1. Anni i ituddu nittam na Eclesiastes 3:1, 7?

KAYÀ na karuan nittam i makabibida. Ari gapa mattattannug i karuan. Ngem kagitta na ipunto naw nga artikulo, egga i tiempo para ta paguvovug anna tiempo para ta ari pattannug. (Bibbigan i Eclesiastes 3:1, 7.) Ngem egga ira tiempo nga iddanamattam nga mas nakuan nga maguvovug i karuan nga wawwaragi tam anna kayà tam gapa nga ari kuruga mabbibida i tanakuan.

2. Sinni i egga kepangngattanna nga mangiyawa tu estandarte ira nu kanni anna kunnasi ittam nakuan nga maguvovug?

² I paguvovug ay regalu nga naggafu kani Jehova. (Ex. 4:10, 11; Nep. 4:11) Ta Uvovugna, duffunanna ittam nu kunnasi usan ta mepangngo yatun nga regalu. Taw nga artikulo, ikonsidera tam i angngarigan ira ta Biblia nga makoffun nittam tapenu mammuan nu kanni ittam nga maguvovug anna nu kanni nga ari mattannug. Gigiammuattam paga nu anni i matageno ni Jehova ta kakkagiattam ta tanakuan. Ollu, ikonsidera tam nu kanni ittam nakuan nga maguvovug.

3. Segun ta Roma 10:14, kanni ittam nakuan nga preparadu nga maguvovug?

³ Kanayun ittam nakuan preparadu nga ipakiyuvovug i meyannung kani Jehova anna ta Pappatulan. (Mat. 24:14; bibbigan i Roma 10:14.) Nu kuattam yatun, paparigattam si Jesus. Tadday ta importante nga rason nu ngatta minay ta davvun si Jesus ay tapenu ikagi ta tanakuan i kinakurug meyannung ta Yamana. (Juan 18:37) Ngem mawag tu daddammattam nga importante gapa nu kunnasi ittam nga maguvovug. Yatutta nu ipakiyuvovug tam ta tanakuan i meyannung kani Jehova, mawag nga kuattam yatun tu “malumamo anna  sigga-pammakakua,” anna ipasingattam nakuan i konsiderasion ta panageno anna kuru-kurugan na tanakuan. (1 Ped. 3:15, 16) Ari laman gafu ittam nga makibbida ta tolay; tudduattam gapa ira anna addetan i futuda.

4. Kagitta na kagian na Proverbio 9:9, kunnasi makoffun ta tanakuan i paguvovug na elder ira?

⁴ Ari nakuan magalangan i elder ira nga tabarangngan i tadday nga wagi nu kawagan. Siempre, mawag tu piliadda i mepangngo nga tiempo nga kagian yatun tapenu ari mepasiranan i wagi. Awayyada nga maginnag tu tiempo sonu awan ngana tu tanakuan nga tolay. Kanayun nga ikaguman na elder ira nga maguvovug nga ari mepasiranan i tabarangngadda. Ngem ariadda iyetu i prinsipio ira ta Biblia nga makoffun ta tanakuan tapenu makapagguyu ira tu masirib. (Bibbigan i Proverbio 9:9.) Ngatta kuruga importante nga maggutu ittam nga maguvovug nu kawagan? Innattam i dua nga makkaduma nga angngarigan. I tadday ay yama nga mawagna nga itunung i ánana, anna i tadday ay i babay nga mawagna nga kibbidan i mabbalin tu patul ta mappange.

5. Kanni nga ari mepangngo i ari pinaguvovug na Atannang nga Pari nga si Eli?

⁵ Egga i dua nga ana na Atannang nga Pari nga si Eli nga kuruga iddeddukanna. Ngem danatun nga ana ay awan tu respetoda kani Jehova. Importante i posisiodda bilang papari nga masserbi ta tabernakulo. Ngem inabusoda i autoridadda, ariadda nirespeto i tavvung ira para kani Jehova, anna mas paga lagu nga pakakuadda i seksual nga imoralidad. (1 Sam. 2:12-17, 22) Segun ta Mosaiko nga Dob, mepangngo ira nga mapatay, ngem nivuya laman ira na kunsintidor nga si Eli anna pinagurayanna lagapa ira nga masserbi ta tabernakulo. (Deut. 21:18-21) Kunnasi minammatan ni Jehova i pinangasikasu ni Eli tatun nga gannug? Kinagina kani Eli: “Ngatta mas ikakuam i ána mu anne niakan?” Yari tu nadisidi ni Jehova nga mapatay i dua nga marake nga ana ni Eli.​—1 Sam. 2:29, 34.

