinagi ni Mark, ‘Ngatta pagalaman ta makippakoma ngà mana nu arianna mabba ikaya?’ Ngem, pinagaram yayya na manangngal ta sirkito nga arianna magimmang. Anni i kingngua ni Mark?

6. (a) Kunnasi nga nakippakoma si Mark? (b) Kunnasi niyaplika ni Mark i Colosas 3:13, 14?

⁶ Turi ta inusito ni Mark i appana-panonona, nalippawana nga kurang i kinapakalinnona anna minappakatunung yayya. Narekunnisina nga mawagna ulian i ugalina. (Col. 3:8, 9, 12) Sigga-pakalinno mana nga inarannianna i brother anna nakkiddaw tu pamakoma megafu ta kingnguana. Namippiga paga nga nattura si Mark ta brother, nu sitaw nikagina i pabbabawina anna i pakkaragana nga mabbalin ira tu kofun uli. Nangiyawa  paga lagu si Mark tu regalu nga abbona tu magustuan na brother. Makaparaddam ta mataki lagapa i nono na brother tannisa. Maski kunnari, sinuttul lagapa ni Mark i bilin ni Jesus nga ayatan i wagina anna pakoman yayya. (Bibbigan i Colosas 3:13, 14.) Maski nu ari alawatan na tanakuan i pangikagumattam nga makippakoma, nu ayatattam i totolay gitta ni Jesus, kanayuttam nakuan ira nga pakoman anna ipakimallo nga metoli uli i makasta nga relasiottam nira.​—Mat. 18:21, 22; Gal. 6:9.

7. (a) Anni i nipagaram nittam ni Jesus? (b) Anni nga mariga nga situasion i neparubang ta tadday nga sister?

⁷ Pagaramman ittam ni Jesus nga kanayuttam nakuan nga tratuan i tanakuan segun ta kayà tam nga katratu. Kinagina paga nga ariattam laman ayatan danuri mangaya nittam. (Luc. 6:31-33) Maski nu ari kuruga mesissimmu, kunnasi nu egga tadday nga wagi nga lillillitan naka anna manaki naka nga pansinan? Kunnatun i naekspiriensa ni Lara. Inistoriana: “Ariannà pinansin na tadday nga sister, ariakku ammu nu ngatta. Fermi i stress ku anna awan tu ganas ku nga umay ta study ira.” Ta ollu, nirason ni Lara: ‘Awan tu liwa ku. Anna aru mabba ta kongregasion i marreklamo ta dumu-duma nga ugali naw nga sister.’

8. Anni i kingngua ni Lara tapenu makippakoma, anna anni i magigiammu tam ta ekspiriensana?

⁸ Nagangngua si Lara tu dakkua ira tapenu makippakoma. Nakimallo yayya kani Jehova anna nadisidina nga makibbida ta sister. Nabbidadda i problema, nakkagakko ira, anna nakkapakoma ira. Gittana mapia ngana ngamin i gannug. Kunni Lara: “Ngem turi kua, ariannà mana pappansinan na sister gitta na kukukuanna ta gafu. Kuruga nadismaya ngà.” Ta gafu, natageno ni Lara nga ari yayya magayayya adde ta ari manguli i sister. Ngem nalippawana gabbalaman nga i kapianan nga makuana ay i tulu-tuloy nga pangayana tatun nga sister anna sigga-paran nga ‘pamakoma’ nisa. (Efe. 4:32–5:2) Neraddamman ni Lara nga i kurug nga Cristiano nga aya ay ‘ari nga mangipappan tu taki na nono, pasa-pasensianna i ngamin nga gannug, kuruganna i  ngamin nga gannug, iddanamanna i ngamin nga gannug, attammanna i ngamin nga gannug.’ (1 Cor. 13:5, 7, NW) Ari ngana mavurung si Lara ta problema. Ta pappasa na tiempo, minakkikofun ngana i sister nisa. Nu itulu-tuloy mu nga pakoman anna ayatan i wawwaragim, makapakkomfiansa ka nga ‘makitappaddian nikaw i Dios nga minaggiddu anna mangiyawa tu imammo.’​—2 Cor. 13:11.

