1. Anni ira nga problema i awayyana nga arubangan na aripan ira ni Jehova?

EGGA kari i madammo nga problemam? Baka natakitakka na kakongregasiommu. (Sant. 3:2) Onu baka uyu-uyawaddaka na katrabahum onu kaeskuelam megafu ta massesserbi ka kani Jehova. (1 Ped. 4:3, 4) Awayyana gapa nga fugaddan naka na kafamiliam ira nga makistudy onu mallayyagayya. (Mat. 10:35, 36) Ngem nu madaddammo ngana i problemam, baka nonopammu i magimmang ngana nga masserbi kani Jehova. Ngem maski anni paga i problemam, makkomfiansa ka nga iyawa nikaw ni Jehova i sirib tapenu makangngua tu makasta ira nga desision anna sikan tapenu maattammammu i situasiommu.

2. Segun ta Roma 15:4, anni i efektona nittam nu bibbigattam i Biblia?

² Nipetura ni Jehova ta Uvovugna i detalye ira nu kunnasi nga inarubang na imperfekto nga totolay i mariga ira nga problema. Ngatta? Tapenu makagigiammu ittam tatun ira. Yatun i nipetura ni Jehova kani apostol Pablo ta Roma 15:4. (Bibbigan.) Nu bibbigattam danatun, mabanna-bannayan anna magiddanama ittam. Ngem tapenu mabbenefisio ittam, mawag tu ariattam laman nga bibbigan i Biblia. Mawag tu pamavulunattam nga ulian na Biblia i appana-panono anna i panageno tam. Angngariganna, anni i kuattam nu kawagattam i tabarang ta tadday nga problema tam? Awayya tam nga kuan i tumunug nga appa nga gannug: (1) Makimallo, (2) Magimajin, (3) Mannono tu mapia, anna (4) Iyaplika. Gigiammuattam nu kunnasi tam kuan i kada tadday tatun. * Tapus usattam yaw nga metodo na paggigiammu tapenu ammuan nu anni i matudduattam kani Patul David anna kani apostol Pablo.

3. Nige mu bibbigan i Biblia, anni nakuan i kuammu, anna ngatta?

 ³ (1) Makimallo. Nige mu bibbigan i Biblia, ipakimallo mu labbi kani Jehova nga uffunan naka nga mabbenefisio ta bibbigammu. Angngariganna, nu magala-aleg ka tu tabarang nu anni i kuammu nu egga i problemam, ikiddom kani Jehova nga uffunan naka nga makaleg tu prinsipio ira ta Uvovugna nga mangigiya nikaw.​—Fil. 4:6, 7; Sant. 1:5.

4. Kunnasi nga mabbalin tu kuru-kurug nikaw i tadday nga istoria na Biblia?

⁴ (2) Magimajin. Niddan ittam ni Jehova tu kappabbaw nga abilidad nga imajinan i ganna-gannug. Tapenu mabbalin tu kuru-kurug nikaw i tadday nga istoria na Biblia, imajinammu i mesissimmu anna nonopammu nga sikaw mismu yari bibbibbigammu. Imajinammu i ganna-gannug nga masingi-singanna anna tagenappammu i posible ira nga mataga-tagenona.

5. Anni nakuan i pannonopammu tu mapia, anna kunnasim nga makua yatun?

⁵ (3) Mannono tu mapia. Pannonopammu tu mapia i bibbibbigammu anna nu kunnasi naka nga moffunan natun. Nu kuammu yatun, mapatturuvvug mu i ideya ira anna mas malippawa mu i bibbibbigammu. Nu bibbigammu i Biblia tapus ariammu nga pannonopan yatun, gittana inninnammu laman i nakkewara nga pirasu na tadday nga jigsaw puzzle ta lamesa ngem ariammu mabba nga buuan yatun. Ngem nu mannono ka tu mapia, gittana pinaddirikke mu danatun nga parte na puzzle ta fustu nga puestuna tapenu masingammu i buu nga itchura natun. Yaw ira i awayyam nga iyavu anna tabbagan durante nga mannonono ka tu mapia: ‘Anni i kingngua na karakter ta istoria tapenu masolba i problemana? Kunnasi yayya inuffunan ni Jehova? Kunnasì meyusa i nagigiammù taw tapenu maattammakku i problemà ira?’