6. Anni i magigiammu tam kani Eli?

⁶ Egga i mala tam nga importante nga leksion kani Eli. Nu nammuattam nga ari sinuttul na tadday nga kofun onu parientes tam i dob na Dios, mawag nga kagiattam yatun nisa anna iperaddam nisa i estandarte ira ni Jehova. Mawag gapa nga masiguradu tam tu malawana i uffun nga kawaganna nga maggafu ta sinunno ira ni Jehova. (Sant. 5:14) Manaki tam nga parigan si Eli nga mas nga ikakua i kofun onu parientes tam anne kani Jehova. Mawag tam i maggutu tapenu kiyuvovugan i tadday nga  mawag nga metunung, ngem makasta i resulta natun. Innan i nadduman na ekspiriensa ni Eli ta tadday nga Israelita nga mangngagan tu Abigail.

7. Ngatta kinibbida ni Abigail si David?

⁷ Si Abigail ay atawa na mariku nga makakkua ta pasto nga si Nabal. Turi ta tattammangngan ni David anna na totolena si Patul Saul, vinuluda i gumappastor ira ni Nabal anna pinrotektadda i aya-ayamna ira ta bandido ira nga makkoko. Nappabalo kari si Nabal ta uffudda? Ari. Turi ta nakkiddaw si David tu baddi nga makan anna danum para ta totolena, napporay si Nabal anna kinukkullekanna ira. (1 Sam. 25:5-8, 10-12, 14) Megafu tatun, determinadu si David nga patayan i kada lalaki ta tangabbalayan ni Nabal. (1 Sam. 25:13, 22) Kunnasi gafu nga nalillitan yatun nga trahedia? Nalippawa ni Abigail nga tiempo ngana tapenu maguvovug yayya, yari tu nigutu-gutuna nga minay ta 400 nga mabisin anna mapatu i uluda nga armadu nga lallaki tapus kinibbidana si David.

8. Anni i magigiammu tam ta ehemplo ni Abigail?

⁸ Turi ta kiniyuvovug ni Abigail si David, magutu, marespeto, anna makakumbinsi yayya. Maski paga ari tu si Abigail i makalliwa, nakkiddaw lagapa yayya tu dispensa kani David. Kinagina i makasta ira nga kualidad ni David anna nattalo yayya nga duffunan yayya ni Jehova. (1 Sam. 25:24, 26, 28, 33, 34) Kagitta ni Abigail, mawag tam i maggutu tapenu ikagi ta tadday nu egga i kukukuanna nga marresulta tu madammo nga liwa. (Sal. 141:5) Mawag tu marespeto ittam ngem magutu gapa nakuan. Nu meddu tam nga tabarangngan i tadday nu kawagan, mapakurug tam nga kurug nga kofun ittam.​—Prov. 27:17.

9-10. Anni nakuan i daddamman na elder ira nu tabarangngadda i tanakuan?

⁹ Mas ngana nga kawagan na elder ira nga  maggutu tapenu kiyuvovugan danuri miembro na kongregasion nga mataga ta pattagaruli. (Gal. 6:1) Sigga-pakalinnoda nga rekunnisian nga imperfekto gapa ira anna duttal i tiempo nga kawagadda gapa i tabarang. Ngem ari tu yatun i mangifugag nira nga tabarangngan danuri magawag tu disiplina. (2 Tim. 4:2; Tito 1:9) Nu mattabarang ira, usadda i regalu nga paguvovug tapenu mapasensia ira nga manuddu tu mapia. Ayatadda i wagida, anna yatun nga aya i mamaguyu nira tapenu duffunan yayya. (Prov. 13:24) Ngem pinaka-importante nira i pangikakua kani Jehova gukaban na panuttul ta estandartena ira anna i papprotekta ta kongregasion kontra ta peligro.​—King. 20:28.