9. Segun ta Kingngua 10:34, 35, ngatta ari ittam nakuan mangireruma?

⁹ Ari mangireruma si Jehova. (Bibbigan i Kingngua 10:34, 35.) Nu ari ittam mangireruma, mapakurug tam nga ánana ittam. Tuttuppalattam paga i bilin nga ayatan i kasittoletam gittana pangaya ta baggi tam, anna mapattalupaddiattam i imammo ta wawwaragi tam.​—Roma 12:9, 10; Sant. 2:8, 9.

10-11. Kunnasi nga nalabanan na tadday nga sister i negatibo ira nga panagenona?

¹⁰ Ari tu mabi para ta tanakuan i pattalupaddian nga ari mangireruma. Angngariganna, ikonsidera i nesimmu ta sister nga si Ruth. Turi ta tinedyer yayya, marake i naekspiriensana ta tadday nga babay nga naggafu ta tanakuan nga nasion. Anni i efekto natun nisa? Inamin ni Ruth: “Kalussò i ngamin meyannung tatun nga nasion. Abbo ku nga para-parehu i ngamin nga tolay tatun nga lugar, pati i wawwaragi.” Kunnasi nga nalabanan ni Ruth i negatibo nga panagenona?

¹¹ Ammu ni Ruth nga mawag tu labananna i negatibo nga appana-panonona. Nabbibbig yayya tu ekspiriensa anna report ira ta Yearbook meyannung tatun nga nasion. Kagianna: “Nappursigi ngà nga mannono tu positibo meyannung ta totolay tatun nga nasion. Gafu tatun, nasingakku i kinalappo na wawwaragi ta passerbi kani Jehova. Manawag ngana niakan nga parte gapa ira na interu-mundo nga pawwaragi tam.” Sisinu nga nantindian ni Ruth nga kawaganna nga ipasingan i ayana. Kinagina: “Kada makasimmu ngà tu wawwaragi nga naggafu tatun nga nasion, talaga ikagumakku i makikkofun nira. Makibbida ngà nira tapenu mas makilalà ira tu mapia.” Anni i resultana? Kinagi ni Ruth: “Ta pappasa na tiempo, nawawan i negatibo ira nga panageno ku.”

12. Anni i problema na sister nga si Sarah?

¹² Ari matageno na karuan nga mangireruma ira. Angngariganna, abbo ni Sarah nga ari yayya mangireruma megafu ta arianna husgan i totolay base ta lahida, estadoda ta pattolay, onu pribilehioda ta organisasion. Ngem inaminna: “Nalippawa ku gabbalaman nga talaga mangireruma ngà.” Kunnasi? Naggafu si Sarah ta familia nga edukadu anna mas ikayana i makikavulu ta totolay nga kaparehuna. Mittan, kinagina paga lagu ta kofunna: “Makikavulu ngà ta kapangngurug ku nga edukadu. Lillitakku danuri ari nga edukadu.” Manawag nga kawagan nga ulian ni Sarah i pagimammana. Kunnasi?

13. Anni i magigiammu tam ta panguli ni Sarah ta pagimammana?

¹³ Zinuffunan na manangngal ta sirkito si Sarah nga alippawatan i appana-panonona. Inistoriana: “Kinomendanna i matalo nga passerbì, makasta ira nga komentò, anna pakannammù ta Biblia. Tapus nipalippawana nga durante nga dumakal i pakannammu tam, mawag gapa nga kultibattam i kualidad ira na Cristiano gitta na kinapakalinno, pangammu ta limitasion, anna allo.” Niyaplika ni Sarah i tabarang na manangngal ta sirkito nisa. Kagianna: “Nalippawa ku nga i pinaka-importante ta ngamin ay masippo anna minaggiddu ittam.” I resultana, nanguli i  pagimammana ta wawwaragi. Kinagina: “Pinuruebakku nga alippawatan nu anni ira nga kualidad i mamabbalin nira nga nabalor kani Jehova.” Kumusta ittam gapa? Ariattam ikaya nga nonopan nga mas atannang ittam ta tanakuan megafu ta ginigiammu tam! Nu kuruga ‘ayatattam i wawwagi tam ta angngurug,’ lillitattam i mangireruma.​—1 Ped. 2:17.