6. Ngatta iyaplika tam nakuan i magiggigiammu tam?

⁶ (4) Iyaplika. Kinagi ni Jesus nga nu ariattam nga iyaplika i nagigiammu tam, gitta tam i tadday nga tolay nga namataddag tu balena ta daga. Kurug tu nallallappo yayya ngem kakenga laman i nabbabbannaganna. Ngatta? Megafu ta nu duttal i bagiu anna naddakal i danum, madaral i balena. (Mat. 7:24-27) Kunnatun gapa nu makimallo ittam, magimajin, anna mannono tu mapia ngem ariattam mabba nga iyaplika i nagigiammu tam. Kakenga laman i nabbabbannagattam. Sonu mapurueban i pangurug tam megafu ta problema ira onu kapeppersigi, ari nga maladda yatun. Ngem nu maggigiammu ittam tapus iyaplika tam yatun, makangngua ittam tu mas makasta ira nga desision, mas memammo i nono tam, anna mas nga massikan i pangurug tam. (Isa. 48:17, 18) Usattam ngana yatun nga appa nga gannug tapenu makagigiammu ittam ta nesimmu kani Patul David.

7. Anni nga istoria ta Biblia i ikonsidera tam?

⁷ Natakitakka ngana kari na kofummu onu na kafamiliam? Nu wan, aru i magigiammum kani Patul David turi ta trinaydor yayya na anana nga si Absalom anna pinuruebanna nga talianan yayya bilang patul.​—2 Sam. 15:5-14, 31; 18:6-14.

8. Anni i kuammu tapenu uffunan naka ni Jehova?

⁸ (1) Makimallo. Base ta istoria nga bibbigammu, ikagim kani Jehova nu anni i mataga-tageno mu megafu ta marake nga nikatratum. (Sal. 6:6-9) Ikagim nisa nu anni talaga i mataga-tageno mu. Tapus mappoffukka kani Jehova tapenu makaleg ka tu prinsipio ira nga mangigiya nikaw tapenu mammuammu nu anni i kuammu taw nga mariga nga problemam.

9. Anni i nesimmu kani David anna kani Absalom?

 ⁹ (2) Magimajin. Nonopammu i nesimmu tatun nga istoria anna imajinammu nu kunnasi nga nafektan si Patul David. Piga ragun nga pinlano na ana ni David nga si Absalom nga apan i fabor na totolay. (2 Sam. 15:7) Turi ta nakaleg ngana tu chansa si Absalom, nangidog yayya tu espiya ta interu nga Israel tapenu kumbinsian i totolay nga suportadda yayya bilang patulda. Kinumbinsina paga lagu nga mevulu ta rebelyon i tadday ta pinakamadukko nga kofun anna gumattabarang ni David nga si Ahitopel. Pinabbalin ni Absalom tu patul i baggina anna pinuruebanna nga ipagafu anna ipapatay si David nga awayyana tu grabe ngana i takina tatun nga tiempo. (Sal. 41:1-9) Nakannammuan ni David yatun nga plano yayya nga pinanawanna i Jerusalem. Ta pappasa na tiempo, nakkalaban i suddalu ira ni Absalom anna i suddalu ira ni David. Naffu i suddalu ira ni Absalom anna napatay yayya.

10. Anni nakuan i puede nga nonopan anna kuan ni Patul David?

¹⁰ Imajinammu gapa nu anni i natageno ni David tatun ira nga nesimmu nisa. Iddukanna si Absalom anna pattalakkanna si Ahitopel. Ngem parehuda yayya nga trinaydor. Mataka-taki i kingnguada nisa anna nigatoda nga patayadda yayya. Awayya nakuan nga ari ngana nga pattalakkan ni David i karuan nga kokkofunna anna passuspechanna ira nga nevulu ngana gapa ira kani Absalom. Puede gapa nakuan nga nonopanna laman i baggina anna magitetadday nga manaw ta nasiodda. Awayya nakuan gapa nga nakkafi i nonona. Ngem ari nga kingngua ni David i maski anni tatun. Nalampasanna yatun nga mariga nga problemana. Kunnasina nga nakua yatun?

11. Anni i kingngua ni David ta mariga nga situasionna?

¹¹ (3) Mannono tu mapia. Anni ira nga prinsipio i magigiammum tatun nga istoria? Tabbagammu yaw: “Anni i kingngua ni David tapenu masolba i problemana?” Ari nga nataranta si David. Ari gapa yayya nga gavva-gavva nga naddesision megafu ta ari tu masirib yatun. Arianna gapa nga nitalattan i paddesision megafu laman ta assingna. Nakiyoffun lallagu yayya kani Jehova ta pakimallo. Nappoffun gapa yayya ta kokkofunna. Tapus insigidana nga kingngua i desisionna ira. Maski nu fermi nga natakitan si David, ari yayya nga nabbalin tu minassuspecha anna minallussaw. Ari lagapa nga nawawan i pattalona kani Jehova anna ta kokkofunna.