¹⁰ Adde taw nga punto, nagigiammu tam nu kanni nga maguvovug. Ngem, egga ira i tiempo nga mas makasta nu ariattam mattattannug. Ngatta maziga nga kuan yatun?

11. Anni nga ilustrasion i inusa ni Santiago, anna ngatta mepangngo yatun?

¹¹ Nu mittan, mariga kontrolan i paguvovug tam. Nangusa si Santiago tu mepangngo nga ilustrasion tapenu palawanan yatun. Kinagina: “Nu i tolay ay ari vuluvuga nga maliwa ta kagian na, awan tu pakkurangan na anna awayya na nga gaggaddan i interu nga baggi na.” (Sant. 3:2, 3) Mepay i maskara ta ulu anna simu na kabayu. Gukaban na pagguggung ta riyenda natun, mefrenu na kalaseru i kabayu onu megiyana i direksion na kabayu. Nu ari makontrol na kalaseru i riyenda, makkubarde i kabayu anna pappeligrowanna i baggina anna i kalaseru. Kunnatun gapa, nu ariattam kontrolan i paguvovug tam, marresulta yatun ta aru nga problema. Ikonsidera tam i karuan nga situasion nu kanni tam nga mawag nga “guggunan i riyenda” anna maffrenu ta paguvovug.

12. Kanni tam nakuan nga “guggunan i riyenda” anna maffrenu ta paguvovug?

 ¹² Anni i kuammu nu egga i informasion na tadday nga wagi nga ammum nga konfidensial? Angngariganna, nu egga i nakilalam nga maddian ta nasion nga megamma i trabahu tam, matenta ka kari nga mangiyavu nisa tu detalye ira meyannung ta trabahu tam ta nasiodda? Magga makasta gapa i motibom. Iddeddu tam i wawwaragi tam anna mavurung ittam ta mesissimmu nira. Kayà tam gapa nga espesipiko i pakimallo tam nira. Ngem, yaw i tiempo nga kawagattam tu “guggunan i riyenda” anna maffrenu ta paguvovug. Nu pilitattam i tadday nga egga i ammuna nga konfidensial ira nga informasion, kurang i pangaya tam tatun nga tolay tuange ta wawwaragi tam nga mattattalo nisa nga arianna ikakkagi i aktibidadda ira. Siguradu nga awan tu maski sinni nittam i maya nga mangammung ta ziga na wawwaragi tam nga maddian ta nasion ira nu sitaw megamma i trabahu tam. Kunne na gapa, nu massesserbi ittam ta kunnatun nga nasion, manaki tam i mangikagi tu detalye ira na pamministerio onu aktibidad na Saksi ira tatun.

13. Kagitta na mabibbig ta Proverbio 11:13, anni nakuan i kuan na elder ira, anna ngatta?

¹³ Mas ngana nga kawagan na elder ira nga iyaplika i prinsipio ta Proverbio 11:13 gukaban na pangitagu ta konfidensial ira nga gannug. (Bibbigan.) Mariga yaw mas ngana nu natawan i elder. Mapaladda na magatawa i relasiodda gukaban na kanayun nga pakibbida ta kataggi-tadday anna pangibillay tu sekreto, mataga-tageno, anna vuru-vurudda. Ngem ari nakuan nga iyistoria na elder i “konfidensial nga nabbiridan” na miembro ira na kongregasion. Nu kuanna yatun, mawawanna i pattaloda nisa anna madaral i reputasionna. Danuri egga i responsibilidadda ira ta kongregasion ay ari nakuan nga ‘doble i zilada’ onu minangngilogo. (1 Tim. 3:8, NW; ftn.) Kayàna kagian natun nga ariadda nakuan mangilogo onu mangichismis. Nu ayatan na elder i atawana, arianna padammakkan yayya gukaban na pangibillay nisa tu informasion nga arianna kawagan nga ammuan.

14. Kunnasi moffunan na babay i elder nga atawana nga mattalupaddian i makasta nga reputasionna?

¹⁴ Moffunan na babay i atawana nga elder nga mattalupaddian nga makasta i reputasionna gukaban na ari pamilit ta atawana nga elder nga iyistoria nisa i gannug ira nga konfidensial. Nu iyaplika na babay yatun nga tabarang, arianna laman sussuportan i atawana, nu ari, ikakuana paga danuri nangitalo ta atawana tu konfidensial ira nga gannug. Anna pinaka-importante, mapagayayyana si Jehova megafu ta nakoffun yayya ta imammo anna pattaradday na kongregasion.​—Roma 14:19.