14. Segun ta Hebreo 13:16, anni i matageno ni Jehova nu mamadulo ittam ta tanakuan?

¹⁴ Magayayya si Jehova nu mamadulo ittam. (Bibbigan i Hebreo 13:16.) Ikonsiderana nga parte yatun na paddayaw tam, netallugaring nu duffunattam danuri magawag. (Sant. 1:27; 2:14-17) Yatutta, pagaramman ittam na Katurakan nga ‘padulattan i dayu ira.’ (Roma 12:13) Nu mamadulo ittam, mepasingattam nga kuruga ikavurungan, ayatan, anna ikaya tam ira nga mabbalin tu kofun. Magayayya si Jehova nu ibilletam ta tanakuan i makan onu inumattam, onu mangiyawa ittam tu tiempo nira. (1 Ped. 4:8-10) Ngem egga ira makefugag nittam nga mamadulo.

15-16. (a) Ngatta magalangan i karuan nga mamadulo? (b) Kunnasi nalabanan ni Edit i pagalanganna nga mamadulo?

¹⁵ Baka magalangan ittam nga mamadulo megafu ta sirkumstansia tam ira. Ikonsidera i angngarigan na balu nga si Edit. Nigena nabbalin tu Saksi, arianna kuruga makikavulu ta tanakuan. Matageno ni Edit nga mas makawayya i tanakuan nga mamadulo.

¹⁶ Turi ta Saksi ngana si Edit, inulina i appana-panonona. Nagangngua yayya tu dakkua ira tapenu mamadulo. Inistoriana: “Turi ta maddaggun nga mepataddag i bagu nga Kingdom Hall-mi, nikagi na tadday nga elder i meyannung ta magatawa nga umay manuffun ta proyekto, anna niyavuna nu awayyà ira nga paddianan ta balemi tu dua ligguan. Neraddammakku nu kunnasi binendisionan ni Jehova i balu nga taga-Zarepta.” (1 Pat. 17:12-16) Minanugu si Edit nga maddian ta baleda i magatawa. Nabendisionan kari yayya?  Kunna: “Nabbalin tu dua vulan i dua ligguan. Durante tatun nga tiempo, nabbalikkami tu madukko nga makkorofun.” Napeggan gapa si Edit tu madukko nga kokkofun ta kongregasion. Payunir ngana yayya sangawe anna magayayya yayya nga pamiriendan ta baleda danuri makavuluna ta ministerio. Kagianna: “Makasta i panageno ku nu mangiyawa ngà! Anna kakuruganna, aru i bendision nga nalawa ku.”​—Heb. 13:1, 2.

17. Anni i nalippawa ni Luke anna na atawana?

¹⁷ Awayyana nga minammadulo ittam ngana, ngem kunnasi tam paga mapakasta yatun? Angngariganna, minammadulo si Luke anna i atawana. Kakayàda nga imbitan ta baleda i mappaganada, parientes, madukko nga kokkofun, anna i manangngal ta sirkito anna atawana. Ngem kinagi ni Luke, “Nalippawami nga danuri laman i madukko nikami i imbitammi.” Kunnasi nga pinakasta ni Luke anna na atawana i pamaduloda?

18. Kunnasi nga pinakasta ni Luke anna na atawana i pamaduloda?

¹⁸ Inuli ni Luke anna na atawana i pagimammada kabalin nga pinannonopadda yaw nga kinagi ni Jesus: “Nu ayatan nu danuri laman i mangaya nikamu, anni i iddanaman nu nga bala-balo na Dios?” (Mat. 5:45-47) Nalippawada nga kawagan tu parigadda si Jehova nga minangngiyawa ta ngamin. Yayya nga napplano ira nga imbitan danuri wawwaragi nga ariadda paga inimbitan dati. Kinagi ni Luke: “Kuruga magayayya kami ngamin taw nga pakkaravulu. Anna mas madukko kami ta kataggi-tadday anna kani Jehova.”

19. Kunnasi tam mapakurug nga sittam i disipulos ni Jesus, anna anni i determinadu nga kuammu?

¹⁹ Nagigiammu tam nga i kapeggan tu napafutuan nga aya ta kataggi-tadday ay makoffun nittam nga mangirattal tu imammo, ari nga mangireruma, anna mamadulo. Mawag nga labanattam i anni laman nga negatibo nga panageno anna napafutuan nga ayatan i wawwaragi tam. Nu kuattam yatun, mabbalin ittam tu magayayya anna mapakurug tam nga sittam i disipulos ni Jesus.​—Juan 13:17, 35.