12. Anni i kingngua ni Jehova tapenu uffunan si David?

¹² Kunnasi nga inuffunan ni Jehova si David? Nu marresearch ka, magigiammum nga niddan ni Jehova si David tu kawaganna nga sikan tapenu maattamman yaw nga problema. (Sal. 3:1-8; footnote na superskripsion) Binendisionan ni Jehova i desision ira ni David. Sinuportanna paga i matalo nga kokkofun ni David turi ta nakillaban ira tapenu maprotektan i patulda.

13. Kunnasim maparigan si David nu mataka-taki i kingngua nikaw na tanakuan nga tolay? (Mateo 18:15-17)

¹³ (4) Iyaplika. Iyavu mu ta baggim: ‘Kunnasì maparigan si David?’ Mawag tu insigida ka nga magguyu tapenu masolba i problema. Depende ta situasiommu, awayyam nga direkta nga kuan i tabarang ni Jesus ta Mateo kapitulo 18 onu iyaplikam i prinsipio natun. (Bibbigan i Mateo 18:15-17.) Ngem ari ka nakuan nga gavva-gavva nga maddesision megafu laman ta makaporay onu dismayadu ka. Makimallo ka kani Jehova nga uffunan naka nga mabbalin tu kalmadu anna masirib tapenu ammum i kuammu. Ari nakuan mawawan i pattalo mu ta wawwaragi. Alawatammu i panguffudda nikaw. (Prov. 17:17) Pinaka-importante ta ngamin, tuttulammu i tabarang ni Jehova ta Biblia.​—Prov. 3:5, 6.

14. Anni ira nga situasion nga awayyana nga makoffun nikaw i 2 Timoteo 1:12-16; 4:6-11, 17-22?

¹⁴ Kokkontran naka kari na kafamiliam? Maddiakka kari ta nasion nu sitaw aru i restriksion onu megamma i ngamin nga trabahu na Saksi ni Jehova? Nu wan, makoffun nikaw i pabbibbig ta 2 Timoteo 1:12-16 anna 4:6-11, 17-22. * Nitura ni Pablo yaw nga parte na Katurakan durante nga agga-fuku yayya.

15. Anni i ipakimallo mu kani Jehova?

¹⁵ (1) Makimallo. Nige mu bibbigan danatun nga teksto, ikagim kani Jehova i problemam anna i mataga-tageno mu. Ikagim nu anni talaga i mataga-tageno mu. Tapus mappoffukka kani Jehova tapenu makaleg ka tu prinsipio ira ta nesimmu kani Pablo nga makoffun nikaw tapenu ammum i kuammu.

16. Iyistoriam bi i nesimmu kani Pablo.

¹⁶ (2) Magimajin. Imajinammu nga sikaw si Pablo. Nakakawag yayya durante nga agga-fuku ta Roma. Nefuku ngana yayya dati ngem sangawe, ammuna nga patayadda yayya. Pinagurayan yayya na karuan ta kokkofunna anna nababbannag ngana yayya.​—2 Tim. 1:15.

17. Anni nakuan i puede nga ninono anna kingngua ni Pablo?

¹⁷ Puede nakuan nga ninonono ni Pablo i nappasa anna nu tanakuan nakuan i desisionna, ari nakuan yayya nga naaresto. Awayyana nakuan nga nallussaw yayya ta kokkofunna nga taga-distrito na Asia nga nallikug ta nisa. Puede nakuan gapa nga ari ngana yayya mattalo ta tanakuan nga kokkofunna. Ngem ari nga kingngua ni Pablo i maski anni tatun. Ngatta siguradu yayya nga matalo lagapa ta nisa i kokkofunna anna bendisionan yayya ni Jehova?

18. Anni i kingngua ni Pablo ta mariga nga situasionna?

¹⁸ (3) Mannono tu mapia. Tabbagammu yaw: “Kunnasi nasolba ni Pablo i problemana?” Maski ammu ni Pablo nga aranni ngana yayya nga matay, arianna nakattaman i pinaka-importante—i pangidayaw kani Jehova. Kanayunna nga nonopan nu kunnasina mapagaram i tanakuan. Nattalo yayya kani Jehova gukaban na kanayun nga pappakimallo. (2 Tim. 1:3) Ari nga agga-nono ni Pablo i wawwaragi nga nallikug nisa. Kinagina lallagu nga dakal i pappabalona turi ira ta meddu nga kokkofunna nga nassuporta anna nanguffun nisa. Nitulu-tuloy gapa nga gigiammuan ni Pablo i Uvovug na Dios. (2 Tim. 3:16, 17; 4:13) Buu i pattalona nga ayatan yayya ni Jehova anna ni Jesus. Ariadda yayya vuluvuga pinagurayan anna bendisionadda yayya ta matalo nga pinasserbina.