15. Anni i natageno ni Jehova ta tallu nga kavulu ni Job, anna ngatta?

¹⁵ Aru i magigiammu tam ta Biblia ta libru nga Job nu kunnasi anna nu kanni nga maguvovug. Kabalin nga naekspiriensa ni Job i natturunug nga kaddaraddam nga trahedia, appa nga lalaki i minay nga namanna-bannay anna nanabarang nisa. Ngem mas apaddu nga tiempo nga ari nga nattattannug danatun nga lallaki. Kabalin natun, base ira ta kinagi na tallu nga lallaki​—da Elifaz, Bildad, anna Zofar—​manawag nga ariadda inusa yatun nga tiempo tapenu pannonopan nu kunnasida duffunan si Job. Lallagu, ninonoda nu kunnasida mapakurug nga egga i mali tu kingngua ni Job. Egga ira i fustu nga kinagida, ngem mas aru ta kinagida meyannung kani Job anna kani Jehova ay mali onu ari tu makasta. Inakusadda si Job nga marake nga tolay. (Job 32:1-3) Anni i reaksion ni Jehova? Napporay yayya  tatun nga tallu nga lalaki. Inagalanna ira nga ulapa anna kinagina nira nga ikiddoda kani Job nga ipakimallona ira.​—Job 42:7-9.

16. Anni ira i magigiammu tam ta marake nga ehemplo da Elifaz, Bildad, anni Zofar?

¹⁶ Aru i mala tam nga leksion ta marake nga ehemplo da Elifaz, Bildad, anni Zofar. Ollu, ariattam nakuan husgan i wawwaragi tam. (Mat. 7:1-5) Lallagu, magginna ittam labbi tu mapia nige tam mabbida. Tatuttam laman nga matindian i situasiodda. (1 Ped. 3:8) Mekadua, nu maguvovug ittam, mawag tu siguraduattam nga masippo anna fustu i kagiattam. (Efe. 4:25) Anna mekatallu, kuruga interesadu si Jehova nu anni i kagiattam ta kataggi-tadday.

17. Anni i magigiammu tam ta ehemplo ni Elihu?

¹⁷ I meka-appa nga lalaki nga nabbisita kani Job ay si Elihu, parientes ni Abraham. Naggigginna yayya durante nga nabbirida si Job anna i tallu nga lalaki. Manawag nga nagginna yayya tu mapia megafu ta nakeyawa yayya tu masippo ngem direkta nga tabarang nga nakoffun kani Job nga itunung i appanonona. (Job 33:1, 6, 17) Pinaka-importante kani Elihu nga medayaw si Jehova, ari tu i baggina onu i sinni nga tolay. (Job 32:21, 22; 37:23, 24) Magigiammu tam ta ehemplo ni Elihu nga egga i tiempo na ari pattannug anna pagginna laman. (Sant. 1:19) Nagigiammu tam paga nga nu manabarang ittam, i pinaka-importante nakuan nittam ay medayaw si Jehova, ari tu i baggi tam.

18. Kunnasi tam mepasingan nga tagibalorattam i regalu nga paguvovug?

¹⁸ Mepasingattam nga tagibalorattam i regalu nga paguvovug nu tuttulattam i tabarang na Biblia meyannung ta nu kanni anna nu kunnasi nga maguvovug. Nainspiran i masirib nga Patul nga si Solomon nga itura: “Kagitta na mansanas nga vulawan ta na-ukit nga pira i uvovug nga nakagi ta mepangngo nga tiempo.” (Prov. 25:11) Nu magginna ittam tu mapia ta kakkagian na tanakuan anna mannono ittam nige maguvovug, megitta i uvovug tam ta mansanas ira nga vulawan​—nabalor anna makasta. Tapus, maski nu baddi onu aru i kagiattam, makapatuyag ta tanakuan i paguvovug tam, anna magayayya si Jehova nittam. (Prov. 23:15; Efe. 4:29) Yaw ngana i kapianan nga makua tam tapenu mepasingattam i appabalo tam taw nga regalu na Dios!