19. Kunnasi nga inuffunan ni Jehova si Pablo?

¹⁹ Dati nga kinagi ni Jehova kani Pablo nga mapersigi yayya megafu ta pabbalinna tu Cristiano. (King. 21:11-13) Kunnasi nga inuffunan ni Jehova si Pablo? Sinabbagna i pakimallo ira ni Pablo tapus pinasikanna yayya. (2 Tim. 4:17) Nipasiguradu ni Jehova kani Pablo nga malawana noka i bala-balona nga nabbabbannaganna. Pinaguyu gapa ni Jehova i matalo nga kokkofun ni Pablo tapenu iddan yayya tu praktikal nga uffun.

20. Kunnasi tam maparigan i pangurug ni Pablo nga mabibbig ta Roma 8:38, 39?

²⁰ (4) Iyaplika. Iyavu mu ta baggim: ‘Kunnasì maparigan si Pablo?’ Mawag nga ekspektattam nga mapersigi ittam megafu ta pangurug tam. (Mar. 10:29, 30) Tapenu makapattalupaddian ittam nga matalo kani Jehova nu egga i problema tam ira, mawag nga kanayun ittam nga makimallo nisa anna mawag nga regular nga gigiammuattam i Biblia. Ariattam nakuan gapa kattaman i pinaka-importante nga gannug—i pangidayaw kani Jehova. Makapattalo ittam kani Jehova nga arianna ittam vuluvuga pagurayan anna awan  tu maski anni onu maski sinni i mamagimmang nisa ta pangayana nittam.​—Bibbigan i Roma 8:38, 39; Heb. 13:5, 6.

21. Anni i nakoffun kani Aya anna kani Hector tapenu malampasan i problemada ira?

²¹ Maski nu anni i paddia-paddiattam, mapasikan ittam ta ehemplo ira ta Biblia. Angngariganna, kagian na payunir ta Japan nga si Aya nga nakoffun nisa i istoria ni Jonas tapenu malabanan i assing ta pallayyagayya ta publiko. Ari nga massesserbi kani Jehova i magana na kabataan nga taga-Indonesia nga si Hector. Nakoffun nisa i ehemplo ni Ruth tapenu gigiammuan i meyannung kani Jehova anna passerbian yayya.

22. Kunnasi ka mabbenefisio ta drama ira ta Biblia onu ta serye nga “Parigan i Pangurugda”?

²² Sitaw ka makaleg tu mas aru nga informasion meyannung ta ehemplo ira ta Biblia nga mamasikan nikaw? Makoffun i video tam ira, dramatiko nga pabbibbig tu Biblia, anna i serye nga “Parigan i Pangurugda” tapenu mabbalin nikaw tu kuru-kurug i istoria ira ta Biblia. * Nige mu nga girawan, ginnan, onu bibbigan danatun nga istoria nga naresearch tu mapia, mappoffukka kani Jehova tapenu malegammu i importante ira nga leksion nga meyaplikam. Imajinammu nga sikaw i egga ta situasion natun nga karakter ta Biblia. Nonopammu tu mapia nu anni i kingnguada tapenu maattamman i problemada anna nu kunnasi ira inuffunan ni Jehova. Tapus iyaplikam ta situasiommu i nagigiammum ira. Mappabalo ka kani Jehova ta uffun nga iyayawana nikaw. Ipasingammu gapa nga maappresiam yatun nga uffun gukaban na pagaleg tu chansa tapenu pagaramman anna suportan i tanakuan.

23. Segun ta Isaias 41:10, 13, anni i nipromesa ni Jehova nittam?

²³ Kiterriga i mattolay tawe ta mundo nga kontroladu ni Satanas anna nu mittan, ariattam ammu nu anni i kuattam. (2 Tim. 3:1) Ngem ari ittam mavurung onu maganassing. Ammu ni Jehova i problema tam ira. Nu kawagattam i uffun, nipromesana nga arianna vuluvuga ibbattan i panammina nittam gukaban na masikan nga ziwanan nga limana. (Bibbigan i Isaias 41:10, 13.) Siguradu ittam nga uffunan ittam ni Jehova anna mapasikan ittam na Biblia tapenu maattamman i maski anni nga problema.